1, 2. Náa numuu rí nandaʼ xtayáá Jeobá ikháánʼ rá.

LÁ NANDAʼ xtayáá Dios ikháánʼ ráʼ. Á mu niraxnáximinaʼ náa ikhaa maratha rí nandaʼ xtayáá. Ikháanʼ nduʼyáá rí gíʼdoo numuu maʼndulú kuʼyáá Jeobá numuu dí nandoo kaʼyulú. Xó má eʼthí náa Biblia, “ikháanʼ nandulúʼ kuʼyáá, numuu rí ikhaa nindoo kaʼyulúʼ ginii” (1 Juan 4:19).

² Mbaʼa rí eʼni Jeobá mu masngájma rí nandoo kaʼyulúʼ. Niʼni Ku̱ba̱ʼ dí nagui̱i̱ wéñuʼ mu ma̱ndoo makuwáanʼlu ikhí, ga̱jma̱a̱ mámbá mbiʼi naxná xúgíʼ rí eyúluʼ mu makuwáanʼ má xúʼko̱ (Mateo 5:43-48). Ma̱ngaa nañewu̱u̱n rí gíʼdoo itháan numuu rí majmañulúʼ ga̱jma̱a̱ numuu ikhaa. Mbá xkri̱da nimínáanʼlú Ajngá rawunʼ rí nindxu̱u̱ Biblia. Ga̱jma̱a̱ naʼtulúʼ muʼtákáñii, muʼthán ga̱jma̱a̱ xúgíʼ a̱jkiu̱lú numuu rí ikhaa maʼdxaunlú ma̱ngaa rí mambáyulúʼ ga̱jma̱a̱ xi̱ʼ kaʼwu ndrígóo (Salmo 65:2; Lucas 11:13). Mú itháan nikujmaa rí nandoo kaʼyulúʼ wéñuʼ índo̱ nikunguanʼ A̱ʼdióo mu maʼni káwáanʼ náa aʼkhá ga̱jma̱a̱ rí nakháñulú. ¡Ra̱ʼkhá tháán eyoo kaʼyulúʼ Jeobá! (Atraxnuu Juan 3:16; Romanos 5:8.)

3. a) Ndiéjunʼ gíʼmáanʼ muʼni mu Dios ma̱ndoo kaʼyulúʼ má xúʼko̱ rá. b) Ndiéjunʼ gíʼmaa muraxi̱mi̱jna̱ ga̱jma̱a̱ náa minaʼ gándoo guxkamaa rí maxtiʼña̱a̱ rá.

³ Jeobá nandoo rí muniʼñámi̱jna̱ ma̱ndoo kaʼyulúʼ  kámuu mbiʼi. Mú, lá ma̱ndoo ráʼ. Ikháanʼ kaʼyulúʼ muʼthá á mu rí ma̱ndoo. Náa Biblia naʼthúún cristianos: “Guni má xúʼko̱ rí nandoo Dios mu ikhaa ma̱ndoo kaʼyala [...] mu makuwáanʼ kámuu mbiʼi nda̱wa̱á” (Judas 21). Índo̱ naʼthí “guni má xúʼko̱” nandoo gáʼthi rí ndayóoʼ muñajunʼ má xúʼko̱ mu xániñuuʼ raʼndoo kaʼyulúʼ Jeobá. Ikha jngó rí nuʼni gasngájma rí nuxnáa núma̱aʼ rí nandoo kaʼyulúʼ. Xúʼko̱ má gíʼdoo wéñuʼ numuu rí mámbáa maraximínáʼ: “Ndiéjunʼ gíʼmaa mani mu masngajmúu Dios rí nandoʼ ka̱yo̱o̱ rá.” Mu mbuʼyáá xóo gáxti̱ʼña̱a̱, guraxnuu Ajngá rawunʼ Dios dí niʼnirámáʼ apóstol Juan: “Rígi̱ eyoo gáʼthi rí maʼndulú kuʼyáá Dios: Rí muʼnimbaníí rí naʼtáñajunlú; mú, rí  naʼtáñajunlú na̱nguá mingíjyúuʼ” (1 Juan 5:3). Nandulúʼ mbuʼyáá xú káʼnii gándoo gusngajmá dí ra̱ʼkhá tháán eyulú kuʼyáá Dios, ikha jngó mbuʼyáá ndiéjunʼ phú eyoo gáʼthi ajngáa dí niʼthí Juan.

