Jesús nindxu̱u̱ bi̱ “kayá edxu̱u̱ náa nagimbíi̱n” (Efesios 5:23). Rí mbiʼi xúgi̱ najmiuu “ñumbáá jmbii bi̱ májánʼ endxa̱ʼwáminaʼ” mu maxnún ikha xa̱bi̱i̱ bi̱ kúwá náa tsu̱du̱u̱ ku̱ba̱ʼ (atraxnuu Mateo 24:45). Mínaaʼ má Jesús nigíiʼ “ñumbáá” bugi̱, ikha jngóo guaʼdáá mbá ñajunʼ rí gíʼdoo numuu. Maski ajndu xúʼko̱ ikhiin nindxu̱ún ñumbáá ndrígóo Cristo ga̱jma̱a̱ numbañún a̱ngui̱i̱n Cristo. Tsáá nindxu̱u̱ ñumbáá buʼko̱ rá. Xú káʼnii nañewu̱nlú rá.

1. Tsáá nindxu̱u̱ “ñumbáá jmbii bi̱ májánʼ endxa̱ʼwáminaʼ ráʼ.”

Jeobá ni̱ʼkha̱ rajmiuu mbáa xa̱bu̱ o mbá chímbaʼin xa̱bu̱ mu maxnúu ikha xuajñuu (Malaquías 2:7; Hebreos 1:1). Mbá xkri̱da, nda̱wa̱á rí nikháñuu Jesús, apóstoles ga̱jma̱a̱ bi̱ kuya̱ edxu̱u̱ náa Jerusalén ninindxu̱ún bi̱ nixná ikha náa nagimbíi̱n (Hechos 15:2). Xó má nirígá nákha ikhú, xúʼko̱ má rí mbiʼi xúgi̱, mbá nguéjmi̱i̱n bi̱ kuya̱ edxu̱u̱, ikhiin nindxu̱ún Cuerpo Gobernante ndrígu̱ún Testigos de Jeobá, ikhiin nuxnún ganitsu rí na̱ʼkha̱ náa Dios ga̱jma̱a̱ nuxna ikha náa najuiʼtáraʼa. “Mbá nguéjmi̱i̱n bi̱ kúwi̱i̱n náa ñumbáá jmbii bi̱ májánʼ endxa̱ʼwáminaʼ bi̱ patriúun [Jesús] nigíiʼ” mu maʼni ñajunʼ rúʼko̱ (Mateo 24:45a). Xúgíinʼ bi̱ kaʼñún náa Cuerpo Gobernante nindxu̱ún bi̱ nixtaʼwíin ga̱jma̱a̱ espíritu santo ga̱jma̱a̱ naguáʼthi̱i̱n mbiʼi rí mutañajunʼ gajmiún Jesús náa mekhuíí, índo̱ ní xákúwá náa tsu̱du̱u̱ ku̱ba̱ʼ gi̱i̱.

2. Ndiéjunʼ ganitsu rí naxnulú ñumbáá jmbii bugi̱ rá.

Jesús niʼthí rí ñumbáá jmbii magiʼdoo ñajunʼ rí “maxníʼtsún [eʼwíinʼ cristianos], mbiʼi rí kaʼyoo” (Mateo 24:45b). Xó má ganitsu rí naʼphu̱ naʼni maxkujián ga̱jma̱a̱ naʼni makuwáánʼ májánʼ, xúʼko̱ má ganitsu rí na̱ʼkha̱ náa Dios ma̱ngaa, xóo muʼthá ikha rí naxnúlú ajngá rawuunʼ Dios, rúʼko̱ naxnúlú tsiakii mu maguajún jmbu náa Jeobá ga̱jma̱a̱ muʼnimbánii ñajunʼ rí Jesús nixnángawulú (1 Timoteo 4:6). Ganitsu rígi̱ nakhánulú náa reunión, náa asamblea, náa i̱yi̱i̱ʼ ndrígúlú ga̱jma̱a̱ videos rí nagájnuu náa Biblia. Xúgíʼ rígi̱ nandoo nambáyulú mu makru̱ʼu̱lú májánʼ rí Jeobá nandoo mu̱ʼni̱ mu xúʼko̱ ma̱ndoo mambájxulú itháán májánʼ gajmiúlú.

 GAJMAÑAAʼ ITHÁAN

3. Xuajñuu Jeobá gíʼmaa makuwíin mbá kambájxu̱u̱n

Jesús naxná ikha náa ñajunʼ rí nuni Cuerpo Gobernante ga̱jma̱a̱ numún testigos de Jeobá. Xúʼko̱ má nákha siglo timbá Jesús nixná ikhúún cristianos. Gu̱ya̱a̱ VIDEO.

