KÍXNUU 13
Ndiéjunʼ eʼsngáa Biblia rí mugíʼnin religión rá.
1. Lá májánʼ xúgíʼ religión ráʼ.
Kuwa xa̱bu̱ bi̱ májánʼ a̱jkiún náa xúgíʼ religión. Ajngáa májánʼ ñajunʼ índo̱ nduʼyáá rí Dios ndaʼñún xa̱bu̱ buʼko̱ ga̱jma̱a̱ naxmiéjunʼ kaʼñúún. Mú religión naʼni wéñuʼ dí ra̱májánʼ ga̱jma̱a̱ rígi̱ naʼni rí mumíniʼ xa̱bu̱ (2 Corintios 4:3, 4; 11:13-15). Xóo má egájnuu náa noticia dí rígá tikhuu religión bi̱ nuni dí ra̱májánʼ mu mamiñún eʼwíínʼ xa̱bu̱, genocidios nandoo gáʼthi rí muradíin mbaʼin xa̱bu̱ bi̱ nundxaʼwamijna mixtiʼkhu o bi̱ ñajúnʼ i̱mba̱ raza, mbaʼa guerra ga̱jma̱a̱ xa̱bu̱ bi̱ narugua̱ xmindu̱u̱n e̱ji̱n ma̱ngaa nuni gíníín. Ríge̱ naʼne rí makuwá gíná xa̱bu̱ bi̱ nunimbu̱ún kuyáá Dios. Atraxnuu Mateo 24:3-5, 11, 12.
Religión rí gajkhun xtáa raʼni mba̱a̱ mbiʼyuu Dios, mú religión dí ragájkhun na̱nguá eni̱ rí naniguʼ Dios. Religión rígi̱ na̱nguá eʼsngáa xóo má eʼkha̱ raʼthí náa Biblia, ga̱jma̱a̱ naʼsngáa dí ragájkhun ga̱jma̱a̱ numuu Dios ma̱ngaa naʼsngáa nduwaʼ ga̱jma̱a̱ numún xa̱bu̱ bi̱ nikháñun. Mú Jeobá nandoo rí xa̱bu̱ majmañún rí gajkhun ga̱jma̱a̱ numuu ikhaa. Atraxnuu Ezequiel 18:4 ga̱jma̱a̱ 1 Timoteo 2:3-5.
2. Ndiéjunʼ eʼsngáa Biblia rí mugíʼnin religión rá.
Mbaʼa religión nuti dí nandún kuyáá Dios, mu Dios ndaʼyoo dí ragájkhun, numuu rí ikhiin nandún kuyáá itháan dí rígá náa numbaaʼ ndrígóo Satanás (Santiago 4:4). Náa Biblia naʼthí rí xúgíʼ religión dí ragájkhun nagumbiʼyuu “Babilonia ri ñajunʼ xuajin apa”. Numuu rí náa xuajin rúʼko̱ nigi̱ʼdu̱u̱ nirígá religión dí ragájkhun nda̱wa̱á rí nixnúu Ruʼwambiiʼ nákha nixtáa Noé. Nacha̱ má Dios maʼni gámbíin xa̱bu̱ bi̱ kuwa náa religión bi̱ nuninduwaʼ ga̱jma̱a̱ nuni gíníín xúgínʼ xa̱bu̱. Atraxnuu Rí huasjŋgajma Juan 17:1, 2, 5, 16, 17 ga̱jma̱a̱ 18:8.
Rígá xóó itháan ajngáa rí májánʼ. Jeobá na̱nguá mbumuu kaʼñúún xa̱bu̱ bi̱ májánʼ a̱jkiún bi̱ kuwa náa i̱ʼwáʼ religión dí ragájkhun dí rígá náa numbaaʼ. Ikhaa xtáa raʼsngúún dí gajkhun xa̱bu̱ buʼko̱ mu makuwa mbá kambáxu̱u̱n. Atraxnuu Miqueas 4:2, 5.
3. Ndiéjunʼ gíʼmaa maʼni xa̱bu̱ bi̱ májánʼ a̱jkiu̱u̱n rá.
Religión bi̱ phú naʼsngáa rí gajkhun xtáa ragímbíin mbaʼin xa̱bu̱
Jeobá naxmiéjunʼ kaʼñúún xa̱bu̱ bi̱ nanigunʼ muni rí Dios na̱ndoo ga̱jma̱a̱ nandún muni dí májánʼ. Dios naʼthúún xa̱bu̱ rí magajníin náa religión dí ragájkhun. Xa̱bu̱ bi̱ nandún kuyáá Dios xáʼñún mingíjyúu muriʼkhumijná numuu rí nandún muni xóo má enigu̱ʼ ikhaa. Atraxnuu Rí huasjŋgajma Juan 18:4.
Nákha timbá siglo, índo̱ xa̱bu̱ nidxawíín ajngáa májánʼ rí kuwa ruti apóstoles niriʼña ga̱jma̱a̱ májánʼ. Jeobá naʼsngúún xa̱bu̱ náa numuu rí kuwa náa numbaaʼ rígi̱ ga̱jma̱a̱ rí xú káʼnii gakuwa nda̱wa̱á. Rígi̱ naʼni rí ikhiin makuwá itháan gagi. Ikhiin ñajúnʼ mbá xkri̱da májánʼ náa ikháanʼ rí mbiʼi xúgi̱ numuu rí niriʼña ajngáa májánʼ, índo̱ ikhiin ndiyáá rí itháan gíʼdoo numuu muni rí eʼthí Jeobá. Atraxnuu 1 Tesalonicenses 1:8, 9 ga̱jma̱a̱ 2:13.
Jeobá nagruiguíi̱n náa awúun xuajñu xa̱bu̱ bi̱ nuniñanʼ religión bi̱ tséʼsngáa dí gajkhun. Á mu ikháánʼ natane xóo má eʼthánʼ Jeobá ikhú gándoo mambaxáʼ májánʼ gajma̱ʼ ikhaa ga̱jma̱a̱ xúʼko̱ má gándoo mambaxáʼ gajmiáanʼ xa̱bu̱ bi̱ kuwa náa awúun xuajñu Jeobá bi̱ nduyamajkuíí rí phú gajkhun ikhaa, ma̱ngaa rí maraxtaa kámuu mbiʼi. Atraxnuu Marcos 10:29, 30 ga̱jma̱a̱ 2 Corintios 6:17, 18.
4. Xú káʼnii gáʼkha kayóo Dios rí gagi náa xúgíʼ tsu̱du̱u̱ Ku̱ba̱ʼ rá.
Rí wíji̱ magíʼnuu religión bi̱ tséʼsngáa rí gajkhun ñajunʼ mbá ajngáa májánʼ. Rígi̱ ma̱ʼkha̱ kayóo rí tsímáá náa xúgíʼ tsu̱du̱u̱ numbaaʼ náa rígá tsingíná. Ikhú ní xarigá nditháan religión rí naʼni nduwiinʼ o narkuájinʼ xa̱bu̱ bi̱ kuwa náa numbaaʼ. Xúgínʼ bi̱ gakáwíin makuwa mbá kambáxu̱u̱n mu mbuyamajkuíí mbáwíi Jeobá bi̱ gajkuwin. Atraxnuu Rí huasjŋgajma Juan 18:20, 21 ga̱jma̱a̱ 21:3, 4.
