KÍXNUU 30
¡Ma̱ndoo matangi̱ín makuwá mbu̱júu̱ʼ bi̱ xtañún!
Rí nakháñulú naʼni makuwáanʼlu ngíná wéñuʼ. Ikha jngóo náa Biblia naʼthí rí nakháñulú nindxu̱u̱ xóo mbáa bi̱ sia̱nʼ gajmiúlú (1 Corintios 15:26). Náa kíxnuu 27, nijmañaaʼ rí Jeobá maʼnigámbáa rí nakháñulú. Mu ndiéjunʼ garigá ga̱jma̱a̱ numún xa̱bu̱ bi̱ nikháñúún má rá. Náa kíxnuu rígi̱ makruaʼaaʼ itháan imbo̱ʼ dí nikudaminaʼ maʼni Jeobá rí makujxi̱ín mbaʼin wéñuʼ xa̱bu̱ mu makuwá tsímáá kámuu mbiʼi. ¡Matangi̱ín makuwá mbu̱júu̱ʼ! Lá gajkhun marigá rúʼko̱ ráʼ. Ga̱jma̱a̱ náa mínaʼ gagabi̱ín xá. Náa mekhuíí o náa tsu̱du̱u̱ Ku̱ba̱ʼ dxe̱ʼ.
1. Ndiéjunʼ nandoo maʼni Jeobá ga̱jma̱á nindxúu̱n a̱ngiu̱lú bi̱ nikháñúún rá.
Jeobá nandoo maʼnigabi̱ín xa̱bu̱ bi̱ nikháñúún. Job ninindxu̱u̱ mbáa xa̱bu̱ bi̱ nigiʼdoo wéñuuʼ fe, ndiʼyoo gajkhun rí Dios xámbumuu kaʼyoo índo̱ gakháñuu ga̱jma̱a̱ índo̱ gáʼga̱a̱ náa “Iñá wa̱jinʼ”. Niʼthúu̱n Dios: “Ikháán matandxaʼoʼ ga̱jma̱a̱ ikhúúnʼ mariʼñaa” (atraxnuu Job 14:13-15).
2. Xú kaʼnii eʼyáá rí bi̱ nikháñúún ma̱ndoo matuxi̱ín rá.
Índo̱ Jesús nixtáa náa tsu̱du̱u̱ Ku̱ba̱ʼ, Dios nixnúu tsiakii mu maʼnigabi̱ín xa̱bu̱. Ikha jngóo Jesús niʼniga̱bi̱i̱ mbáa dxáʼgú bi̱ gíʼdoo 12 tsiguuʼ ga̱jma̱a̱ a̱ʼdióo mbáa a̱ʼgú xuáʼa̱ (Marcos 5:41, 42; Lucas 7:12-15). Nda̱wa̱á bi̱ nambáxu̱u̱ ga̱jma̱a̱ bi̱ mbiʼyuu Lázaro nikháñuu. Maski ajndu ninújngoo a̱jkhu̱ mbiʼi rí nikháñuu ga̱jma̱a̱ nijuiʼdi̱i̱ má, Jesús niʼniga̱bi̱i̱ nda̱wa̱á rí niʼtákáñuu Dios, ikhaa i̱ndó ndiyóoʼ mayejxiraʼa náa nijnguáanʼ ga̱jma̱a̱ maʼthí gakhi̱i̱: “¡Lázaro, agajnáʼ!”. Ga̱jma̱a̱ “bi̱ nikháñuu nigájnáa”, ¡ndaʼya! (Juan 11:43, 44). Lá natatsaʼwáminaʼ xóo nikúwi̱i̱n bi̱ kaʼñún Lázaro ga̱jma̱a̱ bi̱ nambáxu̱u̱ gajmíi̱n xáʼ.
