KÍXNUU 2
Tsáa ñajunʼ Dios rá.
1. Náa numuu rí gíʼmaa mbuʼyamajkuíí Dios rá.
Dios bi̱ gajkhun bi̱ Niʼni xúgíʼ dí rígá. Dios xtáa má xúʼko̱ asndu nákha ginii ga̱jma̱a̱ ikhaa maxtáa má xúʼko̱ kámuu mbiʼi (Salmo 90:2). Náa ikhaa phú eʼkha̱ xúgíʼ ajngáa dí májánʼ rí naʼthí náa Biblia (1 Timoteo 1:11). Numuu rí Dios niʼni makuwáanʼ, gíʼmaa rí mbuʼyamajkuíí i̱ndó ikhaa. Atraxnuu Rí huasjŋgajma Juan 4:11.
2. Xú káʼnii ñajunʼ Dios rá.
Nimbáa xa̱bu̱ na̱nguá ndiʼyoo Dios numuu rí ikhaa gíʼdoo itháan tsiakii ki xóo xa̱bu̱ ga̱jma̱a̱ xujkhúʼ bi̱ kuwa náa tsu̱du̱u̱ Ku̱ba̱ʼ, ikhaa nindxu̱u̱ mbáa espíritu (Juan 1:18; 4:24). Mú ikháanʼ ma̱ndoo mbuʼyáá xú káʼnii xa̱bu̱ nindxu̱u̱ Dios ga̱jma̱a̱ xúgíʼ rí niʼni. Mbá xkri̱da, ikhaa nasngájma rí nandoo kaʼyulúʼ ga̱jma̱a̱ rí najmañuu wéñuʼ índo̱ niʼni mbaʼa enii xndú taun ga̱jma̱a̱ ri̱ʼi̱. Rí xú káʼnii mba̱a̱ mekhu, ku̱ba̱ʼ ga̱jma̱a̱ aʼgua̱an nasngájma rí ikhaa gíʼdoo wéñuʼ tsiakii. Atraxnuu Romanos 1:20.
Ma̱ndoo majmañulúʼ itháan rí xú káʼnii nindxu̱u̱ Dios á mu nuraxnuu Biblia. Mbá xkri̱da, ikhí naʼthúlúʼ ndiéjunʼ rí enigu̱ʼ Dios ga̱jma̱a̱ ndiéjunʼ rí tsíniguʼ ga̱jma̱a̱ xú eʼni gajmíi̱n xa̱bu̱, ma̱ngaa índo̱ mámbáa rí ikháanʼ nakiéʼkúun. Atraxnuu Salmo 103:7-10.
3. Xú káʼnii mbiʼyuu Dios rá.
Jesús niʼthí: “Anaʼxo tsan xta mikui, kaʼu gaʼne mbiʼyaʼ” (Mateo 6:9). Maski ajndu rígá mbaʼa eni rí xú káʼnii ethán Dios, ikhaa gíʼdoo mbóó mbiʼyuu. Mámbá ajngáa najuiʼthá mixtiʼkhu. Náa ajngáa Me̱ʼpha̱a̱ nutháán “Jeobá”. Mú tikhuun xa̱bu̱ nutháán “Yavé”. Atraxnuu Salmo 83:18 (82:19 náa i̱ʼwáʼ Biblia).
Mbiʼyuu Dios nijmangudi̱i̱ náa mbaʼa Biblia ga̱jma̱a̱ nigurámáʼ xóo Señor o Dios. Mú índo̱ nigumaraʼmáʼ Biblia, niguma itháan rí mbá 7,000 nutu mbiʼyuu Dios. Índo̱ Jesús niʼsngúún xa̱bu̱ niʼthún xú káʼnii mbiʼyuu Dios. Atraxnuu Juan 17:26.
