KÍXNUU 50
Xú káʼnii gándoo makuwáanʼ gagi mbá guʼwáanʼ (níʼkhóo 2)
E̱ji̱n nindxu̱ún bi̱ Jeobá nimíniáanlú. Ga̱jma̱a̱ ikhaa gíʼthu̱u̱n rí xabuanii muñewa̱a̱n májánʼ regalo rígi̱. Ikha jngóo naxnún májánʼ consejo rí mambáñuun. Xúʼko̱ má naxnún consejo e̱ji̱n ma̱ngaa mu makuwíinʼ gagi mbá guʼwíin.
1. Ndiéjunʼ consejo naxnún Jeobá xabuanii rá.
Jeobá nagíʼthu̱u̱n rí xabuanii ga̱jma̱a̱ gu̱ʼú wanii maʼndún kuñún e̱jñún ga̱jma̱a̱ rí muriyaʼ mbiʼi makuwíin gajmiún. Ma̱ngaa nandoo rí muñewu̱u̱n náa gamíi ga̱jma̱a̱ rí musngúún xó má naʼthí náa Biblia (Proverbios 1:8). Jeobá naʼthúún xabuanii rígi̱: “Gunimbanuu xó má naʼthí ikha ndrígóo Jeobá” (atraxnuu Efesios 6:4). Jeobá ra̱ʼkhá tháán nanigu̱u̱ índo̱ ndaʼyoo rí xabuanii najmún ikha ndrígóo mu muni manii e̱jñún ga̱jma̱a̱ rí tséniñaaʼ ñajunʼ rígi̱ náa ñawúúnʼ eʼwíinʼ.
2. Ndiéjunʼ consejo exnún Jeobá e̱ji̱n rá.
Jeobá naʼthúún e̱ji̱n rí ‹munimbu̱ún kuñún anu̱ún ga̱jma̱a̱ ru̱dún› (atraxnuu Colosenses 3:20). Á mu ada̱ ndaʼyamajkhuu anu̱u̱ ga̱jma̱a̱ ru̱dúu̱ ma̱ngaa naʼnimbo̱o̱ kaʼñún, maʼni dí makuwi̱i̱n gagi ma̱ngaa maxtáa gagi Jeobá (Proverbios 23:22-25). Jesús nigíʼ májánʼ xkri̱da nákha ninindxu̱u̱ dxámáa; maski ajndu ikhaa ninindxu̱u̱ xa̱bu̱ jmbii, mú niʼnimbo̱o̱ kaʼyoo anu̱u̱ ga̱jma̱a̱ ru̱dúu̱ maski ajndu ikhiin ninindxu̱ún xa̱bu̱ aʼkhá (Lucas 2:51, 52).
3. Ndiéjunʼ gándoo muni xúgíinʼ náa mbá guʼwíin mu makuwá mijngii náa Jeobá rá.
Á mu xtaʼdiin ejña̱a̱n, mbáa nandaaʼ rí mangiin maʼndún kuyáá Jeobá xó má ikháán nandaaʼ xtayáá. Xú káʼnii gándoo gátani rá. Rí matanimbánii consejo rígi̱ dí na̱ʼkha̱ náa Biblia: “Gíʼmaa matagídáʼ ajngóo Jeobá náa edxu̱u̱ a̱ʼdiáaʼ ga̱jma̱a̱ gíʼmaa marata̱a̱n índo̱ gáraʼwún náa guʼwáaʼ ma̱ngaa índo̱ gajngruigaʼ náa kamba̱a̱” (Deuteronomio 6:7). Ajngáa matagídáʼ nandoo gáʼthúun rí xátatsiʼñán rarasngáá. Mbáa ikháán má natayáá rí ndayóoʼ maratha̱a̱n mbaʼa nuthu a̱ʼdiáaʼ mu xúʼko̱ xámbumuu. Rí nandoo gáʼthi náa texto rígi̱ dí ikháán ndayóoʼ mataʼyáʼ xóo ma̱ndoo maratha̱a̱n a̱ʼdiáaʼ ga̱jma̱a̱ numuu Jeobá rí mbá mbiʼi. Ma̱ngaa májánʼ wéñuʼ rí mbá xúgíinʼ bi̱ kúwá náa guʼwáaʼ muriyaʼ mbiʼi mbuyamajkuíí Jeobá índo̱ munigajmaa Biblia mámbá xmáná. Ga̱jma̱a̱ rí matanigajmaa Biblia mbáwíin mámbá xmáná mambáyáaʼ wéñuʼ maski ajndu na̱nguá xtaʼdiin ejña̱a̱n.
GAJMAÑAAʼ ITHÁAN
Guʼyáá tikhu consejo rí nañambáa náa mbá guʼwíin makuwá májánʼ ga̱jma̱a̱ makuwá gagi.
