KÍXNUU 35
Xú káʼnii gúraʼwíí májánʼ dí muʼni rá
Xúgiáánʼ ndayóoʼ muraʼwíí dí muʼni. Mbaʼa dí ikhaa mani̱ndxu̱u̱ xóo kaʼnii gakuwáanʼlú, ga̱jma̱a̱ xóo embáxulu gajmiúlú Jeobá. Mbá xkri̱da, mbáa mbaʼyóoʼ muraʼwíi náa mínaaʼ gakuwáánʼ, ndiéjunʼ guñajunʼ ga̱jma̱a̱ á mu mbuʼyáa xa̱bu̱ o na̱nguá. Á mu nuraʼwíí májánʼ dí muʼni maʼni rí makuwáanʼlu gagi ga̱jma̱a̱ muʼni dí Jeobá maxtáa gagi.
1. Xú káʼnii gámbáyaaʼ Biblia matraʼwíí májánʼ dí matani rá.
Nákha xóo tsétraʼwíí dí matani, atanda̱ʼa̱a̱ Jeobá rí mambáyaʼ ga̱jma̱a̱ ataniminaʼ mataʼyááʼ náa Biblia ndiéjunʼ endxa̱ʼwáminaʼ ga̱jma̱a̱ numuu rí niratháán (atraxnuu Proverbios 2:3-6). Nguáná ma̱ta̱ya̱a̱ rí náa kiʼtáñajunʼ dí Jeobá naxnúlú naʼtulúʼ mbájmbu ndiéjunʼ gíʼmaa muʼni. Á mu xúʼko̱ itháan májánʼ gaʼni dí muʼnimbulúʼ.
Mú ndiéjunʼ gátani á mu náa Biblia na̱nguá eʼthí mbájmbu ndiéjunʼ gíʼmaa matani rá. Maski ma asndu xúʼko̱, Jeobá maxnáaʼ ikha “náa kamba̱a̱” gíʼmaa majngruigaaʼ (Isaías 48:17). Xú kaʼnii rá. Ga̱jma̱a̱ ikha dí kagu̱ ikhí gándoo gámbáyaaʼ. Ikha rí na̱ʼkha̱ náa Biblia rí nindxu̱u̱ gajkhun ma̱ndoo mambáyulú makru̱ʼu̱lú xú kaʼnii endxa̱ʼwáminaʼ ga̱jma̱a̱ xóo eku̱mu̱u̱ Jeobá. Ma̱ndoo mbuʼyáá rúʼko̱ índo̱ nuraxnuu dí na̱ʼkha̱ náa Biblia, rí mbuʼyáá xú kaʼnii endxa̱ʼwáminaʼ Jeobá nambáyulúʼ muraʼwíí muʼni rí naniguuʼ
2. Ndiéjunʼ gíʼmaa ma̱ta̱ya̱a̱ nákha xóo tsétraʼwíí mbá dí matani rá.
Náa Biblia naʼthí “bi̱ najmañuu nandxa̱ʼwáminaʼ ndaʼyoo náa ejkha̱” (Proverbios 14:15). Rígi̱ eyoo gáʼthúu̱n rí nákha xóo tséraʼwíí dí muʼni guʼgíʼ mundxaʼwamíjna̱ i̱ʼwáʼ ndiéjunʼ rí itháan májánʼ muʼni. Índo̱ guʼyáá mámbá dí ikhaa guraximíjna̱: “Xú kaʼnii ikha dí na̱ʼkha̱ náa Biblia kuajtuminaʼ ga̱jma̱a̱ dí naraʼwíí mani rígi̱ rá. Xkáʼnii dí rígi̱ maʼni maxtáá tsímáá rá. Lá maʼni majngrádiinʼ eʼwíinʼ dí garaʼwíí mani ráʼ. Ga̱jma̱a̱ rí itháan gíʼdoo numuu, lá maʼni maxtáa gagi Jeobá ráʼ.” (Deuteronomio 32:29.)
Dios kaʼyoo maʼthúlú ndiéjunʼ rí májánʼ ga̱jma̱a̱ dí ra̱májánʼ. Índo̱ nuniʼnúnʼ májánʼ xtángoo ga̱jma̱a̱ ikha ndrígóo ikhú naxkajxáánʼ muʼnimbulúʼ kuʼyáá ma̱ngaa nambáyulúʼ maguaʼdáá mbá ku̱ma̱ májánʼ. Ga̱jma̱a̱ ku̱ma̱ rúʼko̱ naʼthámúʼunlú ndiéjunʼ dí májánʼ ga̱jma̱a̱ dí ra̱májánʼ (Romanos 2: 14, 15). Mbá ku̱ma̱ rí najuiʼsngáá májánʼ nambáyulúʼ muraʼwíí májánʼ dí muʼni.
