1, 2. Ndiéjunʼ gúʼyáá ga̱jma̱a̱ náa numuu rá.

Á MU ikháánʼ ndiyáa má xa̱bu̱, xóo gárata rí xtaa ga̱jma̱ʼ bi̱ ndiyáa rá. Lá maratha dí kuwáanʼ gagi o rígá xkujndu ráʼ. Lá natayáá ikháánʼ ga̱jma̱ʼ bi̱ ndiyáa rí nini tsingumíjná o maski ajndu xtaa ga̱jma̱ʼ xa̱bu̱ bi̱ ndiyáa mú na̱nguá xtaa tsímáá ráʼ. Á mú xúʼko̱ kaʼnii xtaa, mbáa xtaa gíná numuu rí nánguá embáxalaʼ májánʼ. Á mu ikháánʼ ni̱ndxa̱ʼ cristiano, mbáa naxmiéjuanʼ ga̱jma̱a̱ naraʼdáá gaʼkhu numuu rí bi̱ ndiyáa tséxnúu gamajkhu Jeobá, Dios bi̱ nandoo kaʼyulúʼ. ¡Mú araʼdáá tsiakii! Ma̱ndoo mambanúu.

² Garmáʼáan a̱jkiu̱lú rí kuwa mbaʼin cristianos bi̱ nidamijná bi̱ niguáʼdáá mbaʼa xkujndu nákha ginii mú niʼngu̱u̱n niraʼníí ga̱jma̱a̱ dí xúgi̱ ni̱ndxu̱ún mbá xkri̱da májánʼ. Mú, nixkamaa mbá dí nimbáñun mu mambaxúún májánʼ. Ikháánʼ mangáán mataxkamaa. Mú graxe̱ nindxu̱u̱: Ndiéjunʼ gándoo gáguma mu makuwá itháan gagi bi̱ nidamijná rá.

3, 4. Náa numuu rí nánguá kuwa tsínguánʼ índo̱ bi̱ nidamijná nuni tsiakimijna mu magún kanuu náa Dios rá. Atagíʼ mbá xkri̱da.

³ Índo̱ bi̱ nidamijná nuni tsiakimijna mu magún kanuu náa Dios, mangiin nambáxu̱u̱n itháan. Guʼgíʼ mbá xkri̱da. Náa agoo mbá kúbá xtáa mbáa xa̱biya̱ ga̱jma̱a̱ mbáa a̱ʼgu̱. Xa̱biya̱ xtáa náa mbá níjñúu kúbá ga̱jma̱a̱ i̱mba̱ níjñúu  xtáa a̱ʼgu̱. Mú mbrígúu egún ratsimún nájmi̱i̱n náa kúbá. Ndiéjunʼ erígá rá. Dí índo̱ nagún ratsimún naʼni itháan mijngii mbuyamijná náa inuu kúbá. Xú káʼnii gándoo gáxnulú tsiakii xkri̱da rígi̱ rá.

⁴ Dí nagún ratsimún náa inuu kúbá nandoo gáʼthi tsiakii rí nuʼni bi̱ ni̱ndxu̱lú cristianos mu muʼni ñajuunʼ Jeobá ga̱jma̱a̱ xúgíʼ a̱jkiu̱lú. Mbáa ikháánʼ ga̱jma̱ʼ bi̱ ndiyáa nandala ku̱ya̱a̱ Jeobá ga̱jma̱a̱ nuni tsiakimijna mu matsimala náa kúbá. Á mu tsíyala kuyamíjna̱, nindxu̱u̱ asndu xóo kuwáanʼ mámbá níjñúu kúbá. Ndiéjunʼ gárígá á mu natsimala má xúʼko̱ náa inuu kúbá rá. Maski ajndu nákha ginii tsínguánʼ kuwáanʼla, índo̱ nuni tsiakimijna mutsimala, xóo muʼthá rí mu̱ʼgua̱la kanuu náa Dios,  mambaxála itháan májánʼ. Xúʼko̱, mu mambaxúún itháan májánʼ bi̱ nidamijná gíʼmaa rí magún kanuu náa Dios. Mú, xú gándoo gáguma rá.

