1. Tsáa niʼni rí makuwáanʼ rá.

JEOBÁ “nindxu̱u̱ mbáa Dios bi̱ ndaʼya” (Jeremías 10:10). Ikhaa niʼniáanʼ ga̱jma̱a̱ niʼni makuwáanʼ. Náa Biblia naʼthí ga̱jma̱a̱ numuu Jeobá: “Ikháán nitani̱ xúgíʼ dí rígá, ga̱jma̱a̱ numaʼ ikháán nindoo niguma xúgíʼ” (Revelación [Apocalipsis] 4:11). Kuwáanʼ nduʼya numuu rí Jeobá xúʼko̱ nindoo. Vida nindxu̱u̱ mbá regalo rí gíʼdoo wéñuʼ numuu rí nixnúlú Dios (atraxnuu Salmo 36:9).

2. Ndiéjunʼ gíʼmaa muʼni mu makuwáanʼ májánʼ rá.

² Jeobá naxnúlú xúgíʼ rí ndayúlú mu makuwáanʼ xóo ganitsu ga̱jma̱a̱ iyaʼ (Hechos 17:28). Ma̱ngaa nandoo makuwáanʼ tsímáá (Hechos 14:15-17). Mu makuwáanʼ májánʼ gíʼmaa muʼnimbulúʼ kuʼyáá Dios (Isaías 48:17, 18).

3. Ndiéjunʼ niʼni Jeobá índo̱ Caín nixíyáa Abel rá.

³ Náa Biblia naʼsngúlú rí Jeobá ndaʼyoo rí gíʼdoo wéñuʼ numuu vida ndrígu̱ún xúgínʼ xa̱bu̱ numbaaʼ. Guʼyáá xkri̱da ndrígóo Caín, a̱ʼdióo giʼnii Adán ga̱jma̱a̱ Eva. Caín nikiʼnáa wéñuʼ kaʼyoo Abel. Ikha jngó Jeobá niʼtámúʼúun Caín rí xájmanguʼ, mú Caín táʼnimbo̱o̱. Nikiʼnáa wéñuʼ rí asndu “nixnúu giʼtio̱o̱ Abel ga̱jma̱a̱ nixíyáa” (Génesis 4:3-8). Jeobá nixnúu castigo Caín numuu rí nixíyáa Abel (Génesis 4:9-13). Rígi̱ naʼsngúlú rí sia̱nʼ ga̱jma̱a̱ rí mawiyulú kuʼyáá mbáa nindxu̱u̱ migamíi wéñuʼ numuu rí maʼniáanʼ xa̱bu̱ bi̱ najmangu̱nʼ wéñuʼ o muʼni  gíníi eʼwíínʼ. Xa̱bu̱ bi̱ nuni rígi̱ xákuwa kámuu mbiʼi (atraxnuu 1 Juan 3:15). Mu muʼni rí naniguuʼ Jeobá, gíʼmaa majmañulúʼ maʼndulú kuʼñúún xúgínʼ xa̱bu̱ (1 Juan 3:11, 12).

4. Ndiéjunʼ eʼsngúlúʼ ga̱jma̱a̱ numuu vida mbá rí Gu̱wa̱ʼ Xtángoo rá.

⁴ Mba̱yu̱ʼ tsiguʼ nda̱wa̱á Jeobá nixnúu Moisés mbá Gu̱wa̱ʼ Xtángoo. Mbá rí ikhaa naʼthí: “Ragíʼmaa mataxíyáa nimbáa xa̱bu̱” (Deuteronomio 5:17). Xa̱bu̱ bi̱ naxíyáa imba̱a̱ xa̱bu̱ gíʼmaa makhañúu. Rígi̱ naʼsngúlú rí vida gíʼdoo wéñuʼ numuu náa Jeobá.

