KÍXNUU 10
Xú káʼnii gándoo gúʼyáá náa biʼyaa religión eʼsngáa dí gajkhun rá.
1. Lá rígá mbóó religión dí gajkhun ráʼ.
Guñahuamijnala naʼ inu gaʼyo tsi minduhuin.” (MATEO 7:15)
Jesús niʼsngúún xa̱bi̱i̱ mbóó religión, religión rí naʼsngáa dí gajkhun. Nindxu̱u̱ asndu xóo mbóo kamba̱a̱ rí na̱jkha̱ kaguáanʼ makuwáanʼ kámuu mbiʼi. Jesús niʼthí: “Rambaʼin tsi nuxkama” kamba̱a̱ rúʼkue (Mateo 7:14). Dios naniguʼ mbuyamajkuíí xóo eʼthí náa Biblia. Xúgínʼ bi̱ nduyamajkuíí rí phú gajkhun Dios, kuwa mbá kambáxu̱u̱n náa mbóó religión. Atraxnuu Juan 4:23, 24; 14:6, ga̱jma̱a̱ Efesios 4:4, 5.
2. Ndiéjunʼ niʼthí Jesús ga̱jma̱a̱ numún cristianos bi̱ nusngáa rí nduwaʼ rá.
“Ikhiin nuthi rí nuninuhuinʼ Dios, ga ri nuni nakujma ri [ragájkhun] nuninuhuinʼ.” (TITO 1:16)
Jesús niʼthí rí cristianos bi̱ tsesngáa rí gajkhun muninduwiinʼ bi̱ phú ni̱ndxu̱ún cristianos. Rí matañu̱u̱n nakujmaa asndu xóo kuwa ruyamajkuíí májánʼ Dios. Ikhiin nusngáa náa guʼwá ndxajkun ndrígu̱ún rí nuni xóo má niʼni Jesucristo. Mú ikháánʼ ma̱ndoo ma̱ta̱ya̱a̱ tsíin phú ñajúnʼ xa̱bu̱ buʼko̱. Xú káʼnii rá. I̱ndó náa religión rí gajkhun kuwa cristianos bi̱ phú nusngajma rí májánʼ eni. Atraxnuu Mateo 7:13-23.
3. Xú káʼnii gándoo gúniʼnúʼ tsíin ñajúnʼ bi̱ nuni xóo má eyoo Dios rá.
Mbuʼyáá witsu enii rí xú káʼnii gándoo guniʼnúʼ cristianos bi̱ gajkhun:
-
Bi̱ phú xa̱bi̱i̱ Dios gajkhun nduyamajkuíí Biblia xóo Ajngá rawunʼ Dios. Ikhiin nunimijna makuwíin xóo eʼthí xtángoo rí na̱ʼkha̱ náa Biblia. Ikha jngó religión bi̱ nuni xóo má e̱nda̱ʼa̱ Dios nindxu̱u̱ mixtiʼkhu ki xóo i̱ʼwáʼ religión bi̱ nuni xóo má ethi xa̱bu̱ (Mateo 15:7-9). Xa̱bu̱ bi̱ phú nduyamajkuíí gajkhun Dios nakuwa xóo má esngáa. Atraxnuu Juan 17:17 ga̱jma̱a̱ 2 Timoteo 3:16, 17.
-
Bi̱ phú gajkhun nagún ki̱dxu̱ʼ Jesús nuni mba̱a̱ mbiʼyuu Dios, Jeobá. Jesús niʼni mba̱a̱ mbiʼyuu Dios índo̱ niʼsngúún iʼwíínʼ xa̱bu̱. Ikhaa nimbáñun mbaʼin xa̱bu̱ muniʼniiʼ Dios ga̱jma̱a̱ niʼsngúún rí xú káʼnii mutajkáan mu mbiʼyuu Dios maguma kaʼwi̱i̱ (Mateo 6:9). Náa xtaa ikháánʼ, xkáʼnii religión rí naʼsngáa rí xú káʼnii mbiʼyuu Dios rá. Atraxnuu Juan 17:26 ga̱jma̱a̱ Romanos 10:13, 14.
-
Bi̱ phú ñajúnʼ cristianos nutaraʼa ga̱jma̱a̱ numuu Reino ndrígóo Dios. Dios nikuʼmaa Jesús mu maʼtáraʼa ajngáa rí májánʼ ga̱jma̱a̱ numuu Reino ndrígóo Dios. Reino rígi̱ maʼngo̱o̱ maʼni gámbáa xkujndu rí xtáa raʼni gíníín xa̱bu̱. Jesús nixtáa raʼthí rígi̱ asndu índo̱ nikháñu (Lucas 4:43; 8:1; 23:42, 43). Ikhaa niʼthí rí mangiin xa̱bi̱i̱ gútaraʼa ga̱jma̱a̱ numuu Reino. Á mu mbáa xa̱bu̱ na̱jkha̱ gáʼtháanʼ ga̱jma̱a̱ numuu Reino, ndiéjunʼ religión ñajunʼ xa̱bu̱ buʼko̱ rá. Atraxnuu Mateo 24:14.
-
Xa̱bi̱i̱ ndrígóo Jesús na̱nguá ñajúnʼ náa numbaaʼ xkawiʼ rígi̱. Ikháánʼ mandoo matatsiʼnuu numuu rí na̱nguá endawamijna̱ náa política ga̱jma̱a̱ na̱nguá enigu̱nʼ maguaʼdá xkujndu gajmiún iʼwíínʼ (Juan 17:16; 18:36). Ga̱jma̱a̱ na̱nguá eyaridáá xúgíʼ rí xkawiʼ rí eni xa̱bu̱ numbaaʼ. Atraxnuu Santiago 4:4.
-
Bi̱ gajkhun ñajúnʼ cristianos nusngajma rí phú gajkhun nandún kuyamijná. Ikhiin najmañún náa Ajngá rawunʼ Dios rí gíʼmaa mbuyamajkún xa̱bu̱ bi̱ kuwa náa i̱ʼwáʼ xuajin. Maski ajndu religión dí ragájkhun nuti rí májánʼ magun náa guerra, mú bi̱ phú gajkhun ni̱ndxu̱ún cristianos tseni rúʼko̱ (Miqueas 4:1-3). Rí nuni cristianos bi̱ gajkhun, nuríyaʼ mbiʼi mu mumbañún iʼwíínʼ xa̱bu̱ ma̱ngaa muxnún tsiakii. Atraxnuu Juan 13:34, 35 ga̱jma̱a̱ 1 Juan 4:20.
4. Lá ma̱ndoo ma̱ta̱ya̱a̱ ikháánʼ xkáʼnii religión ñajunʼ dí gajkhun ráʼ.
Xú káʼnii religión bi̱ nuti xóo má eʼthí náa Biblia ga̱jma̱a̱ nuni mba̱a̱ mbiʼyuu Dios ma̱ngaa nuthi rí i̱ndó Reino ndrígóo Dios ma̱ʼkha̱ kayóo rí májánʼ náa xa̱bu̱ numbaaʼ rá. Náa biʼyaa religión rí nandún kuyamijná mbá xúgínʼ ga̱jma̱a̱ rí na̱nguá embañún eʼwíínʼ mu muni guerra rá. Ndiéjunʼ tatsaʼwáá edxa̱ʼ ikháánʼ rá. Atraxnuu 1 Juan 3:10-12.
