Náa xúgíʼ numbaaʼ, mixtiʼkhu xóo nundxaʼwamíjná xa̱bu̱ ga̱jma̱a̱ numuu iya najnga̱a̱. Tikhuin naʼwa̱a̱n nguáná gajmiún bi̱ nambáxu̱u̱n. Eʼwíinʼ nuraʼwíí dí xúwa̱a̱n nditháan dí gíʼdoo iya najnga̱a̱. Ga̱jma̱a̱ kúwá bi̱ naʼwa̱a̱n wéñuʼ asndu najngi̱i̱n. Ndiéjunʼ eʼthí náa Biblia ga̱jma̱a̱ numuu iya najnga̱a̱ rá.

1. Lá raʼkhí dí migi̱i̱n iya najnga̱a̱ rá.

Náa Biblia na̱nguá eʼthí á mu raʼkhí migi̱i̱n iya najnga̱a̱. Náa Ajngá rawuunʼ Dios naʼthí dí “vino naʼni maʼdxuu a̱jkiu̱u̱n xa̱bu̱” nindxu̱u̱ mbá regalo rí nixnúlú Jeobá (Salmo 104:14, 15). Ma̱ngaa náa Biblia na̱ʼkha̱ raʼthí ga̱jma̱a̱ numún xa̱bekha ga̱jma̱a̱ gu̱ʼu̱ bi̱ niʼwa̱a̱n iya najnga̱a̱ (1 Timoteo 5:23).

2. Ndiéjunʼ eʼthí náa Biblia ga̱jma̱a̱ numún xa̱bu̱ bi̱ nuraʼwíí muwa̱a̱n iya najnga̱a̱ rá.

Jeobá raʼkháa i̱ndó tsénigu̱u̱ʼ dí xa̱bu̱ majngi̱i̱n ma̱ngaa tsénigu̱u̱ʼ dí muwa̱a̱n wéñuʼ iya najnga̱a̱ (Gálatas 5:21). Náa Biblia naʼthí: “Xadxuʼnú maraxtaa gajmiáanʼ bi̱ naʼwa̱a̱n wéñuʼ vino” (Proverbios 23:20). Ikha jngóo á mu nuraʼwíí muʼwan iya najnga̱a̱ tséʼniuu á mu ndajkuáanʼ o gajmiúlú eʼwíinʼ, nditháan ragíʼmaa muʼwan rí asndu nánguá mbuʼyáá dí muʼni, nánguá eʼyáá dí nuʼthá o nánguá e̱ndxa̱ʼwa̱míjna̱ májánʼ. Ma̱ngaa ragíʼmaa muʼwan wéñuʼ rí asndu maʼniulú nandii. Á mu tséjmáán gúñewa̱a̱n xóo naʼwan iya najnga̱a̱, gíʼmaa muniʼñááʼ mbá kayuuʼ.

3. Xú káʼnii eʼyamajkuíí dí nuraʼwíí muni eʼwíinʼ rá.

Mámbáa kaʼyoo maraʼwíí á mu naʼga̱a̱n iya najnga̱a̱ o na̱nguá. Ragíʼmaa muʼthá numáá mbáa bi̱ naraʼwíí maga̱a̱n awa̱án iya najnga̱a̱. Asndu má ragíʼmaa mutsudaa maga̱a̱n mbáa bi̱ niraʼwíí dí xága̱a̱n (Romanos 14:10). Ga̱jma̱a̱ nuraʼwíí dí xúʼwan á mu eʼwíinʼ naʼni gawúúnʼ (atraxnuu Romanos 14:21). Xó má eʼyáá rí mbáa cristiano na̱nguá eyaʼ “rí mambáyúu i̱ndó ikhaa, ndayáʼ dí mambáñún eʼwíinʼ” (atraxnuu 1 Corintios 10:23, 24).

 GAJMAÑAAʼ ITHÁAN

4. Ndayóoʼ ma̱ta̱ya̱a̱ á mu migi̱i̱n o xígi̱i̱n

Xú káʼnii ndiʼyoo Jesús dí migi̱i̱n iya najnga̱a̱ rá. Mu mbuʼyáá xóo extiʼña̱a̱ graxe̱ rígi̱, guʼyáá timbá milagro dí niʼni ikhaa. Guraxnuu Juan 2:1-11 ga̱jma̱a̱ gutamíjnála rígi̱:

• Ndiéjunʼ eʼsngúlú dí naʼthí gi̱i̱ rí xóo Jesús ndiʼyoo iya najnga̱a̱ ga̱jma̱a̱ bi̱ naʼwa̱a̱n rá.