4. Lá naxmiéjunʼ kaʼyulúʼ Dios ráʼ.
Xóo mbáa xa̱bu̱ bi̱ nandoo kaʼyoo wéñuʼ a̱ʼdióo, xúʼko̱ má Dios ma̱ngaa naxmiéjunʼ kaʼyulúʼ índo̱ kuwáanʼ ga̱jma̱a̱ tsingíná
Lá nandoo gáʼthi rí na̱nguá exmiéjunʼ kaʼyulúʼ Jeobá, ikha jngó mbaʼáanʼ dí ikháanʼ kuwáanʼ ga̱jma̱a̱ tsingíná ráʼ. Mbaʼin xa̱bu̱ nuthi rí Dios naniñuʼ rí xa̱bu̱ makuwa tsingíná mu mbaʼyoo á mu gajkhun kuwa runi ñajunʼ. Mú ragájkhun nindxu̱u̱ rígi̱. Atraxnuu Santiago 1:13.
Dios nisngájma rí ndaʼyamajkhún xa̱bu̱ numbaaʼ índo̱ niniñuʼ rí xa̱bu̱ muraʼwíí makuwa xóo eñún ikhiin. Lá ragájkhun dí nuxnáa núma̱aʼ numuu rí nandoo nuraʼwíí muʼni ñajunʼ Dios ráʼ. (Josué 24:15). Mú mbaʼin xa̱bu̱ nuraʼwíí muñu̱u̱n dí ra̱májánʼ eʼwíínʼ, ikha jngó Jeobá xtáa gíná índo̱ ndaʼyoo narígá dí ra̱májánʼ wéñuʼ náa tsu̱du̱u̱ Ku̱ba̱ʼ. Atraxnuu Génesis 6:5, 6.
Jeobá ñajunʼ mbáa Dios bi̱ phú naxmiéjunʼ kaʼyulúʼ gajkhun. Ikhaa nandoo rí makuwáanʼ ga̱jma̱a̱ gagi. Nacha̱ má Dios gáʼni gámbáa tsingíná ga̱jma̱a̱ maʼni gámbíin xa̱bu̱ bi̱ nuni gíníín eʼwíínʼ. Nákha xóó tseʼkha̱nú mbiʼi rúʼko̱, ikhaa ndaʼyoo náa numuu eniñuʼ marigá tsingíná nguátha mbiʼi. Náa kíxnuu 8 gájmañuluʼ itháan ga̱jma̱a̱ numuu rúʼko̱. Atraxnuu 2 Pedro 2:9 ga̱jma̱a̱ 3:7, 13.
5. Xú káʼnii gándoo gákuwáanʼ itháan mijngii náa Dios rá.
Jeobá naʼthúlúʼ muʼthá káñíí mu xúʼko̱ ma̱ndoo makuwáanʼ itháan mijngii náa ikhaa. Ikhaa naxmiéjunʼ kaʼyoo mámbáa dí ikháanʼ (Salmo 65:2; 145:18). Ikhaa xtáa xawii má xúʼko̱ mu maʼni mba̱a̱ a̱jkiu̱u̱n kaʼyulúʼ. Ikhaa ndaʼyoo tsiakii rí kuwáanʼ ruʼni mu makuwáanʼ xó má enigu̱ʼ, maski ajndu nguáná ikháanʼ nakiéʼkulu. Maski ajndu xa̱bu̱ aʼkhá ñajunlú, ma̱ndoo mambaxulúʼ májánʼ gajmiulú Dios. Atraxnuu Salmo 103:12-14 ga̱jma̱a̱ Santiago 4:8.
Numuu rí Jeobá niʼni makuwáanʼ, gíʼmaa rí maʼndulúʼ kuʼyáá itháan ikhaa ki xóo rí maʼndulúʼ kuʼyáá imba̱a̱ xa̱bu̱ (Marcos 12:30). Ikháánʼ mi̱dxu̱ʼ ratasngájma rí nandaʼ xtayáá Dios á mu najmañaʼ ga̱jma̱a̱ numuu ikhaa, á mu natani xó má e̱nda̱ʼa̱ ikhaa, xúʼko̱ ikháánʼ maraxtaa itháan mijngii gajma̱ʼ Dios. Atraxnuu 1 Timoteo 2:4 ga̱jma̱a̱ 1 Juan 5:3.
