1, 2. Xú káʼnii eyoo Jeobá makuwá bi̱ nidamijná rá.

JEOBÁ niʼni rí xa̱bu̱ mudamijná. Náa Biblia naʼthúlúʼ rí ikhaa niʼnii timbáa a̱ʼgu̱ ga̱jma̱a̱ ni̱jkha̱ kayáa náa xa̱biya̱. Adán nidxuu wéñuʼ ga̱jma̱a̱ numuu a̱ʼgu̱ rí asndu niʼthí: “Asndu xúgi̱ rá itsu rígi̱ ñajunʼ itsuʼ, xuwiʼ rígi̱ xuyuʼ” (Génesis 2:22, 23). Ikha jngó Jeobá nandoo rí xa̱bu̱ bi̱ nidamijná makuwá tsímáá.

² Migíná rí mbaʼin xa̱bu̱ na̱nguá kuwa tsímáá mbá guʼwíin. Mú náa Biblia na̱ʼkha̱ mbaʼa ikha ga̱jma̱a̱ xtágabu rí ma̱ndoo mambáñún mu makuwá májánʼ ga̱jma̱a̱ tsímáá xúgínʼ bi̱ kuwa mbá guʼwíin (Lucas 11:28).

3, 4. a) Xú káʼnii gíʼmaa xa̱biya̱ maʼniuu a̱ʼgiu̱u̱ rá. b) Ndíjkha gíʼdoo numuu rí xa̱biya̱ ga̱jma̱a̱ a̱ʼgu̱ munimba̱a̱ a̱jkiu̱ún kuyamijná rá.

³ Náa Biblia naʼthí rí xa̱biya̱ bi̱ naʼni rí májánʼ gíʼmaa maʼndoo kaʼyoo a̱ʼgiu̱u̱ ga̱jma̱a̱ mbaʼyamajkuu (atraxnuu Efesios 5:25-29). Xa̱biya̱ gíʼmaa masngájma rí nandoo kaʼyoo a̱ʼgiu̱u̱. Ma̱ngaa gíʼmaa mañewu̱u̱n ga̱jma̱a̱ xáʼni gawúunʼ.

⁴ Ndiéjunʼ gíʼmaa maʼni xa̱biya̱ índo̱ a̱ʼgiu̱u̱ gájngawa̱a̱n rá. Náa Biblia naʼthúún bi̱ guáʼdiin guʼñún: “Gaʼndala kuñu̱u̱n má xúʼko̱ guʼyala ga̱jma̱a̱ xajmanguala wéñuʼ kuñu̱u̱n” (Colosenses 3:19). Xa̱bekha, garmáʼáan a̱jkia̱la rí ikháanʼ mangáanʼ najngawáanʼ. Ga̱jma̱a̱ á mu nandala rí Dios maʼni mba̱a̱ a̱jkiu̱u̱n kaʼyala, ikháanʼ gíʼmaa  munimba̱a̱ a̱jkia̱la ku̱ñu̱u̱n guʼyala (Mateo 6:12, 14, 15). Á mu xa̱biya̱ ga̱jma̱a̱ a̱ʼgu̱ nuni mba̱a̱ a̱jkiu̱ún kuyamijná, maʼni itháan ragákhíi makuwá tsímáá mbá guʼwíin.

5. Ndíjkha rí xa̱biya̱ gíʼmaa mbaʼyamajkuu a̱ʼgiu̱u̱ rá.

⁵ Jeobá gíʼthu̱u̱n rí xa̱biya̱ mbaʼyamajkuu a̱ʼgiu̱u̱, ga̱jma̱a̱ gíʼmaa mbaʼyoo rí ndayóoʼ. Rígi̱ na̱nguá nindxu̱u̱ mbá gitsíin. Á mu ikhaa tséʼniuu rí májánʼ a̱ʼgiu̱u̱, mbáa Jeobá xaʼdxuun rí gaʼtájkáan (1 Pedro 3:7). Jeobá tseʼyoo rí xa̱bekha guáʼdáá itháan numún ki xóo gu̱ʼu̱. Ikhaa ndaʼyoo rí xúgínʼ xa̱bu̱ bi̱ nandún kuyáá guáʼdáá numún.