5. a) Ndiéjunʼ gámbayaʼ mi̱dxu̱ʼnú itháan mijngii náa Jeobá ga̱jma̱a̱ náa bi̱ ndiyáa rá. b) Xú káʼnii eʼñún Jeobá bi̱ nidamijná rá.

⁵ Mbá dí xóo ma̱ndoo matsimala nindxu̱u̱ rí muʼgíʼ munimbánii xtágabu rí naxná Biblia náa xa̱bu̱ bi̱ nidamijná (Salmo 25:4; Isaías 48:17, 18). Guʼyáá májánʼ mámbá dí ikhaa, dí nixná apóstol Pablo índo̱ niʼthí: “Bi̱ nidamijná gaʼni ga̱jma̱a̱ gamajkhu náa xúgínʼ” (Hebreos 13:4). Ndiéjunʼ nindoo gáʼthi ajngáa rígi̱ rá. Timbá, guʼyáá ajngáa “gamajkhu”. Náa phú ajngáa niguma, nandoo gáʼthi mbá rí gíʼdoo wéñuʼ numuu ga̱jma̱a̱ mitsaan. Ikha jngó náa ajngáa rígi̱ nasngájmulúʼ mbuʼyáá xú eʼñún Jeobá bi̱ nidamijná: Xóo mbá dí ra̱ʼkhá tháán gíʼdoo numuu.

6. Índo̱ nduʼyáá náa xúgíʼ ajngáa rí niʼthí Pablo ga̱jma̱a̱ numún bi̱ nidamijná, ndiéjunʼ ejkuanú ekru̱ʼu̱lú, ga̱jma̱a̱ ndíjkha dí gíʼdoo numuu mbuʼyáá rá.

⁶ Á mu ikháánʼ ga̱jma̱ʼ a̱ʼgia̱ʼ nuni ñajunʼ Dios, nájmáanʼ ndu̱ya̱a̱ rí gíʼdoo wéñuʼ numuu ga̱jma̱a̱ dí mitsúʼkháan, numuu rí Jeobá niʼni̱i̱ (atraxnuu Mateo 19:4-6). Á mu nuraʼníí xkujndu bi̱ nidamijná, lá i̱ndó ndayóoʼ mbuyáá dí marigá gamajkhu náa bi̱ nidamijná ráʼ. Mbáa ndayóoʼ mbá dí itháan gíʼdoo tsiakii mu maxkajxi̱i̱n rí maʼndún kuyamijná ga̱jma̱a̱ mbuyamajkumijná. Náa biʼyaa rá. Mu mbuʼyáá ndiéjunʼ nindxu̱u̱, guʼyáá mbu̱júu̱ dí niʼnirámáʼ Pablo. Ikhaa táʼthi: “Bi̱ nidamijná nindxu̱u̱ gamajkhu”; ikhaa niʼthí: “Bi̱ nidamijná gaʼni ga̱jma̱a̱ gamajkhu”. Ikhaa na̱nguá niʼthí á mu ma̱ndoo maguma, ninindxu̱u̱ mbá kiʼtáñajunʼ. * Gíʼdoo numuu rí xámbumulú, numuu  dí naniñulú mbuʼyáá imbo̱o̱ rí maxkaxáanʼ mu maʼndulú kuʼyáá itháan bi̱ ndiʼyáa. Náa numuu rí nuʼthá rígi̱ rá.

7. a) Náa biʼyaa kiʼtáñajunʼ rí na̱ʼkha̱ náa Biblia eʼnimbánii, ga̱jma̱a̱ náa numuu rá. b) Ndiéjunʼ rí májánʼ ekhánulú índo̱ nuʼnimbulúʼ rá.

