1. Xú káʼnii tsajkhun gajmañulú náa capítulo rígi̱ rá.

MBAʼIN wéñuʼ xa̱bu̱ nuniʼnuuʼ padrenuestro. Jesús nijmuu tsajkhun rígi̱ rí najmaʼnuuʼ wéñuʼ mu maʼsngúún xa̱bi̱i̱ xóo mutajkáan. Ndiéjunʼ ninda̱ʼa̱ Jesús náa tsajkhun rúʼko̱ rá. Ndíjkha rí gíʼdoo numuu makru̱ʼu̱lú ndiéjunʼ eyoo gáʼthúu̱n rá.

2. Ndiéjunʼ niʼsngúlúʼ Jesús munda̱ʼa̱ índo̱ guʼtájkáan rá.

² Jesús niʼthí: “Ikháanʼ gíʼmaa mutajkáan xúgi̱ kaʼnii: ‹Anu̱xu bi̱ xtaa mekhuíí, gaguma kaʼwi̱i̱ mbiʼyaaʼ. Ga̱ʼkha̱ reino ndrígáʼ. Gambanúu xóo rí nandaʼ ikháán, xó má rí nambánuu mekhuíí, xúʼko̱ má gambánuu mbayííʼ gi̱jyooʼ ma̱ngaa›” (atraxnuu Mateo 6:9-13). Náa numuu rí Jesús niʼsngúlúʼ munda̱ʼa̱ ajtsú rígi̱ rá. (Atayáá nota 20.)

3. Ndiéjunʼ gúʼyáá náa capítulo rígi̱ rá.

³ Nijmañulúʼ má rí Dios mbiʼyuu Jeobá. Ma̱ngaa ndiʼyáá ndiéjunʼ eyoo Dios maʼni gajmíi̱n xa̱bu̱ náa tsu̱du̱u̱ Ku̱ba̱ʼ. Mú ndiéjunʼ nindoo gáʼthi Jesús índo̱ niʼthí: “Ga̱ʼkha̱ reino ndrígáʼ” rá. Náa capítulo rígi̱ mbuʼyáá ndiéjunʼ nindxu̱u̱ Reino ndrígóo Dios, ndiéjunʼ gáʼni ga̱jma̱a̱ xú káʼnii gáʼngo̱o̱ gáʼni kaʼwi̱i̱ mbiʼyuu Dios.

4. Ndiéjunʼ nindxu̱u̱ Reino ndrígóo Dios, ga̱jma̱a̱ tsáa nindxu̱u̱ Rey rá.

⁴ Reino ndrígóo Dios nindxu̱u̱ mbáa Xa̱bu̱ Ñajunʼ bi̱ Jeobá nigíiʼ mekhuíí. Dios ndiyáaʼ Jesús mu  mani̱ndxu̱u̱ Rey o Xa̱bu̱ Ñajunʼ náa Reino rúʼko̱. Náa Biblia naʼthí rí Jesús nindxu̱u̱ “Rey bi̱ naʼtañajunʼ ga̱jma̱a̱ Señor náa nutañajunʼ” (1 Timoteo 6:15). Jesús ma̱ndoo maʼni itháan ga̱jma̱a̱ numulúʼ ki xóo mbáa Xa̱bu̱ Ñajunʼ náa numbaaʼ. Ma̱ngaa, ikhaa gíʼdoo itháan tsiakii ki xóo xúgínʼ Xa̱bu̱ Ñajunʼ náa numbaaʼ.

5. Náa gáʼtañajunʼ Reino ndrígóo Dios, ga̱jma̱a̱ asndu náá rá.

⁵ Jesús nitanga̱a̱ mekhuíí 40 mbiʼi nda̱wa̱á rí nigabi̱i̱. Nda̱wa̱á, Jeobá nigíiʼ xóo Rey náa Reino ndrígóo (Hechos 2:33). Reino ndrígóo Dios maʼtáñajunʼ náa tsu̱du̱u̱ Ku̱ba̱ʼ asndu náa mekhuíí (Revelación [Apocalipsis] 11:15). Ikha jngó, náa Biblia naʼthí dí Reino ndrígóo Dios nindxu̱u̱ “reino dí rígá mekhuíí” (2 Timoteo 4:18).