4, 5. a) Ndiéjunʼ nindoo gáʼthi Juan índo̱ niʼthí “rígi̱ eyoo gáʼthi rí maʼndulú kuʼyáá Dios” rá. b) Arathá xóo ni̱jkha̱ ra̱ja̱a̱ náa a̱jkia̱nʼ dí nandaʼ xtayáá Jeobá.

⁴ Ndiéjunʼ lá xtáa randxa̱ʼóo edxu̱u̱ apóstol Juan índo̱ niʼnirámáʼ: “Rígi̱ eyoo gáʼthi rí maʼndulú kuʼyáá Dios” rá. Ikhaa nindoo gáʼthi ga̱jma̱a̱ numuu rí ikháanʼ nandulúʼ kuʼyáá Dios. Mbáa narmáʼáan a̱jkia̱nʼ índo̱ ni̱dxu̱ʼ raʼndaʼ xtayáá Jeobá.

⁵ Araʼwún matatsaʼwa̱a̱ edxa̱ʼ mbégu̱ʼ ga̱jma̱a̱ numuu mbiʼi rúʼko̱. Índo̱ nijmañaaʼ rí gajkhun ga̱jma̱a̱ numuu Jeobá ga̱jma̱a̱ rí eʼthí maʼni, ni̱jkha̱ ra̱ja̱a̱ itháan fe rí xtaʼdáá náa ikhaa. Ma̱ngaa ni̱dxu̱ʼnú nikroaʼaʼ rí ikháánʼ ni̱ndxa̱ʼ xa̱bu̱ aʼkhá xó má xúgínʼ xa̱bu̱, ikha jngó na̱nguá nimbáxaʼ májánʼ ga̱jma̱ʼ Dios, maski ajndu xúʼko̱ Jeobá nijmiuu Cristo mu mambáʼtoo kamba̱a̱ mu ikháánʼ maraxtaa kámuu mbiʼi nda̱wa̱á ga̱jma̱a̱ ní xáraʼdáá aʼkhá xóo nigiʼdoo Adán (Mateo 20:28; Romanos 5:12, 18). Ma̱ngaa nikroaʼaʼ rí Jeobá ra̱ʼkhá tháán nimínuuʼ índo̱ nikuʼmaa A̱ʼdióo bi̱ nandoo kaʼyoo wéñuʼ mu makhañúu ga̱jma̱a̱ numaʼ. Rúʼko̱ ni̱jkha̱nú asndu náa a̱jkia̱nʼ, ga̱jma̱a̱ niʼni rí mangáán maʼnda̱ʼ xtayáá Jeobá (atraxnuu 1 Juan 4:9, 10).

6. Xú káʼnii esngajmá rí nandulúʼ kuʼyáá gajkhun mbáa, ga̱jma̱a̱ ndiéjunʼ nitani̱ ikháánʼ numuu rí nindaaʼ xtayáá Dios rá.