5. Ndiéjunʼ endxa̱ʼwáminaʼ Jeobá ga̱jma̱a̱ numuu rí nugrájkhi̱ín e̱jñún xá.

⁵ Ndiéjunʼ endxa̱ʼwáminaʼ Jeobá ga̱jma̱a̱ numuu rí nugrájkhi̱ín e̱jñún xá. Ikhaa ndaʼyoo rí vida ndrígóo mbáa ada̱ bi̱ xóó tséxtáa gíʼdoo wéñuʼ numuu. Jeobá niniñuʼ kaʼwu náa Xtángoo rí nixnúún israelitas: Á mu mbáa naʼni gawúunʼ mbáa a̱ʼgu̱ bi̱ kaguewáan mbáa ada̱ ga̱jma̱a̱ a̱ʼdióo nakháñuu, bi̱ gíʼdoo aʼkhúun gíʼmaa makhañúu (atraxnuu Éxodo 21:22, 23; Salmo 127:3). Rígi̱ naʼsngúlú rí Jeobá tsíyoo gáʼyoo rí nugrájkhi̱ín e̱jñún gu̱ʼu̱ (atayáá nota 28).

6, 7. Xú káʼnii esngajmáá Jeobá rí nduʼyamajkuíí vida rá.

⁶ Xú káʼnii esngajmáá Jeobá rí nduʼyamajkuíí vida rá. Ragíʼmaa muʼni nimbá rí maʼni gachúu vida ndrígúlú o vida ndrígu̱ún eʼwíínʼ. Ikha jngó tsitsikhá ndíí, marihuana o i̱ʼwáʼ drogas numuu dí rígi̱ maʼni gacháanʼ ga̱jma̱a̱ ma̱ndoo magudiáanʼ.

⁷ Numuu rí Dios nixnúlú vida ga̱jma̱a̱ xuyulúʼ, gíʼmaa majmulúʼ xóo eyoo ikhaa. Ikha jngó gíʼmaa muñewa̱a̱n xuyulúʼ. Á mu tséʼni, Dios mbaʼyulú rí mitsagáanʼ (Romanos 6:19; 12:1; 2 Corintios 7:1). Xándoo mbuʼyamajkuíí Dios á mu tséʼyamajkuíí vida, rí nindxu̱u̱ mbá regalo rí  nixnúlú ikhaa. Gajkhun má rí maʼni gakhi̱i̱ muniʼñáʼ rí naguʼwunlú nuʼni. Mú á mu nduʼyamajkuíí vida ga̱jma̱a̱ nandulú muniʼñáaʼ, Jeobá má gambáyulú.

8. Xóo gúñewa̱a̱n vida ndrígúlú ga̱jma̱a̱ ndrígu̱ún eʼwíínʼ rá.

⁸ Ndiʼyáá má rí vida nindxu̱u̱ mbá regalo rí gíʼdoo wéñuʼ numuu. Jeobá gíʼthu̱u̱n rí muʼni xúgíʼ rí gáʼngo̱o̱ mu muñewa̱a̱n vida ndrígúlú ga̱jma̱a̱ vida ndrígu̱ún eʼwíínʼ. Ikha jngó, na̱jkua̱ kuʼyúlú tsumáá carriulu, motiulu o i̱mba̱ rí najmulú. Ma̱ngaa tséʼtsíin náa gitsíin rí migamíi makhañúlúʼ (Salmo 11:5). Ma̱ngaa nduʼyáá á mu guʼwúlú nindxu̱u̱ májánʼ. Jeobá niʼtáñajúúnʼ israelitas rí muni mbá chíʼgíʼ xtátsí mbájndi tsu̱du̱u̱ guʼwá. Náa numuu rá. Ikhaa niʼthún: “Mu xájpatríguíi mbáa ikhí mu xátani rí marigá aʼkhá náa guʼwáaʼ” (Deuteronomio 22:8).

9. Xú káʼnii gíʼmaa muʼniu̱u̱n xujkhúʼ rá.

⁹ Jeobá ma̱ngaa naxmiéjunʼ xóo eʼniu̱u̱n xujkhúʼ. Ikhaa naniñuuʼ muraʼdíin xujkhúʼ mu muʼphúnʼ. Ma̱ngaa naniñuuʼ muxiyáa mbáa xujkhúʼ á mu migamíi maʼni gawúnlú (Génesis 3:21; 9:3; Éxodo 21:28). Mú ragíʼmaa muʼni gíníi xujkhúʼ ni muradíin o muʼni rí ikhiin muxmijná numuu rí nandulú muminduuʼ o muʼni gagimijná (Proverbios 12:10).