6, 7. Náa numuu rí Jesús nindxu̱u̱ itháan májaanʼ ki xóo eʼwíínʼ Xa̱bu̱ Ñajunʼ rá.

⁶ Náa Biblia naʼthí rí Jesús nindxu̱u̱ itháan májaanʼ ki xóo eʼwíínʼ Xa̱bu̱ Ñajunʼ náa numbaaʼ, numuu rí “mbáwíi nindxu̱u̱ bi̱ xáʼganú makhañúu” (1 Timoteo 6:16). Xúgínʼ Xa̱bu̱ Ñajunʼ na̱jkha̱nú nakháñun, mú Jesús xákhañuu nditháan. Ikha jngó xúgíʼ rí májánʼ rí gaʼni Jesús ga̱jma̱a̱ numulúʼ mbajyúuʼ asndu kámuu.

⁷ Ma̱ngaa náa Biblia naʼsngáa rí Jesús mani̱ndxu̱u̱ mbáa Rey jmbii ga̱jma̱a̱ bi̱ nagáwiinʼ a̱jkiu̱u̱n. Náa kiʼtáriyaʼ naʼthí rí Jesús makánaa espíritu ndrígóo Jeobá, “ga̱jma̱a̱ espíritu rí maʼni majmañuu wéñuʼ ga̱jma̱a̱ rí maʼni makro̱ʼo̱o̱, espíritu dí maxná consejo ga̱jma̱a̱ mu magiʼdoo wéñuʼ tsiakii, espíritu mu magiʼdoo ku̱ma̱ ga̱jma̱a̱ mu xáʼni dí tsíniguʼ Jeobá”. Ga̱jma̱a̱ ma̱ngaa naʼthí: “Ga̱jma̱a̱ índo̱ gánda̱ʼa̱a̱ cuenta náa xa̱bu̱ gíníi maʼni ga̱jma̱a̱ májánʼ, ga̱jma̱a̱ ikhaa gíʼmaa maxprígun  ga̱jma̱a̱ májánʼ xa̱bu̱ manso” (Isaías 11:2-4). Lá tsínigua̱a̱ʼ maraʼdaa mbáa Rey bi̱ nindxu̱u̱ xúʼko̱ ráʼ.

8. Xú káʼnii eʼyáá rí Jesús xáʼtañajunʼ mbáwíi rá.

⁸ Náa Biblia naʼthí rí Dios niraʼwíín tikhun xa̱bu̱ mu mutañajunʼ gajmiún Jesús mekhuíí. Mbá xkri̱da, apóstol Pablo niʼthúu̱n Timoteo: “Á mu naʼngulú [...], ikhú muʼtáñajunʼ” (2 Timoteo 2:12). Nguáthi̱i̱n xa̱bu̱ numbaaʼ gútañajunʼ gajmiún Jesús rá.

9. a) Nguáthi̱i̱n xa̱bu̱ numbaaʼ gáʼtañajunʼ gajmíi̱n Jesús rá. b) Nguáná nigíʼdu̱u̱ niraʼwíin Jeobá bi̱ 144,000 rá.

⁹ Xó má nijmañulúʼ náa capítulo 7, apóstol Juan ndiʼyoo mbá visión náa ndiʼyoo Jesús xóo Rey náa mekhuíí gajmíi̱n mbá 144,000 reyes. Tsíin ni̱ndxu̱ún bi̱ 144,000 rá. Mínaʼ má Juan naʼthí: “Bugi̱ nagún kidxuuʼ Aʼdá múgú tséʼniuu má náa ejkha̱”. Ma̱ngaa niʼthí rí ikhiin “nijuiʼtsiwíin náa xa̱bu̱ numbaaʼ” (atraxnuu Revelación 14:1, 4). Aʼdá múgú nindxu̱u̱ Jesús. Ga̱jma̱a̱ bi̱ 144,000 ni̱ndxu̱ún cristianos jmbiin bi̱ Dios niraʼwíin mu “mutañajunʼ náa tsu̱du̱u̱ ku̱ba̱ʼ” gajmiún Jesús. Índo̱ ikhiin nakháñun, nagabi̱ín mekhuíí (Revelación 5:10). Jeobá nigíʼdu̱u̱ niraʼwíin bi̱ 144,000 asndu nákha siglo timbá.

