Jesús niʼsngúún xa̱bi̱i̱ dí ikhiin na̱nguá ni̱ndxu̱ún “xóo xa̱bu̱ numbaaʼ” (Juan 15:19). Dí maguajún jmbu nandoo gáʼthi dí xumbayíí mbáa partido político o rí maku̱mu̱ún kuyáá, ni má xágún guerra. Mú nguáná naʼni mingíjyúuʼ, numuu rí nutsijmáálu ga̱jma̱a̱ numuu rí naguajún jmbu. Mú, xú káʼnii gándoo gúʼni mu muguajún jmbu má xúʼko̱ náa Jeobá rá.

1. Bi̱ ni̱ndxu̱lú cristianos xú káʼnii eʼñún Xa̱bu̱ Ñajunʼ rá.

Ikháanʼ bi̱ ni̱ndxu̱lú cristiano nduʼyamajkhún Xa̱bu̱ Ñajunʼ. Jesús niʼthí: “Guxna̱a̱ César rí kaʼyoo César”. Ikha jngóo ikháanʼ nuʼnimbulú xtángoo dí rígá náa xuajen, xóo índo̱ nuthi dí muʼni numáá impuesto (Marcos 12:17). Náa Biblia naʼthí dí Jeobá má niniñuuʼ makuwá Xa̱bu̱ Ñajunʼ (Romanos 13:1). Ikha jngóo nduʼyáá dí Xa̱bu̱ Ñajunʼ na̱nguá guaʼdáá ikháá má tsiakii xóo gíʼdoo Dios. Nduʼyáá gajkhun dí Dios ga̱jma̱a̱ Xa̱bu̱ Ñajunʼ ndrígióo munimbánii xkujndu ndrígu̱ún xa̱bu̱ numbaaʼ.

2. Xú káʼnii esngajmá dí naguajúnlu jmbu rá.

Ikháanʼlu ma̱ngaa na̱nguá exuʼdámijná náa política, xó má niʼni Jesús. Índo̱ xa̱bu̱ ndiyáá milagro dí niʼni Jesús nindúún mugíiʼ mu mani̱ndxu̱u̱ rey náa tsu̱du̱u̱ Ku̱ba̱ʼ, mú ikhaa táʼndoo (Juan 6:15). Náá numuu rá. Mínaaʼ má ikhaa niʼthí nda̱wa̱á: “Náa matañájunʼ na̱nguá rígá náa numbaaʼ rígi̱” (Juan 18:36). Ikháanʼ bi̱ ni̱ndxu̱lú xa̱bi̱i̱ Jesús mbaʼa enii xóo nusngajmá dí naguajún jmbu. Mbá xkri̱da, ikháanʼlu tséjkhua náa guerra (atraxnuu Miqueas 4:3). Maski ajndu nduʼyamajkuíí símbolo ndrígóo xuajñulú, xóo bandera, mu na̱nguá eʼnilu saludar ga̱jma̱a̱ na̱nguá eʼni ajmúú ndrígóo, numuu dí á mu nuʼni xúʼko̱ mani̱ndxu̱u̱ asndu xóo musmbáti̱gulúʼ náa inuu (1 Juan 5:21). Na̱nguá embáñunluʼ ni má tséʼthá numún partido político o bi̱ nindxu̱u̱ candidato. Índo̱ nuʼni xúgíʼ rígi̱ nusngajmá dí naguajúnlu jmbu i̱ndó náa Xa̱bu̱ Ñajunʼ ndrígióo Dios, bi̱ ikhaa má nigíiʼ.

 GAJMAÑAAʼ ITHÁAN

3. Bi̱ ni̱ndxu̱lú cristianos gajkhun naguajúnlu jmbu

Jesús gajmíi̱n xa̱bi̱i̱ niniñanʼ mbá májánʼ xkri̱da muʼni. Guraxnuu Romanos 13:1, 5-7 ga̱jma̱a̱ 1 Pedro 2:13, 14. Nda̱wa̱á gu̱ya̱a̱ VIDEO ga̱jma̱a̱ gutamíjnála rígi̱:

• Ndíjkha gíʼmaa maguaʼdáá gamajkulú náa inún Xa̱bu̱ Ñajunʼ rá.

