KÍXNUU 8
Ndíjkha rí Dios naniñuʼ marigá dí ra̱májánʼ ga̱jma̱a̱ rí tsingíná rá.
1. Xú káʼnii nigi̱ʼdu̱u̱ nirígá dí ra̱májánʼ rá.
Dios naniñuʼ rí xa̱bu̱ mutañajunʼ mba̱yu̱ʼ mbiʼi mu xúʼko̱ ikhaa masngájma rí ikhiin xáʼngu̱u̱n gúnimbaníí xkujndu ndrígu̱ún xa̱bu̱ numbaaʼ
Dí ra̱májánʼ nigi̱ʼdu̱u̱ náa Ku̱ba̱ʼ índo̱ Satanás niʼthí timbá nduwaʼ. Nákha ginii Satanás ninindxu̱u̱ mbáa ángel bi̱ tágiʼdoo aʼkhá, mú “taxta naʼ riga ri gako” (Juan 8:44). Nigíʼdu̱u̱ niniguʼ rí mbuyamajkuíí ikhaa rí i̱ndó Dios kaʼyoo. Satanás niʼninduwaʼ timbáa a̱ʼgu̱, Eva, ga̱jma̱a̱ niʼni rí mandxa̱ʼóo edxu̱u̱ rí mbuyamajkuíí i̱ndó ikhaa ki xóo Dios. Adán niʼni xóo má niʼni Eva, xúʼko̱ niʼni rí nájmi̱i̱n na̱nguá ninimbu̱ún kuyáá Dios. Rí niʼni Adán ni̱jkha̱ kaguáanʼ makuwáanʼ tsingíná ga̱jma̱a̱ rí nakhañulúʼ. Atraxnuu Génesis 3:1-6, 19.
Índo̱ Satanás niʼthúu̱n Eva rí xáʼnimbo̱o̱ rí niʼthúu̱n Dios ikhú nigíʼdu̱u̱ niʼtanuma rí Dios rakáʼyoo maʼtáñajunʼ. Mbaʼin xa̱bu̱ niwi̱i̱n gajmiún Satanás rí xúnimbu̱ún kuyáá Dios xóo mbáa bi̱ naʼtañajunʼ. Ikha jngó Satanás ni̱jkha̱nú ninindxu̱u̱ bi̱ “naʼtañajunʼ naʼ numbaa rigueʼ”. Atraxnuu Juan 14:30 ga̱jma̱a̱ 1 Juan 5:19.
2. Lá ra̱májánʼ nindxu̱u̱ rí niʼni Dios ráʼ.
Xúgíʼ rí niʼni Dios nindxu̱u̱ phú májánʼ wéñuʼ. Xa̱bu̱ ga̱jma̱a̱ ángeles bi̱ niʼnii Dios ma̱ndoo munimbu̱ún májánʼ wéñuʼ (Deuteronomio 32:4, 5). Dios niʼniáanʼ, mú ikháanʼ guraʼwíí rí muʼni, xóo má dí májánʼ o dí ra̱májánʼ. Rúʼko̱ naniñulú musngajmá rí nandulúʼ kuʼyáá Dios. Atraxnuu Santiago 1:13-15 ga̱jma̱a̱ 1 Juan 5:3.
3. Náa numuu rí Dios naniñuʼ marigá tsingíná asndu mbiʼi xúgi̱ rá.
Asndu nákha Adán ga̱jma̱a̱ Eva túnimbu̱ún, Jeobá niniñuʼ rí xa̱bu̱ xúnimbu̱ún rí ikhaa kaʼyoo maʼtáñajunʼ. Náa numuu rá. Mu masngájma rí nimbáa Xa̱bu̱ Ñajunʼ xáʼngo̱o̱ mambañuun xa̱bu̱ numbaaʼ, á mu Jeobá na̱nguá mbañun (Eclesiastés 7:29; 8:9). Asndu nákha itháan rí 6,000 tsiguʼ nakujmaa májánʼ rígi̱. Xa̱bu̱ Ñajunʼ na̱nguá eʼngu̱u̱n gúni gámbáa mbaʼa guerra, dí nuradimíjná xa̱bu̱, dí ra̱májánʼ ga̱jma̱a̱ nandii. Atraxnuu Jeremías 10:23 ga̱jma̱a̱ Romanos 9:17.