10. Náa numuu rí Jeobá nigíiʼ Jesús gajmíi̱n bi̱ 144,000 mu mutañajunlú rá.

¹⁰ Jeobá nandoo kaʼyulú wéñuʼ ikha jngó nindoo rí xa̱bu̱ numbaaʼ mutañajunʼ gajmiún Jesús. Jesús mani̱ndxu̱u̱ mbáa Xa̱bu̱ Ñajunʼ májaanʼ numuu rí ninindxu̱u̱ xa̱bu̱ numbaaʼ ga̱jma̱a̱ nimínuuʼ wéñuʼ. Apóstol Pablo niʼthí rí Jesús ndaʼyoo xóo ekumulú ga̱jma̱a̱ nakro̱ʼo̱o̱ “rí tseʼngulú guʼnimbánii”, numuu rí ikhaa “niʼngo̱o̱ niraʼnuu xúgíʼ xkujndu xó má ikháanʼ” (Hebreos 4:15; 5:8). Mú ma̱ngaa bi̱ 144,000 nakru̱ʼu̱u̱n rí  nakumulú xóo xa̱bu̱ numbaaʼ numuu rí mangiin nimíniiʼ numuu aʼkhá ga̱jma̱a̱ nandii. Ikha jngó, nduʼyáá májánʼ rí Jesús gajmíi̱n bi̱ 144,000 makru̱ʼu̱u̱n rí nakumulú ga̱jma̱a̱ xkujndu ndrígúlú.

11. Ndíjkha niʼsngáa Jesús rí munda̱ʼa̱ maguma rí nandoo Dios mekhuíí rá.

¹¹ Jesús niʼsngúún xa̱bi̱i̱ rí munda̱ʼa̱ rí mambanúu rí nandoo Dios náa tsu̱du̱u̱ Ku̱ba̱ʼ ga̱jma̱a̱ náa mekhuíí. Náa numuu rí ndiyóoʼ munda̱ʼa̱ rí maguma rí nandoo Dios mekhuíí xá. Náa capítulo 3 nijmañulúʼ rí Satanás nikuxi̱minaʼ náa Dios. Jeobá niniñuuʼ rí Satanás gajmíi̱n ángeles bi̱ túnimbu̱u̱n o xa̱bu̱ wéñiʼ makuwa xóó mekhuíí. Ikha jngó raʼkháa xúgínʼ bi̱ kuwa mekhuíí nuni rí nandoo Dios. Náa capítulo 10 majmañulúʼ itháan ga̱jma̱a̱ numuu Satanás mangiin xa̱bu̱ wéñiʼ.

12. Ndiéjunʼ a̱jma̱ rí gíʼdoo numuu najuiʼthá náa Revelación 12:10 rá.

¹² Náa Biblia niʼthí rí Jesús maxmínaʼ ga̱jma̱a̱ Satanás nda̱wa̱á rí mani̱ndxu̱u̱ Rey náa Reino ndrígóo Dios (atraxnuu Revelación 12:7-10). Náa Revelación 12:10 naʼthí a̱jma̱ dí nirígá rí gíʼdoo wéñuʼ numuu. Timbá, Jesucristo nagíʼdu̱u̱ naʼtáñajunʼ. Ga̱jma̱a̱ rí maʼni a̱jma̱, najuixkríguíi Satanás náa tsu̱du̱u̱ Ku̱ba̱ʼ. Xó má gúʼyáá, nájma̱ rígi̱ nirígá má.

