1, 2. Ndiéjunʼ gíʼmaa matraximínáʼ ga̱jma̱a̱ ndíjkha rá.

ÍNDO̱ nitanigajmaa Biblia, ikháán nijmañaaʼ rí mbaʼin xa̱bu̱ nuthi rí nduyamajkuíí Dios, mú nuni o nusngáa rí nawiyuuʼ kaʼyoo (2 Corintios 6:17). Ikha jngó, ikhaa na̱ndu̱ʼu̱lú rí magajnáaʼ náa religión rí minduwaʼ, “Babilonia xuajin Mba̱a̱” (Revelación [Apocalipsis] 18:2, 4). Ndiéjunʼ gátani ikháán rá. Mámbáa rí ikháanʼ gíʼmaa maraʼwíí mbá rí maʼni ga̱jma̱a̱ maraximínáʼ: “Lá nandoʼ mbayamajkuu Dios xó má eyoo ikhaa, o nandoʼ mbayamajkuu xó má eguʼunʼ nani dxe̱ʼ.”

² Á mu nitatsíñaaʼ má religión dí ragájkhun o xúgíʼ rí naguma ikhí, májánʼ rí nitraʼwíí matani. Mú mbáa náa a̱jkia̱nʼ kaʼníí xóó rígá tikhuu rí naʼni o rí nambánii ga̱jma̱a̱ religión dí ragájkhun rí ndayóoʼ xóó matatsiʼñáanʼ. Guʼyáá tikhu ga̱jma̱a̱ ndíjkha rí ndayóoʼ mbuʼyáá xó má eʼyoo Jeobá.

3. a) Ndíjkha rí tikhun naʼniún mingíjyúuʼ muniñaaʼ rajmiún xándú rá. b) Ndiéjunʼ eʼsngáa Biblia ga̱jma̱a̱ numuu rí najmiún xándú mu mbuyamajkuíí Dios rá.

³ Mu mbuyamajkuíí Dios, tikhun xa̱bu̱ guáʼdiin xándú o i̱ʼwáʼ náa guʼwún asndu nákha mba̱yu̱ʼ tsiguʼ. Á mu natani xúʼko̱, mbáa maʼniaaʼ tsiánguá o raʼkhí rí matayamajkuíí Dios á mu nda̱a̱ rí ejmaaʼ. Mú garmáʼáan a̱jkia̱nʼ rí Jeobá naʼsngúlú xóo eyoo mbuʼyamajkuíí. Ga̱jma̱a̱ náa  Biblia naʼthí kaʼwu rí Jeobá tsíyoo majmiulúʼ xándú mu mbuʼyamajkuíí (atraxnuu Éxodo 20:4, 5; Salmo 115:4-8; Isaías 42:8; 1 Juan 5:21).

4. a) Ndíjkha dí ragíʼmaa mbuʼyamajkún bi̱ nikháñun rá. b) Náa numuu rí Jeobá tániñúnʼ bi̱ israelitas mutamijná gajmiún bi̱ nikháñun rá.

⁴ Mbáa tikhun xa̱bu̱ najmún mba̱yu̱ʼ mbiʼi ga̱jma̱a̱ tsiakii ndrígu̱ún mu muni mbaʼwu̱u̱n bi̱ nikháñun. Mbáa asndu nduyamajkhún. Mú nijmañulúʼ dí ragíʼmaa muʼni rúʼko̱, numuu rí bi̱ nikháñun nánguá xóo mumbayúlú ni má muniulúʼ dí raʼkhí. Asndu má nánguá kuwa i̱mba̱ níʼkhá. Migamíi rí muʼgíʼ muʼtámíjná gajmiúlú numuu rí makumulúʼ rí a̱ngiu̱lú bi̱ nikháñun ethulú, mú bi̱ nuthulú ni̱ndxu̱ún xa̱bu̱ wéñiʼ. Ikha jngó, Jeobá niʼthún bi̱ israelitas rí xúgíiʼ mutamijná gajmiún bi̱ nikháñun ga̱jma̱a̱ xúni̱ nimbá rí kagujtuminaʼ náa xa̱bu̱ wéñiʼ (Deuteronomio 18:10-12; atayáá notas 26 ga̱jma̱a̱ 31).

