1, 2. a) Náa numuu rí xándoo marata̱ rí natatsiniiʼ mbáa bi̱ najmaʼniiʼ wéñuʼ á mu i̱ndó natayáá xóo mbiʼyuu xá. b) Ndiéjunʼ endxaʼwamíjna̱ xa̱bu̱ ga̱jma̱a̱ numuu Jesús rá.

KUWA mbaʼin xa̱bu̱ bi̱ najmaʼnunʼ náa numbaaʼ, mbáa asndu ikháán natayáá rí mbiʼyuu mbáa rí ikhiin. Lá marata̱ rí natatsiniiʼ májánʼ xa̱bu̱ buʼko̱ á mu i̱ndó natayáá rí mbiʼyuu xáʼ. Na̱nguá. Náa numuu rá. Numuu rí tsétatsiniiʼ xóo phú xa̱bu̱ nindxu̱u̱.

² Maski ajndu ninújngoo mbá 2,000 tsiguʼ asndu nákha Jesús nixtáa náa tsu̱du̱u̱ Ku̱ba̱ʼ, mbáa nitadxawíín ga̱jma̱a̱ numuu. Mú mbaʼin xa̱bu̱ tséyáá xú káʼnii xa̱bu̱ ninindxu̱u̱ Jesús. Tikhun nuthi rí ninindxu̱u̱ mbáa májaanʼ xa̱bu̱. Eʼwíínʼ nuthi rí ninindxu̱u̱ mbáa gaʼyee. Ga̱jma̱a̱ eʼwíínʼ nakumu̱ún rí Jesús nindxu̱u̱ Dios. Ndiéjunʼ tatsaʼwáminaʼ ikháán rá. (Atayáá nota 12.)

3. Ndíjkha rí gíʼdoo numuu ma̱ta̱ya̱a̱ rí gajkhun ga̱jma̱a̱ numuu Jeobá ma̱ngaa Jesucristo rá.

³ Gíʼdoo numuu ma̱ta̱ya̱a̱ rí gajkhun ga̱jma̱a̱ numuu Jesús. Náa numuu rá. Numuu rí náa Biblia naʼthí: “Rígi̱ eyoo gáʼthúu̱n rí maraxtaa kámuu mbiʼi, rí muninuwínʼ ikháán, mbáwiin ikháán bi̱ ni̱ndxa̱ʼ Dios gajkhun, ga̱jma̱a̱ Jesucristo bi̱ nitaxúnguanʼ” (Juan 17:3). Á mu najmañaʼ rí gajkhun ga̱jma̱a̱ numuu Jeobá ma̱ngaa Jesús, ma̱ndoo maraxtaa kámuu náa Ku̱ba̱ʼ mitsaan (Juan 14:6). Ma̱ngaa rí matatsiʼniiʼ Jesús ma̱ndoo mambáyaʼ rí mbiʼi xúgi̱, numuu rí ikhaa nindxu̱u̱ bi̱ itháan májánʼ xkri̱da xóo maraxtaa ma̱ngaa xóo guʼniu̱u̱n eʼwíínʼ (Juan  13:34, 35). Náa capítulo 1 nijmañulúʼ rí gajkhun ga̱jma̱a̱ numuu Dios. Náa capítulo rígi̱ majmañulúʼ ndiéjunʼ eʼsngáa Biblia ga̱jma̱a̱ numuu Jesús.

4. Ndiéjunʼ eyoo gáʼthúu̱n títulos mesías ga̱jma̱a̱ cristo rá.

⁴ Mba̱yu̱ʼ tsiguʼ kidíiʼ nákha xóó tséxtáa Jesús, Jeobá nikudaminaʼ náa Biblia rí makuʼmaa Mesías o Cristo. Ajngáa mesías na̱ʼkha̱ náa hebreo ga̱jma̱a̱ ajngáa cristo na̱ʼkha̱ náa griego. A̱jma̱ títulos rígi̱ nandoo gáʼthúu̱n bi̱ mbayáaʼ mu maxnúu mbá ñajunʼ rí gíʼdoo numuu. Ma̱ngaa nda̱wa̱á, Mesías maʼnimbánuu rí nikudaminaʼ Dios.

