KÍXNUU 47
Xtaa xawii majnguáanʼ iyááʼ ráʼ.
Numuu dí natanigajmaa Biblia mbaʼa má rí nijmañaaʼ ga̱jma̱a̱ numuu Jeobá. Mbáa rígá mbaʼa dí nitriʼkhu̱u̱ xóo xtaa numuu rí natanimbánii dí najmañaaʼ. Mbáa rígá mbá dí narikhaaʼ maraxnaxíminaʼ náa Jeobá ga̱jma̱a̱ majnguáanʼ iyááʼ. Náa kíxnuu rígi̱ mbuʼyáá xóo niʼngu̱u̱n nini mbaʼin mú majngún iyááʼ ma̱ngaa mbuʼyáá ndiéjunʼ gándoo matani mangáán mu majnguáanʼ iyááʼ.
1. Nákhá xóó tséjnguáanʼ iyááʼ, lá ndayóoʼ majmañaaʼ xúgíʼ dí naʼthí náa Biblia ráʼ.
Mu majnguáanʼ iyááʼ, ndayóoʼ “maraʼdáá mbá ku̱ma̱ kájxi dí gajkhun” (1 Timoteo 2:4). Raʼkháa rúʼko̱ eyoo gáʼthí rí nákha xóó tséjnguáanʼ iyááʼ ndayóoʼ ma̱ta̱ya̱a̱ xúgíʼ xóo extiʼña̱a̱ graxe̱ dí gútha̱a̱n ga̱jma̱a̱ numuu Biblia. Asndu a̱ngiu̱lú bi̱ mbayuuʼ má tsiguʼ eʼni rí nijngún má iyááʼ ndayóoʼ majmañún má xúʼko̱ (Colosenses 1:9, 10). Mú ndayóoʼ makruaʼaʼ dí itháan nagájnuriyoʼ dí naʼsngáa Biblia. Bi̱ kuya̱ edxu̱u̱ náa congregación mumbayáaʼ ma̱ta̱ya̱a̱ á mu ikháán najmañaaʼ má dí naʼthí náa Biblia.
2. Ndiéjunʼ eyóoʼ matani nákhá xóó tséjnguáanʼ iyááʼ rá.
Náa Biblia naʼthí: “Gatanga̱a̱ a̱jkia̱la ga̱jma̱a̱ aguwa̱ʼla” (atraxnuu Hechos 3:19). Rúʼko̱ rí ndayóoʼ matani ikháán nákha xóó tséjnguáanʼ iyááʼ. Mú, ndiéjunʼ eyoo gáʼthúu̱n rúʼko̱ rá. Nandoo gáʼthí dí magáwi̱i̱nʼ a̱jkia̱a̱nʼ ga̱jma̱a̱ numuu mbá aʼkhá dí nitani̱ ma̱ngaa dí maratha̱a̱n Jeobá maʼni mba̱a̱ a̱jkiu̱u̱n kaʼyaaʼ. Ma̱ngaa rí xátani dí ra̱májánʼ dí maraxtaa xó má Dios naniguuʼ. Ma̱ngaa nandoo gáʼthí dí ikháán naraxtaa itháan náa congregación xóo índo̱ nadxuʼ reunión ga̱jma̱a̱ índo̱ narataráʼa xóo mbáa publicador bi̱ xóó tséjngúun iyááʼ.
3. Ga̱jma̱a̱ numuu dí namíñaaʼ, lá gíʼmaa marikhaaʼ mu xájnguáanʼ iyááʼ ráʼ.
Tikhun namíñúún makiéʼkhún ga̱jma̱a̱ rí xáʼngu̱u̱n gúnimbánii dí nixudami̱jna̱ náa Jeobá. Gajkhun má mbáa nguáná makiéʼkháanʼ, xó má nigíʼnún xa̱bekha ga̱jma̱a̱ gu̱ʼu̱ bi̱ na̱ʼkha̱ raʼthí náa Biblia. Mú garmáʼáan a̱jkia̱a̱nʼ dí Jeobá na̱nguá gíʼthu̱u̱n rí xa̱bi̱i̱ mani̱ndxu̱ún jmbiin (atraxnuu Salmo 103:13, 14). Ikhaa maʼdxuu a̱jkiu̱u̱n á mu ikháán natani xúgíʼ xó má eʼnga̱a̱ʼ. Ga̱jma̱a̱ Jeobá má gámbáyáaʼ. Ikhaa má naʼthúlú dí nimbá xándoo “matsíngúlú náa ngajua rí gíʼdáanʼ Dios” (atraxnuu Romanos 8:38, 39).
