KÍXNUU 11
Xú káʼnii gambayaʼ á mu natraxnuu Biblia
Atatsaʼwáminaʼ rí nandaaʼ matani kaʼwi̱i̱ mbá jmbaaʼ rí mba̱a̱ wéñuuʼ mu maraxna̱a̱ xku̱bi̱ rí asndu tsétayáá náa matagíʼdi̱i̱. Mbáa ikháán xáʼniaʼ mingíjyúuʼ á mu natagíʼdi̱i̱ maraxna̱a̱ xku̱bi̱ chíʼgíiʼ chíʼgíiʼ. Xúʼko̱ má kayuuʼ rígá índo̱ nandaaʼ matagíʼdi̱i̱ matraxnuu Biblia. Mbáa natraximínáʼ: “Náá gagíʼdu̱u̱ maguxnuu rá”. Náa kíxnuu rígi̱ mbuʼyáá tikhu consejo rí ikháán ma̱ndoo mambáyaaʼ mu xúʼko̱ manigua̱a̱ʼ rí matraxnuu ma̱ngaa rí matanigajmaa̱ Biblia.
1. Ndíjkha rí májánʼ rí muraxnuu Biblia tsejtsí mbiʼi rá.
Xa̱bu̱ bi̱ naguxnuu xúgíʼ mbiʼi Biblia o “xtángoo ndrígóo Jeobá” maxtáa tsímáá ga̱jma̱a̱ xúgíʼ rí gáʼni magajnúu májánʼ (atraxnuu Salmo 1:1-3). Mu ma̱ndoo matagíʼdi̱i̱, atraxnuu mbáxngaa rí mbá mbiʼi. Índo̱ gatatsiʼnúuʼ májánʼ Ajngá rawuunʼ Dios itháan gániguaaʼ rí matraxnuu.
2. Ndiéjunʼ gándoo gámbáyaaʼ mu makrua̱ʼa̱a̱ májánʼ dí xtaa ratraxnuu náa Biblia rá.
Mu ma̱ndoo mambáyulú dí kuwáánʼ ruraxnuu náa Biblia gíʼmaa rí muguajún mbáxgaa mu mundxaʼwamíjná dí kuwáánʼ ruraxnuu. Xúʼko̱ má libro rígi̱ ma̱ngaa, raʼkháa i̱ndó ndayóoʼ muraxnuu, gíʼmaa rí “mundxaʼwamíjná rí naʼthí ikhí” (Josué 1:8). Índo̱ xtaa ratraxnuu atrajxi̱mínáʼ rígi̱, “ndiéjunʼ eʼsngóʼ ga̱jma̱a̱ numuu Jeobá versículo rígi̱ rá. Xú káʼnii gándoo maʼgíʼ ma̱ni̱ ikhúún rígi̱ rá. Xú káʼnii gándoo majmuʼ rígi̱ mu mambáñun eʼwíinʼ rá.”
3. Náá gándoo matríyaʼ mbiʼi mu matraxnuu Biblia rá.
Lá naʼniaaʼ mingíjyúuʼ rí matraxnuu mbáxngaa Biblia ráʼ. Xúgiáánʼ nagíʼnulú rúʼko̱. “Gajmaaʼ májánʼ mbiʼi ndrígáaʼ” (Efesios 5:16). Ikháán majmáán matani á mu natríyaʼ mbá hora kiejunʼ mu matraxnuu Biblia. Tikhuun nuraxnuu miʼcha̱, eʼwíinʼ nuraxnuu xóo wakhaʼ índo̱ nduyaxu̱ún mu muphiʼtsu, eʼwíinʼ nuraxnuu wakhííʼ índo̱ xóó tsegun gúnúʼ. Nguáná gándoo matraxnuu ku̱ma̱a̱ʼ ikháán rá.
GAJMAÑAAʼ ITHÁAN
Guʼyáá ndiéjunʼ gándoo muʼni mu manigulúʼ muraxnuu Biblia. Gi̱i̱ gándoo muxkamaa tikhu rí ma̱ndoo mambáyulú muʼniratamijnálú májánʼ ga̱jma̱a̱ mbuʼyáá xú káʼnii gándoo gámbáyulú rí kúwáanʼ ruʼnigajma̱a̱ náa libro rígi̱.