5. Lá nikumu̱ún discípulos ndrígóo Jesús rí ikhaa nindxu̱u̱ Mesías ráʼ.

⁵ Discípulos ndrígóo Jesús ndiyáá gajkhun rí ikhaa ninindxu̱u̱ Mesías bi̱ nijuiʼthá ma̱ʼkha̱ (Juan 1:41). Mbá xkri̱da, apóstol Pedro niʼthúu̱n Jesús: “Ikháán ni̱ndxa̱ʼ Cristo” (Mateo 16:16). Rí xúgi̱ mbuʼyáá náa numuu ma̱ndoo makuwáanʼ gajkhun rí Jesús nindxu̱u̱ Mesías.

6. Xú káʼnii embáyulú Jeobá mu mbuʼyáá tsáa nindxu̱u̱ Mesías rá.

⁶ Mba̱yu̱ʼ tsiguʼ kidíiʼ nákha xóó tséxtáa Jesús, mbaʼin gaʼyee ndrígóo Dios nithi mbaʼa rí mambáñún xa̱bu̱ mu muniʼniiʼ Mesías. Xú káʼnii gambáñun xá. Guʼyáá mbá xkri̱da mu makru̱ʼu̱lú itháan májánʼ. Atatsaʼwáminaʼ rí mbáa na̱nda̱ʼa̱a̱ʼ rí mi̱dxu̱ʼ náa naguáʼnu carro náa kuwa mbaʼin xa̱bu̱ mu mi̱dxu̱ʼ gíyáa mbáa xa̱bu̱ bi̱ tsétatsiniiʼ. Á mu nutha̱a̱nʼ májánʼ xú káʼnii nindxu̱u̱ xa̱bu̱ buʼko̱ ga̱jma̱a̱ xú káʼnii egíʼ xtíñuu, ikháán ma̱ndoo matatsiʼnííʼ. Ikháá má kayuʼ, Jeobá nijmiuu gaʼyee mu mutulú ndiéjunʼ gáʼni Mesías ga̱jma̱a̱ rí gágíʼnuu. Índo̱ nduʼyáá xú káʼnii nimbánuu xúgíʼ rí kiʼtáriyaʼ, bi̱ nandún muni rí nandoo Dios nduyáá rí Jesús nindxu̱u̱ Mesías o Cristo.

7. Arathá a̱jma̱ kiʼtáriyaʼ rí nambáyulúʼ mbuʼyáá rí Jesús nindxu̱u̱ Mesías.

 ⁷ Guʼyáá a̱jma̱ kiʼtáriyaʼ rígi̱. Rí timbá nigumaraʼmáʼ nákha 700 tsiguʼ rí ndayóoʼ maguma Jesús. Gaʼyee Miqueas niʼthí rí Mesías maxtáa náa mbá xuajen chíʼgíʼ rí mbiʼyuu Belén (Miqueas 5:2). Ga̱jma̱a̱ Jesús nixtáa ikhí (Mateo 2:1, 3-9). Rí maʼni a̱jma̱ niʼnirámáʼ gaʼyee Daniel. Ikhaa niʼtáriyaʼ rí Mesías makujmaa pa̱jnu̱ tsiguʼ 29 (Daniel 9:25). Ga̱jma̱a̱ rúʼko̱ ma̱ngaa nimbánuu. * Rígi̱ nindxu̱u̱ káaʼ a̱jma̱ rí mbaʼa rí nijuiʼtáriyaʼ rí nambáyulúʼ mbuʼyáá tsáa nindxu̱u̱ Jesús xóo Mesías bi̱ nijuiʼthá ma̱ʼkha̱.

8, 9. Xú káʼnii esngájma rí nirígá índo̱ nijngúun iyááʼ Jesús rí ikhaa nindxu̱u̱ Mesías rá.

