1, 2. Náa gándoo gumbayúmíjná rí mbiʼi xúgi̱ rá.

ATATSAʼWÁMINAʼ rí xtaa ra̱dxu̱ʼ kamba̱a̱ ga̱jma̱a̱ mbá nacha̱ na̱jkha̱ rambájtu̱u̱n. Naxpíbiʼ, nundxa̱ʼwa̱ a̱jkhu̱u̱n ga̱jma̱a̱ nagíʼdu̱u̱ naxnúu gakhi̱i̱ ruʼwa. Ikhú ikháán natayááʼ náa matawa̱nʼ. ¡Naʼni̱i̱ a̱jkia̱nʼ índo̱ nataxkamaa náa ma̱ndoo matambáyuminaʼ!

² Rí mbiʼi xúgi̱ kuwáanʼ xúgi̱ kaʼnii. Numbaaʼ naʼni itháan xkawiʼ. Mbáa ikháán natraximínáʼ: “Náa gándoo gúmbayumíjná rá.” Mbáa bi̱ niʼnirámáʼ Biblia niʼthí: “Ikhúúnʼ mathu̱u̱n Jeobá: ‹Ikháánʼ ni̱ndxa̱ʼ náa mambáyuminaʼ, bi̱ nañewu̱nʼ, Dios ndrígóʼ, bi̱ naku̱mu̱ʼ ka̱yo̱o̱ má xúʼko̱›” (Salmo 91:2). Jeobá ma̱ndoo mambáyulúʼ ga̱jma̱a̱ xkujndu rí kuaʼdáá xúgi̱, ma̱ngaa naʼthúlúʼ rí makuwáanʼ májánʼ nda̱wa̱á.

3. Ndiéjunʼ gíʼmaa muʼni mu Jeobá mambáyulúʼ rá.

³ Xú káʼnii eñawu̱nlú Jeobá rá. Ikhaa ma̱ndoo mambáyulúʼ muraʼníí asndu xú káʼnii xkujndu rí kuaʼdáá. Ma̱ngaa, itháan gíʼdoo tsiakii ki xóo xa̱bu̱ bi̱ nandún gúniulú dí raʼkhí. Asndu á mu naguaʼnii dí ra̱májánʼ xúgi̱, nduʼyáá gajkhun rí Jeobá maʼni májaanʼ xúgíʼ nda̱wa̱á. Náa Biblia naʼthúlúʼ muʼni rígi̱: “Guni má xúʼko̱ rí nandoo Dios mu ikhaa ma̱ndoo kaʼyalaʼ” (Judas 21). Mu Jeobá mambáyulúʼ muraʼníí xkujndu, gíʼmaa rí mambáxulu gajmiúlú ikhaa. Mú, ndiéjunʼ gándoo gúʼni mu mambáxulu gajmiúlú xá.

4, 5. Xú káʼnii esngájma Jeobá rí nandoo kaʼyulú rá.

⁴ Mu mambáxulu má xúʼko̱ gajmiúlú Jeobá gíʼmaa makru̱ʼu̱lú rí ikhaa nandoo kaʼyulú wéñuʼ. Atatsaʼwáminaʼ xúgíʼ rí niʼni Jeobá ga̱jma̱á numulúʼ. Nixnúlú Ku̱ba̱ʼ rí nindxu̱u̱ mitsaan wéñuʼ náa rígá ixi̱ ga̱jma̱a̱ náa kúwi̱i̱n xujkhúʼ mitsiʼñíin. Ga̱jma̱a̱ nixnúlú ganitsu rí miʼtsí ga̱jma̱a̱ iyaʼ. Ma̱ngaa Jeobá niʼsngúlúʼ náa Biblia xú káʼnii mbiʼyuu ga̱jma̱a̱ xú káʼnii Dios nindxu̱u̱. Mú rí itháan nisngajma rí nandoo kaʼyulú nindxu̱u̱ rí nikuʼmaa A̱ʼdióo bi̱ nandoo kaʼyoo, Jesús, mu makhañúu ga̱jma̱a̱ numulúʼ (Juan 3:16). Núma̱a̱ má ga̱jma̱a̱ numuu rígi̱ dí rígá mbá rí mitsaan rí kuaʼti̱i̱n nda̱wa̱á.