⁶ Mú, rí nikumaʼ ikhú raʼkháa xúʼko̱ phú eyoo gáʼthúu̱n rí maʼnda̱ʼ xtayáá Dios. Náa numuu xúʼko̱ eʼthá rá. Numuu rí maʼnda̱ʼ xtayáá mbáa raʼkháa i̱ndó ndayóoʼ maku̱ma̱ʼ ga̱jma̱a̱ maratha. Rí maʼnda̱ʼ xtayáá Dios raʼkháa i̱ndó  ndayóoʼ muʼthá: “Ikhúúnʼ nandoʼ ka̱yo̱o̱ Jeobá”. Xó má rí maraʼdáá fe, rí maʼnda̱ʼ xtayáá gajkhun mbáa nusngajmá ga̱jma̱a̱ ñajunʼ rí nuʼni (Santiago 2:26). Gajkhun, índo̱ nandulúʼ kuʼyáá mbáa, nandulúʼ muʼni rí nanigu̱u̱ʼ ikhaa. Xúʼko̱ nitagíʼnii ikháánʼ. Índo̱ ni̱jkha̱nú asndu náa a̱jkia̱nʼ rí nindaaʼ xtayáá Jeobá. Nindaaʼ maraxtaa xóo ikhaa enigu̱u̱ʼ. Mbáa asndu nijnguáanʼ iyááʼ mu manindxa̱ʼ xa̱bi̱i̱ ikhaa. Á mu xúʼko̱ nitani̱, nikujmaa kaʼwu dí ra̱ʼkhá tháán nindaaʼ xtayáá Dios ga̱jma̱a̱ nindaaʼ matiamajkuíí i̱ndó ikhaa, rúʼko̱ ni̱jkha̱ kañán matani rí gíʼdoo wéñuʼ numuu: Niratháán Dios rí maraxnaxíminaʼ matani rí nandoo ikhaa xúgíʼ mbiʼi rí gáraxtaa, nda̱wa̱á nijnguánʼ iyááʼ (atraxnuu Romanos 14:7, 8). Mu muʼnimbaníí rí gíʼdoo wéñuʼ numuu rí niʼthá muʼni, gíʼmaa muʼni rí niʼthí apóstol Juan, ikhaa rúʼko̱ guʼyáá xúgi̱.

7. Ndiéjunʼ nindxu̱u̱ tikhuu rí naʼtáñajunlú Dios muʼni, ga̱jma̱a̱ xóo guʼnimbánii rá.

⁷ Juan naʼthí dí á mu nandulúʼ kuʼyáá Dios “muʼnimbaníí rí naʼtáñajunlú”. Xú káʼnii nindxu̱u̱ dí naʼtáñajunlú xá. Náa Biblia naʼthúlúʼ dí Jeobá tsíyoo majngáanʼlú, muxuʼdámi̱jna̱ aʼkhá gajmiúlú mbáa, mbuʼyamajkún xándú, muʼni kuʼwáʼ ga̱jma̱a̱ muʼni nduwaʼ (1 Corintios 5:11; 6:18; 10:14; Efesios 4:28; Colosenses 3:9). Mu muʼnimbulúʼ rí naʼtáñajunlú Dios gíʼmaa makuwáanʼ xó má e̱ʼkha̱ raʼthí náa Biblia.

8, 9. Á mu rígá mbá rí eyulú muʼni, mú nda̱a̱ mbá xtángoo náa naʼthí á mu ikhí o raʼkhí, xú káʼnii gándoo guʼyáá rí eyoo Jeobá muʼni rá. Atagíʼ mbá xkri̱da.

