Jeobá gíʼthu̱u̱n rí xa̱bu̱ bi̱ nidamijná munimbánii dí nithi nákha mbiʼi rí nidamijná. Índo̱ Dios niruwiin timbíi̱n xa̱bu̱, niʼthí: “Ikha jngó xa̱biya̱ [...] maxtáa ga̱jma̱a̱ a̱ʼgiu̱u̱ ma̱ngoo maguanu mani̱ndxu̱ún mbóó xuwiʼ”. Mba̱yu̱ʼ tsiguʼ nda̱wa̱á, Jesucristo niʼthí ikháá má ajngáa: “Ikajngo narañajunʼ ajmi, imbahui xabo ñajunʼ, ikajngo, ri niruhua Dios maxarakuhuaji xabo” (Génesis 2:24; Mateo 19:3-6). Xó má eʼyáá, Jeobá ga̱jma̱a̱ Jesús nduyáá rí índo̱ nudamijná xa̱bu̱ gíʼmaa makuwíin kámuu, dí nakuwa a̱jmi̱i̱n naguámbá índo̱ nakháñuu mbáa (1 Corintios 7:39). Numuu dí mitsúʼkháan nindxu̱u̱, ragíʼmaa mbuʼyáá dí ma̱ndoo muniʼñáánʼ índo̱ nandulúʼ. Jeobá nawiyuuʼ kaʼyoo índo̱ narígá  divorcio ga̱jma̱a̱ numuu mbá dí tséʼthi náa Biblia (Malaquías 2:15, 16).

Xó má eʼthí náa Biblia, náa numuu dí ma̱ndoo marigá mbá divorcio rá. Jeobá niʼthí rí nawiyuuʼ kaʼyoo rí muxudami̱jna̱ aʼkhá gajmiún mbáa (Génesis 39:9; 2 Samuel 11:26, 27; Salmo 51:4). Ra̱ʼkhá tháán wiyuuʼ kaʼyoo rí asndu naniñuuʼ marigá divorcio índo̱ bi̱ nidamijná nuxuda̱mi̱jna̱ aʼkhá gajmiún imba̱a̱. (Náa capítulo 9 kutriga̱ 7, naʼthí xóó itháan ga̱jma̱a̱ numuu rígi̱.) Dios naniñuuʼ maraʼwíí bi̱ na̱nguá nikudaminaʼ aʼkhá á mu manda̱ʼa̱ divorcio o na̱nguá (Mateo 19:9). Á mu naʼthí rí maniñaaʼ, na̱nguá má xtáa raʼni mbá dí nawiyuʼ kaʼyoo Jeobá. Mú nimbáa bi̱ xtáa náa congregación xándoo maʼthúu̱n dí manda̱ʼa̱ divorcio. Á mu rígá tikhuu rí ndaʼyoo bi̱ na̱nguá nikudaminaʼ aʼkhá, ma̱ndoo maʼthí á mu maxtáa xóó ga̱jma̱a̱ bi̱ ndiyáa, itháan á mu bi̱ nikudaminaʼ aʼkhá natanga̱a̱ a̱jkiu̱u̱n. Mú ikhaa gíʼmaa maraʼwíí dí maʼni ga̱jma̱a̱ mbaʼyoo má dí maraʼnuu gaʼkhu nda̱wa̱á (Gálatas 6:5).

Mú ma̱ngaa narígá eʼwáʼ rí mingíjyúuʼ wéñuʼ náa rí mbáa cristiano o cristiana ma̱ndoo maniñaaʼ, o asndu manda̱ʼa̱a̱ divorcio, maski ajndu bi̱ ndiyáa takudaminaʼ aʼkhá ga̱jma̱a̱ mbáa. Índo̱ narígá rígi̱, náa Biblia naʼthí rí bi̱ nandoo maʼgaa “gaxtáa mbáwíi xánujunʼla, o, á mu na̱nguá, gambaxíiʼ ga̱jma̱a̱ ajmbio̱o̱” (1 Corintios 7:11). Á mu xúʼko̱ erígá, mbáa cristiano na̱nguá xóo magíʼdu̱u̱ mbayáaʼ imba̱a̱ bi̱ ma̱ndoo manigúnʼ ga̱jma̱a̱ (Mateo 5:32). Guʼyáá tikhuu dí narígá nguáná rí ni̱jkha̱ kagu̱u̱n tikhun muniñami̱jna̱.