5. Ndiéjunʼ gambayaaʼ matatsiʼñúnʼ xándú mu matayamajkuíí Dios o bi̱ nikháñun rá.

⁵ Ndiéjunʼ gambayaaʼ mu matatsiʼñáanʼ rajmiaaʼ xándú mu matayamajkuíí Dios o mu matayamajkúún bi̱ nikháñun rá. Rí matraxnuu Biblia ga̱jma̱a̱ matatsaʼwamínáʼ xú káʼnii eʼyoo Jeobá rígi̱. Ikhaa ndaʼyoo rí nindxu̱u̱ ‹mixkawiʼ wéñuʼ› (Deuteronomio 27:15). Xúgíʼ mbiʼi gátanda̱ʼa̱a̱ Jeobá rí mambáyaaʼ mu ma̱ta̱ya̱a̱ xóo eʼyoo ikhaa ga̱jma̱a̱ matayamajkuíí xó má eyoo ikhaa (Isaías 55:9). Jeobá gáxnáʼ tsiakii mu matatsiʼñáanʼ xúgíʼ rí naʼni religión rí minduwaʼ.

6. Náa numuu rí niraʼwíí mbiʼi 25 ñajunʼ gu̱nʼ diciembre mu muniriyaaʼ rí nixtáa Jesús xá.

⁶ Navidad nindxu̱u̱ mbá ndxa̱a̱ rí itháan najmaʼnuuʼ  náa xúgíʼ numbaaʼ, ga̱jma̱a̱ mbaʼin xa̱bu̱ nakumu̱ún rí ikhú nagumariyaaʼ rí nixtáa Jesús. Mú rí phú ikhaa, Navidad kagujtuminaʼ ga̱jma̱a̱ religión rí minduwaʼ. Mbá enciclopedia naʼthí rí xa̱bu̱ bi̱ nikúwi̱i̱n náa Roma niniriyaaʼ ndxo̱o̱ A̱jkha̱ʼ mbiʼi 25 ñajunʼ gu̱nʼ diciembre. Xa̱bu̱ ede̱ bi̱ kuwa náa guʼwá dxájkuun nindúún rí itháan xa̱bu̱ mani̱ndxu̱ún cristianos. Ikha jngó nigíʼ rí muniriyaaʼ mbiʼi rí nixtáa Jesús mbiʼi 25 ñajunʼ gu̱nʼ diciembre maski ajndu ikhaa tágumaa mbiʼi rúʼko̱ (Lucas 2:8-12). Xa̱bi̱i̱ Jesús túniriyaaʼ Navidad. Xó má eʼthí náa libro Los orígenes sagrados de las cosas profundas, 200 tsiguʼ nda̱wa̱á rí nikháñuu Jesús, “nimbáa táʼyoo nguáná phú nigumaa Jesús ga̱jma̱a̱ nguéjmi̱i̱n nixmiéjúúnʼ mbuyáá”. Navidad nigíʼdu̱u̱ nigumariyaaʼ 300 tsiguʼ nda̱wa̱á rí nikháñuu Jesús.

7. Náa numuu rí cristianos gajkhun tséniriyaaʼ Navidad rá.

⁷ Mbaʼin xa̱bu̱ nduyáá náa nikumu̱u̱ Navidad ga̱jma̱a̱ costumbre xóo munimájáánʼ ganitsu mu mu̱phu̱ mbá guʼwíin ga̱jma̱a̱ muxna regalos. Náa Inglaterra ga̱jma̱a̱ náa tikhu xuajin ndrígóo Norteamérica túniñuunʼ muniriyaaʼ Navidad mbá nguáthá mba̱yu̱ʼ ga̱jma̱a̱ numuu rí tseni cristianos. Xúgínʼ bi̱ nuniriyaaʼ nuxnún mbá castigo. Mú nda̱wa̱á xa̱bu̱ nigíʼdi̱i̱ niniriyaaʼ mbu̱júu̱ Navidad. Náa numuu rí cristianos gajkhun tséniriyaaʼ Navidad rá. Numuu rí nandún muni rí nandoo Dios náa xúgíʼ rí nuni.

8, 9. Náa numuu rí timbíi̱n cristianos túniriyaaʼ ndxa̱a̱ índo̱ nirámáʼ tsigúnʼ rá.