⁸ Mu muʼni rí nanigu̱u̱ʼ Jeobá raʼkháa i̱ndó ndayóoʼ muʼnimbulúʼ rí naʼtáñajunlú náa Biblia. Jeobá na̱nguá eʼni maxmiéjunʼlú ga̱jma̱a̱ xtángoo dí naʼthúlúʼ xú káʼnii gúʼni mámbá mbiʼi. Xúgíʼ mbiʼi nuraʼníí mbaʼa dí ndayóoʼ muʼni. Mú, nguáná nda̱a̱ nimbá xtángoo dí maʼthúlú á  mu ikhí o raʼkhí. Índo̱ nagíʼnalo xúʼko̱, xóo gándoo guʼyáá á mu maniguuʼ Jeobá rí e̱ndxa̱ʼwáá edxu̱lúʼ muʼni rá. Mú, náa exkamaa rí maʼthúlú májánʼ xú káʼnii eʼyoo Dios dí muʼni rá. Ikhí má náa Biblia. Índo̱ nuʼnigajmaa, najmañulúʼ rí nanigu̱u̱ʼ Dios ga̱jma̱a̱ rí tsínigu̱ʼ (atraxnuu Salmo 97:10; Proverbios 6:16-19). Xúʼko̱ gándoo guʼgua̱ ruʼyáá xú káʼnii xa̱bu̱ ganindxu̱lú, xóo nanigu̱u̱ʼ Dios. Índo̱ guʼgua̱ ruʼyáá xú káʼnii a̱jkiu̱u̱n Jeobá ga̱jma̱a̱ xú eʼni, xáʼniulu mingíjyúuʼ wéñuʼ mbuʼyáá á mu nanigu̱u̱ʼ o tsénigu̱u̱ʼ mbá rí nandulúʼ muʼni. Xúʼko̱ ma̱ndoo mu̱ʼgua̱ ruʼyáá “má xúʼko̱ ndiéjunʼ eyoo Jeobá muʼnilú” maski ajndu nda̱a̱ mbóo xtángoo náa naʼtulúʼ káʼnii phú guʼni (Efesios 5:17).

⁹ Guʼgíʼ mbá xkri̱da. Náa Biblia xúxkamaa náa maʼthí dí ragíʼmaa mbuʼyáá película náa nubúunʼ xa̱bu̱ o náa nuxmijná wéñuʼ. Mú, lá ndayóoʼ mbóo xtángoo náa maʼthí dí ragíʼmaa mbuʼyáá rígi̱ ráʼ. Nduʼyáá má rí endxa̱ʼóo edxu̱u̱ Jeobá. Náa Ajngá rawunʼ naʼthí kaʼwu rí ikhaa “nawiyuʼ kaʼyoo asndu tsáa bi̱ nanigu̱u̱ʼ maxmínaʼ” ga̱jma̱a̱ rí “[Jeobá] mandi̱ʼi̱i̱n cuenta xa̱bu̱ bi̱ nuxuda̱mi̱jna̱ aʼkhá gajmiún mbáa ga̱jma̱a̱ xa̱bu̱ bi̱ ninigu̱nʼ bi̱ nubúnʼ gajmiún imba̱a̱ kaníí” (Salmo 11:5; Hebreos 13:4). Índo̱ nundxa̱ʼwa̱míjna̱ náa ajngáa rígi̱ rí niʼthí Dios na̱jkua̱nú nakru̱ʼu̱lú rí eyoo Jeobá muʼni. Ikha jngó na̱nguá eraʼwíí mbuʼñún xa̱bu̱ bi̱ nuni rí tsénigu̱u̱ʼ Dios. Numbaaʼ rígi̱ naʼniulú mbuʼyáá dí nda̱a̱ rí gaʼniulúʼ índo̱ nduʼyáá mbá dí ra̱májánʼ, mu Jeobá nadxuu índo̱ ikháanʼ nuʼni tsiakimijna rí xúʼyáá nditháan. *

10, 11. Náa numuu rí nandulúʼ muʼnimbulúʼ má xúʼko̱ rí naʼthúlúʼ Jeobá, ga̱jma̱a̱ xóo gíʼmaa muʼni rá.

¹⁰ Náa numuu rí nuʼnimbulúʼ dí naʼtáñajunlú Dios rá.  Xó muʼthá, ndiéjunʼ jngó nandulúʼ makuwáanʼ xúgíʼ mbiʼi xóo eyoo Dios rá. Raʼkháa i̱ndó mu xáguaʼdáá xkujndu o mu xáxnulú castigo (Gálatas 6:7). Nuʼnimbulúʼ rí naʼthí Jeobá numuu dí nduʼyáá rí xúʼko̱ gándoo gusngajmá rí nandulúʼ kuʼyáá wéñuʼ. Xó má e̱ji̱n nandún muni rí naniguuʼ anu̱ún, ikháanʼ nandulúʼ muʼni rí naniguuʼ Jeobá (Salmo 5:12). Ikhaa nindxu̱u̱ Anu̱lú ga̱jma̱a̱ nandulúʼ kuʼyáá wéñuʼ. Ra̱ʼkhá tháán edxu̱lúʼ índo̱ nduʼyáá rí ‹Jeobá naniguuʼ rí nuʼni› (Proverbios 12:2).

