Xúgiáanʼ nanigulúʼ muʼgíʼ xtíin xó ma eyulú ikháanʼ ga̱jma̱a̱ rí muʼni kaʼwumijnáá. Á mu nuʼgíʼ muʼnimbánii ikha rí na̱ʼkha̱ náa Biblia, xúʼko̱ ma̱ndoo muʼgíʼ xtíñúlúʼ xó má nanigulúʼ ma̱ngaa muʼgíʼ muni rí naniguuʼ Jeobá. Mbuʼyáá tikhu dí ikha.

1. Ndiéjunʼ ikha rí na̱ʼkha̱ náa Biblia mambáyulúʼ xóo muʼgíʼ xtíñúlúʼ rá.

Xúgiáanʼ bi̱ ni̱ndxu̱lú cristianos gíʼmaa muraʼwíí májánʼ “xtíin ma̱ngaa xó muʼgílu ga̱jma̱a̱ rí mundxaʼwa̱a̱ májánʼ edxu̱lu”. Ma̱ngaa índo̱ nakujmáán mikaʼwáanʼ nakujmaa rí “nixnajxi̱mijna̱ náa Dios” (1 Timoteo 2:9, 10). Atayáá mbá a̱jkhu̱ ikha rí najmañulú náa texto rígi̱. 1) Xtíñúlúʼ “gíʼmaa maʼni májánʼ o kaʼwu”. Náa xuajñuu Jeobá a̱ngiu̱lú nugíʼ mbaʼa xtíñún xó ma nanigu̱u̱nʼ ikhiin, xó má natayáá náa reunión rí naguáʼdáá náa congregación mu xtíñúlúʼ ga̱jma̱a̱ xóo xtigúu edxu̱lú gíʼmaa rí masngájmaa gamajkhu náa Dios bi̱ nduʼyamajkuíí. 2) “Ndayóoʼ rí muʼgíʼ mbá xtíin rí nakruiyo̱o̱ʼ májánʼ” rígi̱ nandoo gáʼthúu̱n rí xúʼgíʼ xtíin rí jxa̱ʼ, rí nakutaʼa o rí chíjua̱, dí maʼni rí eʼwíinʼ maguaʼa rí mu̱bún ga̱jma̱á ni̱ndxu̱lú. 3) Nusngajmá “ma̱ngaa rí nundxa̱ʼwáá májánʼ edxu̱lú” índo̱ ikháán tséniñamíjná muʼgíʼ xtíin xó ma nugíʼ xtíñún xa̱bu̱ numbaaʼ. 4) Ga̱jma̱a̱ xóo kujmáanlú, rúʼko̱ guyáá eʼwíinʼ rí “nduʼyamajkuíí mbáa Dios bi̱ gajkuwiin” (1 Corintios 10:31).

2. Xú káʼnii gákumu̱ún eʼwíinʼ cristiano ga̱jma̱a̱ rí xóo xtíin dí nuʼgíʼ rá.

Gajkhun má ikháanʼ kaʼyulú muraʼwíí káʼnii xtíin muʼgíʼ mu gíʼmaa mundxaʼwamíjná ginii á mu xúʼni mangrádiin eʼwíinʼ. Ikha jngóo nuʼni xó ma eʼngo̱o̱ mu xúʼni gawúúnʼ eʼwíinʼ. Nuʼnimbánii consejo rígi̱: “Mámbáa rí ikháanʼ gáʼni mbá rí májánʼ ga̱jma̱a̱ numuu xa̱bu̱ numba ga̱jma̱a̱, mu xúʼko̱ mambáyúu ga̱jma̱a̱ maxnúu tsiakii” (atraxnuu Romanos 15:1, 2).

3. Xú káʼnii gambáñun eʼwíinʼ á mu nuʼgíʼ xtíin dí májánʼ rá.

Nuʼnimíjnalu rí mambáa mbiʼi muʼgíʼ xtíñúlúʼ xóo ma kaʼyoo. Mú itháán gíʼmaa muñewa̱a̱n xtíñúlúʼ rí nuʼgíʼ índo̱ na̱jkua̱lú reunión rí naguáʼdáá náa congregación ma̱ngaa índo̱ nagájnulú gúʼtaraʼa. Numuu rí tsíyulú ga̱jma̱a̱ rí xó ma muʼgíʼ xtíin xa̱bu̱ mundxaʼwamíjna̱ dí raʼkhí ga̱jma̱a̱ numulú o ajngáa dí najkua kuʼyúlú. Rí phú nandulú, dí eʼwíinʼ majmañún rí gajkhun ma̱ngaa rí “muni̱ tsíʼyáa xúgíʼ kiʼsngáa ndrígóo Dios” (Tito 2:10).