4. Arasngúún ejña̱a̱n ga̱jma̱a̱ ngajua
Dí marasngáá a̱ʼdiáaʼ nguáná ma̱ndoo maʼni gakhii. Xú káʼnii gándoo gámbáyáaʼ Biblia rá. Guraxnuu Santiago 1:19, 20 ga̱jma̱a̱ gutamíjnála rígi̱:
-
Xú káʼnii gándoo xabuanii musngajmún e̱jñún rí nandún kuñúún índo̱ nutamijná gajmiún xá.
-
Ndíjkha dí ragíʼmaa rí mbáa xa̱bu̱ nikhii maxprígúu a̱ʼdióo índo̱ nakiʼnáa rá. a
5. Atie̱wu̱u̱n ejña̱a̱n
Mu matiewu̱u̱n ejña̱a̱n gíʼdoo wéñuʼ numuu dí maratha̱a̱n mambáa dí ikhaa ga̱jma̱a̱ numuu rí nubún xa̱bu̱. Gajkhun má, mbáa xáʼkha̱ a̱jkia̱a̱nʼ marathu̱u̱n. Gu̱ya̱a̱ VIDEO ga̱jma̱a̱ gutamíjnála rígi̱:
-
Ndíjkha rí naʼniún gakhii tikhuun xabuanii muthún e̱jñún ga̱jma̱a̱ numuu rí nubún xa̱bu̱ rá.
-
Ndiéjunʼ nimbáñún tikhun xabuanii mu muthún e̱jñún ga̱jma̱a̱ numuu rí nubún xa̱bu̱ rá.
Xóo má nijuiʼtáriyaʼ náa Biblia, rí numbaaʼ rígi̱ maʼni itháán xkawiʼ. Guraxnuu 2 Timoteo 3:1, 13 ga̱jma̱a̱ gutamíjnála rígi̱:
-
Tikhun xa̱bu̱ xkawi̱i̱nʼ bi̱ na̱ʼkha̱ raʼthí náa versículo 13 nurugui̱i̱n ga̱jma̱a̱ tsiakii e̱ji̱n bi̱ majkhiin. Mú, ndíjkha rí gíʼdoo wéñuʼ numuu rí xabuanii muthún e̱jñún ga̱jma̱a̱ numuu rí nubún xa̱bu̱ rá. Ga̱jma̱a̱ ndiéjunʼ ma̱ndoo muni mu muñewu̱u̱n xá.
Lá natayáá má ráʼ.
Testigos de Jeobá nurawíi mbaʼa wéñuʼ i̱yi̱i̱ʼ rí ma̱ndoo mambáñún xabuanii mu muthún e̱jñún ga̱jma̱a̱ numuu rí nubún xa̱bu̱ ga̱jma̱a̱ xóo gándoo guñewu̱u̱n mu xutsijmiin. Rígi̱ nindxu̱u̱ tikhu:
-
Guñewu̱u̱n e̱jña̱la (video)
-
Aprendamos del Gran Maestro, capítulos 10 ga̱jma̱a̱ 32
-
“Xóo gáratha̱a̱n a̱ʼdiáaʼ ga̱jma̱a̱ numuu rí nubu̱únʼ xa̱bu̱” (¡Awaxunʼ!, núm. 5 tsiguʼ 2016)
6. Atiamajkuíí ana̱a̱ʼ ga̱jma̱a̱ ru̱dáaʼ
E̱ji̱n ga̱jma̱a̱ jiámá ma̱ngaa wa̱ʼxa̱ʼ gíʼmaa rí mbuyamajkún anún ga̱jma̱a̱ rudún, rúʼko̱ nusngajma ga̱jma̱a̱ xóo nuthúún. Gu̱ya̱a̱ VIDEO ga̱jma̱a̱ gutamíjnála rígi̱:
-
Ndíjkha rí májánʼ rí mbáa dxámá o dxáʼgú matamijná ga̱jma̱a̱ gamajkhu anu̱u̱ rá.
-
Xú káʼnii gándoo mbáa dxámá o dxáʼgú masngájma rí ndaʼyamajkuu anu̱u̱ o ru̱dúu̱ rá.
Guraxnuu Proverbios 1:8 ga̱jma̱a̱ gutamíjnála rígi̱:
-
Xú káʼnii gíʼmaa mbaʼyoo mbáa dxámá o dxáʼgú índo̱ anu̱u̱ ga̱jma̱a̱ ru̱dúu̱ naʼthúu̱n dí maʼni xá.
7. Guyamajkuíí Jeobá mbá guʼwáanʼ
Testigos de Jeobá nuriyaʼ mbiʼi kiejuunʼ rí mbá xmáná mu mbuyamajkuíí Dios mbá guʼwi̱i̱n. Xú káʼnii nindxu̱u̱ rí nunigajma̱a̱ mbá guʼwi̱i̱n xá. Gu̱ya̱a̱ VIDEO ga̱jma̱a̱ gutamíjnála rígi̱:
-
Ndiéjunʼ gándoo gambáyála mu xuniʼñáá runigajma̱a̱ mbá guʼwáanʼ rá.