¹¹ Ikha jngó ikháanʼ tséʼni ñajunʼ Dios ga̱jma̱a̱ xtájkháan, tséʼtan muʼni ñajunʼ á mu rígá rí maxnúlúʼ ní má muʼni xó má ikháanʼ eyulú. * Ikháanʼ xándoo gúʼthá nguáná guʼnimbulúʼ. Ikháanʼ ‹nuʼnimbulúʼ ga̱jma̱a̱ xúgíʼ a̱jkiu̱lú› (Romanos 6:17). Nuʼthá xóo niʼthí salmista: ‹Ga̱jma̱a̱ masngajmá rí naniguuʼ wéñuʼ xú káʼnii eratáñajunʼ› (Salmo 119:47). Xúʼko̱, nuʼnimbulúʼ rí naʼthí Jeobá ga̱jma̱a̱ xúgíʼ a̱jkiu̱lú. Nduʼyáá má rí ikhaa kaʼyoo ga̱jma̱a̱ na̱ndu̱ʼu̱lú rí muʼnimbulúʼ má xúʼko̱ (Deuteronomio 12:32). Nandulúʼ manindxu̱lúʼ xóo Noé, bi̱ niʼnimbo̱o̱ má xúʼko̱ kaʼyoo Dios ga̱jma̱a̱ xúʼko̱ nindoo nisngájma rí nindoo kaʼyoo. Xúʼko̱ gíʼthá ga̱jma̱a̱ numulúʼ xó má nijuiʼthá ga̱jma̱a̱ numuu: “Noé niʼni xúgíʼ xó má niʼtáñajunʼ Dios. Xúʼko̱ kayuʼ niʼni” (Génesis 6:22).

12. Ndiéjunʼ eyóoʼ muʼni mu maʼdxuu Jeobá rá.

¹² Xú káʼnii ku̱mu̱u̱ Jeobá índo̱ nuʼnimbulúʼ ga̱jma̱a̱ xúgíʼ a̱jkiu̱lú rá. Náa Biblia naʼthí rí nuʼni gagi a̱jkiu̱u̱n (Proverbios 27:11). Lá ma̱ndoo mbáa maʼni rí maʼdxuu Dios bi̱ niʼni xúgíʼ dí rígá ráʼ. Ma̱ndoo, mbuʼyáá náa numuu. Jeobá niʼniáanʼ mu muraʼwíí ikháanʼ ndiéjunʼ eyulú muʼni.  Xúʼko̱, ma̱ndoo muraʼwíí muʼnimbulúʼ o xúʼnimbulúʼ rí naʼthúlúʼ ikhaa (Deuteronomio 30:15, 16, 19, 20). Ikha jngó ikhaa nadxuu wéñuʼ índo̱ ikháanʼ nuʼthá muʼni rí nandoo ikhaa numuu rí nandulúʼ kuʼyáá ga̱jma̱a̱ xúgíʼ ámiulú (Proverbios 11:20). Ga̱jma̱a̱ itháan májánʼ gákuwáanʼ xúʼko̱.

13, 14. Náa numuu eʼthá “rí naʼtáñajunlú [Jeobá] na̱nguá mingíjyúuʼ”, ga̱jma̱a̱ xú káʼnii xkri̱da gándoo majmulúʼ rá.

