KÍXNUU 05
Náa Biblia na̱ʼkha̱ Ajngá rawuunʼ Dios rí mambáyulú
Jeobá nimínáanʼlu rí gíʼdoo wéñuuʼ numuu, ikhaa nindxu̱u̱ 66 libros majkhaʼ rí kagu̱ náa Biblia. Mbáa natraximínáʼ: “Náá ni̱ʼkha̱ Biblia rá. Tsáá nindxu̱u̱ bi̱ niʼnirámáʼ rá.” Mu ma̱ndoo maxtiʼña̱a̱ graxe̱ rígi̱, guʼyáá xú káʼnii eʼni rí Biblia rígá asndu mbiʼi xúgi̱.
1. Á mu xa̱bu̱ numbaaʼ ni̱ndxu̱ún bi̱ niniraʼmáʼ Biblia, xú káʼnii eʼni rí ajngóo Dios nindxu̱u̱ rí na̱ʼkha̱ ikhí rá.
Mbá 40 xa̱bekha bi̱ niniraʼmáʼ Biblia bi̱ mixtiʼkhu xóo nikúwi̱i̱n ga̱jma̱a̱ xóo nindxu̱ún. Biblia nigi̱ʼdu̱u̱ nigumaraʼmáʼ nákha tsiguʼ 1513 tsiguʼ ginii ga̱jma̱a̱ niguájxi̱ índo̱ niʼni tsiguʼ 98 tsiguʼ nda̱wa̱á, ndijyúuʼ 1,600 tsiguʼ mu magumaraʼmáʼ, maski asndu xúʼko̱ Biblia tséxtiʼkhuu rí naʼthí. Xú káʼnii niʼni rúʼko̱ rá. Numuu rí ni̱ndxu̱u̱ ajngóo Dios (atraxnuu 1 Tesalonicenses 2:13). Xa̱bekha bugi̱ túniraʼmáʼ rí nandún ikhiin, “espíritu santo niʼniún muthi ajngáa rí na̱ʼkha̱ náa Dios” (2 Pedro 1:21). a Dios nijmuu espíritu santo ndrígóo mu maʼni rí xa̱bekha bugi̱ muniraʼmáʼ rí ikhaa naku̱mu̱u̱ (2 Timoteo 3:16).
2. Tsíin ma̱ndoo mambáñún Biblia rá.
Xa̱bu̱ bi̱ kúwá “náa xúgíʼ xuajen mba̱ʼu̱, xuajen majkhaʼ ga̱jma̱a̱ náa xúgíʼ ajngáa” ma̱ndoo mambáñun ajngáa májánʼ rí na̱ʼkha̱ náa Biblia (atraxnuu Apocalipsis 14:6). Dios niʼni rí Biblia marigá náa mbaʼa ajngáa ga̱jma̱a̱ rígi̱ ni̱ndxu̱u̱ libro rí itháan nijuiʼtájuíi. Mbaʼin xa̱bu̱ náa xúgíʼ numbaaʼ ma̱ndoo mbuyáá rí na̱ʼkha̱ raʼthí náa Biblia, tséʼniuu má náa kúwá o xú káʼnii ajngáa ethi.
3. Xú káʼnii niʼnikríyaaʼ Biblia Jeobá rá.
Biblia nigumaraʼmáʼ náa rí tséjyúu eguámbáa, nijmún rollo rí naguma ga̱jma̱a̱ jxtún xujkhúʼ o ga̱jma̱a̱ xtáyoo planta rí mbiʼyuu papiro. Mú guéjmi̱i̱n xa̱bu̱ bi̱ nandún kuyáá Biblia nitariya̱a̱ʼ ga̱jma̱a̱ ñawúnʼ nini tsumáá wéñuuʼ. Maski asndu mbaʼin xa̱bu̱ bi̱ niguáʼdáá mbá ñajunʼ mba̱ʼu̱ nigíʼ muni gámbáa Biblia, mú eʼwíinʼ nikúwá xawii rí asndu ninigínamíjná mu munikríyaaʼ. Jeobá tániñuuʼ rí nimbá ni má nimbáa marikhoo mu xáʼtámijná ga̱jma̱á ni̱ndxu̱lú. Náa Biblia naʼthí: “Ajngóo Dios nagajyúuʼ asndu kámuu” (Isaías 40:8).
GAJMAÑAAʼ ITHÁAN
Guʼyáá itháan xú káʼnii Dios niʼni rí tikhun xa̱bekha muniraʼmáʼ Biblia. Ma̱ngaa mbuʼyáá ndiéjunʼ niʼni mu maʼnikríyaaʼ mu xúʼko̱ xa̱bu̱ numbaaʼ ma̱ndoo muguaʼdáá rí mbiʼi xúgi̱.
4. Náa Biblia naʼthúlú tsáá niʼni rí maguma
Gu̱ya̱a̱ VIDEO. Nda̱wa̱á guraxnuu 2 Timoteo 3:16 ga̱jma̱a̱ gutamíjnála rígi̱:
-
Á mu dí xa̱bu̱ niniraʼmáʼ Biblia, náá numuu rí najuiʼthá rí nindxu̱u̱ ajngóo Dios rá.
-
Lá nakuma̱a̱ʼ ikháán dí ma̱ndoo muʼnimbulú rí Dios niʼni dí xa̱bu̱ numbaaʼ muniraʼmáʼ rí nandxaʼwáminaʼ ráʼ.
Secretario naʼnirámáʼ dí naʼthí patrun. Xúʼko̱ má dí naʼthí náa Biblia ma̱ngaa, xa̱bu̱ numbaaʼ niniraʼmáʼ, mú nindxu̱u̱ ajngóo Dios.