GAJMAÑAA’ ITHÁAN
Guʼyáá itháan kuduun xú káʼnii eyambáá ikha rí na̱ʼkha̱ náa Biblia ga̱jma̱a̱ ku̱ma̱ ndrígúlú índo̱ rígá mbá dí muraʼwíi rí muʼni
3. Atatsíñáminaʼ dí Biblia maxnáa ikha
Xú kaʼnii exná ikhulú ikha rí na̱ʼkha̱ náa Biblia índo̱ gúraʼwíí dí muʼni rá. Gu̱ya̱a̱ VIDEO ga̱jma̱a̱ gutamíjnála rígi̱:
-
Ndiéjunʼ nindxu̱u̱ rí muraʼwíí dí muni rá.
-
Ndíjkha jngóo Jeobá nixnúlú dí muraʼwíí muʼni rá.
-
Ndiéjunʼ nixnúlú Dios mu mambáyulúʼ muraʼwíí májánʼ dí muʼni rá.
Mú mbuʼyáá mbá xkri̱da náa kayá mbá ikha dí na̱ʼkha̱ náa Biblia, guraxnuu Efesios 5:15, 16. Nda̱wa̱á gutamíjnála xú kaʼnii gándoo “gajmalaʼ májánʼ mbiʼi rí naguanúu” mu. . .
-
. . . muraxnuu Biblia tsejtsí mbiʼi.
-
. . . manindxu̱lúʼ itháan májánʼ xa̱bu̱ bi̱ gíʼdaa̱ a̱ʼgiu̱u̱ o ajmbio̱o̱, xa̱bu̱ bi̱ gíʼdiin e̱ji̱i̱n ga̱jma̱a̱ e̱ji̱n.
-
. . . mu̱ʼgua̱ ma xúʼko̱ reunión dí narígá náa nagimbáanʼ.
4. Arasngáa ku̱ma̱ ndrígáaʼ mu maraʼwíí májánʼ dí matani
Tséʼni mingíjyúuʼ rí matraʼwíí májánʼ dí matani índo̱ náa Biblia naʼthúlú mbájmbu ndiéjunʼ dí ragíʼmaa muʼni. Mú ndiéjunʼ guʼni á mu nda̱a̱ rá. Gu̱ya̱a̱ VIDEO ga̱jma̱a̱ gutamíjnála rígi̱:
-
Xó ma na̱ʼkha̱ náa video, ndiéjunʼ niʼni ndxájulú mu maʼni ratoo ku̱ma̱ ndrígóo ga̱jma̱a̱ maraʼwíí maʼni mbá rí Jeobá nanigu̱u̱ʼ rá.
Náa numuu dí xáʼyóoʼ munda̱ʼa̱a̱ mbáa maraʼwíí dí muʼni rá. Guraxnuu Hebreos 5:14 ga̱jma̱a̱ gutamíjnála rígi̱:
-
Maski ajndu nakujmaa dí itháan xáʼni mingíjyúuʼ rí munda̱ʼa̱ mbáa maraʼwíí dí muʼni, mú ndíjkha rí mámbáa gíʼmaa mbaʼyoo ndiéjunʼ nindxu̱u̱ rí májánʼ rá.
-
Xú kaʼnii i̱yu̱lúʼ dí kuaʼdáá mambáyulú muʼsngáá májánʼ ku̱ma̱ ndrígúlú ga̱jma̱a̱ muraʼwíí májánʼ dí muʼni rá.
Índo̱ mbáa ndaʼyoo mbá mapa mu mbaʼyoo náa phú gáʼgánú, xúʼko̱ kayuuʼ nindxu̱u̱ ku̱ma̱ ndrígúlú nambáyulúʼ mbuʼyáá ndiéjunʼ phú guʼni.
5. Guʼyamajkuíí ku̱ma̱ ndrígu̱ún eʼwíinʼ
Numuu rí xúgiáanʼ ni̱ndxu̱lú mixtiʼkuáanʼ ikha jngóo mixtiʼkhu dí eraʼwíí muʼni. Xú káʼnii gándoo gusngajmá dí nduʼyamajkuíí ku̱ma̱ ndrígu̱ún eʼwíinʼ rá. Guʼyáá a̱jma̱ dí narígá.
Timbá: Mbáa ndxájulú bi̱ naniguʼ maquillaje na̱jkha̱ gáxtáa náa mbá congregación náa kúwi̱i̱n mbaʼin a̱ngiu̱lú gu̱ʼu̱ bi̱ nduyáá dí tsékujmaa májánʼ dí majmaaʼ maquillaje.
Guraxnuu Romanos 15:1 ma̱ngaa 1 Corintios 10:23, 24 ga̱jma̱a̱ gutamíjnála rígi̱:
-
Xó má na̱ʼkha̱ raʼthí náa versículo rígi̱, ndiéjunʼ gándoo maraʼwíí maʼni ndxájulú buʼko̱ rá. Ndiéjunʼ gátani ikháanʼ, á mu ku̱ma̱ ndrígóo i̱mba̱ xa̱bu̱ tséniñuʼ maʼni mbá dí ikháán naniñaaʼ matani rá.