¹³ Apóstol Juan naʼthí xóó itháan ajngáa rí naʼni̱i̱ a̱jkiu̱lú: “Rí naʼtáñajunlú [Jeobá] na̱nguá mingíjyúuʼ”. Náa ajngáa griego náa naʼthí “mingíjyúuʼ” náa 1 Juan 5:3 nandoo gáʼthi ‹miki̱wu̱n›. * Ikha jngó imbo̱o̱ Biblia naguwíi ajngáa xóo: ‹Rí naʼtáñajunlú na̱nguá ñajunʼ xóo mbóo rí miki̱wu̱n› (Nuevo Testamento, Pedro Ortiz). Jeobá na̱nguá endu̱ʼu̱lúʼ mbá rí xáʼngulú guʼni. Maski ajndu xúgiáanʼ ni̱ndxu̱lú xa̱bu̱ aʼkhá, xúgiáanʼ ma̱ndoo muʼnimbaníí xtángoo ndrígóo.

¹⁴ Atatsaʼwáminaʼ rígi̱, mbáa bi̱ nambáxa̱ʼ ga̱jma̱ʼ na̱nda̱ʼa̱ʼ rí matambáyii maʼni goʼwóo. Ndayóoʼ magiʼngoo ixi̱ náa miʼni guʼwá. Rígá rí maʼngaaʼ mida̱ mbáwiin, rígá rí ndayóoʼ muda̱ a̱jmi̱i̱n xa̱bu̱. Bi̱ nambáxa̱ʼ ga̱jma̱ʼ naraʼwíí ixi̱ rí maʼngaaʼ mida̱. Lá manda̱ʼa̱ʼ mida̱ ixi̱ rí miki̱wu̱n wéñuʼ xáʼ. Na̱nguá. Ikhaa xándoo rí matani gawuminaʼ. Xúʼko̱ má eʼni Anu̱lú Dios bi̱ nandoo kaʼyulúʼ (Deuteronomio 30:11-14). Tsendu̱ʼu̱lúʼ muʼda̱ mbá rí miki̱wu̱n wéñuʼ. Jeobá ndaʼyoo ndiéjunʼ gaʼngulúʼ muʼni, “numuu rí ikhaa  ndaʼyoo rí xú káʼnii kiʼniáanʼ ga̱jma̱a̱ ikhaa ndaʼyoo rí yujndaʼ ñajunlú” (Salmo 103:14).

15. Ndiéjunʼ jngó ma̱ndoo muʼthá rí mambáyulúʼ wéñuʼ rí naʼtáñajunlú Jeobá rá.

¹⁵ Rí naʼtáñajunʼ Jeobá nditháan na̱nguá mingíjyúuʼ; i̱ndó nambáyulúʼ mu makuwáanʼ májánʼ (atraxnuu Isaías 48:17). Moisés niʼthún xa̱bu̱ israelitas rí gíʼmiin ‹munimbaníí xúgíʼ rí Jeobá naʼthí ga̱jma̱a̱ dí mbuyamajkuíí ikhaa›. Nda̱wa̱á niʼthí náa numuu: “Mu mambáyulúʼ má xúʼko̱, mu makuwáanʼ xó má mbiʼi xúgi̱” (Deuteronomio 6:24). Ikháanʼ mangáanʼ ma̱ndoo muʼthá rí xtángoo ndrígóo Dios nambáyulúʼ má xúʼko̱, mu makuwáanʼlu gagi kámuu mbiʼi. Ga̱jma̱a̱ nduʼyáá rí gajkhun mambáyulúʼ. Náa numuu rá. Numuu rí na̱ʼkha̱ náa Jeobá, ikhaa ndaʼyoo ndiéjunʼ phú gambáyulú, numuu rí ikhaa najmañuu wéñuʼ (Romanos 11:33). Ma̱ngaa ikhaa phú esngájma rí nandoo kaʼyulúʼ (1 Juan 4:8). Náa xúgíʼ rí naʼthí, rí naʼni ga̱jma̱a̱ rí naʼtáñajunlú nakujmaa rí Dios nandoo kaʼyulúʼ.