⁵ Jeobá nigíʼ Reino ndrígóo Mesías mekhuíí. Xa̱bu̱ Ñajunʼ bugi̱ inu maʼni gámbóo tsingíná ga̱jma̱a̱ maʼni̱i̱ Ku̱ba̱ʼ mitsaan, náa makuwáanʼ tsímáá ga̱jma̱a̱ gagi (Salmo 37:29). Jeobá ma̱ngaa nisngájma rí nandoo kaʼyulú índo̱ naʼsngúlú xóo gándoo gakuwáanʼ májánʼ. Ma̱ngaa naʼthúlúʼ rí muʼtákáñii ga̱jma̱a̱ xtáa xawii mu madxaʼunlú. Xó má eʼyáá, Jeobá phú gajkhun nandoo kaʼyulú.

6. Xóo gatasngajmá rí naraxnáa núma̱aʼ Jeobá rí nandoo kaʼyaʼ rá.

⁶ Xú káʼnii gatasngajmá rí naraxnáa núma̱aʼ Jeobá rí nandoo kaʼyaʼ rá. Atayamajkuíí xúgíʼ rí niʼni ga̱jma̱a̱ núma̱aʼ. Phú gíná rí náa numbaaʼ kuwa wéñuʼ xa̱bu̱ bi̱ tséxna̱a̱ núma̱aʼ. Ga̱jma̱a̱ xúʼko̱ má nirígá nákha mbiʼi ndrígóo Jesús. Mbá miʼtsú Jesús niʼni thanún mbá guwiinʼ leprosos, mú káaʼ mbáwíi nixnáa núma̱aʼ (Lucas 17:12-17). Ikháanʼ nandulú manindxu̱lúʼ xóo xa̱bu̱ buʼko̱ ga̱jma̱a̱ muxnáa má xúʼko̱ núma̱aʼ Jeobá.

7. Xú káʼnii gíʼmaa maʼndulú kuʼyáá Jeobá rá.

⁷ Ma̱ngaa gíʼmaa musngajmá rí nandulú kuʼyáá Jeobá. Jesús niʼthún xa̱bi̱i̱ rí gíʼmaa maʼndún kuyáá Jeobá ga̱jma̱a̱  xúgíʼ a̱jkiu̱ún, nímiu̱ún ga̱jma̱a̱ xúgíʼ ku̱ma̱ ndrígu̱ún (atraxnuu Mateo 22:37). Ndiéjunʼ eyoo gáʼthúu̱n rígi̱ rá.

8, 9. Xú káʼnii esngajmáá Jeobá rí nandulúʼ kuʼyáá rá.

⁸ Lá i̱ndó ndayóoʼ muʼthá rí nandulú kuʼyáá Jeobá ráʼ. Na̱nguá. Á mu nandulú kuʼyáá Jeobá ga̱jma̱a̱ xúgíʼ a̱jkiu̱lú, nimiúlú ga̱jma̱a̱ ku̱ma̱ ndrígúlú, musngajmá ga̱jma̱a̱ rí nuʼnilú (Mateo 7:16-20). Náa Biblia naʼsngúlú kaʼwu rí á mu nandulú kuʼyáá Dios muʼnimbulúʼ kuʼyáá xtángoo ndrígóo. Lá mingíjyúuʼ nindxu̱u̱ ráʼ. Na̱nguá, numuu rí xtángoo ndrígóo Jeobá na̱nguá nindxu̱u̱ mingíjyúuʼ matanimbaníí (atraxnuu 1 Juan 5:3).

⁹ Índo̱ nuʼnimbulúʼ kuʼyáá Jeobá, nakuwáanʼ gagi ga̱jma̱a̱ nagiʼdoo numuu vida ndrígúlú (Isaías 48:17, 18). Mú, ndiéjunʼ gambáyulú mu mambáxulúʼ má xúʼko̱ gajmiúlú xá. Guʼyáá.

10. Ndíjkha rí ndayóoʼ majmañaaʼ má xúʼko̱ ga̱jma̱a̱ numuu Jeobá rá.

¹⁰ Xú káʼnii ni̱dxa̱ʼnú nimbáxaʼ ga̱jma̱a̱ʼ Jeobá rá. Índo̱ nitanigajmaa Biblia, nitatsiniiʼ itháan ga̱jma̱a̱ ikhú nimbáxa̱ʼ ga̱jma̱a̱ʼ. Rígi̱ nindxu̱u̱ xóo mbá aguʼ. Mú xajuiyuuʼ ndayóoʼ madriyaʼ má xúʼko̱ ixi̱. Rígi̱ nandoo gáʼthúu̱n rí ndayóoʼ majmañaaʼ má xúʼko̱ ga̱jma̱a̱ numuu Jeobá mu ma̱ndoo mambaxáaʼ má xúʼko̱ ga̱jma̱a̱ʼ (Proverbios 2:1-5).

