1, 2. a) Náa numuu rí muʼtájkáan nindxu̱u̱ mbá regalo kiejunʼ rá. b) Ndíjkha gíʼdoo numuu mbuʼyáá rí eʼsngáa Biblia ga̱jma̱a̱ numuu xóo muʼtájkáan rá.

GA̱JMA̱A̱ xúgíʼ dí rígá náa numbaaʼ, Ku̱ba̱ʼ nindxu̱u̱ chíʼgíʼ. Jeobá ndaʼñún xúgínʼ xa̱bu̱ bi̱ kuwa ikhí xóo mbéʼtsu iyaʼ (Salmo 115:15; Isaías 40:15). Maski ajndu majkiáanʼ wéñuʼ náa numbaaʼ rígi̱, náa Biblia naʼthí: “Jeobá xtáa mijngii náa xúgínʼ xa̱bu̱ bi̱ nutakáñii, náa xúgínʼ xa̱bu̱ bi̱ nutháán rí gajkhun. Maʼnimbánuu rí nandún xa̱bu̱ bi̱ nuni ñajuunʼ ikhaa, ga̱jma̱a̱ maʼdxawun índo̱ gutakáñii rí mambáñun, ma̱ngaa maʼni káwíin” (Salmo 145:18, 19). Phú májánʼ ñajunʼ rí kuaʼdáá. Jeobá bi̱ gíʼdoo xúgíʼ tsiakii nindxu̱u̱ bi̱ Niʼni xúgíʼ, ga̱jma̱a̱ nandoo rí mambáxulúʼ gajmiúlú ma̱ngaa rí maʼdxun rí guʼtájkáan. Rí muʼtájkáan nindxu̱u̱ mbá regalo kiejunʼ rí Jeobá nixnúlú mambáa rí ikháanʼ.

² Jeobá i̱ndó maʼdxun rí gúʼthán á mu nuʼtájkáan xóo eyoo ikhaa. Xú káʼnii gúʼni rá. Guʼyáá ndiéjunʼ gaʼsngúlú Biblia ga̱jma̱a̱ numuu rí muʼtájkáan.

3. Ndíjkha rí gíʼdoo numuu maratakháñii Jeobá rá.

³ Jeobá nandoo rí ikháán maratakháñii. Xú káʼnii eʼyáá rá. Atatsaʼwáminaʼ rí mitsaan naʼtháanʼ Dios náa Filipenses 4:6, 7 (atraxnuu). Bi̱ niʼni numbaaʼ naxmiéjunʼ wéñuʼ kaʼyaʼ ga̱jma̱a̱ nandoo rí maratha̱a̱n rí ekumaʼ ma̱ngaa xkujndu rí xtaʼdáá.

4. Xú káʼnii gambáxulúʼ gajmiúlú Jeobá á mu nuʼtájkáan má xúʼko̱, ga̱jma̱a̱ náa numuu rá.

 ⁴ Rí muʼtájkáan nambáyulúʼ mambáxulúʼ májánʼ gajmiúlú Jeobá. Índo̱ a̱jmi̱i̱n bi̱ nambáxu̱u̱n nutamijná má xúʼko̱ rí nakumu̱ún ga̱jma̱a̱ rí naxmiéjúnʼ, ikhú nambáxu̱u̱n itháan májánʼ. Ikháá má kayuʼ, Jeobá niʼtháanʼ náa Biblia rí eku̱mu̱u̱ ga̱jma̱a̱ rí nandxa̱ʼwáminaʼ ma̱ngaa niʼtháanʼ rí gáʼni nda̱wa̱á. Mangáán ma̱ndoo maratha̱a̱n Jeobá xúgíʼ rí naku̱ma̱ʼ índo̱ naratákáñii. Á mu naratháán tsejtsi, mambaxáaʼ ga̱jma̱a̱ʼ itháan májánʼ (Santiago 4:8).