Guraxnuu 1 Corintios 14:33, 40 ga̱jma̱a̱ gutamíjnála rígi̱:

• Xó má naʼthí náa versículo rígi̱, lá nandoo Jeobá rí Testigos makuwíin mbá jnduʼ ráʼ. Ndíjkha dí xúʼko̱ tatsaʼwáminaʼ rá.

4. Ñumbáá jmbii naxná ikha náa najuiʼtáraʼa

Timbíin cristianos bi̱ nikúwá ndiyáá rí mutaraʼa ninindxu̱u̱ mbá ñajunʼ rí itháan gíʼdoo numuu. Guraxnuu Hechos 8:14, 25 ga̱jma̱a̱ gutamíjnála rígi̱:

• Nákha siglo timbá, tsíín nindxu̱ún bi̱ nixna ikha náa najuiʼtáraʼa rá.

• Ndiéjunʼ niʼni Pedro ga̱jma̱a̱ Juan índo̱ eʼwíinʼ apóstoles nixnúún ikha xá.

Rí majuitáraʼa nindxu̱u̱ mbá ñajunʼ rí itháan gíʼdoo numuu rí naríyaʼ awan Cuerpo Gobernante. Gu̱ya̱a̱ VIDEO.

 Jesús niʼthí dí gíʼdoo wéñuuʼ numuu miʼtáraʼa. Guraxnuu Marcos 13:10 ga̱jma̱a̱ gutamíjnála rígi̱:

• Ndíjkha rí miʼtáraʼa gíʼdoo wéñuuʼ numuu eʼyoo Cuerpo Gobernante rá.

• Náá numuu rí ndayúlú dí ñumbáá jmbii bi̱ májánʼ endxa̱ʼwáminaʼ mariyaʼ awan náa ñajunʼ rígi̱ dí narígá náa xúgíʼ numbaaʼ rá.

5. Ñumbáá jmbii naxná ikhulú

Cuerpo gobernante naxná ikhúún xúgíinʼ cristianos bi̱ kúwá náa xúgíʼ tsu̱du̱u̱ numbaaʼ. Xú káʼnii eraʼwi̱i̱ ikha rí muxnún xá. Atayáá xú káʼnii eni̱ Cuerpo Gobernante nákha timbá siglo. Guraxnuu Hechos 15:1, 2 ga̱jma̱a̱ gutamíjnála rígi̱:

• Ndiéjunʼ niʼni rí xambanún tikhuun Cristianos nákha timbá siglo rá.

• Náá ni̱jkha̱ Pablo, Bernabé ga̱jma̱a̱ eʼwíinʼ cristianos mu munimbaníí xkujndu rá.

Guraxnuu Hechos 15:12-18 ma̱ngaa 23-29 ga̱jma̱a̱ gutamíjnála rígi̱:

• Nákha xóo tsiraʼwíí dí muni̱, ndiéjunʼ nini̱ bi̱ Cuerpo Gobernante nákha timbá siglo mu Dios maxnún ikha munimbánii xkujndu rá. (Gu̱ya̱a̱ versículo 12, 15 ga̱jma̱a̱ 28)

Guraxnuu Hechos 15:30, 31 ma̱ngaa 16:4, 5 ga̱jma̱a̱ gutamíjnála rígi̱:

• Xú káʼnii nindrigú ikha cristianos bi̱ nikúwá nákha timbá siglo rí nixná Cuerpo Gobernante rá.

• Xú káʼnii eʼyáá dí Jeobá niʼni tsajkurámiinʼ numuu rí ninimbu̱ún xá.

Guraxnuu 2 Timoteo 3:16 ma̱ngaa Santiago 1:5 ga̱jma̱a̱ gutamíjnála rígi̱:

• Índo̱ nuri̱ya̱ʼ awan Cuerpo Gobernante bi̱ kúwi̱i̱n rí mbiʼi xúgi̱, ndiéjunʼ eni̱ mu makhánun ikha.

 RÍ NAGÁJNURIYO̱O̱ʼ

Cuerpo Gobernante nindxu̱u̱ “ñumbáá jmbii bi̱ májánʼ endxa̱ʼwáminaʼ” bi̱ Cristo nigíiʼ. Ñumbáá bugi̱ naxnún ikha ga̱jma̱a̱ naxnún ganitsu rí na̱ʼkha̱ náa Dios cristianos bi̱ kúwá náa xúgíʼ numbaaʼ.

Rí nijmañaaʼ

• Tsáá nigíiʼ “ñumbáá jmbii bi̱ májánʼ endxa̱ʼwáminaʼ” rá.

• Xú káʼnii nañewu̱nlú Cuerpo Gobernante rá.

• Lá naku̱ma̱a̱ʼ ikháán dí Cuerpo Gobernante nindxu̱u̱ “ñumbáá jmbii bi̱ májánʼ endxa̱ʼwáminaʼ” ráʼ.