⁷ Gundxaʼwamíjna̱ mbégu̱ʼ. Xú káʼnii tayáá ikháánʼ i̱ʼwáʼ rí naʼtáñajunʼ náa Biblia, xó má dí miʼsngúún xa̱bu̱ o dí magimbáanʼ mu mbuʼyamajkuíí Dios rá. (Mateo 28:19; Hebreos 10:24, 25.) Natanimbánii, maski ajndu nguáná naʼniaʼ mingíjyúuʼ. Nagájnaʼ gárataráʼa ajngáa ndrígóo Reino maski ajndu xa̱bu̱ tsíñún gudxawíín. Ma̱ngaa na̱dxu̱ʼ náa reunión maski ajndu néʼngaʼ egájnaʼ náa natiejunʼ. Maski ajndu naʼniaʼ mingíjyúuʼ, tsítatsiñanʼ raratáraʼa ni má tsítatsiñanʼ ra̱dxu̱ʼ náa reunión. Nimbáa tséʼngo̱o̱ gárikhaʼ, ni má Satanás. Náa numuu rá. Numuu dí ikháánʼ nandaʼ xtayáá Jeobá ga̱jma̱a̱ xúgíʼ a̱jkia̱nʼ, ga̱jma̱a̱ rúʼko̱ naxkaxíin matanimbánii rí naʼtáñajunʼ (1 Juan 5:3). Ndiéjunʼ rí májánʼ ekhánaʼ índo̱ naratáraʼa ga̱jma̱a̱ na̱dxu̱ʼ náa reunión rá. Numuu rí xtaa ratani̱ rí eyoo Dios, naraxtaa tsímáá ga̱jma̱a̱ narígá gagi náa a̱jkia̱nʼ. Rígi̱ naʼni rí mbi̱ya̱a̱ tsiakii (Nehemías 8:10). Ndiéjunʼ eʼsngúlúʼ dí guámbulúʼ ndiʼyáá rá.

8, 9. a) Ndiéjunʼ gáxkaxáanʼ mbuʼyamajkuíí bi̱ ndiʼyáa, ga̱jma̱a̱ náa numuu rá. b) Xú káʼnii a̱jma̱ enii rí mbuʼyáá xúgi̱ rá.

⁸ Xó má eʼyáá, rí maʼndulú kuʼyáá Dios naxkaxáanʼ muʼnimbulúʼ kiʼtáñajunʼ rí muʼtáraʼa ga̱jma̱a̱ dí mu̱ʼgua̱ náa reunión maski ajndu nuraʼníí xkujndu. Numuu rí nandulúʼ kuʼyáá naxkaxáanʼ muʼnimbulúʼ dí na̱ʼkha̱ náa Biblia rí gíʼmaa muʼni tsiakimijna mu marigá “gamajkhu” náa bi̱ nidamijná, maski ajndu naʼniulú mingíjyúuʼ (Hebreos 13:4; Salmo 18:29; Eclesiastés 5:4). Xó má Jeobá eʼni tsajkurámuʼ tsiakii rí nuʼni mu muʼtáraʼa ga̱jma̱a̱ rí mu̱ʼgua̱ reunión, ma̱ngaa maʼni tsajkurámuʼ tsiakii rí gúʼni mu musngajmá dí nduʼyáá rí gíʼdoo numuu bi̱ ndiʼyáa (1 Tesalonicenses 1:3; Hebreos 6:10).

 ⁹ Mú, xú káʼnii gándoo gúni bi̱ nidamijná mu marigá gamajkhu rá. Timbá, xúni̱ nimbá rí maʼni gachúu. Raga̱jma̱, miʼni dí ndayóoʼ mu mambaxúún má xúʼko̱.

10, 11. a) Ndiéjunʼ eʼni dí xárígá gamajkhu náa bi̱ nidamijná rá. b) Ndiéjunʼ graxe̱ gíʼmaa matani̱i̱ bi̱ ndiyáa rá.