5. Xú káʼnii eʼyáá rí Jeobá tséʼdxuun xúgíʼ rí nuʼtájkáan rá.

⁵ Lá naʼdxun Jeobá xúgíʼ rí nuʼtájkáan ráʼ. Na̱nguá. Nákha mbiʼi ndrígóo gaʼyee Isaías, Jeobá niʼthún israelitas: “Maski ajndu ikháanʼ nuni mbaʼa tsajkhun, ikhúúnʼ na̱nguá edxuun; numuu rí niradíin mbaʼin wéñuʼ xa̱bu̱” (Isaías 1:15). Á mu tséñaʼwumíjna̱, ma̱ndoo muʼni mbá rí  maʼni gachúu rí nambáxulúʼ gajmiúlú Jeobá. Á mu xúʼko̱ eʼni ikhaa xaʼdxawun rí guʼtákáñii.

6. a) Ndíjkha rí gíʼdoo wéñuʼ numuu fe rá. b) Xú káʼnii esngajmá rí kuaʼdáá fe rá.

⁶ Á mu nandulú rí Jeobá maʼdxun rí gúʼthán, gíʼmaa maguaʼdáá fe náa ikhaa (Marcos 11:24). Apóstol Pablo naʼthí: “Á mu nda̱a̱ fe xándoo muʼni rí naniguʼ Dios, numuu rí bi̱ nakuʼmaminaʼ náa Dios, gíʼmaa maʼnimbo̱o̱ rí ikhaa xtáa ga̱jma̱a̱ rí ikhaa naʼni tsajkurámiinʼ bi̱ nduyáaʼ má xúʼko̱” (Hebreos 11:6). Mú raʼkháa i̱ndó ndayóoʼ muʼthá rí kuaʼdáá fe. Gíʼmaa musngajmá má xúʼko̱ rí nuʼnimbulúʼ kuʼyáá Jeobá (atraxnuu Santiago 2:26).

7. a) Ndíjkha rí gíʼmaa manindxu̱lúʼ xa̱bu̱ guabaaʼ ga̱jma̱a̱ maguaʼdáá gamajkhulúʼ índo̱ guʼtákáñii Jeobá rá. b) Xú káʼnii esngajmá rí nuʼthá rí nagájnuu asndu náa a̱jkiu̱lú rá.

⁷ Índo̱ guʼtákáñii Jeobá, gíʼmaa manindxu̱lúʼ xa̱bu̱ guabaaʼ ga̱jma̱a̱ maguaʼdáá gamajkhulúʼ. Ndíjkha rá. Á mu ndayóoʼ muʼtámíjná gajmiúlú mbáa Xa̱bu̱ Ñajunʼ o mbáa presidente, muʼni ga̱jma̱a̱ gamajkhu. Mú Jeobá nindxu̱u̱ bi̱ gíʼdoo xúgíʼ tsiakii, ikha jngó mbaʼyóoʼ musngajmá itháan gamajkhu índo̱ gúʼtámíjná gajmiúlú ikhaa (Génesis17:1; Salmo138:6). Ma̱ngaa gíʼmaa muʼthá rí nagájnuu asndu náa a̱jkiu̱lú, raʼkháa rí muʼthá kikháá ajngáa mbaʼa nuthu (Mateo 6:7, 8).

8. Ndiéjunʼ gíʼmaa muʼni índo̱ nuʼtájkáan rá.

⁸ Rí iwáá kayuʼ, índo̱ rígá rí nunda̱ʼa̱ índo̱ nuʼtájkáan, gíʼmaa muʼnimíjna̱ muʼnimbánii rí niʼtháán Jeobá. Mbá xkri̱da, mbáa munda̱ʼa̱a̱ rí mambáyulúʼ muxkamaa rí ndayúlú mu makuwáanʼ ga̱jma̱a̱. Mú ragíʼmaa maʼskulú ga̱jma̱a̱ maguaʼthi̱i̱n rí Jeobá maxnúlúʼ xúgíʼ. Á mu nandoo muñajunʼ mu makhánulúʼ, guñajunʼ gakhi̱i̱ ga̱jma̱a̱ gundrígú asndu xú káʼnii má ñajunʼ rí ma̱ndoo muʼni (Mateo 6:11; 2 Tesalonicenses 3:10). O nuʼtákáñii Jeobá  rí mambáyulúʼ mu muniʼñáʼ ru̱ʼni̱ mbá dí ra̱májánʼ, gíʼmaa muʼnigaʼduunʼ xúgíʼ rí maʼni muʼni dí ra̱májánʼ (Colosenses 3:5). Rí xúgi̱ guʼyáá tikhu graxe̱ rí nuni xa̱bu̱ ga̱jma̱a̱ numuu rí nutajkáan.

