KÍXNUU 4
Tsáa lá ñajunʼ Jesús rá.
1. Xú káʼnii ni̱jkha̱nú nixtáa Jesús rá.
Xú káʼnii nisngájma rí Jesús ninindxu̱u̱ mbáa xa̱bu̱ bi̱ niniñaminaʼ maratha̱a̱n rá. (MATEO 11:29; MARCOS 10:13-16)
Mú mixtiʼkhu nixtáa Jesús raʼkháa xóo mbáa xa̱bu̱. Ikhaa nixtáa ginii mekhuíí xóo mbáa ángel, nda̱wa̱á ni̱ʼkha̱ gáxtáa náa tsu̱du̱u̱ Ku̱ba̱ʼ (Juan 8:23). Jesús ñajunʼ timbáa bi̱ niʼnii Dios, ga̱jma̱a̱ ikhaa niñambáá mu maʼni xúgíʼ dí rígá mekhuíí ga̱jma̱a̱ náa Ku̱ba̱ʼ. Mbáwíi ikhaa ñajunʼ bi̱ niʼnii Jeobá, ikha jngó májánʼ rí ikhaa magumbiʼyuu ‹Aʼdá giʼnii› ndrígóo Dios (Juan 1:14). Dios nijmiu Jesús mu maʼthí ga̱jma̱a̱ numuu ikhaa, ikha jngó nagumbiʼyuu ‹Ajngáa›. Atraxnuu Proverbios 8:22, 23, 30 ga̱jma̱a̱ Colosenses 1:15, 16.
2. Náa numuu ni̱ʼkha̱ Jesús náa tsu̱du̱u̱ Ku̱ba̱ʼ rá.
Dios nikunguanʼ Jesús asndu náa mekhu mu maguewáan mbáa ndxáʼgu judía bi̱ nagumbiʼyuu María. Ndxáʼgu bugi̱ xóó tsebo̱ʼ ga̱jma̱a̱ nimbáa xa̱bu̱. Ikha jngó, anu̱u̱ Jesús na̱nguá ninindxu̱u̱ nimbáa xa̱biya̱ (Lucas 1:30-35). Jesús ni̱ʼkha̱ náa tsu̱du̱u̱ Ku̱ba̱ʼ ga̱jma̱a̱ ajtsú numuu: 1) mu maʼsngáa rí gajkhun ga̱jma̱a̱ numuu Dios, 2) mu magíiʼ mbá xkri̱da rí xú káʼnii gúʼni ñajunʼ Dios maski ajndu nuraʼní xkujndu, ga̱jma̱a̱ 3) mu maxnáximinaʼ xóo xa̱bu̱ bi̱ ragíʼdoo aʼkhúun, xúʼko̱ ikhaa niʼni numuu aʼkhá ndrígulúʼ. Atraxnuu Mateo 20:28.
3. Náa numuu ndayóoʼ rí mbáa makhañúu ga̱jma̱a̱ numulúʼ rá.
Nguáná ndayóoʼ majma numáá mu makríyaʼ rí xákhañuu mbáa xa̱bu̱ (Éxodo 21:29, 30). Jeobá táʼndoo asndu nákha ginii rí xa̱bu̱ maganun ga̱jma̱a̱ rí makhañún. Xú káʼnii eʼyáá rá. Nduʼyáá numuu rí Dios niʼthúu̱n timbáa xa̱biya̱, Adán, rí a mu ikhaa nakudaminaʼ “aʼkhá” makhañúu. Á mu Adán na̱nguá nikudaminaʼ aʼkhá, ikhaa xáʼganú makhañúu nimbá miʼtsú (Génesis 2:16, 17; 5:5). Xóo má eʼthí náa Biblia, ga̱jma̱a̱ numuu Adán niʼni rí makhañún xúgínʼ xa̱bu̱. Rígi̱ eyoo gáʼthi rí Adán niniñuʼ xúgíʼ aʼkhá náa xúgínʼ e̱ji̱i̱n ga̱jma̱a̱ rí nakhañulúʼ. Ikha jngó ndayóoʼ rí mixnáa mbáa xa̱bu̱ mu xúʼko̱ maʼni káwanʼ rí nakhañulúʼ rí Adán niniñuʼ. Atraxnuu Romanos 5:12 ga̱jma̱a̱ 6:23.