11. Xú káʼnii gambayaaʼ rí gajmañaaʼ náa Biblia rá.

¹¹ Índo̱ gátanigajmaa má xúʼko̱ Biblia, ikháán majmañaaʼ rí maʼga̱nú asndu náa a̱jkia̱nʼ. Atayáá xú káʼnii nikumu̱ún a̱jmi̱i̱n xa̱bi̱i̱ Jesús índo̱ niʼthún ndiéjunʼ eyoo gáʼthúu̱n tikhu rí nijuiʼtáriyaʼ. Ikhiin nithi: “Lá raʼkháa asndu xóo aguʼ nirmáʼán náa a̱jkiu̱lú índo̱ ni̱ʼkha̱ raʼthúluʼ  náa kamba̱a̱, índo̱ niʼthúluʼ kaʼwu rí e̱ʼkha̱ raʼthí náa Ajngá rawunʼ Dios ráʼ.” (Lucas 24:32.)

12, 13. a) Ndiéjunʼ rí tsíyulú mambáa rá. b) Ndiéjunʼ gándoo muʼni mu xámbáa rí nandulú kuʼyáá Dios rá.

¹² Rí Jesús niʼsngúún a̱jmi̱i̱n xa̱bi̱i̱ ni̱jkha̱nú asndu náa a̱jkiu̱ún. Mbáa ikháán mangáán nidxaaʼ índo̱ nidxuʼ rakrua̱ʼa̱ʼ Biblia. Rígi̱ nimbáyaʼ matatsiʼniiʼ Jeobá ga̱jma̱a̱ maʼndaaʼ xtayáá. Ma̱ngaa tsíyaaʼ dí rígi̱ mámbáa (Mateo 24:12).

¹³ Rí xúgi̱ dí nambáxa̱ʼ ga̱jma̱ʼ Dios, gíʼmaa mataniminaʼ mu xandati̱ga̱a̱ʼ. Mú mbaʼyóoʼ majmañaaʼ má xúʼko̱ ga̱jma̱a̱ numuu Jeobá ma̱ngaa Jesús. Ma̱ngaa, gíʼmaa matatsaʼwa̱a̱ edxa̱ʼ rí xtaa rajmañaʼ ga̱jma̱a̱ xú káʼnii gátanimbaníí (Juan 17:3). Índo̱ gáraxnuu o gátanigajmaa Biblia, atraximínaʼ: “Ndiéjunʼ eʼsngóʼ rígi̱ ga̱jma̱a̱ numuu Jeobá rá. Ndíjkha rí gíʼmaa maʼndo̱ʼ ka̱yo̱o̱ Dios ga̱jma̱a̱ xúgíʼ a̱jkiu̱nʼ rá.” (1 Timoteo 4:15.)

14. Xú káʼnii embáyulú rí muʼtájkáan mu maʼndulú kuʼyáá Jeobá rá.

 ¹⁴ Á mu ikháán xtaʼdaa mbáa bi̱ nambáxa̱ʼ májánʼ ga̱jma̱a̱ʼ, ikháán naratamíjná ga̱jma̱a̱ʼ nángii eʼni. Rúʼko̱ naʼni rí mambaxáaʼ itháan májánʼ ga̱jma̱ʼ. Xúʼko̱ má rí nandulú kuʼyáá Jeobá naʼni itháan gújkhuʼ índo̱ nuʼtákáñii nángii eʼni (atraxnuu 1 Tesalonicenses 5:17). Rí muʼtájkáan nindxu̱u̱ mbá regalo mitsaan rí na̱ʼkha̱ náa Anu̱lú bi̱ xtaa mekhuíí. Gíʼmaa muʼthán rí nagájnuu asndu náa a̱jkiu̱lú (Salmo 62:8). Ragíʼmaa muʼthá kikháá índo̱ nuʼtájkáan, gíʼmaa makumulúʼ gajkhun rí nuʼthá. Á mu nuʼnigajmaa má xúʼko̱ Biblia ga̱jma̱a̱ nuʼtháán rí nagájnuu asndu náa a̱jkiu̱lú, ikhú maʼndulú kuʼyáá má xúʼko̱ Jeobá.

15, 16. Ndiéjunʼ etatsaʼwáminaʼ ga̱jma̱a̱ numuu rí najuiʼtáraʼa rá.