9. a) Tsáa gíʼmaa muʼtákáñii rá. b) Ndiéjunʼ eʼsngúlúʼ Juan 14:6 ga̱jma̱a̱ numuu rí muʼtájkáan rá.

⁹ Tsáa gíʼmaa muʼtákáñii rá. Jesús niʼsngúún xa̱bi̱i̱ mutajkáan xúgi̱ káʼnii: “Anu̱xu bi̱ xtaa mekhuíí” (Mateo 6:9). Ikha jngó gíʼmaa muʼtákáñii i̱ndó Jeobá. Jesús ma̱ngaa niʼthí: “Ikhúúnʼ ni̱ndxu̱ʼ kamba̱a̱ʼ, rí gajkhun ga̱jma̱a̱ rí ndaʼya. Nimbáa tséʼkha̱ náa Anu̱ʼ á mu raʼkháa ga̱jma̱a̱ numuʼ ikhúúnʼ” (Juan 14:6). Rígi̱ naʼsngúlú rí gíʼmaa muʼtájkáan ga̱jma̱a̱ mbiʼyuu Jesús. Ndiéjunʼ eyoo gáʼthúu̱n muʼtájkáan ga̱jma̱a̱ mbiʼyuu Jesús rá. Á mu nandulú rí Jeobá maʼdxaun rí nuʼtháán, gíʼmaa musngajmá gamajkhu ga̱jma̱a̱ numuu ñajunʼ kiejunʼ rí nixnúu A̱ʼdióo. Xó má nijmañulúʼ, Jesús ni̱ʼkha̱ náa tsu̱du̱u̱ Ku̱ba̱ʼ mu maʼni káwáanʼ náa aʼkhá ga̱jma̱a̱ rí naʼni makhañúlúʼ (Juan 3:16; Romanos 5:12). Ma̱ngaa Jeobá nigíiʼ mu mani̱ndxu̱u̱ bi̱ Maʼtáñajúúnʼ Ndxajkun ga̱jma̱a̱ Juez (Juan 5:22; Hebreos 6:20).

10. Lá rígá xóo gíʼmaa mu’ni índo̱ guʼtájkáan ráʼ. Arathá.

¹⁰ Lá rígá xóo gíʼmaa mu’ni índo̱ guʼtájkáan ráʼ. Na̱nguá. Jeobá na̱nguá eʼthí rí gíʼmaa musmbáti̱gulúʼ, mutrigáanʼ o muguajún. Náa Biblia naʼsngáa rí ma̱ndoo muʼtájkáan asndu xú káʼnii má, mú gíʼmaa masngájma gamajkhu (1 Crónicas 17:16; Nehemías 8:6; Daniel 6:10; Marcos 11:25). Rí itháan gíʼdoo numuu náa Jeobá rí muʼthán ga̱jma̱a̱ mbá numuu májánʼ, raʼkháa xóo eʼtájkháan. Ma̱ndoo muʼtájkáan gakhi̱i̱ o mañúú, asndu náa ga̱jma̱a̱  nguáná, tséʼniuu á mu mbiʼi o mbruʼun. Índo̱ nuʼtájkáan, nduʼyáá gajkhun rí Jeobá naʼdxawunlú maski ajndu nimbáa tséʼdxuun (Nehemías 2:1-6).