6. Ndiéjunʼ eyoo gáʼthúu̱n rí nánguá “ni̱ndxu̱ún a̱jmi̱i̱n” bi̱ nidamijná rá.

⁶ Jesús niʼthí rí xa̱biya̱ ga̱jma̱a̱ a̱ʼgu̱ bi̱ nidamijná “nánguá ni̱ndxu̱ún a̱jmi̱i̱n, naʼni̱i̱ mbawíí” (Mateo 19:6). Bi̱ nidamijná na̱nguá eninduwamijná gajmiún imba̱a̱ xa̱bu̱ (Proverbios 5:15-21; Hebreos 13:4). Mámbáa gíʼmaa maxnúu rí ndayóoʼ bi̱ ndiyáa xóo rí mabóoʼ ga̱jma̱a̱ (1 Corintios 7:3-5). Xa̱biya̱ gíʼmaa marmáʼáan a̱jkiu̱u̱n rí “nimbáa xa̱bu̱ na̱nguá wiyuʼ kaʼyaminaʼ; rí naʼni, naxniʼtsuminaʼ, ga̱jma̱a̱ nañewuminaʼ májánʼ wéñuʼ”. Ikha jngó xa̱biya̱ gíʼmaa maʼndoo kaʼyoo a̱ʼgiu̱u̱ ga̱jma̱a̱ masngájma rígi̱. Rí phú itháan nandoo mbáa a̱ʼgu̱ rí ajmbio̱o̱ mani̱ndxu̱u̱ májaanʼ xa̱bu̱ ma̱ngaa mangajo̱o̱ kaʼyoo (Efesios 5:29).

7. Náa numuu rí náa mbá guʼwíin ndayóoʼ mbáa bi̱ mayéʼga edxu̱u̱ rá.

⁷ Xúgínʼ bi̱ kuwa mbá guʼwíin ndayóoʼ rí mbáa maxnún ikhaa mu xúgínʼ munimbaníí rí kaʼñún, xóo muʼthá, rí mbáa mayéʼga edxu̱u̱. Náa Biblia naʼthí náa 1 Corintios 11:3: “Cristo kayá edxu̱u̱ náa xa̱biya̱; xa̱biya̱ kayá edxu̱u̱ náa a̱ʼgu̱; xó má Dios kayá edxu̱u̱ náa Cristo”.

8. Xú káʼnii mbáa a̱ʼgu̱ nasngájma rí ndaʼyamajkuu wéñuʼ ajmbio̱o̱ rá.

 ⁸ Gajkhun má rí xúgínʼ xa̱bekha nakiéʼkhun. Mú índo̱ a̱ʼgu̱ nambáyúu ajmbio̱o̱ ga̱jma̱a̱ rí naraʼwíí maʼni, xúgínʼ bi̱ kuwa náa mbá guʼwíin nambáñun (1 Pedro 3:1-6). Náa Biblia naʼthí: “A̱ʼgu̱ gíʼmaa mbaʼyamajkuu wéñuʼ ajmbio̱o̱” (Efesios 5:33). Mú, á mu xa̱biya̱ gíʼdoo i̱mba̱ religión rá. Maski ajndu xúʼko̱, a̱ʼgiu̱u̱ gíʼmaa mbaʼyamajkuu wéñuʼ. Náa Biblia ma̱ngaa naʼthí: “Gu̱ʼu̱ bi̱ ninuju̱nʼ, gunimbánii rí ethi ajmbiala, mú xúʼko̱ gáʼni rí á mu tikuin na̱nguá enimbu̱ún ajngáa, maguanu munimbu̱ún ga̱jma̱a̱ numuu rí xóo kuwa runi guʼñún, numuu rí ikhiin míninʼ nduyáá rí guʼñún nuni rí májánʼ ga̱jma̱a̱ guáʼdáá wéñuʼ gamajkhún” (1 Pedro 3:1, 2). Xkri̱da májánʼ rí nagíʼ a̱ʼgiu̱u̱ ma̱ndoo mambáyúu makro̱ʼo̱o̱ ga̱jma̱a̱ mbaʼyamajkuu rí naʼnimbo̱o̱.

9. a) Ndiéjunʼ gíʼmaa maʼni a̱ʼgu̱ índo̱ tsembánii rí naʼtámíjná ga̱jma̱a̱ ajmbio̱o̱ rá. b) Xú káʼnii xtágabu rí na̱jkha̱ inún gu̱ʼu̱ rí nuxkamaa náa Tito 2:4, 5 rá.

