KÍXNUU 48
Atraʼwíin májánʼ bi̱ mambajxáaʼ gajmiáanʼ
Bi̱ nambájxu̱lú májánʼ gajmiúlú nuni̱ dí makuwáanʼ itháan gagi. Ga̱jma̱a̱ xúʼko̱ tsékumu̱nlú dí kuwáanʼ gíná. Mú guʼnilú tsumáá, náa Biblia naʼthí dí raʼkháa xúgíinʼ ma̱ndoo mambajxulú gajmiúlú. Á mu xúʼko̱, xú káʼnii gándoo gúraʼwíin bi̱ mambajxulú gajmiúlú rá. Guʼyalú tikhu graxe̱ dí na̱ʼkha̱ gi̱i̱.
1. Ndiéjunʼ gumbayáaʼ matani bi̱ nambájxáaʼ gajmiáanʼ rá.
Mbaʼa nuthu nuʼni xó má eni xa̱bu̱ bi̱ kuwáánʼ itháan mbayuuʼ gajmiúlú, tséʼniuu á mu numbayúlúʼ muʼni dí májánʼ o dí raʼkhí. Narígá xúʼko̱ maski ajndu nambáxulúʼ gajmiúlú mijngii o i̱ndó nuʼtámíjná gajmiúlú náa Internet. Xúʼko̱ naʼthí náa Biblia: “Bi̱ najngruigo̱o̱ gajmíi̱n xa̱bu̱ bi̱ nundxa̱ʼwa̱a̱ májánʼ edxu̱ún, xúʼko̱ má gándxa̱ʼóo májánʼ edxu̱u̱ ma̱ngaa, mú bi̱ nambáxu̱u̱ gajmíi̱n xa̱bu̱ skágunʼ magiʼnuu dí ra̱májánʼ” (Proverbios 13:20). Á mu bi̱ nambajxulú gajmiúlú nandún kuyáá Jeobá ga̱jma̱a̱ nduyamajkuíí ikhaa ma̱ndoo mumbayulu mu makuwáanʼ mijngii náa Jeobá ga̱jma̱a̱ muraʼwíi májánʼ rí muʼni. Á mu ikháán xtaʼdiin bi̱ nambájxáaʼ gajmiáanʼ bi̱ na̱nguá kúwá náa congregación, ma̱ndoo muni dí matsinguáanʼ náa Jeobá. Ikha jngóo náa Biblia naxnulu consejo rígi̱, gúraʼwíin májánʼ bi̱ mambajxulú gajmiúlú. Índo̱ bi̱ nambájxulú gajmiúlú nandún kuyáá Dios, xúʼko̱ nambajxulú itháan májánʼ gajmiúlú. Ga̱jma̱a̱ xúʼko̱ nuʼnimbulúʼ consejo rígi̱: “Ikha jngóo guxnamíjnála tsiakii, gumbáyumijnálá, xó má kuwáanʼ ru̱ni̱” (1 Tesalonicenses 5:11).
2. Lá naxmiéjuunʼ Jeobá rí matraʼwíin bi̱ mambájxáaʼ gajmiáanʼ ráʼ.
Jeobá naraʼwíin májánʼ xa̱bu̱ bi̱ nambájxu̱u̱ gajmíi̱n. Náa Biblia naʼthí, “ikhaa nambáxu̱u̱ gajmíi̱n bi̱ nuni rí jmbu” (Proverbios 3:32). Xú káʼnii gákumuu Jeobá á mu nambájxulú gajmiúlú bi̱ tsíñún kuyáá ikhaa rá. ¡Rakha tháán gaxtáa gíná! (Atraxnuu Santiago 4:4). Á mu nuniʼñán mbájkhu rambajxulú gajmiúlú xa̱bu̱ xkawiinʼ ga̱jma̱a̱ na̱jkua̱ kanuu mijngii náa ikhaa ma̱ngaa nambájxulú gajmiúlú bi̱ nandún kuyáá rakha tháán gáʼdxuu Jeobá ga̱jma̱a̱ maʼndoo rí mambajxulú gajmiúlú (Salmo 15:1-4).