¹⁰ Ninújngoo má tsiguʼ, mbáa cristiana niʼthí rígi̱: “Na̱ndo̱ʼo̱o̱ Jeobá maxnúʼ tsiakii mu maʼngo̱o̱ a̱jkiu̱nʼ gáʼni”. Ndiéjunʼ gáʼngo̱o̱ xá. Ikhaa má eʼthí: “Ajmbioʼ naʼni gawúunʼ ga̱jma̱a̱ ajngóo. Na̱nguá kujmaa á mu nagawúnʼ rí mbájníí, mu nagawúnʼ rí a̱jkiu̱nʼ, numuu rí nángi eʼni eʼthúnʼ: ‹Néʼngo̱ʼ tani› o ‹Nda̱a̱ dí ejmán›”. A̱ʼgu̱ bugi̱ niʼthí xkujndu dí narígá náa bi̱ nidamijná: Dí nutamijná ajngáa rí naʼni gawúunʼ.

¹¹ ¡Phú gíná rí cristianos bi̱ nidamijná nutawéñumíjná, ajngáa rí naʼni mingíjyúuʼ mambumaʼ! Índo̱ bi̱ nidamijná najmún má xúʼko̱ ajngáa xóo rígi̱ na̱nguá rígá gamajkhu. Rí xúgi̱, xú káʼnii xtaa ikháánʼ ga̱jma̱ʼ bi̱ ndiyáa rá. Mu ma̱ta̱ya̱a̱, atraxi̱i̱ ga̱jma̱a̱ májánʼ: “Lá najmuʼ ajngáa rí naʼni gawáanʼ ráʼ.” Á mu nariʼña̱a̱ dí mbaʼa nuthu má tani, gíʼmaa dí matriʼkuminaʼ (Gálatas 5:15; atraxnuu Efesios 4:31).

12. Ndiéjunʼ gáʼni rí ní xágiʼdoo numuu gamajkhu rí nuxnáá Dios rá.

¹² Garmáʼáan a̱jkiu̱lú rí á mu nuʼthá wéñiʼ xa̱bu̱ bi̱ ndiʼyáa maʼni gachúu rí nambáxulúʼ gajmiúlú Jeobá. Náa Ajngá rawunʼ Dios naʼthí: “Á mu mbáa nandxa̱ʼwáminaʼ dí nindxu̱u̱ xa̱bi̱i̱ Dios mú á mu tsíñewu̱u̱n raju̱u̱n, xtáa raʼni nduwaaʼ a̱jkiu̱u̱n, ga̱jma̱a̱ rí ndaʼyamajkuu Dios nindxu̱u̱ ndíí” (Santiago 1:26). Ragíʼmaa mundxaʼwamíjna̱ rí índo̱ najmulú ajngáa nindxu̱u̱ mixtiʼkhu ki xóo rí mbuʼyamajkuíí Jeobá. Xó má esngájma náa Biblia, raʼkhí mandxaʼwáminaʼ mbáa rí á mu naʼni ñajuunʼ Dios, tséʼniuu má dí rígá náa goʼwóo. Xúʼni̱ nduwamijná: Nindxu̱u̱  mbá dí ra̱ʼkhá tháán gíʼdoo numuu (atraxnuu 1 Pedro 3:7). Mbáa xa̱bu̱ ma̱ndoo mañajunʼ májánʼ náa congregación. Mú á mu naʼni gawúunʼ ga̱jma̱a̱ ajngóo bi̱ kuwa náa goʼwóo, na̱nguá xtáa raʼyamajkhuu bi̱ ndiyáa, ga̱jma̱a̱ Dios mbaʼyoo rí nda̱a̱ numuu gamajkhu rí naxnúu.