⁸ Jeobá nisngájma kaʼwu rí Jesús nindxu̱u̱ Mesías. Dios nikudaminaʼ náa Juan bi̱ nakumíínʼ iyááʼ xa̱bu̱ rí masngájmuu mbá tsinaʼ mu maniniiʼ Mesías. Nákha tsiguʼ 29, Jesús ni̱jkha̱ náa mañu Jordán mu Juan makumáanʼ iyááʼ. Ikhú Juan ndiʼyoo mbá tsinaʼ. Náa Biblia naʼthí rí narígá: “Nda̱wa̱á rí Jesús nijngúun iyááʼ, nacha̱ nigájna̱a̱ náa iyaʼ; ga̱jma̱a̱ ¡atayáá!, mekhu nimbaʼtoo, ga̱jma̱a̱ ndiʼyoo rí nigajtaa náa ikhaa xóo paloma xi̱ʼ ndrígóo Dios. ¡Atayáá! Ma̱ngaa niwáán mbá aʼwá asndu mekhuíí rí niʼthí: “Bugi̱ nindxu̱u̱ A̱ʼdióʼ bi̱ nandoʼ ka̱yo̱o̱, bi̱ nadxuʼ ka̱yo̱o̱” (Mateo 3:16, 17). Rí Juan ndiʼyoo ga̱jma̱a̱ niʼdxuun niʼni maʼnimbo̱o̱ rí Jesús nindxu̱u̱ Mesías  (Juan 1:32-34). Mbiʼi rúʼko̱, Jeobá nixnúu xi̱ʼ kaʼwu Jesús. Asndu nákha ikhú, Jesús ni̱jkha̱nú ninindxu̱u̱ Mesías o Cristo. Ikhaa ñajuunʼ xa̱bu̱ bi̱ Dios ndiyáaʼ mu mani̱ndxu̱u̱ Rey ga̱jma̱a̱ bi̱ Maʼtáñajunʼ (Salmo 2:6; Isaías 55:4).

⁹ Rí kiʼtáriyaʼ náa Biblia, ga̱jma̱a̱ rí niʼni Jeobá ma̱ngaa rí niʼthí índo̱ nijngúun iyááʼ A̱ʼdióo nasngájma rí Jesús  nindxu̱u̱ Mesías. Mú, náa ni̱ʼkha̱ Jesús rá. Xú káʼnii xa̱bu̱ ninindxu̱u̱ xá. Guʼyáá rí naʼthí náa Biblia.

10. Ndiéjunʼ eʼsngáa náa Biblia xóo nixtáa Jesús nákha xóó tséʼkha̱ náa tsu̱du̱u̱ Ku̱ba̱ʼ rá.

¹⁰ Náa Biblia naʼsngáa rí Jesús nixtáa mekhuíí nákha xóó tséʼkha̱ náa tsu̱du̱u̱ Ku̱ba̱ʼ. Mbá xkri̱da, gaʼyee Miqueas niʼthí rí Mesías mani̱ndxu̱u̱ mbáa xa̱bu̱ bi̱ “nigumaa asndu nákha ginii” (Miqueas 5:2). Ga̱jma̱a̱ Jesús má niʼthí mbaʼa nuthu rí nixtáa má mekhuíí nákha xóó tséxtáa xóo xa̱bu̱ numbaaʼ (atraxnuu Juan 3:13; 6:38, 62, ga̱jma̱a̱ 17:4, 5). Náa mekhuíí, Jesús nimbáxu̱u̱ májánʼ wéñuʼ ga̱jma̱a̱ Jeobá.

11. Náa numuu rí Jeobá nandoo kaʼyoo wéñuʼ Jesús rá.

¹¹ Jeobá nandoo kaʼyoo wéñuʼ Jesús. Náa numuu rá. Numuu rí Jesús nindxu̱u̱ bi̱ “nigumaa ginii náa xúgíʼ dí rígá”. Nandoo gáʼthúu̱n rí Jeobá niʼnii ginii ikhaa (Colosenses 1:15). * Jesús ma̱ngaa nindxu̱u̱ kiejunʼ náa Dios numuu rí nindxu̱u̱ “A̱ʼdióo bi̱ mbáwíi”. Rígi̱ nandoo gáʼthúu̱n rí Jesús nindxu̱u̱ bi̱ Jeobá niʼnii, nda̱wa̱a̱ tsáa nimbáyúu (Juan 3:16). Ma̱ngaa i̱ndó Jesús nimbáyúu Jeobá mu maʼni i̱ʼwáʼ (Colosenses 1:16). Ga̱jma̱a̱ i̱ndó Jesús nigumbiʼyuu “Ajngáa”, numuu rí Jeobá nijmiuu mu maxnún ikha ga̱jma̱a̱ ajngóo ángeles mangiin xa̱bu̱ numbaaʼ (Juan 1:14).