GAJMAÑAAʼ ITHÁAN
Guʼyáá ndíjkha rí gíʼdoo wéñuʼ numuu rí muraʼwíin májánʼ bi̱ mambajxulú gajmiúlú ga̱jma̱a̱ xú káʼnii gándoo gumbayúlú ikhiin mu xúʼko̱ makuwanlu májánʼ.
3. Tsumáá gátani índo̱ gatraʼwíin bi̱ mambajxáaʼ gajmiáanʼ
Ragíʼmaa mambajxáaʼ gajmiáanʼ xa̱bu̱ bi̱ na̱nguá eñún kuyáá Dios ga̱jma̱a̱ bi̱ tséyamajkuíí xtángoo ndrígóo. Gu̱ya̱a̱ VIDEO ga̱jma̱a̱ gutamíjnála rígi̱:
-
Xú káʼnii gándoo maʼni rí asndu xúʼyáá xóo gambáxulúʼ gajmiúlú bi̱ nuni dí raʼkhí rá.
Guraxnuu 1 Corintios 15:33 ga̱jma̱a̱ gutamíjnála rígi̱:
-
Tsíin xa̱bi̱i̱ bi̱ ragíʼmaa mambajxáaʼ gajmiáanʼ ku̱ma̱a̱ʼ ikháanʼ rá. Náá numuu rá.
Guraxnuu Salmo 119:63 ga̱jma̱a̱ gutamíjnála rígi̱:
-
Ndiéjunʼ rí gíʼmaa mataʼyáʼ ikháán náa mbáa bi̱ nambajxáaʼ ga̱jma̱a̱ʼ rá.
Xóo mbá manzana rí ni̱ʼga̱ ma̱ndoo maʼni rí mi̱ga̱ i̱ʼwáʼ ma̱ngaa. Xú káʼnii gúni maʼchíín bi̱ nambajxáaʼ gajmiáanʼ bi̱ nuni dí raʼkhí rá.
4. Ma̱ndoo mambajxulú májánʼ gajmiúlú xa̱bu̱ bi̱ mixtiʼkuiin ki xóo ikháánʼ
Náa Biblia naʼthí ga̱jma̱a̱ numuu David ma̱ngaa Jonatán, a̱jmi̱i̱n xa̱bu̱ bi̱ nikúwá nákha wajyúúʼ. Ga̱jma̱a̱ mixtiʼkhu tsigúnʼ ma̱ngaa xóo nikúwi̱i̱n mú nimbajxu̱u̱n májánʼ wéñuʼ. Guraxnuu 1 Samuel 18:1 ga̱jma̱a̱ gutamíjnála rígi̱:
-
Ndíjkha rí tséyóoʼ rí xúgíinʼ bi̱ nambájxulú gajmiúlú maʼni mbríguu tsiguúnʼ xóo ikháanʼ o bi̱ guaʼdáá rá.
Guraxnuu Romanos 1:11, 12 ga̱jma̱a̱ gutamíjnála rígi̱:
-
Xú káʼnii exnámijná tsiakii bi̱ nambajxuun bi̱ nandún kuyáá Jeobá rá.
Xú káʼnii nixkamin bi̱ mambajxúu gajmíi̱n mbáa dxámá náa rí na̱nguá gíʼthún rá. Gu̱ya̱a̱ VIDEO ga̱jma̱a̱ gutamíjnála rígi̱:
-
Ndíjkha rí nixmiéjuunʼ anu̱u̱ ga̱jma̱a̱ ru̱dúu̱ Akil ga̱jma̱a̱ numún bi̱ nambájxuu gajmíi̱n bi̱ gíʼdiin náa escuela xá.
-
Ndíjkha rí niniguuʼ Akil rí xóo nimbájxuu gajmíi̱n nákha ginii jiámá buʼko̱ rá.
-
Ndiéjunʼ niʼni mu xákumu rí xtáa mbáwíi xá.
5. Xú káʼnii gátani mu mambajxáaʼ májánʼ gajmiáanʼ eʼwíinʼ
Atayáá xóo ma̱ndoo mataxkamiin bi̱ mambajxáaʼ gajkhun gajmiáanʼ ma̱ngaa rí gani̱ndxa̱ʼ xúʼko̱ mangáanʼ. Gu̱ya̱a̱ VIDEO.