⁸ I̱mba̱ ndxa̱a̱ rí itháan najmaʼnuuʼ nindxu̱u̱ índo̱ narámáʼ tsigúnʼ. Lá gíʼmaa muʼniriyaaʼ ndxa̱a̱ índo̱ narámáʼ tsigulú ráʼ. I̱ndó ndxa̱a̱ rí narámáʼ tsigúnʼ rí na̱ʼkha̱ raʼthí náa Biblia nindxu̱u̱ rí nini xa̱bu̱ bi̱ tséyamajkuíí Jeobá (Génesis  40:20; Marcos 6:21). Náa ndxa̱a̱ rí narámáʼ tsigúnʼ nduyamajkhún dioses bi̱ ragájkhun. Ikha jngó, timbíi̱n cristianos ndiyáá rí nindxu̱u̱ “costumbre rí na̱ʼkha̱ náa xa̱bu̱ ra̱míjínʼ” (Las cosas nuestras de cada día).

⁹ Xa̱bu̱ romanos ga̱jma̱a̱ griegos bi̱ nikuwa wajyúúʼ nikumu̱ún rí mbá xi̱ʼ rígá índo̱ naxtáa mbáa xa̱bu̱ ga̱jma̱a̱ xi̱ʼ rúʼko̱ mañewu̱u̱n náa xúgíʼ mbiʼi rí gáxtáa. “Xi̱ʼ rígi̱ nambáxu̱u̱ ga̱jma̱a̱ dios bi̱ naramaaʼ tsiguuʼ ikháá má mbiʼi xóo xa̱bu̱” (The Lore of Birthdays [Rí naguma índo̱ narámáʼ tsigúnʼ]).

10. Ndíjkha rí cristianos bi̱ kuwa xúgi̱ tséniriyaaʼ ndxa̱a̱ índo̱ narámáʼ tsigúnʼ rá.

¹⁰ Lá naku̱ma̱ʼ ikháán rí Dios nanigu̱u̱ʼ xúgíʼ ndxa̱a̱ rí na̱ʼkha̱ náa religión rí minduwaʼ ráʼ. (Isaías 65:11, 12.) Na̱nguá. Ikha jngó, cristianos bi̱ kuwa rí mbiʼi xúgi̱ tséniriyaaʼ índo̱ narámáʼ tsigúnʼ ni má i̱ʼwáʼ ndxa̱a̱ rí na̱ʼkha̱ náa religión rí minduwaʼ.

11. Náa numuu rí tikhun xa̱bu̱ nuniriyaaʼ ndxa̱a̱ rí na̱ʼkha̱ náa religión rí minduwaʼ rá. b) Ndiéjunʼ gíʼmaa magiʼdoo itháan numuu náa ikháán rá.

¹¹ Tikhun xa̱bu̱ bi̱ nduyáá náa nikumu̱u̱ Navidad ga̱jma̱a̱ i̱ʼwáʼ ndxa̱a̱, nuniriyaaʼ má xúʼko̱. Nakumu̱ún rí náa ndxa̱a̱ rúʼko̱ nindxu̱u̱ mu makuwa gajmiún a̱ngiu̱ún. Lá xúʼko̱ tatsaʼwáminaʼ mangáán ráʼ. Na̱nguá má nindxu̱u̱ raʼkhí rí maraxtaa gajmiáanʼ a̱ngia̱nʼ. Jeobá niʼni rí makuwa mbá guʼwíin ga̱jma̱a̱ nandoo mambaxúlúʼ májánʼ gajmiúlú (Efesios 3:14, 15). Mú rí mambaxúlúʼ gajmiúlú Jeobá gíʼmaa magiʼdoo itháan numuu náa ikháanʼ ki xóo rí muʼni rí nandún a̱ngiu̱lú rí muʼniriyaaʼ ndxa̱a̱ rí na̱ʼkha̱ náa religión rí minduwaʼ. Ikha jngó, apostol Pablo niʼthí: “Guni má xúʼko̱ rí májánʼ náa inuu Señor” (Efesios 5:10).

12. Xú káʼnii ndxa̱a̱ rí tséniguuʼ Jeobá rá.

 ¹² Mbaʼin xa̱bu̱ nundxaʼwamíjná rí tséʼniuu má náa nikumu̱u̱ mbá ndxa̱a̱. Mú Jeobá tsíndxaʼwáminaʼ xúʼko̱ kaʼnii. Ikhaa tséniguuʼ ndxa̱a̱ rí na̱ʼkha̱ náa religión dí ragájkhun rí nduyamajkhún xa̱bu̱ o bandera rí ndaʼyamajkuu mbá xuajen. Mbá xkri̱da, xa̱bu̱ egipcios niniriyaaʼ mbaʼa ndxa̱a̱ ga̱jma̱a̱ numún dioses ndrígu̱ún bi̱ ragájkhun. Nda̱wa̱á rí israelitas nigájnun náa Egipto, niniriyaaʼ mbá ndxa̱a̱ rí nuni egipcios rí nixnambiʼí “ndxo̱o̱ Jeobá”. Mú Jeobá nixnúún castigo numuu rí nini rígi̱ (Éxodo 32:2-10). Ikháanʼ gíʼmaa muʼni rí niʼthí gaʼyee Isaías: “Xúrugua̱ nditháan rí mixkawiʼ” (atraxnuu Isaías 52:11).