3. Lá matangi̱ín makuwá mbu̱júu̱ʼ bi̱ nandaaʼ xtañún ráʼ.
Náa Biblia naʼthí gajkhun “rí magabiín xa̱bu̱” (Hechos 24:15). Xa̱bu̱ bi̱ Jesús nikujxi̱ín na̱nguá nigúun mekhuíí (Juan 3:13). Xúgíinʼ nidxún wéñuuʼ dí nitangiín makuwá náa tsu̱du̱u̱ Ku̱ba̱ʼ. Xóo ma nirígá nákha ikhú, nánguá ma tígo̱o̱ mbayuuʼ rí Jesús maʼnigabi̱ín mbaʼin wéñuuʼ xa̱bu̱ mu makuwíin kámuu mbiʼi náa tsu̱du̱u̱ Ku̱ba̱ʼ rí maʼni mitsaanʼ. Ikhaa niʼthí rí: “Xúgíinʼ bi̱ kajtiin náa iñá wa̱jinʼ”, xóo muʼthá, bi̱ Dios gíwanʼ a̱jkiu̱u̱n eni̱, magabiín xúgíinʼ asndu bi̱ nimbáa na̱nguá ermáʼáan a̱jkiu̱ún eni̱ (Juan 5:28, 29, nota).
GAJMAÑAA’ ITHÁAN
Guʼyáá rí nasngájma náa Biblia rí xa̱bu̱ bi̱ nikháñúún ma̱ndoo matangi̱ín makuwá ga̱jma̱a̱ rígi̱ gajkhun marigá. Ma̱ngaa mbuʼyáá, dí matuxi̱ín xa̱bu̱ ma̱ndoo maʼnii a̱jkia̱a̱nʼ ga̱jma̱a̱ rígá mbá dí maraʼti̱i̱n nda̱wa̱á.
4. Jesús nisngájma rí maʼngo̱o̱ maʼnigabi̱ín xa̱bu̱ bi̱ nikháñúún
Atayáá itháan xóo phú niʼni Jesús ga̱jma̱a̱ numuu mígiu̱u̱ Lázaro. Guraxnuu Juan 11:14 ma̱ngaa 38-44 ga̱jma̱a̱ gutamíjnála rígi̱:
-
Xú kaʼnii eʼyáá dí Lázaro gajkhun nikháñuu rá. (Gu̱ya̱a̱ versículo 39).
-
Á mu Lázaro ni̱jkha̱a̱ mekhuíí, lá nakuma̱a̱ʼ rí májánʼ niʼni Jesús rí ma̱ʼkha̱a̱ kayáa mbu̱júu̱ʼ náa tsu̱du̱u̱ Ku̱ba̱ʼ xáʼ.
5. ¡Mbaʼin matangi̱ín makuwá!
Guraxnuu Salmo 37:29 ga̱jma̱a̱ gutamíjnála rígi̱:
-
Náa mínaaʼ gakúwi̱i̱n xa̱bu̱ bi̱ mbaʼin wéñuuʼ índo̱ gátuxi̱ín rá.
Jesús raʼkháa i̱ndó maʼnigabi̱ín bi̱ ndiyamajkuíí Jeobá ma̱ngaa makujxi̱ín mbaʼin wéñuuʼ eʼwíinʼ xa̱bu̱. Guraxnuu Hechos 24:15 ga̱jma̱a̱ gutamíjnála rígi̱:
-
Índo̱ gatujxíin xa̱bu̱, tsáá ganigua̱ʼ ma̱ta̱ya̱a̱ rá.
Atatsaʼwáminaʼ rígi̱: Ra̱mingíjyúuʼ eʼyoo Jesús rí makujxi̱ín xa̱bu̱ bi̱ nikháñúún xóo má eʼni mbáa anu̱u̱ ada̱ índo̱ naxkajui̱i̱ a̱ʼdióo.
6. Dí matujxi̱ín xa̱bu̱ ma̱ndoo maʼni̱i̱ a̱jkia̱a̱nʼ ga̱jma̱a̱ naʼni marigá dí maraʼti̱i̱n nda̱wa̱á
Dí na̱ʼkha̱ raʼthí náa Biblia ga̱jma̱a̱ numuu wáxioo Jairo niʼni̱i̱ a̱jkiu̱ún ga̱jma̱a̱ nida̱a̱ tsiakii mbaʼin wéñuuʼ xa̱bu̱ bi̱ kúwi̱i̱n ngíná ga̱jma̱a̱ numuu rí nikháñuu mbáa. Guraxnuu historia rígi̱ dí nirígá gajkhun náa Lucas 8:40-42 ga̱jma̱a̱ 49-56.