Xó má nanigulúʼ índo̱ naʼphu̱ i̱ʼwáʼ ganitsu, xúʼko̱ má ma̱ndoo manigulúʼ dí nuraxnuu náa Biblia ma̱ngaa
4. Atayáá xóo matani mu manigua̱a̱ʼ matraxnuu Biblia
Mbáa maʼniaaʼ mingíjyúuʼ índo̱ ndiʼkhú matagíʼdi̱i̱ matraxnuu Biblia. Mú, nindxu̱u̱ xóo mbá ganitsu rí ikháán na̱nguá tatsiʼnuʼ, índo̱ natagíʼdi̱i̱ natsu na̱jkha̱ ranigua̱a̱ʼ “xúʼko̱ ma̱ndoo maʼga ranigua̱a̱ʼ” rí matraxnuu Biblia ma̱ngaa. Guraxnuu 1 Pedro 2:2 ga̱jma̱a̱ gutamíjnála rígi̱:
-
Á mu ikháán natraxnuu xúgíʼ mbiʼi Biblia, lá naku̱ma̱a̱ʼ rí manigua̱a̱ʼ itháán ráʼ.
Guya̱a̱ VIDEO muniʼnuuʼ tikhun jiámá ga̱jma̱a̱ wa̱ʼxa̱ʼ, mu mbuʼyáá ndiéjunʼ nimbáñun ikhiin dí niraxnuu Biblia. Nda̱wa̱á gutamíjnála rígi̱:
-
Ndiéjunʼ rí nindoo nini jiámá ga̱jma̱a̱ wa̱ʼxa̱ʼ bi̱ nikujmiin náa video rá.
-
Ndiéjunʼ nimbáñun rí muraxnuu má xúʼko̱ Biblia xá.
-
Ndiéjunʼ nini mu manigu̱u̱nʼ itháán rí muraxnuu Biblia xá.
Rí ma̱ndoo mambáyaaʼ matagíʼdi̱i̱:
-
Atayáʼ mbá Biblia rí nagumaraʼmáʼ xóo phú kaʼyoo ga̱jma̱a̱ ajngáa rí nuthi̱ mbiʼi xúgi̱. Atayáá Traducción del Nuevo Mundo á mu rígá náa ajngáaʼ.
-
Atagíʼdi̱i̱ matraxnuu náa naʼthí rí ikháán nanigua̱a̱ʼ. Ma̱ndoo mataxkamaa náa tabla “Rí ma̱ndoo mambáyaaʼ matagíʼdi̱i̱ matraxnuu Biblia”.
-
Atani mbá lista náa mínaʼ edxu̱u̱ ratraxnuu. Gajmaaʼ tabla rí kayá edxu̱u̱ “Náa ejkhá raguxnuu Biblia”, dí rígá náa libro rígi̱.
-
Atrígú náa celular ndrígáaʼ JW Library®. Á mu nitrígú náa celular ndrígáaʼ o náa imbo̱ʼ ajua̱nʼ, ikháán ma̱ndoo matraxnuu ga̱jma̱a̱ matadxawíín Biblia asndu náa má eyaaʼ.
-
Gajmaaʼ i̱ʼwáʼ dí na̱ʼkha̱ náa Traducción del Nuevo Mundo. Ikhí mataxkamaa mapa, tabla ga̱jma̱a̱ glosario rí mambáyaaʼ manigua̱a̱ʼ matraxnuu itháan Biblia.
5. Atani̱rataminaʼ mu majuiʼsngáaʼ ga̱jma̱a̱ numuu Biblia
Guraxnuu Salmo 119:34 ga̱jma̱a̱ gutamíjnála rígi̱:
-
Ndíjkha rí gíʼdoo numuu dí maratajkáan ginii nákha xóo tsíraxnuu Biblia o índo̱ xtaa ratani̱rataminaʼ mu matanigajmaa̱ libro rígi̱ rá.