¹⁵ Mu mambáxulúʼ má xúʼko̱ gajmiúlú Jeobá, ma̱ngaa gíʼmaa muʼthúún eʼwíínʼ xa̱bu̱ rí nuʼnimbulúʼ. Rí muʼthúún eʼwíínʼ numuu Jeobá nindxu̱u̱ ñajunʼ kiejunʼ (Lucas 1:74). Ma̱ngaa nindxu̱u̱ mbá rí niʼtáñajunʼ Jesús muni xúgínʼ cristianos gajkhun. Ikha jngó xúgiáanʼ gíʼmaa muʼtáraʼa ajngáa rí májánʼ ndrígóo Reino. Lá xtaa má ratani̱ ráʼ. (Mateo 24:14; 28:19, 20.)

¹⁶ Apóstol Pablo ndiʼyoo rí gíʼdoo wéñuʼ numuu rí miʼtáraʼa rí asndu nixná mbiʼyuu “tesoro” (2 Corintios 4:7). Rí marathu̱u̱n eʼwíínʼ ga̱jma̱a̱ numuu Jeobá ga̱jma̱a̱ rí eyoo maʼni nindxu̱u̱ mbá rí itháan gíʼdoo numuu rí ikháán ma̱ndoo matani. Rí miʼtáraʼa nindxu̱u̱ ñajunʼ ndrígóo Dios, ga̱jma̱a̱ ikhaa ndaʼyoo rí gíʼdoo wéñuʼ numuu rí ikháán xtaa ratani̱ (Hebreos 6:10). Índo̱ naratáraʼa, ikháán natambáñun eʼwíínʼ mu mambaxúún gajmiún Dios ga̱jma̱a̱ nambáyaʼ mangáán mu mambaxáaʼ itháán ga̱jma̱ʼ. Ga̱jma̱a̱ numuu rí najuiʼtáraʼa, ikháán ma̱ndoo maraxtaa kámuu mbiʼi, ga̱jma̱a̱ bi̱ gudxawaanʼ  (atraxnuu 1 Corintios 15:58). Lá ma̱ndoo marigá imbo̱o̱ ñajunʼ rí maʼni maraxtaa itháan gagi ráʼ.

17. Ndíjkha rí ndayóoʼ miʼtáraʼa nacha̱ rá.

¹⁷ Ndayóoʼ rí majuiʼtáraʼa nacha̱. Náa Biblia naʼthí: “Aratáraʼa ajngáa, gaʼcha̱ʼ matani rígi̱” (2 Timoteo 4:2). Xa̱bu̱ ndañúunʼ rí mudxawíín ajngáa májánʼ ndrígóo Reino. Ma̱ngaa naʼthí: “Mbiʼi ndrígóo Jeobá na̱ʼkha̱nú mijngii” ga̱jma̱a̱ na̱ʼkha̱ nacha̱. Fin “xájyúuʼ má gáʼkha̱” (Sofonías 1:14; Habacuc 2:3). Inuu má rí Jeobá maʼni gámbáa numbaaʼ xkawiiʼ ndrígóo Satanás. Nákha xóó tsírígá, gíʼmaa rí muʼtámuʼun xa̱bu̱ mu ma̱ndoo muraʼwíí muni ñajuunʼ Jeobá.

18. Ndíjkha rí cristianos gíʼmaa magimbíin náa reunión mu mbuyamajkuíí Jeobá rá.

¹⁸ Jeobá nandoo rí bi̱ ni̱ndxu̱lú cristianos gajkhun magimbáanʼlú mu mbuʼyamajkuíí. Náa Biblia naʼthí: “Gíʼmaa muniʼnúnʼ májánʼ wéñuʼ eʼwíínʼ mu maxkaxáanʼlu maʼndulú kuʼñún ma̱ngaa muʼni rí májánʼ, xuniʼñáanʼ rajkua náa nawáanʼlu, xó má eguʼwun eni tikhun, rí phú gíʼmaa muʼni, guxnámíjná tsiakii, numuu rí ikháanʼlu nduʼyáá dí na̱ʼkha̱ rajngiyuu mbiʼi” (Hebreos 10:24, 25). Gíʼmaa muʼnimíjna̱ xó má eʼngo̱o̱ mu mu̱ʼgua̱ náa reunión. Numuu rí ikhí ma̱ndoo muxnamíjnálu tsiakii.