10. Náa numuu eʼyáá rí eʼdi nandoo gáʼthúu̱n vida rá.

¹⁰ Eʼdi nindxu̱u̱ mitsáʼkhúun numuu rí nindxu̱u̱ vida. Ikha jngó, Jeobá nixnúu castigo Caín numuu rí nixídii eʼdiuu Abel, xóo muʼthá, numuu rí nixíyáa (Génesis 4:10). Nda̱wa̱á rí nixnúu Ruʼwa mbiiʼ, niniñuʼ kaʼwu rí eʼdi nandoo gáʼthúu̱n vida. Jeobá niniñuʼ mikhu̱u̱n xujkhúʼ Noé gajmíi̱n bi̱ kuwa náa goʼwóo. Niʼthún: “Xúgínʼ xujkhúʼ bi̱ nduya ma̱ndoo muphu xuñún. Xúʼko̱ má  ma̱ndoo muphu xúgíʼ yaʼu, rí naniʼñuʼ muphu xúgiáanʼ ikháanʼ”. Mú Jeobá niʼthún dí rígá mbá rí xándoo mu̱phu̱: “I̱ndó xuwiʼ ga̱jma̱a̱ vida ndrígóo, eʼdiu, ragíʼmaa muphula” (Genesis 1:29; 9:3, 4, nota).

11. Xú káʼnii xtángoo nixnúún xa̱bi̱i̱ Jeobá rá.

¹¹ Mbá 800 tsiguʼ nda̱wa̱á rí niʼthúu̱n Noé rí xákhu̱ eʼdi, Jeobá niʼthúu̱n xuajñu: “Asndu tsáa má xa̱bíi bi̱ nindxu̱u̱ a̱ʼdióo xa̱bu̱ Israel o mbáa xa̱bu̱ bi̱ na̱ʼkha̱ náa i̱mba̱ xuajin bi̱ xtáa náa ikháanʼla, á mu xa̱bu̱ bugi̱ naxíyáa mbáa xujkhú xáná o mbáa ñu̱ʼu̱ bi̱ ma̱ndoo mikhu xuyuuʼ, gíʼmaa rí maxídii eʼdiuu ma̱ngaa marugoo ga̱jma̱a̱ yujndaʼ”. Ga̱jma̱a̱ xóó niʼthí: “Ragíʼmaa mu̱phu̱ eʼdiuu xujkhúʼ” (Levítico 17:13, 14). Jeobá xóó nindoo rí xa̱bi̱i̱ mbuyáá rí nindxu̱u̱ mitsáʼkháan eʼdi. Ma̱ndoo mu̱phu̱ xuwiʼ, mu eʼdi xándoo. Índo̱ nuxi̱ya̱a̱ mbáa xujkhúʼ mu muphi̱i̱, gíʼmaa muxidíí eʼdiuu mbayííʼ.

12. Xú káʼnii eyáá cristianos eʼdi rá.

¹² Nguáthá tsiguʼ nda̱wa̱á rí nikháñuu Jesús, apóstoles ga̱jma̱a̱ bi̱ kuya̱ edxu̱u̱ náa congregación náa Jerusalén nigimbíin mu mbuyáá náa Xtángoo rí nijuixnúún xa̱bu̱ israelitas rí gíʼmaa munimbánii bi̱ cristianos (atraxnuu Hechos 15:28, 29; 21:25). Jeobá nimbáñun makru̱ʼu̱u̱n rí eʼdi xóó gíʼdoo wéñuʼ numuu náa ikhaa ga̱jma̱a̱ rí cristianos gíʼmaa mbuyáá rí gíʼdoo numuu. Cristianos bi̱ nikuwa nákha siglo timbá ragíʼmaa mu̱phu̱ eʼdi ga̱jma̱a̱ muwa̱a̱n. Ma̱ngaa ragíʼmaa mu̱phu̱ xuwiʼ dí tagadíí májánʼ eʼdiuu. Rí muni rúʼko̱ nindxu̱u̱ ra̱májánʼ kayuʼ, nindxu̱u̱ ikháá má xóo matayamajkúún xándú o rí mubúúnʼ gajmiún mbáa. Asndu nákha ikhú bi̱ ni̱ndxu̱ún cristianos gajkhun tséʼphu̱ ga̱jma̱a̱ tseʼwa̱a̱n eʼdi. Jeobá xóo nandoo mbuʼyáá rí eʼdi nindxu̱u̱ mitsáʼkhúun.