 GAJMAÑAAʼ ITHÁAN

4. Á mu nakujmáanʼ májánʼ nasngájma rí nduʼyamajkuíí Jeobá

Ndíjkha rí gíʼdoo numuu rí maxmiéjunlú ga̱jma̱a̱ dí xóo nuʼgíʼ xtíñúlúʼ rá. Guraxnuu Salmo 47:2 ga̱jma̱a̱ gutamíjnála rígi̱:

• Índo̱ nduʼyáá dí ikháanʼlu nusngajmá xóo nindxu̱u̱ Jeobá, xú káʼnii xtíin gíʼmaa muʼgíʼ rá.

• Lá gíʼdoo numuu muñewa̱a̱n xóo nuʼgíʼ xtíñúlúʼ índo̱ na̱jkua̱lú náa reunión ma̱ngaa índo̱ nagájnulú gúʼtaraʼa rá. Ndíjkha ku̱ma̱a̱ʼ xúʼko̱ rá.

5. Xóo gándoo gúraʼwíí májánʼ xtíñúlúʼ ma̱ngaa rí xóo muʼni kaʼwumijnáanʼlu

Gu̱ya̱a̱ VIDEO.

Tséʼniuu nguáthá numuu xtíñúlúʼ. Rí itháán gíʼdoo numuu rí maʼni kaʼwu ma̱ngaa dí maʼni xó má kaʼyoo. Guraxnuu 1 Corintios 10:24 ga̱jma̱a̱ 1 Timoteo 2:9, 10. Nda̱wa̱á gutamíjnála rígi̱ ndíjkha ragíʼmaa muʼgíʼ xtíin. . .

• . . . dí rakáʼyoo o rí tsaga.

• . . . rí jxa̱ʼ, rí naʼkutaʼa o rí maʼni dí eʼwíinʼ magua̱ʼa̱ rí mubún ga̱jma̱á ni̱ndxu̱lú.

Maski ajndu ikháanʼ nánguá kuwáánʼ xó má naʼthí náa xtángoo ndrígóo Moisés, mú náa xtángoo rígi̱ naʼni mbuʼyáá rí xóo endxa̱ʼóo edxu̱u̱ Jeobá. Guraxnuu Deuteronomio 22:5 ga̱jma̱a̱ gutamíjnála rígi̱:

• Ndíjkha dí ragíʼmaa rí mbáa a̱ʼgu̱ magíʼ xtíin dí makujmaa xóo xa̱biya̱ o rí mbáa xa̱biya̱ magíʼ xtíin dí makujmaa rí nindxu̱u̱ a̱ʼgu̱ rá.

Guraxnuu 1 Corintios 10:32, 33 ga̱jma̱a̱ 1 Juan 2:15, 16 ga̱jma̱a̱ gutamíjnála rígi̱:

• Á mu ga̱jma̱a̱ dí xóo nuʼgíʼ xtíñúlúʼ naʼni rí xúndxaʼwamíjna̱ májánʼ xa̱bu̱ bi̱ kúwá mijngii náa kúwáanʼ o náa congregación ndrígúlú. Lá gíʼmaa maxmiéjunlú rúʼko̱ ráʼ. Náá numuu rá.

• Xú káʼnii eguʼwún nugíʼ xtíñún xa̱bu̱ náa mijngii xtaa ikháán rá.

• Lá naku̱ma̱a̱ʼ dí tikhu xtíin rúʼko̱ ragíʼmaa magíʼ mbáa cristiano ráʼ. Ndíjkha dí xúʼko̱ ratá rá.

 RÍ NAGÁJNURIYO̱O̱ʼ

Índo̱ nuraʼwíí májánʼ dí xóo nuʼgíʼ xtíñúlúʼ ma̱ngaa rí xóo muʼni kaʼwumijnáanʼlu nusngajmá rí nduʼyamajkuíí Jeobá ga̱jma̱a̱ eʼwíinʼ xa̱bu̱.

Rí nijmañaaʼ

• Ndíjkha rí gíʼdoo numuu eʼyoo Jeobá ga̱jma̱a̱ dí xóo nuʼgíʼ xtíñúlúʼ rá.

• Ndiéjunʼ ni̱ndxu̱u̱ tikhu texto rí ma̱ndoo maxnúlú ikha mu muraʼwíí májánʼ xtíñulú rá.

• Lá ma̱ndoo maʼni rí xóo xtíin dí nuʼgíʼ maʼni dí eʼwíinʼ xa̱bu̱ muthi dí májánʼ ga̱jma̱a̱ numuu Jeobá rá. Xú káʼnii rá.