Raga̱jma̱: Mbáa ndxájulú ndaʼyoo rí náa Biblia tséʼni gaʼduunʼ migi̱i̱n awáán iyaʼ najnga̱a̱, mú ikhaa naraʼwíí dí xágáan nditháan. Mbá mbiʼi nutháán maʼga̱ náa mbá convivio ga̱jma̱a̱ ikhí ndaʼñún a̱ngiu̱lú naʼwa̱a̱n iyaʼ najnga̱a̱.
Guraxnuu Eclesiastés 7:16 ma̱ngaa Romanos 14:1, 10 ga̱jma̱a̱ gutamíjnála rígi̱:
-
Xó má na̱ʼkha̱ raʼthí náa versículo rígi̱, ndiéjunʼ dí gándoo maraʼwíí maʼni ndxájulú buʼko̱ rá. Ndiéjunʼ gátani ikháán á mu natayáá dí mbáa naʼni mbá dí ku̱ma̱ ndrígáaʼ tséniñaaʼ matani rá.
Ndiéjunʼ eyóoʼ matani mu matraʼwíí májánʼ dí matani rá.
1. Atanda̱ʼa̱a̱ Jeobá rí mambáyaaʼ matraʼwíí dí matani (Santiago 1:5).
2. Atayáʼ ma̱ta̱ya̱a̱ itháan ga̱jma̱a̱ numuu rúʼko̱ náa Biblia ga̱jma̱a̱ náa i̱ʼwáʼ i̱yu̱lúʼ mu mataxkamaa ikha rí kagujtuminaʼ ga̱jma̱a̱ dí nandaaʼ ma̱ta̱ya̱a̱. Ma̱ngaa ma̱ndoo matrajxi̱i̱ mbáa ndxájulú bi̱ nandxa̱ʼóo májánʼ edxu̱u̱.
3. Atatsaʼwáminaʼ ndiéjunʼ gáʼniuu ku̱ma̱ ndrígáaʼ ikháán ga̱jma̱a̱ ndrígu̱ún eʼwíinʼ dí gátraʼwíí matani.
RÍ NUTHI TIKHUN: “Ikháanʼ kaʼyaaʼ matraʼwíí matani asndu ndiéjunʼ má eyaaʼ ¡Tséʼniuu má dí gúthi eʼwíinʼ!”.
-
Ndíjkha dí gíʼdoo numuu mbuʼyáá xóo eku̱mu̱u̱ Dios ga̱jma̱a̱ xóo ekumu̱ún eʼwíinʼ rá.
RÍ NAGÁJNURIYO̱O̱ʼ
Ma̱ndoo muraʼwíí májánʼ dí muʼni á mu nduʼyáá xú kaʼnii endxa̱ʼwáminaʼ Jeobá ga̱jma̱a̱ numuu rí nandulúʼ ma̱ngaa á mu nduʼyáá rí muʼni mambáñún o maʼni gawúúnʼ eʼwíinʼ.
Rí nijmañaaʼ
-
Xú kaʼnii gándoo gátraʼwíí matani dí Jeobá manigu̱u̱ʼ rá.
-
Ndiéjunʼ gándoo matani mu marasngáá ku̱ma̱ ndrígáaʼ rá.
-
Xú kaʼnii gándoo ikháán matasnga̱jmá rí natayamajkuíí xóo ekumu̱ún eʼwíinʼ rá.
ATAYÁÁ ITHÁAN
Xú kaʼnii gándoo gátraʼwíí matani rí maʼni mambaxáʼ májánʼ ga̱jma̱a̱ Jeobá rá.
“Guraʼwíí muʼni dí maxnuu gamajkhu Jeobá” (Bi̱ Nayenjgoo, 15 ñajunʼ gu̱nʼ abril tsiguʼ 2011)
Gakruaʼaaʼ itháan májánʼ xú káʼnii exnúlú xtágabu Jeobá.
Atayáá ndiéjunʼ nimbáyúu mbáa xa̱bu̱ maraʼwíí maʼni mbá dí mingíjyúuʼ.
Atayáá itháan xú káʼnii gándoo matani rí Jeobá maxtáa gagi índo̱ rígá mbá dí na̱nguá eʼthúlú mbájmbu ndiéjunʼ gíʼma muʼni.
Puede que también le interese
GRAXE̱ DÍ NAGUMA MÁ XÚʼKO̱
Xú káʼnii esngúún xa̱bu̱ ga̱jma̱a̱ numuu Biblia testigos de Jeobá rá.
Dí musngááʼ ga̱jma̱a̱ numuu Biblia testigos de Jeobá rí xáʼyóoʼ matani̱ numáá, ikháán ma̱ndoo majmaaʼ asndu xkáʼníí má Biblia rí xtaʼdáá. Ma̱ngaa, ma̱ndoo marathu̱u̱n makuwíin xúgíinʼ bi̱ kúwá náa guʼwáaʼ o bi̱ nambájxa̱a̱ʼ gajmiáanʼ.
