KÍXNUU 04
Tsáá nindxu̱u̱ Dios rá.
Asndu nákha nigi̱ʼdu̱u̱ nikúwá xa̱bu̱ numbaaʼ, xa̱bu̱ ndiyamajkhún mbaʼin wéñuuʼ dios. Mú, náa Biblia naʼthí ga̱jma̱a̱ numuu “mbáa Dios bi̱ itháan gíʼdoo numuu náa eʼwíinʼ dios” (2 Crónicas 2:5). Tsáá nindxu̱u̱ ikhaa xá. Ga̱jma̱a̱ ndiéjunʼ rí naʼni magiʼdoo itháan numuu ikhaa náa eʼwíinʼ dios bi̱ nduyamajkhún xa̱bu̱ rá. Náa kíxnuu rígi̱ majmañaaʼ ndiéjunʼ rí eyoo Dios rí ma̱ta̱ya̱a̱ ga̱jma̱a̱ numuu ikhaa.
1. Ndiéjunʼ mbiʼyuu Dios ga̱jma̱a̱ xú káʼnii eʼyáá dí ikhaa nandoo dí muniʼnuuʼ mbiʼyuu xá.
Náa Biblia naʼthí tsáá nindxu̱u̱ Dios, ikhaa naʼthí: “Ikhúún ni̱ndxu̱ʼ Jeobá, xúʼko̱ mbiʼyuʼ” (atraxnuu Isaías 42:5, 8). Mbaʼin bi̱ najmañún nuthi rí Jeobá najuiʼtájuíi náa ajngáa hebreo, rí nandoo gáʼthúu̱n “ikhaa naʼni dí maʼga̱nú marigá”. Jeobá nandoo rí muniʼnuuʼ mbiʼyuu (Éxodo 3:15). Xú káʼnii eʼyáá rá. Numuu rí ikhaa niʼni dí mbiʼyuu makujmaa náa Biblia itháan dí 7,000 nuthu. a Jeobá mbiʼyuu “Dios bi̱ gajkhun bi̱ xtáa mekhuíí ga̱jma̱a̱ náa tsu̱du̱u̱ ku̱ba̱ʼ” (Deuteronomio 4:39).
2. Ndiéjunʼ eʼthúlú náa Biblia ga̱jma̱a̱ numuu Jeobá rá.
Náa Biblia naʼthí, náa xúgíinʼ dios bi̱ nduyamajkhún xa̱bu̱ numbaaʼ, xtáa mbawíí Dios bi̱ gajkhun, ikhaa nindxu̱u̱ Jeobá. Náá numuu rá. Rígá mbaʼa numuu, Jeobá nindxu̱u̱ mbáwíí “bi̱ itháan Mba̱a̱ bi̱ xtáa náa xúgíʼ tsu̱du̱u̱ ku̱ba̱ʼ” (atraxnuu Salmo 83:18). Ikhaa nindxu̱u̱ bi̱ “gíʼdoo Xúgíʼ tsiakii” ga̱jma̱a̱ rígi̱ nandoo gáʼthúu̱n dí ikhaa gíʼdoo tsiakii mu maʼni asndu ndiéjúúnʼ má eyoo ikhaa ma̱ngaa ikhaa nindxu̱u̱ bi̱ Niʼnianʼlú, ikhaa niʼni “mbá xúgíʼ dí rígá” náa mekhuíí ga̱jma̱a̱ xúgíinʼ bi̱ nduya bi̱ kúwá náa tsu̱du̱u̱ Ku̱ba̱ʼ (Apocalipsis 4:8, 11). Ma̱ngaa Jeobá nindxu̱u̱ mbáwíí bi̱ xtáa asndu kámuu (Salmo 90:2).
GAJMAÑAAʼ ITHÁAN
Guʼyáá xú kaʼnii mixtiʼkhu nindxu̱u̱ rí xóo nutháán Dios ga̱jma̱a̱ rí phú mbiʼyuu, rí i̱ndó ikhaa kaʼyoo. Ma̱ngaa majmañulú xú káʼnii esngájmulú muniʼnuuʼ mbiʼyuu ga̱jma̱a̱ náá numuu rí nandoo dí ikháán ma̱ta̱ya̱a̱ xú káʼnii mbiʼyuu.
3. Mbaʼa rí xóo ethán Dios, mú káaʼ mbóó mbiʼyuu rígá
Mu ma̱ta̱ya̱a̱ xú káʼnii mixtiʼkhu nindxu̱u̱ rí xóo nutháán mbáa xa̱bu̱ ga̱jma̱a̱ xóo phú mbiʼyuu, gu̱ya̱a̱ VIDEO ga̱jma̱a̱ gutamíjnála rígi̱:
-
Xú káʼnii mixtiʼkhu nindxu̱u̱ índo̱ nutháán tátá ga̱jma̱a̱ rí phú mbiʼyuu xá.
Náa Biblia naʼthí rí xa̱bu̱ nduyamajkhún mbaʼin dios bi̱ ragájkhun ga̱jma̱a̱ tátá. Guraxnuu Salmo 136:1-3 ga̱jma̱a̱ gutamíjnála rígi̱:
-
Tsáá nindxu̱u̱ “Dios ndrígu̱ún dios bi̱ ragájkhun” rá. Tsáá nindxu̱u̱ “Tátá ndrígu̱ún tátá” rá.