12. Xú káʼnii eʼyáá rí Jesús ga̱jma̱a̱ Dios na̱nguá ni̱ndxu̱ún mbáwíi xa̱bu̱ rá.

¹² Kuwa bi̱ nakumu̱ún rí Dios ga̱jma̱a̱ Jesús ni̱ndxu̱ún  mbáwíi xa̱bu̱, mú raʼkháa xúʼko̱ eʼthí náa Biblia (atayáá nota 14). Náa Biblia naʼsngáa rí Jesús nigumaa, rígi̱ nandoo gáʼthúu̱n rí nákha ginii ikhaa na̱nguá xtáa. Mú Jeobá xtáa má xúʼko̱. Ikhaa niʼni xúgíʼ dí rígá (Salmo 90:2). Náa Biblia naʼthí kaʼwu rí Tátá nindxu̱u̱ itháan mba̱a̱ ki xóo A̱ʼdióo. Ma̱ngaa Jesús nditháan táʼnimbríguminaʼ ga̱jma̱a̱ Anu̱u̱ (atraxnuu Juan 14:28; 1 Corintios 11:3). Ga̱jma̱a̱ rí i̱ndó Jeobá nindxu̱u̱ “Dios bi̱ gíʼdoo Xúgíʼ tsiakii” (Génesis 17:1). Ikhaa nindxu̱u̱ xa̱bu̱ bi̱ itháan gíʼdoo numuu ga̱jma̱a̱ bi̱ itháan gíʼdoo tsiakii.

13. Náa numuu rí náa Biblia naʼthí rí Jesús “nigájnuu xó má Dios bi̱ tsékujmaa” rá.

¹³ Nákha xóó tséguma mekhu ga̱jma̱a̱ Ku̱ba̱ʼ, Jeobá ga̱jma̱a̱ Jesús niñajunʼ mba̱yu̱ʼ tsiguʼ. Nda̱wa̱á rí nikuwa mba̱yu̱ʼ wéñuʼ tsiguʼ, mbáa nindúún kuyamijná wéñuʼ (Juan 3:35; 14:31). Biblia naxná mbiʼyuu Jesús bi̱ “nigájnuu xó má Dios bi̱ tsikujmaa”. Náa numuu rá. Numuu rí Jesús ndiʼyáridoo rí xóo xa̱bu̱ nindxu̱u̱ Anu̱u̱ (Colosenses 1:15).

14. Xú káʼnii niʼni rí Jesús nixtáa xóo xa̱bu̱ náa numbaaʼ rá.

¹⁴ Jesús nindoo maniñuʼ mekhuíí mu ma̱ʼkha̱ náa Ku̱ba̱ʼ. Mú xú káʼnii niʼni rí maxtáa xóo mbáa xa̱bu̱ xá. Jeobá niʼni mbá milagro. Nigíwanʼ vida ndrígóo A̱ʼdióo náa awúu̱n mbáa wáxá bi̱ mbiʼyuu María. Ikha jngó, táʼyóoʼ magiʼdaa mbáa anu̱u̱ náa numbaaʼ mu Jesús ma̱ndoo maxtáa. Ikha jngó María nigiʼdaa mbáa a̱ʼdióo jmbii, bi̱ nixná mbiʼyuu Jesús (Lucas 1:30-35).

15. Xú káʼnii gándoo gátatsiʼnííʼ itháan Jeobá rá.

¹⁵ Jesús niʼthí: “Bi̱ ndiʼyoʼ ikhúúnʼ ndiʼyoo Anu̱ʼ ma̱ngaa” (Juan 14:9). Numuu rí Jesús kayíʼ xóo Anu̱u̱,  ikháán matatsiʼniiʼ itháan májánʼ Jeobá índo̱ gajmañaaʼ ga̱jma̱a̱ numuu Jesús. Ma̱ndoo ma̱ta̱ya̱a̱ itháan májánʼ vida ndrígóo Jesús ga̱jma̱a̱ xóo xa̱bu̱ nindxu̱u̱ índo̱ gátraxnuu: Mateo, Marcos, Lucas ga̱jma̱a̱ Juan.

16. a) Ndiéjunʼ niʼsngáa Jesús rá. b) Náa nijmañuu Jesús rí niʼsngáa rá.

¹⁶ Mbaʼin xa̱bu̱ nixna mbiʼí Jesús ‹Maestro› (Juan 1:38; 13:13). Rí nigiʼdoo itháan numuu rí niʼsngáa Jesús ninindxu̱u̱ ‹ajngáa májánʼ ndrígóo Reino›. Ndiéjunʼ nindxu̱u̱ “reino” rá. Reino ndrígóo Dios, bi̱ maʼtáñajunʼ mekhuíí ga̱jma̱a̱ ma̱ʼkha̱ kayóo rí májánʼ náa xa̱bu̱ bi̱ nunimbu̱ún kuyáá Dios (Mateo 4:23). Náa nijmañuu rí Jesús niʼsngáa rá. Xúgíʼ nijmañuu náa Jeobá. Jesús niʼthí: “Rí nasngáa raʼkháa ndrígóʼ nindxu̱u̱, numuu rí kaʼyoo bi̱ nikuʼmún” (Juan 7:16). Jesús ndiʼyoo rí Dios nandoo rí xa̱bu̱ mudxawíín ajngáa májánʼ rí Reino ndrígóo Dios maʼtáñajunʼ náa tsu̱du̱u̱ Ku̱ba̱ʼ.