Nákha xóó tséʼnigabi̱i̱ wáxioo Jairo, Jesús niʼthúu̱n: ‹Xámiñaaʼ, i̱ndó araʼdáá fe› (gu̱ya̱a̱ versículo 50). Xóo gámbáyaaʼ ma̱ta̱ya̱a̱ dí nda̱wa̱á matujxi̱ín bi̱ nikháñúún...
-
... índo̱ gakháñuu mbáa bi̱ xtayáá rá.
-
... índo̱ inu makhañáaʼ rá.
Gu̱ya̱a̱ VIDEO ga̱jma̱a̱ gutamíjnála rígi̱:
-
Xú kaʼnii niʼni dí maʼni̱i̱ a̱jkiu̱ún ga̱jma̱a̱ muda̱a̱ tsiakii anu̱u̱ ga̱jma̱a̱ ru̱dúu̱ Phelicity rí magabiín bi̱ nikháñúún rá.
RÍ NUTHI TIKHUN: “Naʼniuʼ mingíjyúuʼ manimbo̱ʼ rí xa̱bu̱ matujxi̱ín makuwá náa tsu̱du̱u̱ Ku̱ba̱ʼ”.
-
Ndiéjunʼ tatsaʼwáminaʼ ikháán rá.
-
Xú kaʼnii texto gájmaaʼ mu matasnga̱jmá rí xa̱bu̱ matujxi̱ín náa tsu̱du̱u̱ Ku̱ba̱ʼ rá.
RÍ NAGÁJNURIYO̱O̱ʼ
Náa Biblia naʼthí kaʼwu rí mbaʼin wéñuʼ xa̱bu̱ magabiín. Jeobá nandoo rí matangi̱ín makuwá mbu̱júu̱ʼ, ikha jngóo nixnúu tsiakii Jesús mu makujxi̱ín.
Rí nijmañaaʼ
-
Xú káʼnii eʼyáá dí Jeobá ga̱jma̱a̱ Jesús nandún wéñuuʼ rí muxujxiín xa̱bu̱ rá.
-
Náá mínaaʼ gatujxi̱ín makuwá mbaʼin wéñuuʼ xa̱bu̱: Náa mekhuíí o náa tsu̱du̱u̱ Ku̱ba̱ʼ dxe̱ʼ. Náá numuu dí xúʼko̱ etriʼña̱a̱ʼ rá.
-
Ndiéjunʼ eʼni ma̱ta̱ya̱a̱ gajkhun ikháán rí matujxi̱ín makuwá bi̱ xtañún rá.
ATAYÁÁ ITHÁAN
Atraxnuu tikhu rí mambáyaaʼ mu xáraxtaa gíná.
“Rí mambáñún bi̱ kúwi̱i̱n ngíná ga̱jma̱a̱ numuu rí nikháñuu mbáa” (¡Awaxunʼ!, núm. 3 tsiguʼ 2018)
Lá ma̱ndoo mambáyúu bi̱ xtáa ngíná ikha ndrígóo Biblia ga̱jma̱a̱ numuu rí nikháñuu mbáa ráʼ.
Atayáá xóo gándoo gátambáyii mbáa ada̱ bi̱ nikháñuu mbáa bi̱ nandoo kaʼyoo.
Lá matujxi̱ín tikhun bi̱ magu̱ún mekhuíí ráʼ. Lá maxtáa mbáa bi̱ xágabi̱i̱ ráʼ.
“Ndiéjunʼ nindxu̱u̱ rí magabi̱ín xá.” (Artículo dí rígá náa jw.org)
Puede que también le interese
GRAXE̱ DÍ NAGUMA MÁ XÚʼKO̱
Xú káʼnii esngúún xa̱bu̱ ga̱jma̱a̱ numuu Biblia testigos de Jeobá rá.
Dí musngááʼ ga̱jma̱a̱ numuu Biblia testigos de Jeobá rí xáʼyóoʼ matani̱ numáá, ikháán ma̱ndoo majmaaʼ asndu xkáʼníí má Biblia rí xtaʼdáá. Ma̱ngaa, ma̱ndoo marathu̱u̱n makuwíin xúgíinʼ bi̱ kúwá náa guʼwáaʼ o bi̱ nambájxa̱a̱ʼ gajmiáanʼ.