GAJMAÑAAʼ ITHÁAN
Guʼyáá a̱jma̱ dí mambáyaaʼ maʼnga̱a̱ʼ matraʼníí asndu ndiéjunʼ má dí gárikhaaʼ majnguáanʼ iyááʼ: Rí matatsiʼniiʼ májánʼ Jeobá ga̱jma̱a̱ rí matatsiʼñáminaʼ dí ikhaa mámbáyaʼ.
4. Atatsiniiʼ májánʼ Jeobá
Nguáthá eyóoʼ matatsiʼniiʼ Jeobá nákhá xóó tséjnguáanʼ iyááʼ rá. Ndayóoʼ rí matatsiʼniiʼ májánʼ Jeobá mu xúʼko̱ maʼndaaʼ xtayáá ga̱jma̱a̱ matatsimbaaʼ xtayáá. Gu̱ya̱a̱ VIDEO mu ma̱ta̱ya̱a̱ xú káʼnii nini rúʼko̱ mbaʼin bi̱ nunigajmaa Biblia náa xúgíʼ numbaaʼ. Nda̱wa̱á gutamíjnála rígi̱:
-
Xó má na̱ʼkha̱ náa video, ndiéjunʼ nimbáñun tikhun mu makuwá xawii majngún iyááʼ rá.
Guraxnuu Romanos 12:2 ga̱jma̱a̱ gutamíjnála rígi̱:
-
Natayáá dí gajkhun nindxu̱u̱ dí naʼthí náa Biblia ráʼ. Naku̱ma̱a̱ʼ dí testigos de Jeobá nusngáa dí gajkhun ráʼ.
-
Á mu natani a̱jma̱ a̱jkia̱a̱nʼ, ndiéjunʼ gándoo matani rá.
5. Maʼnga̱a̱ʼ matraʼníí xúgíʼ dí narikhaaʼ majnguáanʼ iyááʼ
Xúgiáánʼ nuraʼníí xkujndu índo̱ nuraʼwíí muxnaxímíjná náa Jeobá ga̱jma̱a̱ majngúlú iyááʼ. Mu mbuʼyáá xóo nigíʼnuu mbáa, gu̱ya̱a̱ VIDEO. Nda̱wa̱á gutamíjnála rígi̱:
-
Ndiéjunʼ ndiyóoʼ maraʼnuu Narangerel mu maʼni ñajuunʼ Jeobá rá.
-
Xú káʼnii nimbáyúu dí nindoo kaʼyoo Jeobá maʼngo̱o̱ maraʼnuu xkujndu xá.
Guraxnuu Proverbios 29:25 ma̱ngaa 2 Timoteo 1:7 ga̱jma̱a̱ gutamíjnála rígi̱:
-
Tsáá exnúlúʼ tsiakii mu xámiñulu muraʼníí asndu xkáʼnii má xkujndu rá.
6. Gakumaaʼ xtayáá Jeobá dí ikhaa má gámbáyaaʼ
Jeobá má gámbáyaaʼ matani̱ dí ikhaa nandoo. Gu̱ya̱a̱ VIDEO ga̱jma̱a̱ gutamíjnála rígi̱:
-
Náá numuu rí na̱nguá nindoo majngúun iyááʼ bi̱ na̱ʼkha̱ náa video rá.
-
Ndiéjunʼ nimbáyúu maku̱mu̱u̱ kaʼyoo itháan Jeobá xá.
Guraxnuu Isaías 41:10, 13 ga̱jma̱a̱ gutamíjnála rígi̱:
-
Ndíjkha ma̱ndoo ma̱ta̱ya̱a̱ gajkhun dí maʼnga̱a̱ʼ má matanimbánii dí niratá maraxnaxíminaʼ náa Dios rá.
7. Gangajuaaʼ dí Jeobá nindoo kaʼyaaʼ
Índo̱ ikháán natatsaʼwáminaʼ itháan ga̱jma̱a̱ numuu rí xú káʼnii eyoo kaʼyaʼ Jeobá, itháan gáʼndaaʼ maraxna̱a̱ núma̱aʼ ga̱jma̱a̱ itháan gáʼndaaʼ matani ñajuunʼ kámuu mbiʼi. Guraxnuu Salmo 40:5 ga̱jma̱a̱ gutamíjnála rígi̱:
-
Xkáʼnii regalo dí nixná Jeobá naniguaaʼ itháan ikháán rá.