13. Xú káʼnii imbo̱o̱ rígá rí mbáa cristiano naʼni gawúunʼ bi̱ ndiyáa rá.

¹³ Bi̱ nidamijná gíʼmaa rí muñewa̱a̱n dí muni mu xúni̱ gawúunʼ bi̱ kuwa náa guʼún. Guʼyáá a̱jma̱ xkri̱da. Bi̱ kayá edxu̱u̱ náa mbá guʼwá mba̱yu̱ʼ wéñuʼ eʼtamíjná náa teléfono ga̱jma̱a̱ mbáa ndxájulú a̱ʼgu̱ bi̱ xtáa náa congregación ndrígóo bi̱ mbáwíi eʼnimbanii e̱ji̱i̱n mu ma̱ndo̱ʼo̱o̱ xtágabu. Imbo̱o̱, mbáa ndxájulú bi̱ ninújunʼ naʼtáraʼa mba̱yu̱ʼ wéñuʼ dí mbá xmáná ga̱jma̱a̱ mbáa ndxájulú bi̱ xóó tsínigúnʼ. Xó má bi̱ kayá edxu̱u̱ náa mbá guʼwá ga̱jma̱a̱ ndxájulú bi̱ ninújunʼ nuni ga̱jma̱a̱ mbá numuu dí májánʼ; mú, xú káʼnii ekumún bi̱ ndi̱ya̱a̱ xá. Mbáa cristiana bi̱ nigíʼnuu xúʼko̱ kaʼnii niʼthí: “Nagawúnʼ wéñuʼ índo̱ nda̱yo̱o̱ rí ajmbioʼ naʼtámíjná mba̱yu̱ʼ ga̱jma̱a̱ nambáyúu mbáa ndxájulú a̱ʼgu̱ náa congregación. Naʼni maku̱mu̱ʼ rí nda̱a̱ numuʼ”.

14. a) Xó má eʼthí Génesis 2:24, ndiéjunʼ kaʼñúún muni bi̱ nidamijná rá. b) Ndiéjunʼ dí gíʼmaa muraximíjna̱ bi̱ ninigu̱nʼ rá.

¹⁴ Gajkhun má nagawúunʼ ndxájulú a̱ʼgu̱. Xúʼko̱ má gawúunʼ tikhun a̱ngiu̱lú índo̱ nduyáá rí bi̱ ndi̱ya̱a̱ nanújngorámunʼ ikha rí nixnúún Dios bi̱ ninigu̱nʼ: “Ikha jngó xa̱biya̱ maniñuʼ anu̱u̱ ga̱jma̱a̱ ru̱dúu̱ gíʼdoo rí maxtáa ga̱jma̱a̱ a̱ʼgiu̱u̱” (Génesis 2:24). Lá nandoo gáʼthi versículo rígi̱ dí índo̱ mbáa ndayáa xa̱bu̱ nánguá mañewu̱u̱n anu̱u̱ ga̱jma̱a̱ ru̱dúu̱ xáʼ. Na̱nguá. Dí nandoo gáʼthi texto dí maxmiéjunʼ ginii kaʼyoo bi̱ ndiyáa. Xúʼko̱ má erígá náa eʼwíínʼ a̱ngui̱i̱n bi̱ mbóó fe ndrígóo: Maski ajndu nandoo kaʼñún wéñuʼ, mú itháan gíʼdoo numuu mambáyúu bi̱ ndiyáa. Ikha jngó, á mu naʼtámíjná gajmíi̱n mba̱yu̱ʼ o nambáxu̱u̱ wéñuʼ gajmíi̱n eʼwíínʼ, itháan á mu nindxu̱u̱ mbáa xa̱biya̱ o mbáa a̱ʼgu̱, maʼni dí marigá xkujndu náa goʼwóo.  Atraxi̱mínáʼ: “Lá ikhaa numuu rígi̱ dí gúʼdoo xkujndu náa goʼwóo ráʼ. Lá naríyaʼ mbiʼi rí maxtáá ga̱jmu̱ʼ, madxawun ga̱jma̱a̱ masngajmúu rí nandoʼ ka̱yo̱o̱ bi̱ ndi̱ya̱a̱ ráʼ.”

15. Xó má eʼthí Mateo 5:28, ndíjkha rí cristianos bi̱ ninigu̱nʼ ragíʼmaa mambaxúu wéñuʼ ga̱jma̱a̱ mbáa ndxájulú a̱ʼgu̱ rá.