Guraxnuu Proverbios 18:24 ma̱ngaa 27:17 ga̱jma̱a̱ gutamíjnála rígi̱:
-
Xú káʼnii embayumijná bi̱ nambájxu̱u̱n gajkhun rá.
-
Lá xtaʼdiin bi̱ nambájxáaʼ májánʼ gajmiáanʼ xó má naʼthí náa Proverbios rá. Á mu na̱nguá, xú káʼnii gándoo gátaxkamiin xá.
Guraxnuu Filipenses 2:4 ga̱jma̱a̱ gutamíjnála rígi̱:
-
Mu maraʼdiin bi̱ mambajxáaʼ májánʼ gajmiáanʼ, ikháán mangáán gíʼmaa ma̱nindxa̱a̱ʼ májáanʼ xa̱bu̱. Xú káʼnii gándoo gátani rá.
Mu maraʼdiin bi̱ mambajxáaʼ májánʼ gajmiáanʼ ikháán mangáán gíʼmaa mani̱ndxa̱a̱ʼ májáanʼ xa̱bu̱.
RÍ NUTHI TIKHUN: “Mu xáxtáá mbáwun, mambajxúʼ má gajmíi̱n bi̱ kuʼdíinʼ”.
-
Ndiéjunʼ tatsaʼwáminaʼ ikháán rá.
RÍ NAGÁJNURIYO̱O̱ʼ
Índo̱ nuraʼwíin májánʼ bi̱ mambajxúlú gajmiúlú xúʼko̱ nakuwáanʼ itháán májánʼ ga̱jma̱a̱ nuʼni rí maʼdxuu Jeobá.
Rí nijmañaaʼ
-
Ndíjkha rí naxmiéjuunʼ Jeobá índo̱ natraʼwíin bi̱ mambajxáaʼ gajmiáanʼ rá.
-
Tsíin nindxúu̱n bi̱ ragíʼmaa mambajxáaʼ gajmiáanʼ rá.
-
Xú káʼnii gándoo gambajxáaʼ itháán májánʼ gajmiáanʼ xa̱bu̱ bi̱ nuni rí májánʼ rá.
ATAYÁÁ ITHÁAN
Atayáá xú káʼnii gándoo gumbayúlú bi̱ nambájxulú gajkhun gajmiúlú índo̱ kuwáanʼ mbiʼi mingíjyúuʼ.
“Gambáxulúʼ májánʼ nákha xóó tséʼkha̱ fin” (Bi̱ Nayejngoo, noviembre tsiguʼ 2019)
Atayáá tikhu rí ma̱ndoo mambáyáaʼ mu mambajxáaʼ májánʼ gajmiáanʼ eʼwíinʼ.
Ndiéjunʼ gíʼmaa ma̱ta̱ya̱a̱ ikháán náa bi̱ nambajxáaʼ gajmiáanʼ náa internet rá.
Atraxnuu historia ndrígóo xa̱bu̱ náa naʼthí “Nindoʼ rí magúʼdaa mbáa anu̱ʼ” atayáá ndíjkha niriʼkuwíin bi̱ nambajxuu gajmíi̱n.
“Biblia niriʼkhu̱u̱ rí xóo makuwá” (Bi̱ Nayejngoo, 1 ñajunʼ gu̱nʼ abril tsiguʼ 2012)
Puede que también le interese
GRAXE̱ DÍ NAGUMA MÁ XÚʼKO̱
Xú káʼnii esngúún xa̱bu̱ ga̱jma̱a̱ numuu Biblia testigos de Jeobá rá.
Dí musngááʼ ga̱jma̱a̱ numuu Biblia testigos de Jeobá rí xáʼyóoʼ matani̱ numáá, ikháán ma̱ndoo majmaaʼ asndu xkáʼníí má Biblia rí xtaʼdáá. Ma̱ngaa, ma̱ndoo marathu̱u̱n makuwíin xúgíinʼ bi̱ kúwá náa guʼwáaʼ o bi̱ nambájxa̱a̱ʼ gajmiáanʼ.