Xa̱bu̱ Ñajunʼ ndrígóo Dios nambáñun bi̱ nunimbuún kuyáá, raʼkháa xóo Xa̱bu̱ Ñajunʼ bi̱ kúwi̱i̱n xúgi̱ (Isaías 48:17, 18). Nacha̱ má Jeobá maʼni gámbíin xúgínʼ Xa̱bu̱ Ñajunʼ. I̱ndó xa̱bu̱ bi̱ nandún maʼtáñajúnʼ Dios makuwa náa tsu̱du̱u̱ Ku̱ba̱ʼ (Isaías 11:9). Atraxnuu Daniel 2:44.
4. Ndiéjunʼ gándoo gúʼni numuu rí Dios naʼngo̱o̱ a̱jkiu̱u̱n rá.
Satanás naʼthí rí nimbáa xa̱bu̱ na̱nguá eʼni ñajunʼ Dios ga̱jma̱a̱ xúgíʼ a̱jkiu̱u̱n. Lá nanigua̱ʼ matasnga̱jmá dí ragájkhun ráʼ. Ma̱ndoo matani. Rí naʼngo̱o̱ a̱jkiu̱u̱n Dios naniñuʼ rí ikháanʼ musngajmá á mu nandulúʼ maʼtáñajunlu Dios o á mu nandulúʼ maʼtáñajunlu xa̱bu̱ numbaaʼ. Rí xú káʼnii kuwáanʼ nasngájma tsáa eyuluʼ maʼtáñajunlu. Atraxnuu Job 1:8-12 ga̱jma̱a̱ Proverbios 27:11.
5. Xú káʼnii gándoo gúraʼwíí rí maʼtáñajunlu Dios rá.
Rí gúraʼwíí muʼni masngájma á mu nandulúʼ rí Dios maʼtáñajunlu
Ma̱ndoo muraʼwíí rí Dios maʼtáñajunlu á mu najmañulúʼ ga̱jma̱a̱ numuu ikhaa ma̱ngaa á mu nuʼni xóo má e̱nda̱ʼa̱ religión dí gajkhun, xóo má eʼkha̱ raʼthí náa Ajngá rawunʼ Dios, rí ñajunʼ Biblia (Juan 4:23). Ma̱ndoo muʼnigaʼduun Satanás xóo Xa̱bu̱ Ñajunʼ, á mu tsindawamijna̱ náa política, ga̱jma̱a̱ náa guerra xó má niʼni Jesús. Atraxnuu Juan 17:14.
Satanás najmuu tsiakii ndrígóo mu maʼni rí makujmaa dí ra̱ʼkhá tháán májánʼ xúgíʼ rí xkawiʼ wéñuʼ ga̱jma̱a̱ rí naʼni gachíin xa̱bu̱. Índo̱ ikháanʼ nuʼnigaʼduun rúʼko̱, tikhuun bi̱ nambáxulúʼ gajmiulú o asndu a̱ngiu̱lú munduʼwajmáanʼlu o makiʼníin kuyulúʼ (1 Pedro 4:3, 4). Ikha jngó gíʼmaa rí mundxaʼwá edxuluʼ ndiéjunʼ guʼni. Lá mambaxulúʼ gajmiulú xa̱bu̱ bi̱ nandún kuyáá Dios rá. Lá muʼnimbulúʼ xtángoo ndrígóo Dios bi̱ ndaʼyoo wéñuʼ ga̱jma̱a̱ bi̱ nandoo kaʼyulúʼ wéñuʼ rá. Á mu nuʼni xúʼko̱, musngajmá rí Satanás niʼni nduwaʼ índo̱ niʼthí rí nimbáa xa̱bu̱ xáʼni xóo má niʼthí Dios á mu naʼñuu mingíjyúu wéñuʼ. Atraxnuu 1 Corintios 6:9, 10 ga̱jma̱a̱ 15:33.
Rí Dios nandoo kaʼñúún xa̱bu̱ numbaaʼ, nasngájma rí gajkhun maʼganú mambáa xúgíʼ dí ra̱májánʼ ga̱jma̱a̱ tsingíná. Bi̱ nusngajma rí guáʼdáá fe náa ajngáa rígi̱ makuwa gagi kámuu mbiʼi náa tsu̱du̱u̱ Ku̱ba̱ʼ. Atraxnuu Juan 3:16.