13. Ndiéjunʼ gándoo gátraximínáʼ índo̱ nánguá etaniriyaaʼ ndxa̱a̱ rá.

¹³ Índo̱ ikháán gátatsiʼñáaʼ ratani̱ ndxa̱a̱ rí na̱ʼkha̱ náa religión rí minduwaʼ, mbáa matani mbaʼa graxe̱ xóo: “Ndiéjunʼ gáni á mu bi̱ nañajunʼ gajmíi̱nʼ nuraxu̱ʼ náa numuu rí tséniriyaaʼ Navidad rá. Ndiéjunʼ gáni á mu mbáa naxnúʼ mbá regalo índo̱ nagumariyaaʼ Navidad rá. Á mu ajmbioʼ o a̱ʼgiu̱ʼ nandoo maniriyaaʼ mbá ndxa̱a̱ rí tséniguuʼ Dios rá. Xú káʼnii gándoo gambáñun e̱ji̱nʼ mu xákuwa gíná á mu tséniriyaaʼ mbá ndxa̱a̱ o índo̱ narámáʼ tsigúnʼ xá.”

14, 15. Ndiéjunʼ gíʼmaa matani á mu mbáa naʼtháanʼ rí tsímáá lá gáraxtaa náa ndxa̱a̱ o naxnáʼ mbá regalo rá.

¹⁴ Gíʼdoo numuu ma̱ta̱ya̱a̱ ndiéjunʼ gárata ga̱jma̱a̱ ndiéjunʼ gátani náa mámbá rí gátraʼníí. Mbá xkri̱da, á mu mbáa naʼtháanʼ rí tsímáá lá gáraxtaa náa ndxa̱a̱, ragíʼmaa matani rí asndu xóo tsétadxuun. I̱ndó ma̱ndoo maraxna̱a̱ “núma̱aʼ”. Mú á mu mbáa nandoo mbaʼyoo itháan, ikháán ma̱ndoo maratha̱a̱n náa numuu rí tsétaniriyaaʼ  ndxa̱a̱. Mú arathá ga̱jma̱a̱ májánʼ ga̱jma̱a̱ araʼdáá gamajkuaaʼ. Náa Biblia naʼthí: “Ganindxu̱u̱ májánʼ má xúʼko̱ dí muthala, gagiʼdoo idú, mu xúʼko̱ mbu̱ya̱a̱ xú káʼnii gíʼmaa muriʼña̱a̱ mámbáa” (Colosenses 4:6). Mbáa ma̱ndoo maratha rí naniguaaʼ maraxtaa gajmiáanʼ eʼwíínʼ xa̱bu̱ ga̱jma̱a̱ maraxna regalos, mú raʼkháa índo̱ narígá ndxa̱a̱.

¹⁵ Ndiéjunʼ gíʼmaa matani á mu mbáa naxnáʼ mbá regalo rá. Náa Biblia tséʼkha̱ mbá lista náa naʼthí xú káʼnii gíʼmaa matani, mú naʼthí rí gíʼmaa maguaʼdáá kaʼwu ku̱ma̱ ndrígúlú (1 Timoteo 1:18, 19). Mbáa xa̱bu̱ bi̱ nandoo maxnáʼ mbá regalo tseʼyoo rí ikháán tsétaniriyaaʼ ndxa̱a̱ rúʼko̱. O mbáa maʼtháanʼ: “Nda̱yo̱o̱ má rí tsétaniriyaaʼ ndxa̱a̱, mú nandoʼ maxna̱ʼ regalo rígi̱”. Náa mámbá rígi̱, ikháán gáta̱ya̱a̱ á mu matrigú regalo o na̱nguá. Mú atayáá májánʼ rí gátani xáʼni gawúunʼ ku̱ma̱ ndrígaaʼ. Tsíyulú muʼni nimbá rí maʼni gachúu rí nambáxulúʼ gajmiúlú Jeobá.