13. Náa numuu rí tséta̱ʼa̱a̱n eʼdi cristianos rá.

 ¹³ Lá nandoo gáʼthúu̱n rígi̱ rí mangiin cristianos ragíʼmaa mata̱ʼa̱a̱n eʼdi ráʼ. Xúʼko̱. Jeobá naʼthí dí ragíʼmaa mu̱ʼphu̱ ní muʼwa̱a̱n eʼdi. Atatsaʼwáminaʼ rígi̱: Á mu médico gáʼtháanʼ dí ragíʼmaa migi̱i̱n alcohol, lá mataxuʼdáaʼ náa xuyaaʼ ráʼ. Na̱nguá. Ikhaa má kayuuʼ, xtángoo ndrígóo Dios náa naʼthí rí xíʼtsu ga̱jma̱a̱ xígíin eʼdi ma̱ngaa nandoo gáʼthúu̱n rí maxáta̱ʼa̱a̱ʼ eʼdi (atayáá nota 29).

14, 15. Ndíjkha rí cristianos gíʼmaa mbuyamajkuíí vida ga̱jma̱a̱ munimbu̱ún kuyáá Dios rá.

¹⁴ Á mu mbáa médico gáʼthulúʼ rí makhañúlúʼ á mu tséta̱ʼa̱a̱lú eʼdi rá. Mámbáa rí ikháanʼ gíʼmaa maraʼwíí á mu maʼnimbo̱o̱ xtángoo ndrígóo Dios ga̱jma̱a̱ numuu eʼdi. Bi̱ cristianos nduʼyáá vida xóo mbá regalo ndrígóo Dios ga̱jma̱a̱ nduʼyamajkuíí wéñuʼ. Ikha jngó nduʼyáaʼ i̱ʼwáʼ thana rí mambáyulúʼ mu makuwáanʼ xóó, mú tséta̱ʼa̱a̱lú eʼdi.

¹⁵ Nuʼni xúgíʼ rí eʼngo̱o̱ mu xáʼniulu nandii. Mú eʼdi nindxu̱u̱ vida ga̱jma̱a̱ mitsáʼkháan nindxu̱u̱ náa Dios, ikha jngó tséta̱ʼa̱a̱lú eʼdi. Ikháanʼ nduʼyáá rí itháan gíʼdoo numuu muʼnimbulúʼ kuʼyáá Jeobá ki xóo muʼnimíjna̱ makuwáanʼ itháan rí asndu xúʼnimbánii xtángoo ndrígóo. Jesús niʼthí: “Bi̱ maʼndoo maʼnikríyaaʼ vida ndrígóo, maʼnimbáti̱ga̱; mú bi̱ gáʼnimbáti̱ga̱ ga̱jma̱a̱ numuʼ, maxkama̱a̱” (Mateo 16:25, nota). Nandulúʼ muʼnimbulúʼ kuʼyáá Jeobá numuu rí nandulú kuʼyáá. Ma̱ngaa ikhaa ndaʼyoo ndiéjunʼ rí itháan májánʼ náa ikháanʼ. Xó má ikhaa, nduʼyáá rí vida gíʼdoo wéñuʼ numuu ga̱jma̱a̱ mitsáʼkháan (Hebreos 11:6).

16. Náa numuu rí nuʼnimbulúʼ kuʼyáá Dios bi̱ ni̱ndxu̱lú cristianos rá.

¹⁶ Bi ni̱ndxu̱lú cristianos gajkhun nuʼgíʼ nuʼnimbaníí xtángoo ndrígóo Dios ga̱jma̱a̱ numuu eʼdi. Ikha jngó, xúʼphu̱  ni xúʼwa̱a̱n eʼdi ní má xundrígú xóo thana. * Mú mundrígú i̱ʼwáʼ thana mu muʼgíʼ makuwaanʼ xóó. Dios niʼni makuwáanʼ ga̱jma̱a̱ niʼni eʼdi, ga̱jma̱a̱ nduʼyáá rí ikhaa ndaʼyoo rí nindxu̱u̱ itháan májánʼ náa ikháanʼ. Lá xúʼko̱ tayáá mangáán ráʼ.