11. Ndiéjunʼ gándoo munda̱ʼa̱ índo̱ guʼtájkáan rá.

¹¹ Ndiéjunʼ gándoo munda̱ʼa̱ rá. Asndu ndiéjunʼ má rí nambánii ga̱jma̱a̱ rí nandoo maʼni Jeobá. Náa Biblia naʼthí: “Tséʼniuu ndiéjunʼ nindxu̱u̱ rí gúnda̱ʼa̱a̱, ikhaa naʼdxun á mu ikháanʼ nunda̱ʼa̱ rí nandoo ikhaa” (1 Juan 5:14). Lá ma̱ndoo muʼtháán ga̱jma̱a̱ numuu rí ndayúlú xáʼ. Xúʼko̱. Rí muʼtámíjná gajmiúlú Jeobá gíʼmaa maʼni xóo índo̱ nuʼtámíjná gajmiúlú bi̱ nambáxulúʼ májánʼ gajmiúlú. Ma̱ndoo muʼtháán xúgíʼ rí nundxa̱ʼwáá edxu̱lúʼ ga̱jma̱a̱ rí nakumulú (Salmo 62:8). Ma̱ngaa ma̱ndoo munda̱ʼa̱a̱ xi̱ʼ kaʼwu ndrígóo mu muʼni rí jmbu (Lucas 11:13). Ga̱jma̱a̱ májánʼ nindxu̱u̱ rí munda̱ʼa̱a̱ ku̱ma̱ mu muraʼwíí májánʼ rí muʼni ma̱ngaa maxnúlúʼ tsiakii mu muraʼníí xkujndu (Santiago 1:5). Gíʼmaa muʼtákáñii Jeobá rí maʼni mba̱a̱ a̱jkiu̱u̱n kaʼyoo aʼkhá ndrígúlú (Efesios 1:3, 7). Ma̱ngaa gíʼmaa muʼtájkáan ga̱jma̱a̱ numún eʼwíínʼ xa̱bu̱, xóo bi̱ kuʼñúún ga̱jma̱a̱ a̱ngiu̱lú bi̱ kuwa náa congregación (Hechos 12:5; Colosenses 4:12).

12. Ndiéjunʼ gíʼmaa magiʼdoo itháan numuu índo̱ guʼtájkáan rá.

¹² Ndiéjunʼ gíʼmaa magiʼdoo itháan numuu índo̱ guʼtájkáan rá. Mani̱ndxu̱u̱ Jeobá ga̱jma̱a̱ rí nandoo maʼni. Gíʼmaa muxnáa núma̱aʼ Jeobá ga̱jma̱a̱ xúgíʼ a̱jkiu̱lú ma̱ngaa xúgíʼ rí niʼni ga̱jma̱á numulúʼ (1 Crónicas 29:10-13). Índo̱ Jesús niʼsngúún mutajkáan xa̱bi̱i̱, nisngájma ndiéjunʼ gíʼmaa magiʼdoo itháan numuu índo̱ guʼtájkáan (atraxnuu Mateo 6:9-13). Ikhaa niʼthí rí ginii gíʼmaa munda̱ʼa̱ rí maguma kaʼwii mbiʼyuu Jeobá, xóo muʼthá, rí gíʼmaa mbiʼyáá rí nindxu̱u̱ mitsáʼkháan o kaʼwu. Nda̱wa̱á Jesús nisngájma rí gíʼmaa munda̱ʼa̱ rí ma̱ʼkha̱ Reino ndrígóo  Dios ga̱jma̱a̱ rí maguma rí nandoo Dios náa xúgíʼ tsu̱du̱u̱ Ku̱ba̱ʼ. Niʼthí rí nda̱wa̱á rí gúnda̱ʼa̱ rígi̱ rí gíʼdoo wéñuʼ numuu ma̱ndoo munda̱ʼa̱ rí nandulú ikháanʼ. Nusngajmá rí itháan gíʼdoo numuu á mu ginii nuʼtájkáan numuu Jeobá ga̱jma̱a̱ rí eyoo maʼni.