⁹ Ndiéjunʼ rí ma̱ndoo maʼni a̱ʼgu̱ índo̱ tsembánii rí naʼtámíjná ga̱jma̱a̱ ajmbio̱o̱ rá. Ma̱ndoo maʼthí rí  naku̱mu̱u̱, mú gíʼmaa maʼni ga̱jma̱a̱ gamajkhu. Mbá xkri̱da, Sara niʼthúu̱n Abrahán mbá rí ikhaa tániguuʼ. Mú Jeobá niʼthúu̱n Abrahán: “Atadxawíín rí naʼtháanʼ” (Génesis 21:9-12). A̱ʼgu̱ gíʼmaa maʼni rí naraʼwíí maʼni ajmbio̱o̱ á mu na̱nguá enújngoramuuʼ rí naʼthí náa Biblia (Hechos 5:29; Efesios 5:24). Ma̱ngaa a̱ʼgu̱ bi̱ májaanʼ gíʼmaa mañewu̱u̱n bi̱ kuwa náa goʼwóo (atraxnuu Tito 2:4, 5). Índo̱ ajmbio̱o̱ ga̱jma̱a̱ e̱ji̱i̱n gúyáá xúgíʼ rí naʼni ikhaa ga̱jma̱a̱ numún, maʼndún kuʼyáá itháan ma̱ngaa mbuyamajkuíí (Proverbios 31:10, 28).

10. Ndiéjunʼ eʼthí Biblia ga̱jma̱a̱ numuu rí murujturi̱ga̱a̱ i̱yi̱i̱ʼ ma̱ngaa rí muniñami̱jna̱a̱ xá.

¹⁰ Tikhun bi̱ nidamijná nduyááʼ nacha̱ muniñami̱jna̱a̱. Mú náa Biblia naʼthí rí “a̱ʼgu̱ ragíʼmaa maniñuʼ ajmbio̱o̱” ga̱jma̱a̱ “xa̱biya̱ ragíʼmaa maniñuʼ a̱ʼgiu̱u̱” (1 Corintios 7:10, 11). Gajkhun má dí rígá tikhu xkujndu rí maʼni muniñami̱jna̱a̱ bi̱ nidamijná, mú rígi̱ na̱nguá nindxu̱u̱ gitsíin. * Ndiéjunʼ gándoo gúʼthá ga̱jma̱a̱ numuu rí murujturi̱ga̱a̱ i̱yi̱i̱ʼ xá. Náa Biblia naʼsngáa rí i̱ndó rígá mbá numuu mu ma̱ndoo murujturi̱ga̱a̱ i̱yi̱i̱ʼ, xóo índo̱ mbáa nabóoʼ ga̱jma̱a̱ bi̱ raʼkháa a̱ʼgiu̱u̱ o ajmbio̱o̱ (Mateo 19:9).

11. Ndiéjunʼ rí itháan ndañúunʼ e̱ji̱n rá.

¹¹ Xa̱bu̱ bi̱ guáʼdiin e̱ji̱n, gakuwáanʼ gajmiála e̱jña̱la xúgíʼ mbiʼi rí gándoo, numuu rí ikhiin ndañúunʼ. Mú itháan gíʼdoo numuu rí ikháanʼ musngúún e̱jña̱la ga̱jma̱a̱ numuu Jeobá (Deuteronomio 6:4-9).

12. Ndiéjunʼ gíʼmaa muni xa̱bu̱ guanii mu muñewu̱u̱n e̱jñún rá.

¹² Na̱jkha̱ rajoo itháan dí ra̱májánʼ náa numbaaʼ ndrígóo Satanás. Kuwa xa̱bu̱ bi̱ nandún muniu̱u̱n dí ra̱májánʼ  e̱jñu̱lú. Eʼwíínʼ ma̱ndoo mutsijmiin e̱ji̱n. Tikhun xa̱bu̱ naʼniún mingíjyúuʼ mutamijná gajmiún e̱jñún ga̱jma̱a̱ numuu rígi̱. Mú ikhiin gíʼmaa muthún e̱jñún ga̱jma̱a̱ numún xa̱bu̱ bugi̱ ga̱jma̱a̱ musngúún muñeumíjna̱ náa ikhiin. Xa̱bu̱ guanii gíʼmaa muñewu̱u̱n e̱jña̱la (1 Pedro 5:8). *

13. Xú káʼnii gíʼmaa musngúún e̱jñún xa̱bu̱ guanii rá.

¹³ Xa̱bu̱ guanii gíʼmaa musngúún e̱jñún mu muni rí májánʼ. Xú káʼnii gándoo gátani ikháán rá. Maski ajndu  ndayóoʼ mataxprígún e̱jña̱ʼ, mú xátani gíníi (Jeremías 30:11). Ikha jngó xátaxprígún índo̱ ikháán nakiʼnán. Ikháán tsíyaaʼ matani gawúunʼ ga̱jma̱a̱ ajngáa rí narathúún xóo eʼni mbá espada (Proverbios 12:18). Atambáñun makru̱ʼu̱u̱n náa numuu rí gíʼmaa munimbu̱ún (Efesios 6:4; Hebreos 12:9-11; atayáá nota 30).