13. Ndiéjunʼ nirígá mekhuíí índo̱ Satanás nixkriyaaʼ ikhí xá.

¹³ Ángeles bi̱ nunimbu̱u̱n nidxún wéñuʼ índo̱ Satanás gajmíi̱n xa̱bu̱ wéñiʼ nixkawíin mekhuíí. Náa Biblia naʼthí: “¡Gaʼdxala náa mekhuíí ga̱jma̱a̱ xúgiáanʼ bi̱ kuwáanʼ ikhí!” (Revelación 12:12). Rí xúgi̱ kuwa tsímáá mekhuíí ga̱jma̱a̱ mbá kambáxu̱u̱n numuu rí xúgínʼ bi̱ kuwa ikhí nuni rí nandoo Dios.

14. Ndiéjunʼ nirígá náa tsu̱du̱u̱ Ku̱ba̱ʼ asndu nákha Satanás nixkriyaaʼ mekhuíí xá.

 ¹⁴ Mú nindxu̱u̱ mixtiʼkhu wéñuʼ xóo kuwa xa̱bu̱ náa Ku̱ba̱ʼ. Náa Ku̱ba̱ʼ rígá wéñuʼ tsingíná numuu rí “Gixa̱a̱ nigajtaa” ikhí ga̱jma̱a̱ “ikhaa nakiʼnáa wéñuʼ, numuu rí ndaʼyoo rí na̱jkha̱ ratumuu mbiʼi rí nikhánúu maxtáa” (Revelación 12:12). Satanás nakiʼnáa wéñuʼ numuu rí nixkriyaaʼ mekhuíí ga̱jma̱a̱ ndaʼyoo rí inuu mambáa. Ikha jngó, naʼni xúgíʼ rí nandoo mu mumíniiʼ xúgínʼ xa̱bu̱ numbaaʼ.

15. Ndiéjunʼ eyoo Dios maʼni náa tsu̱du̱u̱ Ku̱ba̱ʼ rá.

¹⁵ Mú táxtiʼkhuu rí nandoo Dios maʼni náa tsu̱du̱u̱ Ku̱ba̱ʼ. Ikhaa xóó nandoo rí Ku̱ba̱ʼ maʼni̱i̱ mitsaan ga̱jma̱a̱ rí xa̱bu̱ numbaaʼ xáguaʼdáá aʼkhá ma̱ngaa rí makuwa asndu kámuu (Salmo 37:29). Xú káʼnii gáʼngo̱o̱ gáʼni xúgíʼ rígi̱ Reino ndrígóo Dios rá.

16, 17. Ndiéjunʼ eʼsngúlúʼ ga̱jma̱a̱ numuu Reino ndrígóo Dios rí kiʼtáriyaʼ náa Daniel 2:44 rá.

¹⁶ Rí nijuiʼtáriyaʼ náa Daniel 2:44 naʼthí: “Ga̱jma̱a̱ índo̱ gakuwa rutañajunʼ reyes, Dios bi̱ xtáa mekhuíí magíiʼ mbáa reino bi̱ xáʼga̱nú mámbáa. Ga̱jma̱a̱ reino bugi̱ xáxtáa náa i̱mba̱ xuajen. Maʼni̱i̱ yujndaʼ ga̱jma̱a̱ maʼni gámbíin xúgínʼ reino, xúʼko̱ maʼga̱nú maʼtáñajunʼ asndu kámuu mbiʼi”. Ndiéjunʼ eʼsngúlúʼ kiʼtáriyaʼ rígi̱ ga̱jma̱a̱ numuu Reino ndrígóo Dios rá.

¹⁷ Timbá, naʼsngúlú dí Reino ndrígóo Dios magíʼdu̱u̱ maʼtáñajunʼ “índo̱ gakuwa rutañajunʼ reyes”. Rígi̱ nandoo gáʼthúu̱n rí xóó makuwa Xa̱bu̱ Ñajunʼ náa Ku̱ba̱ʼ índo̱ Reino magíʼdu̱u̱ maʼtáñajunʼ. Raga̱jma̱, naʼsngúlú dí Reino ndrígóo Dios mbajyúuʼ asndu kámuu ga̱jma̱a̱ rí nimbáa Xa̱bu̱ Ñajunʼ xáriʼkuriyaaʼ. Ga̱jma̱a̱ rí maʼni ajtsú, naʼsngúlú rí Xa̱bu̱ Ñajunʼ bi̱ kuwa náa numbaaʼ  rígi̱ muxmíjná gajmiún Reino ndrígóo Dios. Ga̱jma̱a̱ Reino maʼngo̱o̱ ma̱ngaa i̱ndó ikhaa maʼtáñajunʼ náa Ku̱ba̱ʼ. Índo̱ gambanúu rí kiʼtáriyaʼ rígi̱, xa̱bu̱ numbaaʼ maguaʼdaa mbáa Xa̱bu̱ Ñajunʼ bi̱ itháan májaanʼ.