17. a) Náa niʼsngáa Jesús rá. b) Náa numuu rí niʼniminaʼ wéñuʼ mu maʼsngúún xa̱bu̱ xá.

¹⁷ Náa niʼsngáa Jesús rá. Asndu náa má kuwa xa̱bu̱. Niʼsngáa náa xaná, náa xuajen mba̱ʼu̱ ga̱jma̱a̱ ma̱jkha̱ʼ, náa xuáá, náa templo ga̱jma̱a̱ náa sinagogas, ga̱jma̱a̱ náa guʼwún xa̱bu̱. Tágiʼthu̱u̱n rí xa̱bu̱ maguwáʼ náa ikhaa, rí phú niʼni, ni̱jkha̱ gáñíinʼ (Marcos 6:56; Lucas 19:5, 6). Jesús nijmuu mbiʼi ga̱jma̱a̱ tsiakii mu maʼsngáa. Ndiʼyoo dí rúʼko̱ naniguuʼ Anu̱u̱, ikha jngó niʼnimbo̱o̱ má xúʼko̱ kaʼyoo (Juan 8:28, 29). Ma̱ngaa niʼsngáa numuu rí nigáwiinʼ a̱jkiu̱u̱n eni xa̱bu̱ (atraxnuu Mateo 9:35, 36). Ndiʼyoo rí xa̱bu̱ ede̱ bi̱ kuwa náa guʼwá ndxajkun túsngáa rí gajkhun ga̱jma̱a̱ numuu Dios ma̱ngaa numuu Reino ndrígóo. Ikha jngó ikhaa nindoo maʼthí ajngáa rí májánʼ ga̱jma̱a̱ numuu Reino náa mbá xúgínʼ xa̱bu̱ bi̱ gáʼngo̱o̱.

18. Ndiéjunʼ rí phú itháan nanigua̱ʼ rí xóo xa̱bu̱ ninindxu̱u̱ Jesús rá.

 ¹⁸ Jesús nindoo kaʼñún xa̱bu̱ ga̱jma̱a̱ nixmiéjunʼ kaʼñún. Nisngájmun ngajua, ga̱jma̱a̱ xa̱bu̱ ninigu̱nʼ mutamijná gajmiún. Asndu e̱ji̱n ninigu̱nʼ makuwa gajmiún (Marcos 10:13-16). Jesús ninindxu̱u̱ jmbii má xúʼko̱. Niguiyuʼ kaʼyoo rí minduwaʼ ga̱jma̱a̱ dí raʼkhí (Mateo 21:12, 13). Nixtáa nákha gu̱ʼu̱ na̱nguá niguáʼdáá wéñuʼ numún ga̱jma̱a̱ tuyamajkhún. Mú Jesús ndiʼyamajkhún má xúʼko̱ ga̱jma̱a̱ ningajo̱o̱ kaʼñún (Juan 4:9, 27). Ma̱ngaa, phú gajkhun rí Jesús ninindxu̱u̱ mbáa xa̱bu̱ guabaaʼ. Mbá xkri̱da, mbá mbiʼi niʼjñáa rajkúún apóstoles ndrígóo. Ñajunʼ rígi̱ nuni xa̱bu̱ bi̱ nuyambáá (Juan 13:2-5, 12-17).