14, 15. Ndíjkha rí e̱ji̱n gíʼmaa munimbu̱ún kuñún anu̱ún rá.

¹⁴ Jesús niʼnimbo̱o̱ kaʼyoo má xúʼko̱ Anu̱u̱, asndu náa mbiʼi gakhi̱i̱ (Lucas 22:42; Juan 8:28, 29). Jeobá gíʼthu̱u̱n rí e̱ji̱n munimbu̱ún kuñún anu̱ún (Efesios 6:1-3).

¹⁵ Ikháán ada̱, mbáa naʼniaʼ mingíjyúuʼ matatsimbaaʼ xtayáá ana̱ʼ ga̱jma̱a̱ rudáaʼ. Mú garmáʼáan a̱jkia̱nʼ: Índo̱ natatsimbaaʼ, Jeobá ga̱jma̱a̱ aniaʼ maʼdxúún wéñuʼ (Proverbios 1:8; 6:20; 23:22-25). *

16. a) Xú káʼnii eʼni Satanás mu jiáma muni dí ra̱májánʼ rá. b) Ndíjkha rí gíʼdoo numuu mambaxáʼ gajmiáanʼ bi̱ nandún kuyáá Jeobá rá.

¹⁶ Satanás ma̱ndoo majmiuu bi̱ nambáxa̱ʼ gajmiáanʼ ga̱jma̱a̱ eʼwíínʼ jiáma mu munia̱nʼ matani dí raʼkhí. Ikhaa ndaʼyoo rí maʼniaʼ mingíjyúuʼ matani gaʼduunʼ índo̱ gutsudáán. Guʼyáá xkri̱da ndrígóo Dina: Mbáa wáxioo Jacob. Ikhaa nimbáxu̱u̱ gajmíi̱n bi̱ táʼnduun kuyáá Jeobá, rígi̱ niʼni magiʼdoo wéñuʼ xkujndu ikhaa ga̱jma̱a̱ bi̱ kuwa náa goʼwóo (Génesis 34:1, 2). Á mu nambáxa̱ʼ gajmiáanʼ bi̱ tsíñún kuyáá Jeobá, mbáa muniaʼ matani rí ikhaa naguiyuuʼ kaʼyoo. Rúʼko̱ maʼni gawáanʼ wéñuʼ ikháán, bi̱ kuwa náa guʼwáaʼ ga̱jma̱a̱ Jeobá (Proverbios 17:21, 25). Ikha jngó gíʼdoo wéñuʼ numuu rí mambaxáʼ gajmiáanʼ bi̱ nandún kuyáá Jeobá (1 Corintios 15:33).

17. Ndiéjunʼ gíʼmaa muni xúgínʼ bi̱ kuwa náa mbá guʼwíin rá.

¹⁷ Índo̱ xúgínʼ bi̱ kuwa náa mbá guʼwíin nunimbánii xtágabu ndrígóo Dios, na̱nguá guáʼdáá wéñuʼ xkujndu. Ikha jngó á mu ikháán xtaʼdaa a̱ʼgia̱ʼ, gaʼndaaʼ xtayáá ga̱jma̱a̱ gangajua̱ʼ xtayáá. Á mu xtaʼdaa ajmbiaʼ, atayamajkuíí, atambáyii rí naraʼwíí maʼni ga̱jma̱a̱ atayaridáá a̱ʼgu̱ bi̱ najuiʼthá náa Proverbios 31:10-31. Á mu xtaʼdiin e̱ji̱n, arasngúún maʼndún kuyáá Dios (Proverbios 22:6). Á mu xtaʼdaa a̱ʼgia̱ʼ ga̱jma̱a̱ xtaʼdiin e̱ji̱n, arathá ñajunʼ májánʼ náa guʼwáaʼ (1 Timoteo 3:4, 5; 5:8). Ga̱jma̱a̱ ikháanʼla e̱ji̱n, gunimbala ku̱ñu̱u̱n ana̱la (Colosenses 3:20). Garmáʼáan a̱jkiu̱lú rí xúgiáanʼ bi̱ kuwáanʼ náa mbá guʼwáanʼ nakiéʼkulú, ikha jngó gíʼmáanʼ manindxu̱lúʼ xa̱bu̱ guabáanʼ ga̱jma̱a̱ munda̱ʼa̱ rí muni mba̱a̱ a̱jkiu̱ún kuyulúʼ. Xó má ndiʼyáá, náa Biblia na̱ʼkha̱ ikha rí naxná Jeobá mu munimbaníí xúgínʼ bi̱ kuwa náa mbá guʼwíin.