13. Nguáthá mba̱yu̱ʼ gíʼmaa mbajyúuʼ rí muʼtájkáan rá.

¹³ Nguáthá mba̱yu̱ʼ gíʼmaa mbajyúuʼ rí muʼtájkáan rá. Náa Biblia tséʼthi. Ma̱ndoo maʼni mba̱yu̱ʼ o na̱nguá, asndu  xó má eyóoʼ maʼni. Mbá xkri̱da, ma̱ndoo muʼtájkáan mbá nacha̱ índo̱ inu muphiʼtsu, mú itháan mba̱yu̱ʼ índo̱ nuxnáa núma̱aʼ Jeobá o nuʼtháán xkujndu ndrígúlú (1 Samuel 1:12, 15). Tsíyulú muʼtájkáan mba̱yu̱ʼ mu i̱ndó mbuyáá eʼwíínʼ, xó má nini tikhun xa̱bu̱ nákha nixtáa Jesús (Lucas 20:46, 47). Jeobá tsénigu̱u̱ʼ rúʼko̱, ikhaa nandoo muʼtájkáan ga̱jma̱a̱ xúgíʼ a̱jkiu̱lú.

14. a) Mámbá nguáthá mba̱yu̱ʼ gíʼmaa muʼtájkáan rá. b) Ndiéjunʼ eʼsngúlúʼ Jeobá rá.

¹⁴ Mámbá nguáthá mba̱yu̱ʼ gíʼmaa muʼtájkáan rá. Jeobá naʼthúlúʼ rí muʼthán nángii eʼni. Náa Biblia naʼthí: “Gutajkáan nángi eʼni”, “xúʼniñáʼ runi tsajkhun” ga̱jma̱a̱ “gutajkháan má xúʼko̱” (Mateo 26:41; Romanos 12:12; 1 Tesalonicenses 5:17). Jeobá xtáa xawii mu maʼdxawunlú.  Xúgíʼ mbiʼi ma̱ndoo muxnáa núma̱aʼ numuu rí nandoo kaʼyulú ga̱jma̱a̱ rí naxnúlú. Ma̱ngaa ma̱ndoo munda̱ʼa̱a̱ rí maxnúlúʼ ikha, tsiakii ga̱jma̱a̱ rí maʼni̱i̱ a̱jkiu̱lú. Á mu nduʼyamajkuíí rí nandoo nuʼtájkáan, muʼtámíjná gajmiúlú Jeobá xúgíʼ mbiʼi.

15. Ndíjkha rí gíʼmaa muʼthá “amén” índo̱ naguámbulúʼ nuʼtájkáan rá.

¹⁵ Ndíjkha rí gíʼmaa muʼthá “amén” índo̱ naguámbulúʼ nuʼtájkáan rá. Ajngáa amén nandoo gáʼthúu̱n “xúʼko̱ gáʼne”. Índo̱ nuʼthá rígi̱ nusngajmá rí nindxu̱u̱ gajkhun rí nuʼtájkáan (Salmo 41:13). Ma̱ngaa náa Biblia naʼsngúlú rí índo̱ naguámbá rutajkáan náa kuwa mbaʼin xa̱bu̱ májánʼ muʼthá “xúʼko̱ gáʼne”, tséʼñu á mu gakhi̱i̱ o mañu. Xúʼko̱ nusngajmá rí gajkhun nindxu̱u̱ rí nijuiʼthá (1 Crónicas 16:36; 1 Corintios 14:16).

16. Lá nariʼña̱a̱ Dios rí nuʼtájkáan ráʼ. Arathá.

¹⁶ Lá gajkhun nariʼña̱a̱ Dios rí nuʼtájkáan ráʼ. Xúʼko̱. Náa Biblia naʼthí rí Dios nindxu̱u̱ “Bi̱ naʼdxawun índo̱ nugríga̱a̱” ga̱jma̱a̱ rí mariʼñulú (Salmo 65:2; Isaías 30:19). Jeobá naʼdxaun rí nutajkáan mbaʼin xa̱bu̱ bi̱ nuni ga̱jma̱a̱ mbá numuu májánʼ ma̱ngaa mbaʼa enii xóo eriʼña̱a̱.