16. Ndiéjunʼ embáyulú muʼnimbulúʼ kuʼyáá Dios maski ajndu kuwáanʼ náa numbaaʼ xkawiʼ rígi̱ ga̱jma̱a̱ rí ni̱ndxu̱lú xa̱bu̱ aʼkhá rá.

¹⁶ Rúʼko̱ na̱nguá eyoo gáʼthi dí ramíʼskhoo muʼnimbulúʼ rí naʼthí Dios. Gíʼmáanʼ muʼni tsiakimijna mu xúʼni̱ dí naʼni numbaaʼ xkawiʼ rígi̱ numuu rí kuwáanʼ “naʼ ago ñaunʼ gixa” (1 Juan 5:19). Ma̱ngaa ni̱ndxu̱lú xa̱bu̱ aʼkhá, ikha jngó ndayóoʼ muʼni tsiakimijna mu xanujngorámulúʼ xtángoo ndrígóo Dios (Romanos 7:21-25). Á mu nandulúʼ kuʼyáá Dios maʼngulú muʼni xúgíʼ rígi̱. Jeobá naʼni tsajkurámiinʼ bi̱ nugíʼ nunimbu̱ún rí eʼthí ikhaa numuu rí nandún kuyáá. Naxnún ‹xi̱ʼ kaʼwu bi̱ nunimbu̱ún kuyáá xóo mbáa bi̱ naʼtáñajunʼ› (Hechos 5:32). Ga̱jma̱a̱ xi̱ʼ rúʼko̱ naʼni muriʼkhumijná mu manindxu̱lúʼ májáánʼ xa̱bu̱, rígi̱ nambáyulúʼ muʼnimbulúʼ kuʼyáá má xúʼko̱ Dios (Gálatas 5:22, 23).

17, 18. a) Ndiéjunʼ gúʼnigajmaa náa libro rígi̱, ga̱jma̱a̱ ndiéjunʼ gíʼmaa magiwa̱nʼ a̱jkiu̱lú índo̱ gákuwáanʼ ruʼyáá rá. b) Ndiéjunʼ gúʼyáá náa imbo̱o̱ capítulo rá.

 ¹⁷ Náa libro rígi̱ gúʼnigajmaa numuu ikha rí na̱ʼkha̱ náa Biblia ga̱jma̱a̱ awan ndrígóo Jeobá dí naʼniulú muʼni dí májánʼ, xúʼko̱ má i̱ʼwáʼ rí nandoo muʼnilú. Índo̱ gúʼnigajmaa i̱yi̱i̱ʼ rígi̱ mbaʼa rí gíʼmaa magiwa̱nʼ a̱jkiu̱lú rí gíʼdoo wéñuʼ numuu. Timbá, rí Jeobá na̱nguá eʼniulú tsiakii muʼnimbulúʼ xtángoo ndrígóo ga̱jma̱a̱ ikha rí na̱ʼkha̱ náa Biblia. Ikhaa nandoo muʼni ga̱jma̱a̱ xúgíʼ a̱jkiu̱lúʼ dí naʼthí ikhaa. Raga̱jma̱, rí Jeobá naʼtulúʼ makuwáanʼ májánʼ, mu xúʼko̱ maʼni tsajkurámáanʼ rí mbiʼi xúgi̱ ga̱jma̱a̱ nda̱wa̱á makuwáanʼ kámuu mbiʼi. Ragajtsú, á mu nuʼnimbulúʼ kuʼyáá Jeobá ga̱jma̱a̱ xúgíʼ a̱jkiu̱lú xúʼko̱ gusngajmá rí nandulúʼ kuʼyáá.

¹⁸ Mu mbuʼyáá á mu ikhí o raʼkhí rí eʼni, rígá mbá rí Jeobá nimináanʼ: Ikhaa nindxu̱u̱ conciencia. Á mu nandulúʼ maguikulú ndayóoʼ muʼsngáá májánʼ, rúʼko̱ nindxu̱u̱ rí guʼyáá náa imbo̱o̱ capítulo.