17. I̱ndó náa numuu niniñuuʼ Jeobá majmaa eʼdi náa Israel rá.

¹⁷ Náa xtángoo ndrígóo Moisés, Jeobá niʼthún israelitas: “Numuu rí eʼdi dí rígá náa xuwiʼ nindxu̱u̱ vida, ikhúúnʼ naxidíí eʼdi náa altar mu xúʼko̱ ikháanʼ xaguaʼdáá aʼkhá, numuu rí eʼdi naʼni rí mambáa aʼkhá” xóo muʼthá, naʼni mba̱a̱ a̱jkiu̱u̱n kaʼñún (Levítico 17:11, atayáá nota). Índo̱ israelitas nuxuda̱mi̱jna̱ aʼkhá, Jeobá ma̱ndoo maʼni mba̱a̱ a̱jkiu̱u̱n kaʼñún índo̱ nagún ku̱ya̱a̱ mbáa xujkhúʼ náa templo mu ndxajkun maxnáxi̱i̱ ga̱jma̱a̱ maxidirámuuʼ mbá tapha eʼdi náa altar. I̱ndó xúʼko̱ rí Jeobá naniñuuʼ majmaa eʼdi náa Israel.

18. Ndiéjunʼ nindoo nirígá ga̱jma̱a̱ numuu tsigijñaʼ ndrígóo Jesús rá.

¹⁸ Índo̱ Jesús ni̱ʼkha̱ náa tsu̱du̱u̱ Ku̱ba̱ʼ, nixnáxi̱ vida o eʼdi ndrígóo mu aʼkhá ndrígúlú majngudi̱i̱. Nda̱wa̱á nánguá ndiyóoʼ muxnaxi̱i̱n xujkhúʼ, xó má nijuiʼthá náa Xtángoo (Mateo 20:28; Hebreos 10:1). Vida ndrígóo Jesús nigiʼdoo wéñuʼ numuu. Ga̱jma̱a̱ numuu tsigijñaʼ ndrígóo, Jeobá nindoo niʼni rí xúgínʼ xa̱bu̱ ma̱ndoo makuwá kámuu mbiʼi (Juan 3:16; Hebreos 9:11, 12; 1 Pedro 1:18, 19).

19. Ndiéjunʼ gúʼni mu xáguaʼdáá “aʼkhá ga̱jma̱a̱ numuu eʼdiún xúgínʼ xa̱bu̱” rá.

¹⁹ Nuxnáa wéñuʼ núma̱a̱ Jeobá numuu rí nixnúlú  vida rí nindxu̱u̱ mitsaan. Ikha jngó, nandulúʼ muʼthúún xa̱bu̱ á mu nusngájma fe náa Jesús ma̱ndoo makuwá kámuu. Ma̱ngaa numuu rí nandulú kuʼñúún nuʼni xúgíʼ rí naʼngo̱o̱ mu muʼsngúún ndiéjunʼ gíʼmaa muni mu makuwá kámuu mbiʼi (Ezequiel 3:17-21). Xúʼko̱ ma̱ndoo muʼthá xó má apóstol Pablo: “Na̱nguá gúʼdoo aʼkhá ga̱jma̱a̱ numuu eʼdiún xúgínʼ xa̱bu̱, numuu rí táni gaʼduunʼ mathu̱u̱n xúgíʼ xtágabu ndrígóo Dios” (Hechos 20:26, 27). Índo̱ nuʼthá ga̱jma̱a̱ numuu Jeobá ma̱ngaa rí ikhaa ndaʼyoo rí gíʼdoo wéñuʼ numuu vida, nusngajmá rí nduʼyamajkuíí wéñuʼ vida ga̱jma̱a̱ eʼdi.