17. Xú káʼnii ejmiuu ángeles ga̱jma̱a̱ xa̱bi̱i̱ Jeobá mu mariʼña̱a̱ rí nuʼtájkáan rá.

¹⁷ Jeobá najmiuu ángeles ga̱jma̱a̱ xa̱bi̱i̱ mu mariʼña̱a̱ rí nuʼtákáñii (Hebreos 1:13, 14). Mbaʼin xa̱bu̱ nitajkháan mu munda̱ʼa̱ rí mixtambáñuun makru̱ʼu̱u̱n Biblia, ga̱jma̱a̱ tájyúuʼ má rí xa̱bi̱i̱ Dios nigún gúñún. Rígi̱ nasngájma rí ángeles nuxna ikha náa najuiʼtáraʼa “ajngáa májánʼ” náa xúgíʼ tsu̱du̱u̱ Ku̱ba̱ʼ (atraxnuu Revelación 14:6). Ma̱ngaa, mbaʼánʼ rí ikháanʼ niʼtákáñii Jeobá numuu rí niguaʼdáá mbá xkujndu o índo̱ nirígá mbá rí ndiyúlú,  ga̱jma̱a̱ nimbáyulúʼ mbáa ndxájulú náa congregación (Proverbios 12:25; Santiago 2:16).

18. Xú káʼnii ejmuu Jeobá xi̱ʼ kaʼwu ndrígóo ga̱jma̱a̱ Biblia mu mariʼña̱a̱ rí nuʼtájkáan rá.

¹⁸ Ma̱ngaa mu mariʼña̱a̱ rí nuʼtájkáan, Jeobá najmuu xi̱ʼ kaʼwu ndrígóo. Índo̱ nunda̱ʼa̱a̱ rí mambáyulúʼ mu muraʼníí mbá xkujndu, mbáa Dios najmuu xi̱ʼ kaʼwu ndrígóo mu maxnúlúʼ ikha ma̱ngaa maxnúlúʼ tsiakii (2 Corintios 4:7). Ma̱ngaa, Jeobá najmuu Biblia mu mariʼña̱a̱ rí nuʼtájkáan ga̱jma̱a̱ mu mambáyulúʼ muraʼwíí májánʼ rí muʼni. Mbáa índo̱ nuraxnuu nuxkamaa tikhu texto rí nambáyulúʼ. Jeobá ma̱ngaa ma̱ndoo maʼni rí mbáa maʼthí náa reunión mbá rí ndayúlú muʼdxawíín. Ga̱jma̱a̱ ma̱ndoo majmiuu mbáa bi̱ kayá edxu̱u̱ náa congregación mu masngájmulu mbá ku̱ma̱ rí naʼthí náa Biblia (Gálatas 6:1).

19. Náa numuu ma̱ndoo mundxaʼwamíjná rí Jeobá tsériʼña̱a̱ rí nuʼtájkáan rá.

¹⁹ Á mu mbá miʼtsú nitraximínáʼ náa numuu rí Jeobá táriʼña̱a̱ rí niratájkáan, garmáʼáan a̱jkia̱nʼ rí ikhaa ndaʼyoo nguáná ga̱jma̱a̱ xú káʼnii gáriʼña̱a̱. Jeobá ndaʼyoo májánʼ rí ndayúlú. Mú mbáa mbaʼyóoʼ muʼtájkáan má xúʼko̱ mu musngajmáá Jeobá rí gíʼdoo numuu rí ninda̱ʼa̱a̱ ga̱jma̱a̱ rí kuaʼdáá fe náa ikhaa (Lucas 11:5-10). Nguáná Jeobá nariʼña̱a̱ asndu xóo ikháanʼ tséguaʼthi̱i̱n. Mbá xkri̱da, mbáa nuʼtákáñii numuu rí kuaʼdáá xkujndu gakhi̱i̱, mú Jeobá xarígúu xkujndu, ikhaa maxnúlúʼ tsiakii mu maʼngulú (atraxnuu Filipenses 4:13).

20. Ndíjkha rí gíʼmaa muʼtájkáan nángii eʼni rá.

²⁰ Rí muʼtájkáan nindxu̱u̱ mbá regalo kiejunʼ rí nixnúlú Jeobá. Ga̱jma̱a̱ nduʼyáá gajkhun rí ikhaa naʼdxawunlú (Salmo 145:18). Índo̱ itháan guʼtákáñii, itháan gambáxulúʼ gajmiúlú.