¹⁵ Ma̱ngaa, índo̱ xa̱bu̱ bi̱ nidamijná nakúwi̱i̱n mba̱yu̱ʼ  gajmiún mbáa bi̱ na̱nguá ndi̱ya̱a̱ ga̱jma̱a̱ nambáxu̱u̱n wéñuʼ, nuni mbá dí migamíi. Phú gíná, tikhun cristianos nini xúʼko̱ ga̱jma̱a̱ niguánu nindúún kuñún (Mateo 5:28). Rígi̱ ni̱jkha̱ kagu̱u̱n muni mbá dí tséxnúu gamajkhu bi̱ ndi̱ya̱a̱. Guʼyáá rí niʼthí apóstol Pablo ga̱jma̱a̱ numuu rígi̱.

16. Ndiéjunʼ eʼthí xóó Pablo ga̱jma̱a̱ numún bi̱ nidamijná rá.

¹⁶ Nda̱wa̱á rí niʼthí dí “bi̱ nidamijná gaʼni ga̱jma̱a̱ gamajkhu”, Pablo naʼthí xóó dí “ragíʼmaa mubúúnʼ gajmiún eʼwíínʼ, numuu rí Dios mandi̱ʼi̱i̱n cuenta xa̱bu̱ bi̱ nuxuda̱mi̱jna̱ aʼkhá gajmiún mbáa ga̱jma̱a̱ xa̱bu̱ bi̱ ninigu̱nʼ bi̱ nubúnʼ gajmiún imba̱a̱ kaníí” (Hebreos 13:4). Náa texto rígi̱, ajngáa dí “ragíʼmaa mubúúnʼ gajmiún eʼwíínʼ” nandoo gáʼthi dí gíʼmaa makuwá mikaʼwu dí i̱ndó bi̱ nidamijná kaʼñúún mubúúnʼ, xó má eʼthí náa Biblia: “Araxtaa gagi ga̱jma̱ʼ a̱ʼgia̱ʼ bi̱ ndiyáa nákha ni̱ndxa̱ʼ dxámá” (Proverbios 5:18).

17. a) Ndíjkha dí ragíʼmaa mundxaʼwamíjna̱ xó má numbaaʼ rígi̱ ga̱jma̱a̱ numuu rí muʼbúlú gajmiúlú imba̱a̱ kaníí rá. b) Xú káʼnii gándoo gúʼyaridáá Job rá.

¹⁷ Xa̱bu̱ bi̱ ninigu̱nʼ bi̱ nubúunʼ gajmiún imba̱a̱ kaníí nanújngorámunʼ xtángoo ndrígóo Dios. Maski ajndu mbaʼin nduyáá rí májánʼ nindxu̱u̱, ikháanʼ bi̱ ni̱ndxu̱lú cristianos tséndxaʼwáá edxu̱lúʼ xó má xa̱bu̱ numbaaʼ rígi̱. Nduʼyáá rí “Dios mandi̱ʼi̱i̱n cuenta xa̱bu̱ bi̱ nuxudami̱jna̱ aʼkhá gajmiún mbáa ga̱jma̱a̱ xa̱bu̱ bi̱ ninigu̱nʼ bi̱ nubúnʼ gajmiún imba̱a̱ kaníí”, raʼkháa mbáa xa̱bu̱ (Hebreos 10:31; 12:29). Ikháanʼ bi̱ ni̱ndxu̱lú cristianos nduʼyamajkuíí ikha rí naxnúlú Jeobá (atraxnuu Romanos 12:9). Guʼyaridáá Job, bi̱ niʼthí: “Nimbánuʼ ga̱jmu̱ʼ iduʼ” (Job 31:1). Xúniʼñáanʼ idulú mayaxu̱u̱ imba̱a̱ dí asndu maʼndulú muʼbúlú gajmiúlú á mu raʼkháa ikhaa ndiʼyáa.  Xúʼko̱, nuʼni gaʼduunʼ dí maʼga̱ kaguáanʼ muʼbúlú gajmiúlú imba̱a̱ kaníí (atayáá apéndice “Ndí eʼthí Biblia numuu divorcio ga̱jma̱a̱ dí muniñami̱jna̱ xa̱bu̱ rá.”).

18. a) Xó eʼñún Jeobá bi̱ nubúnʼ gajmiún eʼwíínʼ rá. b) Xú káʼnii eʼni mbríguu rígi̱ ga̱jma̱a̱ rí mbiʼyamajkhúún xándú rá.