Tsáa gáʼngo̱o̱ gáʼni numuu mu maʼni káwanʼ rí nakhañulúʼ rá. Índo̱ nakhañulúʼ, nuʼni numáá ga̱jma̱a̱ numuu aʼkhá ndrígulúʼ. Nimbáa xa̱bu̱ aʼkhá xáʼngo̱o̱ gáʼni numuu aʼkhá ndrígu̱ún eʼwíínʼ. Atraxnuu Salmo 49:7-9.
4. Náa numuu nikháñu Jesús rá.
Jesús na̱nguá gíʼdoo aʼkhá, raʼkháa xóo ikháanʼ. Ikhaa na̱nguá ndiyóoʼ makhañúu ga̱jma̱a̱ aʼkhá ndrígóo numuu rí ikhaa na̱nguá nikudaminaʼ aʼkhá. Jesús nikháñu ga̱jma̱a̱ numuu aʼkhá ndrígu̱ún eʼwíínʼ xa̱bu̱. Dios nisngájma rí nandoo kaʼñún wéñuʼ xa̱bu̱ índo̱ ikhaa nikunguanʼ A̱ʼdióo mu makhañúu ga̱jma̱a̱ numuluʼ. Ma̱ngaa Jesús nisngájma rí nandoo kaʼyulúʼ numuu rí niʼnimbo̱o̱ kaʼyoo Anu̱u̱ índo̱ ikhaa ni̱ʼkha̱ gakhañu ga̱jma̱a̱ aʼkhá ndrígulúʼ. Atraxnuu Juan 3:16 ga̱jma̱a̱ Romanos 5:18, 19.
5. Ndiéjunʼ xtáa raʼni Jesús xúgi̱ rá.
Índo̱ Jesús nixtáa náa tsu̱du̱u̱ Ku̱ba̱ʼ, niʼni thanún xa̱bu̱ bi̱ naʼñún nandii, nikuxi̱i̱n xa̱bu̱ bi̱ nikháñun ga̱jma̱a̱ nimbáñun xa̱bu̱ bi̱ numininʼ, xúʼko̱ nindoo nisngájma rí gáʼni nda̱wa̱á gajmíi̱n xa̱bu̱ bi̱ nunimbu̱u̱n (Mateo 15:30, 31; Juan 5:28). Nda̱wa̱á rí Jesús nikháñu, Dios niʼnigabi̱i̱ xóo mbáa ángel (1 Pedro 3:18). Jesús nigiʼtu̱u̱n náa ñawunʼ mújúnʼ Jeobá asndu índo̱ ikhaa gáxnúu tsiakii maʼtañajunʼ xóo Rey náa xúgíʼ tsu̱du̱u̱ Ku̱ba̱ʼ (Hebreos 10:12, 13). Rí xúgi̱ Jesús xtáa raʼtañajunʼ xóo Rey náa mekhu, ga̱jma̱a̱ discípulo ndrígóo kuwa rutaraʼa ajngáa rí májánʼ rígi̱ náa xúgíʼ numbaaʼ. Atraxnuu Daniel 7:13, 14 ga̱jma̱a̱ Mateo 24:14.
Nacha̱ má Jesús majmuu tsiakii ndrígóo xóo Rey mu maʼni gámbáa xúgíʼ tsingíná ga̱jma̱a̱ bi̱ kuwa runi dí ra̱májánʼ. Xúgínʼ bi̱ guáʼdáá fe náa Jesús ga̱jma̱a̱ bi̱ nunimbu̱u̱n kuyáá makuwa náa ku̱ba̱ʼ mitsaan. Atraxnuu Salmo 37:9-11.