19. Xú káʼnii xkri̱da esngájma rí Jesús ndiʼyoo rí ndiñúnʼ xa̱bu̱ ga̱jma̱a̱ rí nindoo mambáñun xá.

¹⁹ Jesús ndiʼyoo rí nda̱ñúnʼ xa̱bu̱ ga̱jma̱a̱ nindoo mambáñun. Nisngájma kaʼwu rígi̱ índo̱ nijmuu tsiakii ndrígóo Dios rí nikhánaa mu maʼni thanún xa̱bu̱ (Mateo 14:14). Mbá xkri̱da, mbáa xa̱bu̱ bi̱ nigiʼdoo lepra nikuʼmaminaʼ náa Jesús ga̱jma̱a̱ niʼthúu̱n: “Á mu nandaʼ ma̱ndoo matani kaʼwu̱u̱n”. Gaʼkhu ga̱jma̱a̱ rí namínuʼ xa̱bu̱ buʼko̱ ni̱jkha̱nú asndu náa a̱jkiu̱u̱n Jesús. Ikha jngó Jesús nigáwiinʼ a̱jkiu̱u̱n kaʼyoo ga̱jma̱a̱ nimbáyúu. “Nikruiyaʼ ñawúunʼ ma̱ngaa nixkajmaa, ikhú niʼthúu̱n: ‹Nandoʼ. Gaʼni kaʼwi̱i̱n›”. Ga̱jma̱a̱ bi̱ naʼniuu nandii niguma thanáá (Marcos 1:40-42). Lá naʼngo̱o̱ natatsaʼwáminaʼ xú káʼnii nikumu̱u̱ xa̱bu̱ buʼko̱ ráʼ.

20, 21. Náa numuu rí Jesús nigíʼ mbá májánʼ xkri̱da rí xóo muʼnimbulúʼ kuʼyáá Dios rá.

²⁰ Jesús nindxu̱u̱ xkri̱da rí itháan májánʼ rí niʼnimbo̱o̱ kaʼyoo Dios. Náa numuu rá. Numuu rí ninindxu̱u̱ jmbii  náa Anu̱u̱ maski ajndu nigumaa dí raʼkhí ga̱jma̱a̱ rí nini̱i̱ xúgínʼ xa̱bu̱ sia̱nʼ. Mbá xkri̱da, Jesús taxpátriguíi índo̱ Satanás nigruiga̱ tsáʼkhá náa inuu (Mateo 4:1-11). Ma̱ngaa, tikhun bi̱ kaʼñún túnimbu̱ún rí ikhaa nindxu̱u̱ Mesías ga̱jma̱a̱ nithi rí ikhaa nakágunʼ. Maski ajndu xúʼko̱, Jesús tániñuuʼ raʼnimbo̱o̱ kaʼyoo Jeobá (Marcos 3:21). Asndu índo̱ xa̱bu̱ sia̱nʼ nini gínáa wéñuʼ, ikhaa niwi̱ji̱ jmbu má xúʼko̱ náa Dios ga̱jma̱a̱ tátanga̱a̱ maʼniún xóo nini̱i̱ (1 Pedro 2:21-23).

²¹ Jesús niwi̱ji̱ jmbu náa Jeobá maski ajndu nimínuuʼ wéñuʼ índo̱ nikháñuu (atraxnuu Filipenses 2:8). Atatsaʼwáminaʼ xúgíʼ rí niʼngo̱o̱ nákha mbiʼi rí nikháñuu: Nirugua̱a̱, tikhun xa̱bu̱ nini gámaa rí niʼthá wéñuʼ Dios, tikhun jueces bi̱ ra̱míjínʼ nithi rí magíʼnuu, xa̱bu̱  nitsijmaa, ga̱jma̱a̱ tikhun soldados nini gínáa wéñuʼ ga̱jma̱a̱ nidujmaa náa mbá ixi̱. Índo̱ Jesús inuu makhañúu, nindxa̱ʼwá: “¡Nimbánuu rá!” (Juan 19:30). Ajtsú mbiʼi rí nikháñu, Jeobá niʼnigabi̱i̱ ga̱jma̱a̱ niʼni rí mani̱ndxu̱u̱ xóo mbáa ángel (1 Pedro 3:18). Nguáthá xmáná nda̱wa̱á, Jesús nitanga̱a̱ mekhuíí, “nigi̱ʼi̱ náa níjniú mújúnʼ Dios” ga̱jma̱a̱ nigi̱ʼthu̱u̱n rí Anu̱u̱ magíiʼ xóo Rey (Hebreos 10:12, 13).

22. Xú káʼnii gakuwáanʼ numuu rí Jesús niwi̱ji̱ jmbu náa Anu̱u̱ rá.

²² Ga̱jma̱a̱ numuu rí Jesús niwi̱ji̱ jmbu náa Anu̱u̱ náa xúgíʼ rí niʼni, ma̱ndoo makuwáanʼ kámuu mbiʼi náa mbá Ku̱ba̱ʼ mitsaan. Rúʼko̱ rí nindoo Jeobá asndu nákha ginii. Náa imbo̱o̱ capítulo mbuʼyáá xú káʼnii rí nikháñuu Jesús maʼni rí makuwáanʼ kámuu mbiʼi.