Xú káʼnii gándoo matani mu mambáyaaʼ mambá índo̱ natanigajmaa rá. Índo̱ gátanigajma̱a̱ mambá kíxnuu, atagíʼ matani dí eʼthí gi̱i̱:
-
Atraxnuu xúgíʼ kutriga̱ rí kaʼyoo náa nagi̱ʼdu̱u̱ kíxnuu.
-
Atayáʼ xúgíʼ texto ndrígóo Biblia, atraxnuu ma̱ngaa atani mbríguii ga̱jma̱a̱ rí xtaa rajmañaaʼ.
-
Atraxníʼ ajngáa rí nariʼña graxi̱. Rígi̱ gámbáyaaʼ índo̱ gátanigajmaa kíxnuu rígi̱ gajmaaʼ bi̱ nasngáaʼ.
Lá natayáá má rá’.
Bi̱ ni̱ndxu̱xu̱ʼ testigos de Jeobá mbaʼa Biblia nijmuxu, mu rí naniguxu ikha ni̱ndxu̱u̱ Traducción del Nuevo Mundo numuu rí ikhí naʼthí mbájmbu, kaʼwu ga̱jma̱a̱ ikhí na̱ʼkha̱ mbiʼyuu Dios (artículo dí rígá náa jw.org: “Lá guaʼdáá mbá Biblia kiejuunʼ testigos de Jeobá ráʼ.”)
RÍ NUTHI TIKHUN: “Mingíjyúuʼ rí matanigajmaa̱ Biblia narígú kaʼyaʼ mbiʼi. Tseguaphúún ga̱jma̱a̱ naskoʼ gánigajmaa”.
-
Dí rathá ikháán rá.
RÍ NAGÁJNURIYO̱O̱ʼ
Mu ma̱ndoo mambáyaʼ rí matraxnuu Biblia, atríyaʼ mbá májánʼ awan, atanda̱ʼa̱a̱ Dios rí mambáyaʼ mu makrua̱ʼa̱a̱ʼ rí natraxnuu ga̱jma̱a̱ atani̱rataminaʼ guapháá nákha xóó tsétagíʼdi̱i̱ matanigajmaa̱.
Rí nijmañaaʼ
-
Ndiéjunʼ gámbáyaaʼ mu manigua̱a̱ʼ matraxnuu Biblia rá.
-
Nguáná gándoo matraxnuu Biblia ikháán ma̱ngaa matanigajmaa̱ rí eʼthí ikhí rá.
-
Ndíjkha rí gíʼdoo numuu dí matani̱rataminaʼ guapháá mu matanigajmaa̱ Biblia rá.
ATAYÁÁ ITHÁAN
Atanga̱án matayaa rí nijmañaaʼ mu xúʼko̱ mambáyaʼ índo̱ ikháán natraxnuu Biblia.
“Ganigua̱a̱ʼ matraxnuu Biblia” (Bi̱ Nayejngoo, núm. 1 tsiguʼ 2017)
Atayáá ajtsú enii xóo matraxnuu Biblia.
Atayáá xóo gátani mu manigua̱a̱ʼ matraxnuu Biblia.
Atayáá rí nuthi̱ tikhun xa̱bu̱ bi̱ wajyúuʼ má kúwá runigajmaa Biblia.
Rí muʼnigajmaa ndajkuáanʼ nambayulú murajtumijnaa náa Ajngá rawunʼ Dios (2:06)
Puede que también le interese
GRAXE̱ DÍ NAGUMA MÁ XÚʼKO̱
Xú káʼnii esngúún xa̱bu̱ ga̱jma̱a̱ numuu Biblia testigos de Jeobá rá.
Dí musngááʼ ga̱jma̱a̱ numuu Biblia testigos de Jeobá rí xáʼyóoʼ matani̱ numáá, ikháán ma̱ndoo majmaaʼ asndu xkáʼníí má Biblia rí xtaʼdáá. Ma̱ngaa, ma̱ndoo marathu̱u̱n makuwíin xúgíinʼ bi̱ kúwá náa guʼwáaʼ o bi̱ nambájxa̱a̱ʼ gajmiáanʼ.