19. Ndiéjunʼ gambáyulú mu maʼndulú kuʼñúún a̱ngiu̱lú rá.

¹⁹ Náa reunión, ikháán mataxkamiin bi̱ mambaxáaʼ májánʼ gajmiáanʼ. Ikhiin mumbayááʼ matani ñajuunʼ Jeobá. Matatsiʼnúunʼ a̱ngiu̱lú bi̱ mixtiʼkun ga̱jma̱a̱ mixtiʼkhu náa naguwaʼ bi̱ mangiin nunimíjna̱ muni ñajuunʼ Jeobá. Mú, ni̱ndxu̱ún xó má ikháán, ni̱ndxu̱ún xa̱bu̱ aʼkhá ga̱jma̱a̱ nakiéʼkhún. Índo̱ gátagíʼnii rúʼko̱, atani mba̱a̱ a̱jkia̱nʼ xtañún (atraxnuu Colosenses 3:13). Atayáá náa xúgíʼ rí májánʼ rí nuni a̱ngiu̱lú. Rúʼko̱ gambayaaʼ maʼndaaʼ xtañún ga̱jma̱a̱ mambaxáaʼ itháan gajmaaʼ Jeobá.

20, 21. Ndiéjunʼ ñajuunʼ “vida rí phú nindxu̱u̱ gajkhun” rá.

²⁰ Jeobá nandoo rí xúgínʼ bi̱ nambáxu̱u̱ gajmíi̱n makuwa májánʼ. Náa Biblia naʼsngáa rí nda̱wa̱á makuwáanʼ mixtiʼkhu ki xóo rí kuwáanʼ xúgi̱.

²¹ Rí nda̱wa̱á, makuwáanʼlu kámuu, ga̱jma̱a̱ raʼkháa káaʼ 70 u 80 tsiguʼ. Makuwáanʼlu “kámuu mbiʼi” náa ixi̱ ri̱ʼi̱ mitsaan, náa ní xáʼniulu nandii, makuwáanʼlu tsímáá ga̱jma̱a̱ gagi. Ikhaa rígi̱ rí Biblia naxná mbiʼyuu “vida rí phú nindxu̱u̱ gajkhun”. Jeobá nakudaminaʼ maxnúlúʼ vida rígi̱, mú ikháanʼ gíʼmaa muʼnimíjna̱ mu makhánulúʼ (1 Timoteo 6:12, 19).

22. a) Xóo gándoo guxkamaa “vida rí phú nindxu̱u̱ gajkhun” rá. b) Ndíjkha rí nditháan rakáʼyulú makuwáanʼ kámuu mbiʼi rá.

²² Xú káʼnii guxkamaa “vida rí phú nindxu̱u̱ gajkhun” rá. Gíʼmaa muʼni ñajunʼ “rí májánʼ” ga̱jma̱a̱ “guguaʼdáá rí májánʼ rí na̱ʼkha̱ náa Dios” (1 Timoteo 6:18). Rígi̱ nandoo gáʼthúu̱n rí gíʼmaa muʼni rí ejmañuluʼ náa Biblia. Mú rí makuwáanʼlu kámuu na̱nguá nindxu̱u̱ mbá rí maʼngulú muxkamaa ga̱jma̱a̱ numuu tsiakii ndrígúlú. Maski ajndu muʼni xó má eʼngo̱o̱, nditháan rakáʼyulú muguaʼdáá. Nindxu̱u̱ mbá regalo rí Jeobá naxnún xa̱bi̱i̱ bi̱ jmbiin rí nasngájma ‹rí májánʼ wéñuʼ a̱jkiu̱u̱n› (Romanos 5:15). Anu̱lú bi̱ xtáa mekhuíí ra̱ʼkhá tháán eyoo maxnún xa̱bi̱i̱ regalo mitsaan rígi̱.

23. Náa numuu rí xúgi̱ gíʼmaa matraʼwíí matani rí májánʼ rá.

²³ Atraximínaʼ: “Ikhúúnʼ rá. Lá ndayamajkhuu Dios xó má eyoo ikhaa xáʼ.” Á mu natayáá rí gíʼmaa matriʼkuminaaʼ, atani mbá nacha̱. Índo̱ nakumulú kuʼyáá Jeobá ga̱jma̱a̱ nuʼnimíjna̱ muʼnimbulúʼ kuʼyáá, ikhaa na̱jkha̱nú nanindxu̱u̱ bi̱ nañewu̱nlú. Jeobá mañewu̱u̱n xa̱bi̱i̱ jmbiin náa iwáá mbiʼi náa numbaaʼ xkawiiʼ rígi̱. Ga̱jma̱a̱  nda̱wa̱á maʼni rí makuwáanʼ kámuu mbiʼi náa Ku̱ba̱ʼ mitsaan, xó má nikudaminaʼ. Á mu ikháán natraʼwíí matani rí májánʼ, mataxkamaa rí maraxtaa kámuu.