18. Xú káʼnii mbiʼyuu guerra rí muni Xa̱bu̱ Ñajunʼ náa numbaaʼ gajmiún Reino ndrígóo Dios rá.

¹⁸ Ndiéjunʼ garigá índo̱ inuu marigá guerra rí muni Xa̱bu̱ Ñajunʼ náa numbaaʼ gajmiún Reino ndrígóo Dios rá. Xa̱bu̱ wéñiʼ muni nduwiinʼ “xúgínʼ reyes bi̱ kuwa náa xúgíʼ tsu̱du̱u̱ ku̱ba̱ʼ, mu magimbíin náa guerra rí nigíʼ Dios bi̱ gíʼdoo Xúgíʼ tsiakii”. Guerra rígi̱ nagumbiʼyuu Armagedón, ikhí Xa̱bu̱ Ñajunʼ muxmíjná gajmiún Reino ndrígóo Dios (Revelación 16:14, 16; atayáá nota 10).

19, 20. Náa numuu rí ndayúlú Reino ndrígóo Dios rá.

¹⁹ Náa numuu rí ndayúlú Reino ndrígóo Dios rá. Rígá mbá ajtsú numuu. Timbá, numuu rí ni̱ndxu̱lú xa̱bu̱ aʼkhá, naʼniulú nandii ga̱jma̱a̱ nakháñulú. Mú índo̱ gáʼtañajunʼ Reino ndrígóo Dios makuwáanʼ asndu kámuu. Náa Biblia naʼthí: “Dios nindoo kaʼñún wéñuʼ xa̱bu̱ numbaaʼ rí asndu nixnáa A̱ʼdióo bi̱ mbáwíi, mú xúgínʼ bi̱ gaguaʼdáá fe xákhañun, makuwá kámuu mbiʼi” (Juan 3:16).

²⁰ Rí maʼni a̱jma̱ nindxu̱u̱ numuu rí kuwáanʼ náa numbaaʼ náa kuwa xa̱bu̱ xkawiinʼ wéñuʼ. Mbaʼin nuni nduwaʼ, ga̱jma̱a̱ nuni aʼkhá rí xkawiiʼ wéñuʼ, ikháanʼlu xándoo murikhúún mu xúni̱ rígi̱. Mú Jeobá maʼngo̱o̱ maʼni. Á mu tsiriʼkumijná, ikhaa maʼni gámbíin náa Armagedón (atraxnuu Salmo 37:10). Rí maʼni ajtsú numuu rí ndayúlú Reino nindxu̱u̱ rí Xa̱bu̱ Ñajunʼ nuni gíníi eʼwíínʼ, nuni kuʼwáʼ ga̱jma̱a̱ tséʼngu̱u̱n gunimbaníí  xkujndu ndrígu̱ún. Ma̱ngaa, tsíñún gumbañúún xa̱bu̱ mu munimbu̱u̱n kuyáá Dios. Ikha jngó náa Biblia naʼthí rí “xa̱biya̱ naʼtañajunʼ xa̱biya̱ mu maʼniu dí raʼkhí” (Eclesiastés 8:9).