5. Biblia nikríyaaʼ náa mbaʼa xkujndu
Á mu Biblia na̱ʼkha̱ náa Dios, ikhaa má gáñewu̱u̱n. Mba̱yu̱u̱ʼ tsiguʼ rí ninújngoo mbaʼin Xa̱bu̱ Ñajunʼ nindúún munigámbáa Biblia ma̱ngaa xa̱bu̱ edi̱ bi̱ nikúwá náa guʼwá ndxájkun táʼndúún rí xa̱bu̱ maguaʼdáá Biblia mu ma̱ndoo muraxnuu. Maski ajndu nikúwíin bi̱ táʼndúún gúyáá Biblia, mú mbaʼin xa̱bu̱ ninigínámijná mu munikríyaaʼ. Á mu ikháán nandaaʼ ma̱ta̱ya̱a̱ itháan ga̱jma̱a̱ numún xa̱bu̱ bugi̱, gu̱ya̱a̱ VIDEO ga̱jma̱a̱ gutamíjnála rígi̱:
-
Indo̱ natayáá dí ra̱ʼkhá tháán ninitsiakimíjna̱ mu muñewa̱a̱n Biblia, lá naxkajxi̱i̱n matraxnuu ráʼ. Náá numuu rá.
Guraxnuu Salmo 119:97 ga̱jma̱a̱ gutamíjnála rígi̱:
-
Náá numuu rí tikhun xa̱bu̱ nini gínámijná rí asndu nikháñún mu mutajuíi Biblia ga̱jma̱a̱ rí muxnaraʼa rá.
6. Mbá libro rí muraxnuu xúgíinʼ xa̱bu̱
Biblia nindxu̱u̱ libro rí itháan najuiʼtájuíi ga̱jma̱a̱ rí itháan najuixnáraʼa. Guraxnuu Hechos 10:34, 35 ga̱jma̱a̱ gutamíjnála rígi̱:
-
Náá numuu rí Dios nandoo rí ajngóo majuiʼtájuíi náa mbaʼa ajngáa ga̱jma̱a̱ makhánun xúgíinʼ xa̱bu̱ rá.
-
Ndiéjunʼ rí nanigua̱a̱ʼ ikháán rí na̱ʼkha̱ náa Biblia rá.
Itháan maʼni
mbá xúgíinʼ xa̱bu̱
bi̱ kúwi̱i̱n náa numbaaʼ
ma̱ndoo muraxnuu Biblia náa ajngún
Rígá itháan rí
3,000
ajngáa,
kañiʼ o mbá ta̱pha̱
Naʼni itháan dí
5,000 millón
Biblia dí rígá,
Itháan mbaʼa ki xóo i̱ʼwáʼ libro
RÍ NUTHI TIKHUN: “Biblia nindxu̱u̱ mbá libro wayuu rí niniraʼmáʼ xa̱bu̱ú”.
-
Xú káʼnii rathá ikháán rá.
-
Ndiéjunʼ eʼsngáma dí Biblia nindxu̱u̱ Ajngá rawuunʼ Dios rá.
RÍ NAGÁJNURIYO̱O̱ʼ
Biblia nindxu̱u̱ Ajngá rawuunʼ Dios ga̱jma̱a̱ ikhaa niʼni rí xúgíinʼ xa̱bu̱ ma̱ndoo maguaʼdáá.
Rí nijmañaaʼ
-
Ndiéjunʼ eyoo gáʼthúu̱n rí Dios niʼni rí xa̱bekha muniraʼmáʼ rí naʼthí náa Biblia rá.
-
Ndiéjunʼ rí nanigua̱a̱ʼ itháan ga̱jma̱a̱ numuu xóo nikríyaaʼ Biblia, xóo nijuiʼtájuíi ga̱jma̱a̱ xóo nijuixnáraʼa rá.
-
Xú káʼnii ku̱ma̱a̱ʼ ikháán ga̱jma̱a̱ numuu xúgíʼ rí niʼni Dios mu ma̱ndoo maratamíjná ga̱jma̱a̱ʼ rá.
ATAYÁÁ ITHÁAN
Atayáá náa na̱ʼkha̱ raʼthí ga̱jma̱a̱ numuu Biblia. Asndu nákha nigi̱ʼdu̱u̱ nigumaraʼmáʼ ga̱jma̱a̱ asndu dí rígá mbiʼi xúgi̱.
“Xú káʼnii eʼni rí Biblia rígá asndu mbiʼi xúgi̱ rá.” (¡Awaxunʼ!, gu̱nʼ noviembre tsiguʼ 2007)
Atayáá mbá ajtsú rí nigíʼ maʼni gámbáa Biblia.
Atayáá ndiéjunʼ niguáʼníí tikhun xa̱bu̱ numuu rí nitajuíi Biblia.
Rígá mbaʼa Biblia rí nijuiʼtájuíi, mú xú káʼnii gándoo gáta̱ya̱a̱ á mu táxtiʼkhuu ajngóo Dios rá.
“Lá nixtiʼkhuu rí naʼthí náa Biblia ráʼ.” (Artículo dí rígá náa jw.org)
Puede que también le interese
GRAXE̱ DÍ NAGUMA MÁ XÚʼKO̱
Xú káʼnii esngúún xa̱bu̱ ga̱jma̱a̱ numuu Biblia testigos de Jeobá rá.
Dí musngááʼ ga̱jma̱a̱ numuu Biblia testigos de Jeobá rí xáʼyóoʼ matani̱ numáá, ikháán ma̱ndoo majmaaʼ asndu xkáʼníí má Biblia rí xtaʼdáá. Ma̱ngaa, ma̱ndoo marathu̱u̱n makuwíin xúgíinʼ bi̱ kúwá náa guʼwáaʼ o bi̱ nambájxa̱a̱ʼ gajmiáanʼ.