4. Jeobá nandoo rí matatsiʼnuuʼ mbiʼyuu ga̱jma̱a̱ rí majmaaʼ
Xú káʼnii eʼyáá dí Jeobá nandoo rí ikháán matatsiʼnuuʼ mbiʼyuu rá. Gu̱ya̱a̱ VIDEO ga̱jma̱a̱ gutamíjnála rígi̱:
-
Náá numuu ku̱ma̱a̱ʼ ikháán rí Jeobá nandoo dí majmaʼnuuʼ mbiʼyuu rá.
Jeobá nandoo rí xa̱bu̱ majmúún mbiʼyuu. Guraxnuu Romanos 10:13 ga̱jma̱a̱ gutamíjnála rígi̱:
-
Ndíjkha rí gíʼdoo numuu majmulú mbiʼyuu Jeobá rá.
-
Xú káʼnii ku̱ma̱a̱ʼ ikháán índo̱ mbáa naʼtháanʼ ga̱jma̱a̱ mbiʼyaaʼ rá.
-
Xú káʼnii xtáa Jeobá índo̱ najmaaʼ mbiʼyuu ku̱ma̱a̱ʼ ikháán rá.
5. Jeobá nandoo rí mambajxáaʼ ga̱jma̱a̱ʼ
Mbáa a̱ʼgu̱ bi̱ xtáa náa Camboya bi̱ mbiʼyuu Soten, naʼthí rí majmañaaʼ mbiʼyuu Dios “nindxu̱u̱ mbá rí itháan májánʼ rí ma̱ndoo mataxkamaa”. Gu̱ya̱a̱ VIDEO ga̱jma̱a̱ gutamíjnála rígi̱:
-
Xó má ndiʼyáá náa video, xú káʼnii nimbáyúu Soten dí maninuuʼ mbiʼyuu Dios rá.
Índo̱ nugíʼdi̱i̱ nambájxulú gajmiúlú mbáa xa̱bu̱, ginii rí nuniʼnuuʼ mbiʼyuu. Guraxnuu Santiago 4:8a ga̱jma̱a̱ gutamíjnála rígi̱:
-
Ndiéjunʼ eyoo Jeobá dí matani̱ ikháán rá.
-
Lá naku̱ma̱a̱ʼ ikháán dí matatsiʼnuuʼ ga̱jma̱a̱ rí majmaaʼ mbiʼyuu Dios mambáyaaʼ mu mataxuʼmáminaʼ náa ikhaa xáʼ. Náá numuu rá.
RÍ NUTHI TIKHUN: “Numuu rí mbáwíí má Dios xtáa, ikha jngóo tséʼñuu asndu xú káʼníí má gáratha̱a̱n”.
-
Lá naku̱ma̱a̱ʼ ikháán dí Jeobá mbiʼyuu Dios ráʼ.
-
Xú káʼnii gárathu̱u̱n eʼwíinʼ rí Dios nandoo rí majmulú mbiʼyuu rá.
RÍ NAGÁJNURIYO̱O̱ʼ
Jeobá mbiʼyuu Dios bi̱ gajkhun. Ikhaa nandoo rí muniʼnuuʼ mbiʼyuu ga̱jma̱a̱ rí majmulú, mu xúʼko̱ ma̱ndoo mambaxú gajmiúlú.
Rí nijmañaaʼ
-
Ndiéjunʼ rí naʼni mixtiʼkuii Jeobá náa xúgíinʼ dios bi̱ nduyamajkhún xa̱bu̱ rá.
-
Náá numuu rí gíʼmaa majmulú mbiʼyuu Dios rá.
-
Xú káʼnii tayáá ikháán rí Jeobá nandoo mambaxáaʼ ga̱jma̱a̱ʼ rá.
ATAYÁÁ ITHÁAN
Atayáá mbá witsu numuu náa nasngájma rí Dios gajkhun xtáa.
Atayáá náá numuu rí kaʼnii matatsimbaaʼ rí Dios xtáa má xúʼko̱.
“Tsáá niʼnii Dios rá.” (Bi̱ Nayejngoo, 1 ñajunʼ gu̱nʼ agosto tsiguʼ 2014)
Atayáá náá numuu rí gíʼmaa majmulú mbiʼyuu Dios maski ajndu tséʼyáá xóo egixnuu náa phú nigumaraʼmáʼ ginii.
Lá naxmiéjuunʼ Dios xú káʼnii exná mbiʼí ráʼ. Atayáá náá numuu nuʼthá rí Dios káaʼ mbóó mbiʼyuu gíʼdoo.
“Nguáthá mbiʼyuu gíʼdoo Dios rá.” (Artículo dí rígá náa jw.org)
a Náa apéndice A4 ndrígóo Biblia. Traducción del Nuevo Mundo mataxkamaa itháan rí nandoo gáʼthúu̱n mbiʼyuu Dios ga̱jma̱a̱ náá numuu rí tikhuu Biblia nijngudi̱i̱ mbiʼyuu.
Puede que también le interese
GRAXE̱ DÍ NAGUMA MÁ XÚʼKO̱
Xú káʼnii esngúún xa̱bu̱ ga̱jma̱a̱ numuu Biblia testigos de Jeobá rá.
Dí musngááʼ ga̱jma̱a̱ numuu Biblia testigos de Jeobá rí xáʼyóoʼ matani̱ numáá, ikháán ma̱ndoo majmaaʼ asndu xkáʼníí má Biblia rí xtaʼdáá. Ma̱ngaa, ma̱ndoo marathu̱u̱n makuwíin xúgíinʼ bi̱ kúwá náa guʼwáaʼ o bi̱ nambájxa̱a̱ʼ gajmiáanʼ.