Tsixmiéjunʼ muxnún dí nda̱ñúnʼ bi̱ kuwa náa guʼwún. Kuwa xa̱bekha bi̱ na̱nguá exnún rí nda̱ñúnʼ bi̱ kuwa náa guʼwún, raʼkháa numuu rí tséʼngu̱u̱n, tséxnún numuu dí tsíñún; ikhú bi̱ kuwa náa guʼwún numíniʼ. Ndiéjunʼ eʼthí náa Biblia ga̱jma̱a̱ numún ikhiin xá. “Á mu mbáa tséxnún rí nda̱ñúnʼ [...] bi̱ kuwa náa goʼwóo, nasngájma rí naʼni gaʼduunʼ fe rí gíʼdoo, ga̱jma̱a̱ nindxu̱u̱ itháan ra̱májánʼ ki xóo mbáa bi̱ na̱nguá gíʼdoo fe.” (1 Timoteo 5:8.) Á mu mbáa xa̱biya̱ bi̱ nindxu̱u̱ xúʼko̱ kaʼnii tsíyoo garikuminaʼ, a̱ʼgiu̱u̱ má gáʼyoo á mu ndayóoʼ maniñuuʼ  raxtáa ga̱jma̱a̱ mu ma̱ndoo maxtáa májánʼ gajmíi̱n e̱ji̱i̱n. Índo̱ najuiʼthá dí mbáa cristiano naʼni rígi̱, bi̱ kuya̱ edxu̱u̱ náa congregación muraxi mu mbuyáá itháan, numuu dí ma̱ndoo magumaa expulsar á mu xúʼko̱ eʼni.

Naʼne gawúunʼ bi̱ kuwa náa goʼwóo. Kúwi̱i̱n bi̱ ra̱ʼkhá tháán eni gíníi rí asndu migamíi muni kámbiñunʼ o asndu migamíi makhañúu bi̱ ndi̱ya̱a̱. Á mu bi̱ naʼni nindxu̱u̱ mbáa cristiano, bi̱ kuya̱ edxu̱u̱ gíʼmaa mbuyáá májánʼ xú káʼnii erígá, numuu rí índo̱ nakiʼnáa me̱ndaʼkho mbáa ga̱jma̱a̱ naʼni gawúunʼ bi̱ kuwa náa goʼwóo nindxu̱u̱ mbá numuu mu magumaa expulsar (Gálatas 5:19-21).

Migamíi dí asndu maniñuuʼ rambáxu̱u̱ ga̱jma̱a̱ Dios. Kúwi̱i̱n tikhun bi̱ nuni asndu xó má eʼngo̱o̱ mu xúniñuuʼ muni ñajuunʼ Jeobá bi̱ ndi̱ya̱a̱ o asndu nuniu̱u̱n tsiakii mu manújngorámunʼ kiʼtáñajunʼ rí na̱ʼkha̱ náa Biblia. Á mu xúʼko̱ erígá, cristiano gíʼmaa mbaʼyoo á mu i̱ndó xí naniñuuʼ raxtáa ga̱jma̱a̱ kayáa maʼnimbo̱o̱ dí “naʼtan Dios guini, [ki] xo ri nutan xabo” (Hechos 5:29).

Índo̱ narígá rí mingíjyúuʼ wéñuʼ xó má rí guámbulúʼ ndiʼyáá ragíʼmaa miʼthán bi̱ takudaminaʼ aʼkhá maniñuuʼ o maxtáa má xúʼko̱ ga̱jma̱a̱ a̱ʼgiu̱u̱ o ajmbio̱o̱. Maski ajndu bi̱ kuya̱ edxu̱u̱ ga̱jma̱a̱ eʼwíínʼ a̱ngiu̱lú bi̱ nundxa̱ʼwa̱míjna̱ májánʼ ma̱ndoo mumbañún ga̱jma̱a̱ muxnún xtágabu rí na̱ʼkha̱ náa Biblia, gíʼmaa mbuyáá rí i̱ndó bi̱ ndaʼyoo dí narígá náa mbáa xa̱biya̱ ga̱jma̱a̱ mbáa a̱ʼgu̱ nindxu̱u̱ Jeobá. Á mu mbáa cristiana o mbáa cristiano mbaaʼ naʼthí ga̱jma̱a̱ numuu xkujndu dí nagiʼdoo ga̱jma̱a̱ xa̱bu̱ bi̱ ndiyáa numuu dí nandoo maniña̱a̱ʼ, na̱nguá eʼyamajkhuu awan dí rígá náa bi̱ nidamijná ni má tséʼyamajkhuu Dios. Ma̱ngaa Jeobá ndaʼyoo á mu mbáa ndayáʼ rí maʼni nduwaʼ, maski ajndu májánʼ wéñuʼ niriyaʼ awan. Xúʼko̱, “xúgíʼ rígá pa̱jnu̱ ga̱jma̱a̱ ndaʼyoo májánʼ náa bi̱ muxnaxíi cuenta” (Hebreos 4:13). Á mu rígá mbá dí migamíi wéñuʼ, ga̱jma̱a̱ nándáa dí maʼni, cristiano naʼthí dí maniña̱a̱ʼ bi̱ ndiyáa, nimbáa ragíʼmaa maʼtá numuu. Numuu rí “xúgiáanʼ muxnaxíi cuenta náa Dios” (Romanos 14:10-12).