-
Xú káʼnii gándoo gúni̱ xabuanii rí índo̱ nunigajma̱a̱ mbá guʼwi̱i̱n maʼni rí xúgíinʼ mambáñún ga̱jma̱a̱ manigu̱u̱n rá. (Atayáá xtiʼkhu náa nagi̱ʼdu̱u̱.)
-
Lá naku̱ma̱a̱ʼ dí rígá mbá dí maʼni gakhii mu munigajma̱a̱ mbá guʼwáanʼ ráʼ. Ndiéjuunʼ nindxu̱u̱ rá.
Nákha wajyúuʼ, Jeobá nagi̱ʼthu̱u̱n rí mutamijná israelitas dí naʼthí náa Kiʼniraʼmáʼ. Guraxnuu Deuteronomio 6:6, 7 ga̱jma̱a̱ gutamíjnálá rígi̱:
-
Xú káʼnii gándoo gataʼgíʼ matanimbánii ikháán consejo rígi̱ rá.
Xkri̱da xóo ma̱ndoo matanigajma̱a̱ gajmiáanʼ bi̱ kúwá náa guʼwáaʼ:
-
Guniratmijnálá mbóó rí mbuya̱a̱ náa reunión dí narígá náa congregación.
-
Guraxnuu ga̱jma̱a̱ gutamijnála mbá dí naʼthí náa Biblia rí manigu̱u̱nʼ xúgíinʼ bi̱ kúwá náa guʼwáaʼ.
-
Á mu xtaʼdiin ejña̱a̱n majkhiin, atrígú mbá rí ma̱ndoo muni e̱ji̱n dí rígá náa jw.org.
-
Á mu xtaʼdiin ejña̱a̱n bi̱ wani má, atayáʼ mbá artículo dí rígá náa jw.org, náa naʼthí ga̱jma̱a̱ numún jiámá o wa̱ʼxa̱ʼ.
-
Guni xóo ikháanʼ nindxa̱la xa̱bu̱ bi̱ naʼthí náa Biblia.
-
Gu̱ya̱a̱ mbá video dí rígá náa jw.org nda̱wa̱á gutamíjnála.
RÍ NUTHI TIKHUN: “E̱ji̱n xándoo mikru̱ʼu̱u̱n Biblia numuu dí gakhii wéñuʼ eʼthí”.
-
Ndiéjunʼ ku̱ma̱a̱ʼ ikháán rá.
RÍ NAGÁJNURIYO̱O̱ʼ
Jeobá nandoo rí xabuanii maʼndún kuñún e̱jñún, musngúún, muñewu̱u̱n; ma̱ngaa rí e̱ji̱n mbuyamajkún anún ga̱jma̱a̱ rudún mu xúʼko̱ mbá guʼwíin mbuyamajkuíí ikhaa.
Rí nijmañaaʼ
-
Xú káʼnii gándoo xabuanii musngúún ga̱jma̱a̱ muñewu̱u̱n e̱jñún rá.
-
Xú káʼnii gándoo musngajma e̱ji̱n rí nduyamajkhún anu̱ún ga̱jma̱a̱ rudún rá.
-
Á mu nuriyaʼ mbiʼi mbuyamajkuíí Dios mbá guʼwíin mámbá xmáná, ndiéjunʼ gáñambáá rá.
ATAYÁÁ ITHÁAN
Ndiéjunʼ ikha rí mambáñún ejña̱a̱n índo̱ gani rá.
“Majun ikha rí mbaʼyóoʼ misʼngúún e̱jña̱la” (¡Awaxunʼ!, núm. 2 tsiguʼ 2019)
Atraxnuu tikhu consejo rí mambáñún bi̱ nuñewu̱u̱n bi̱ wanii.
Atayáá xú káʼnii mbáa xa̱bu̱ bi̱ tséʼyoo xóo maxnún consejo e̱ji̱i̱n ninindxu̱u̱ mbáa májáanʼ xa̱bu̱ nikhii.
Atayáá xú káʼnii mbáa xa̱bu̱ nikhii nambájxu̱u̱ májánʼ gajmíi̱n e̱ji̱i̱n.
a Índo̱ náa Biblia naʼthí rí muxprigún, nandoo gáʼthúu̱n rí musngúún ga̱jma̱a̱ muxnún ikha, mú xúni ga̱jma̱a̱ sngañún o rí muni gíníin (Proverbios 4:1).
Puede que también le interese
GRAXE̱ DÍ NAGUMA MÁ XÚʼKO̱
Xú káʼnii esngúún xa̱bu̱ ga̱jma̱a̱ numuu Biblia testigos de Jeobá rá.
Dí musngááʼ ga̱jma̱a̱ numuu Biblia testigos de Jeobá rí xáʼyóoʼ matani̱ numáá, ikháán ma̱ndoo majmaaʼ asndu xkáʼníí má Biblia rí xtaʼdáá. Ma̱ngaa, ma̱ndoo marathu̱u̱n makuwíin xúgíinʼ bi̱ kúwá náa guʼwáaʼ o bi̱ nambájxa̱a̱ʼ gajmiáanʼ.