¹⁸ Nguáthá mitsáʼkháan eʼyoo Jeobá dí nuni xa̱bu̱ bi̱ ninigu̱nʼ bi̱ nubúnʼ gajmiún imba̱a̱ kaníí rá. Xtángoo rí nixnúu Moisés nambáyulúʼ makru̱ʼu̱lú, numuu dí ikhí naʼthí dí makhañún israelitas bi̱ ninigu̱nʼ bi̱ nibúnʼ gajmiún imba̱a̱ kaníí o ndiyamajkhún xándú (Levítico 20:2, 10). Xú káʼnii eʼni mbríguu aʼkhá rúʼko̱ rá. Numuu rí nájma̱ nanújngorámuʼ mbá dí gíʼdoo numuu: Índo̱ nduyamajkuíí xándú naʼni dí ní xágiʼdoo numuu pacto dí nini gajmiún Jeobá, ga̱jma̱a̱ á mu nubúnʼ gajmiún eʼwíínʼ nánguá gíʼdoo numuu dí nithi nákha nidamijná. Nájma̱ rígi̱ nindxu̱u̱ mbá dí ra̱májánʼ wéñuʼ (Éxodo 19:5, 6; Deuteronomio 5:9; atraxnuu Malaquías 2:14). Ikhú Jeobá naniñúnʼ mbájkhu, Dios bi̱ nindxu̱u̱ jmbii ga̱jma̱a̱ náa ma̱ndoo matanimbaaʼ (Salmo 33:4).

19. Ndiéjunʼ gambáyulú mu nditháan xúʼbúlú gajmiúlú i̱mba̱ kaníí, ga̱jma̱a̱ náa numuu rá.

¹⁹ Gajkhun má dí mixtiʼkhu nikúwi̱i̱n israelitas, bi̱ cristianos tséyóoʼ má muʼnimbulúʼ Xtángoo dí niwaxnáá Moisés. Maski ajndu xúʼko̱ ndayóoʼ dí marmáʼáan a̱jkiu̱lú xtángoo náa naʼthí mbájmbu dí ra̱májánʼ muʼbúlú gajmiúlú eʼwíínʼ. Náa numuu rá. Numuu dí mambáyulúʼ mu xúʼni̱ nditháan. Guʼgíʼ mbá xkri̱da. Lá mata̱ʼa̱ʼ ikháánʼ náa mbá guʼwá ndxájkun ga̱jma̱a̱ masmbátigaʼ náa inuu xándú mu matani tsajkhun ráʼ. Mbá ikháánʼ maratha “¡Nimbá míʼtsú!”. Á mu nuxnaʼ mba̱a̱ wéñuʼ mbújkha̱a̱ xá. Maratha “¡Maski ajndu xúʼko̱, na̱nguá!”. Bi̱ ni̱ndxu̱lú cristianos tsénigulú muʼni mbá rí tsíniguuʼ Jeobá xóo dí mbuʼyamajkuíí mbáa xándú. Ragíʼmaa mundxaʼwamíjna̱ muʼni̱i̱ mbá dí ra̱májánʼ Dios, xúʼko̱ má bi̱ ndiʼyáa, rí muʼbúlú gajmiúlú imba̱a̱ kaníí, maski ajndu xkáʼnii má  dí naʼniulú muʼni (Salmo 51:1, 4; Colosenses 3:5). Nimbá míʼtsú tsíyulú muʼni dí Satanás maxtáa gagi ga̱jma̱a̱ mbá dí xániguuʼ Jeobá ga̱jma̱a̱ dí xuʼyamajkuíí bi̱ ndiʼyáa.