Profeta Jeremías nindoo kaʼyoo Jeobá ga̱jma̱a̱ Ajngá rawuunʼ ma̱ngaa ndiʼyoo rí gíʼdoo wéñuʼ numuu rí maʼthí ga̱jma̱a̱ numuu Dios. Ikhaa niʼthí: “Ajngáaʼ niʼni maxtáá gagi ga̱jma̱a̱ maʼdxuu wéñuʼ a̱jkiu̱nʼ; numuu rí ikhúún na̱jkhá kayo̱’ mbiʼyaaʼ, oh Jeobá Dios” (Jeremías 15:16). Nda̱wa̱á atriʼña̱a̱ graxe̱ rígi̱:
-
Ndíjkha rí nindxu̱u̱ mbá gamajkhu mba̱a̱ dí ma̱nindxa̱a̱ʼ testigos de Jeobá rá.
-
Nandaaʼ majnguáanʼ iyááʼ mu ma̱nindxa̱a̱ʼ testigos de Jeobá ráʼ.
-
Rígá mbá dí narikhaaʼ ráʼ.
-
Ndiéjunʼ gándoo matani mu midxunúʼ majnguáanʼ iyááʼ rá.
RÍ NUTHI TIKHUN: “Namíñúʼ dí makiéʼkhunʼ ga̱jma̱a̱ rí xánimbánuu xóo kaʼyoo maʼni mbáa Testigo bi̱ nijngúun má iyááʼ”.
-
Xúʼko̱ ku̱ma̱a̱ʼ mangáán ráʼ.
RÍ NAGÁJNURIYO̱O̱ʼ
Jeobá má gambáyaaʼ matraʼníí xúgíʼ dí narikhaaʼ majnguáanʼ iyááʼ.
Rí nijmañaaʼ
-
Lá ndayóoʼ majmañaaʼ xúgíʼ Biblia mu majnguáanʼ iyááʼ ráʼ.
-
Ndiéjunʼ eyóoʼ matani nákhá xóó tséjnguáanʼ iyááʼ rá.
-
Ndíjkha dí xáʼyóoʼ marikhaaʼ majnguáanʼ iyááʼ dí namíñaʼ rá.
ATAYÁÁ ITHÁAN
Atayáá ndiéjunʼ gíʼmaa maxkajxi̱i̱n matraʼwíí majnguáanʼ iyááʼ.
“Lá xtáa xawii mu majnguáanʼ iyááʼ ráʼ.” (Bi̱ Nayejngoo, marzo tsiguʼ 2020)
Atayáá xú káʼnii gándoo matraʼníí tikhu xkujndu dí narikhaaʼ majnguáanʼ iyááʼ.
“Ndiéjunʼ rí tséniñuʼ majngúnʼ iyááʼ rá.” (Bi̱ Nayejngoo, marzo tsiguʼ 2019)
Atayáá xú káʼnii mbáa xa̱biya̱ niʼngo̱o̱ niraʼnuu mbaʼa xkujndu mu majngúun iyááʼ.
Nákha ginii, mbáa xa̱biya̱ bi̱ mbiʼyuu Ataa na̱nguá eʼyoo á mu májánʼ gáʼni dí majngúun iyááʼ. Atayáá ndiéjunʼ nimbáyúu mu majngúun iyááʼ.
Puede que también le interese
GRAXE̱ DÍ NAGUMA MÁ XÚʼKO̱
Xú káʼnii esngúún xa̱bu̱ ga̱jma̱a̱ numuu Biblia testigos de Jeobá rá.
Dí musngááʼ ga̱jma̱a̱ numuu Biblia testigos de Jeobá rí xáʼyóoʼ matani̱ numáá, ikháán ma̱ndoo majmaaʼ asndu xkáʼníí má Biblia rí xtaʼdáá. Ma̱ngaa, ma̱ndoo marathu̱u̱n makuwíin xúgíinʼ bi̱ kúwá náa guʼwáaʼ o bi̱ nambájxa̱a̱ʼ gajmiáanʼ.