• Jesús táʼyoo má dí raʼkhí nindxu̱u̱ rí muwan iya najnga̱a̱ xa̱bu̱, mú ndiéjunʼ gíʼmaa mandxaʼwáminaʼ mbáa cristiano ga̱jma̱a̱ numuu i̱mba̱a̱ bi̱ naraʼwíí maga̱a̱n iya najnga̱a̱ rá.

Raʼkháa numuu dí mbáa cristiano ma̱ndoo maga̱a̱n iya najnga̱a̱ nandoo gáʼthi dí majmaa maraʼwíí dí gaʼni ga̱jma̱a̱. Guraxnuu Proverbios 22:3 ga̱jma̱a̱ gutamijná á mu májánʼ gáʼni dí mbáa maga̱a̱n iya najnga̱a̱:

• Índo̱ na̱jkha̱ kayóo carro.

• A̱ʼgu̱ bi̱ kaguewáan ada̱.

• Índo̱ médico naʼthí dí xígíin iya najnga̱a̱.

• Naʼniaaʼ mingíjyúuʼ migi̱i̱n awa̱án.

• Xtángoo naʼthí dí ragíʼmaa migi̱i̱n iya najnga̱a̱.

• Xtaa ga̱jma̱a̱ʼ bi̱ niraʼwíí dí xágáa̱nʼ iya najnga̱a̱ numuu rí niʼniuu gakhii maniñuuʼ.

Lá gíʼmaa mataxíñáʼ ikháán iya najnga̱a̱ muwa̱a̱n eʼwíinʼ índo̱ narígá ndxa̱a̱ gatsigúnʼ o náa nagimbíi̱n mbaʼin xa̱bu̱ ráʼ. Mu ma̱ta̱ya̱a̱ ndiéjunʼ gíʼmaa matani, gu̱ya̱a̱ VIDEO.

Guraxnuu Romanos 13:13 ga̱jma̱a̱ 1 Corintios 10:31, 32. Nda̱wa̱á dí niraxnula mámbá texto ga̱jma̱a̱ gutamíjnála rígi̱:

• Xú káʼnii gándoo gámbáyaaʼ ikha rígi̱ mu matraʼwíí matani mbá dí maʼdxuu a̱jkiu̱u̱n Jeobá rá.

5. Atraʼwíí ma̱ta̱ya̱a̱ nguáthá mba̱ji̱nʼ gígíi̱n

Á mu natraʼwíí migi̱i̱n iya najnga̱a̱, garmáʼáan a̱jkia̱a̱nʼ dí maski ajndu Jeobá ndaʼyoo dí na̱nguá má raʼkhí dí muʼwan, mú tsénigu̱u̱ʼ dí muʼwan wéñuʼ iya najnga̱a̱. Náá numuu rá. Guraxnuu Oseas 4:11, 18 ga̱jma̱a̱ gutamíjnála rígi̱:

• Ndiéjunʼ gamíi marigá á mu mbáa xa̱bu̱ naʼga̱a̱n wéñuʼ iya najnga̱a̱ rá.

Ndiéjunʼ gámbáyulú rí xúʼwan wéñuʼ iya najnga̱a̱ rá. Ndayóoʼ mbuʼyáá asndu náá mbri̱ga̱a̱ gíʼmaa muʼwan. Guraxnuu Proverbios 11:2 ga̱jma̱a̱ gutamíjnála rígi̱:

• Ndíjkha rí májánʼ gáʼni dí ma̱ta̱ya̱a̱ wapháá nguáthá phú mba̱ji̱nʼ gígíin rá.

6. Xátatsiʼñáʼ dí iya najnga̱a̱ maʼga̱ kañáán migi̱i̱n wéñuʼ

 RÍ NAGÁJNURIYO̱O̱ʼ

Jeobá niniñuuʼ dí muʼwanʼlu iya najnga̱a̱ mu muʼni gagimijná, mú ikhaa nditháan tsénigu̱u̱ʼ dí majngaánlú.

Rí nijmañaaʼ

• Ndiéjunʼ eʼthí náa Biblia ga̱jma̱a̱ numuu iya najnga̱a̱ rá.

• Ndiéjunʼ gamíi marigá á mu nagi̱i̱n wéñuʼ iya najnga̱a̱ rá.

• Índo̱ eʼwíinʼ nuraʼwi̱i̱ á mu dí muwa̱a̱n iya najnga̱a̱ o na̱nguá, xú káʼnii gusngajmá rí nduyamajkuíí ikháanʼ rá.