21. Xú káʼnii gáʼnimbánuu Reino rí nandoo Dios náa tsu̱du̱u̱ Ku̱ba̱ʼ rá.

²¹ Nda̱wa̱á rí gájngoo Armagedón, Reino maʼnimbánuu rí nandoo Dios náa tsu̱du̱u̱ Ku̱ba̱ʼ. Mbá xkri̱da, Satanás gajmíi̱n xa̱bu̱ wéñiʼ maguguáriʼiin (Revelación 20:1-3). Nda̱wa̱á nimbáa ní xáʼniuu nandii ga̱jma̱a̱ ni xákhañuu. Ga̱jma̱a̱ numuu rí nijuiʼtsiwáanʼ, xúgínʼ xa̱bu̱ bi̱ nunimbu̱u̱n ma̱ndoo makuwa kámuu náa Ku̱ba̱ʼ mitsaan (Revelación 22:1-3; atayáá nota 21). Ma̱ngaa, Reino maʼni kaʼwi̱i̱ mbiʼyuu Dios. Ndiéjunʼ eyoo gáʼthúu̱n rígi̱ rá. Rí índo̱ Reino gáʼtañajunʼ náa tsu̱du̱u̱ Ku̱ba̱ʼ, xa̱bu̱ numbaaʼ mbuyamajkuíí mbiʼyuu Dios.

22. Xú káʼnii eʼyáá rí Jesús táʼtañajunʼ índo̱ nixtáa náa tsu̱du̱u̱ Ku̱ba̱ʼ o núkhu rí ni̱jkha̱a̱ mekhuíí rá.

²² Índo̱ Jesús nixtáa náa tsu̱du̱u̱ Ku̱ba̱ʼ, niʼsngúún xa̱bi̱i̱ rí mutajkáan xúgi̱ kaʼnii: “Ga̱ʼkha̱ reino ndrígáʼ”. Rúʼko̱ eyoo gáʼthi dí Reino xóó tséʼkha̱. Ginii, Jeobá ndayóoʼ magíiʼ Jesús xóo Rey náa Xa̱bu̱ Ñajunʼ buʼko̱. Lá nigíiʼ  Jesús xóo Rey núkhu má índo̱ nitanga̱a̱ mekhuíí ráʼ. Na̱nguá, Jesús ndiyóoʼ magiʼthu̱u̱n. Nda̱wa̱á rí Jesús nigabi̱i̱, apóstol Pedro ga̱jma̱a̱ Pablo nithi kaʼwu rígi̱. Ikhiin nithi rí nimbánuu náa Jesús rí naʼtáriyaʼ náa Salmo 110:1. Náa kiʼtáriyaʼ rígi̱, Jeobá niʼthí: “Araʼwún náa ñawún mújúnʼ asndu índo̱ gáratañájúúnʼ xa̱bu̱ bi̱ guáʼdáá sia̱nʼ náa ikháán” (Hechos 2:32-35; Hebreos 10:12, 13). Rígi̱ eyoo gáʼthi rí Jesús ndiyóoʼ magiʼthu̱u̱n asndu índo̱ Jeobá gágíiʼ xóo Rey.

23. a) Nguáná nigíʼdu̱u̱ niʼtáñajunʼ Jesús xóo Rey náa Reino ndrígóo Dios rá. b) Ndiéjunʼ gúʼyáá náa imbo̱o̱ capítulo rá.

²³ Nguáná nigíʼdu̱u̱ niʼtáñajunʼ Jesús rá. Nákha tsiguʼ 1914. Mba̱yu̱ʼ tsiguʼ wapháá, mbá nguéjmi̱i̱n cristianos nikru̱ʼu̱u̱n rí tsiguʼ 1914 magiʼdoo numuu náa rí naʼtáriyaʼ Biblia. Rí nirígá náa numbaaʼ asndu nákha 1914 nasngájma rí cristianos bugi̱ nithi rí gajkhun. Jesús nigíʼdu̱u̱ niʼtáñajunʼ tsiguʼ rúʼko̱ (Salmo 110:2; atayáá nota 22). Nda̱wa̱á, nidatiguíi Satanás náa Ku̱ba̱ʼ, ga̱jma̱a̱ rí xúgi̱ “na̱jkha̱ ratumuu mbiʼi rí nikhánúu maxtáa” (Revelación 12:12). Náa imbo̱o̱ capítulo mbuʼyáá itháan rí nasngájma rí kuwáanʼ náa “na̱jkha̱ ratumuu mbiʼi”. Ma̱ngaa majmañulúʼ dí Reino inuu má maʼnimbánuu rí nandoo Dios náa tsu̱du̱u̱ Ku̱ba̱ʼ.