16. Ndiéjunʼ gátani á mu bi̱ kuwa náa guʼwáaʼ nandún muniriyaaʼ mbá ndxa̱a̱ rá.

¹⁶ Ndiéjunʼ gátani á mu bi̱ kuwa náa guʼwáaʼ nandún muniriyaaʼ mbá ndxa̱a̱ rá. Xágiʼda̱a̱ʼ gajmiáanʼ. Garmáʼáan a̱jkia̱nʼ rí ikhiin má kaʼñún muraʼwi̱i̱ rí gúni. Gani̱ndxa̱a̱ʼ májaanʼ xa̱bu̱ ga̱jma̱a̱ atayamajkuíí rí nuraʼwíí muni, xó má ikháán nandaaʼ rí mbuyamajkuíí rí natani (atraxnuu Mateo 7:12). Mú, á mu ikhiin nandún maraxtaa gajmiáanʼ índo̱ nuni ndxa̱a̱ rúʼko̱ xá. Nákha xóó tsétraʼwi̱i̱ rí matani, atanda̱ʼa̱a̱ Jeobá rí mambáyaaʼ mu matani rí jmbu. Atatsaʼwáminaʼ ga̱jma̱a̱ numuu rígi̱ ga̱jma̱a̱ atayáaʼ rí ma̱ndoo mambáyaaʼ. Xámbumaaʼ rí ikháán i̱ndó nandaaʼ matani rí naniguuʼ Jeobá.

17. Ndiéjunʼ gátani mu ejña̱a̱nʼ xákumu̱ún rí nandáti̱gu̱u̱n rí májánʼ índo̱ tséniriyaaʼ ndxa̱a̱ rá.

 ¹⁷ Ndiéjunʼ gándoo matani mu ejña̱a̱nʼ xákumu̱ún rí nandáti̱gu̱u̱n mbá rí májánʼ índo̱ nduyáá rí eʼwíínʼ nuniriyaaʼ ndxa̱a̱ rá. Atani mbá rí nanigu̱nʼ índo̱ gándoo. Ma̱ngaa ma̱ndoo maraxnu̱u̱n regalo. Mbá regalo rí itháan májánʼ rí ma̱ndoo maraxnu̱u̱n nindxu̱u̱ mbiʼi ndrígaaʼ ga̱jma̱a̱ rí maʼndaaʼ xtañún.

18. Náa numuu rí gíʼmaa mu̱ʼgua̱ reunión rá.

¹⁸ Á mu nandulú muʼni rí naniguuʼ Jeobá, gíʼmáanʼ rí muniʼñáaʼ religión rí minduwaʼ, costumbres ga̱jma̱a̱ xúgíʼ rí na̱ʼkha̱ ikhí. Ma̱ngaa, gíʼmaa muʼni rí naʼni religión rí gajkhun. Xú káʼnii rá. Mbá rí ikhaa nindxu̱u̱ rí mi̱dxu̱ʼ mámbá xmáná náa reunión (atraxnuu Hebreos 10:24, 25). Reunión gíʼdoo wéñuʼ numuu mu mbuʼyamajkuíí Jeobá (Salmo 22:22; 122:1). Ikhí nuxnámíjnalú tsiakii (Romanos 1:12).

19. Ndíjkha gíʼdoo numuu marathu̱u̱n eʼwíínʼ rí nijmañaaʼ náa Biblia rá.

¹⁹ Mu maraxtaa náa religión rí gajkhun, mangáán gíʼmaa marathu̱u̱n eʼwíínʼ xa̱bu̱ rí nijmañaaʼ náa Biblia. Mbaʼin xa̱bu̱ naxmiéjúnʼ wéñuʼ ga̱jma̱a̱ numuu dí ra̱májánʼ rí xtáa rarígá náa numbaaʼ. Mbáa natatsinuuʼ xa̱bu̱ bi̱ nakumu̱ún xúgi̱ kaʼnii. Arathún rí mitsaan rí xtaʼti̱i̱n makánaʼ. Índo̱ gídxúʼ náa reunión ga̱jma̱a̱ marathu̱u̱n eʼwíínʼ rí naʼthí náa Biblia, ma̱ta̱ya̱a̱ rí nánguá eyaaʼ gídxúʼ náa religión rí minduwaʼ ni matani rí nuni ikhí. Ikháán maraxtaa tsímáá ga̱jma̱a̱ rí Jeobá maʼni tsajkurámuuʼ xúgíʼ tsiakii rí natani mu matayamajkuíí xó má ikhaa eyoo (Malaquías 3:10).