• Xú káʼnii nusngajmá dí nuʼnimbulú kuʼñúún xá.

Nguáná índo̱ narígá guerra, tikhun Xa̱bu̱ Ñajunʼ bi̱ kúwá náa país nuthi dí tséxudami̱jna̱ ikhí, maski ajndu xúʼko̱ nduyáʼ xóo mumbañún mbá najmiin bi̱ kúwá nuni guerra. Lá rúʼko̱ nindxu̱u̱ dí mariejún jmbu ráʼ. Guraxnuu Juan 17:16. Nda̱wa̱á gu̱ya̱a̱ VIDEO ga̱jma̱a̱ gutamíjnála rígi̱:

• Ndiéjunʼ eyoo gáʼthúu̱n dí mariejún jmbu rá.

Nguáná Xa̱bu̱ Ñajunʼ nuthi maguma mbá dí nanújngorámuuʼ xtángoo ndrígóo Dios. Ndiéjunʼ guʼnilú ikháanʼ ikhú rá. Guraxnuu Hechos 5:28, 29. Nda̱wa̱á gu̱ya̱a̱ VIDEO ga̱jma̱a̱ gutamíjnála rígi̱:

• Á mu mbá xtángoo ndrígóo xa̱bu̱ numbaaʼ nanújngorámuuʼ xtángoo ndrígóo Dios, xkáʼnii dí gíʼmaa munimbulú rá.

• Atatsaʼwáminaʼ ndiéjunʼ rí maʼthí mbáa Xa̱bu̱ Ñajunʼ rí xáʼnimbo̱o̱ mbáa cristiano rá.

4. Ariejún jmbu rí xóo natatsaʼwáminaʼ ga̱jma̱a̱ rí xóo natani

Guraxnuu 1 Juan 5:21. Nda̱wa̱á gu̱ya̱a̱ VIDEO ga̱jma̱a̱ gutamíjnála rígi̱:

• Ndíjkha Ayenge niraʼwíí dí xákudaminaʼ náa mbá partido político ni má rí maʼniuu saludar bandera rá.

• Dí niraʼwíí maʼni, lá májánʼ nindxu̱u̱ ráʼ. Ndiéjuunʼ rathá ikháán.

Náá o nguáná gamíi maʼni dí xáguajún jmbu rá. Gu̱ya̱a̱ VIDEO ga̱jma̱a̱ gutamíjnála rígi̱:

• Xú káʼnii gándoo musngajmá dí naguajún jmbu náa nutsi̱i̱n mbaʼin xa̱bu̱ mu maʼngu̱u̱n rá.

• Xú káʼnii gándoo muguajún jmbu índo̱ dí nuraʼwi̱i̱ muni político mbá rí mambáyulú o xámbáyulúʼ rá.

• Ndiéjunʼ gúthi ga̱jma̱á ni̱ndxu̱lú náa noticia o xa̱bu̱ bi̱ kúwi̱i̱n mijngii náa kuwáanʼ á mu naguajún jmbu rá.

 RÍ NAGÁJNURIYO̱O̱ʼ

Bi̱ ni̱ndxu̱ún cristianos nunimi̱jna̱ xóo má eʼngo̱o̱ dí maguajún jmbu mu xúxudámijná náa política, rúʼko̱ nakujmaa xóo endxaʼwamíjna̱, xóo nuthi ga̱jma̱a̱ xóo nuni.

Rí nijmañaaʼ

• Ndiéjunʼ gíʼmaa muʼni ga̱jma̱a̱ numún Xa̱bu̱ Ñajunʼ rá.

• Ndíjkha rí na̱nguá exuʼdámijná náa política rá.

• Nguáná o náá gamíi maʼni rí xúguajun jmbu rá.