20. Gajmaaʼ mbá xkri̱da mu maratha ndiéjunʼ dí niguaʼnii tikhun bi̱ nidamijná.

²⁰ Mu mba̱jo̱o̱ gamajkhu náa ikháanʼ, raʼkháa i̱ndó muniʼñáʼ runi mbá rí xáʼyamajkhuu bi̱ ndiʼyáa. Ndiéjunʼ xóó gáʼyóóʼ muʼni rá. Mu muriʼña̱a̱ graxe̱ rígi̱, bi̱ nidamijná nambánii xóo mbá guʼwá. Náa biʼyaa dí naʼnirathoo rá. Ikhaa nindxu̱u̱ tikhuu ajngáa májánʼ, mbaʼyoo dí eyóoʼ ga̱jma̱a̱ i̱ʼwáʼ rí naʼni maʼga̱ gamajkhu náa bi̱ ndiyáa. Índo̱ nakuwa mbáa kambáxu̱u̱n bi̱ nidamijná, nakuwa tsímáá ga̱jma̱a̱ gagi xóo mbá guʼwá dí nagumarathoo. Mú á mu na̱jkha̱ randáti̱ga̱a̱ rí nandala kuyamíjna̱, rí kiʼnirathoo rúʼko̱ na̱jkha̱ raguámbá rí asndu nakujmaa gíná. Ikháánʼ tsíyaaʼ marigá xúʼko̱. Ikháánʼ nandaʼ matatsimbaʼ xtángoo ndrígóo Dios rí “bi̱ nidamijná gaʼni ga̱jma̱a̱ gamajkhu” xó má eyoo Dios maguma. Xúgíʼ dí mitsaan gíʼdoo numuu maxtie̱wa̱a̱n ga̱jma̱a̱ magumaa. Ikha jngó, matani tsiakimínáʼ matani̱i̱ náa gáʼchúu. Náa Ajngá rawunʼ Dios naʼthí xú káʼnii gáguma: “Ga̱jma̱a̱ numuu dí najmañaʼ naguma mbá guʼwá ga̱jma̱a̱ dí makruaʼaʼ maʼni rí mawiji̱ xa̱ʼ. Ga̱jma̱a̱ ku̱ma̱ naʼni rí marigá dí mitsaan náa awúu̱n guʼwá ga̱jma̱a̱ marigá rí gíʼdoo wéñuʼ numuu” (Proverbios 24:3, 4). Guʼyáá xú káʼnii gúʼgíʼ muʼni ajngáa rígi̱ náa bi̱ ndiʼyáa.

21. Xú káʼnii gúni bi̱ nidamijná mu maʼga̱ rambáxu̱u̱n itháan májánʼ rá. (Ma̱ngaa atayáá rí kúgumaʼá “ Xóo gambáxuʼ itháan ga̱jmu̱ʼ bi̱ ndi̱ya̱a̱ rá.”)

²¹ Dí “mitsaan” rí naʼni marigá gagi náa mbá guʼwá nindxu̱u̱ dí maʼndún kuyamijná, xúni̱ mbá dí tsénigu̱u̱ʼ Dios ga̱jma̱a̱ maguaʼdáá mbá fe gujkhuʼ (Proverbios 15:16, 17;  1 Pedro 1:7). Á mu nuni tsiakimijna muni rígi̱ ga̱jma̱a̱ xó má ndiʼyáá makuwá itháan májánʼ bi̱ nidamijná. Mú, lá nitayáá náa Proverbios 24:4 xóo gárígá “dí mitsaan” náa mbá guʼwá ráʼ. Rí nambáyulúʼ nindxu̱u̱ “ku̱ma̱.” Ikha jngó, bi̱ nidamijná bi̱ nandún muriʼkhu̱u̱ xóo ni̱ndxu̱ún ga̱jma̱a̱ mugími̱jna̱ maʼndún kuyamijná mbu̱júu̱ gíʼmaa majmañún ku̱ma̱ rí na̱ʼkha̱ náa Biblia ga̱jma̱a̱ mugíʼ muni (Romanos 12:2; Filipenses 1:9). Rí matrigi̱i̱n mbuyáá xóo eʼthí texto rí kaʼyoo mámbá mbiʼi rí nagájnuu náa Biblia o i̱mba̱ náa naʼthí ga̱jma̱a̱ numún bi̱ nidamijná dí nagájnuu náa revista Bi̱ Nayejngoo o ¡Despertad! mambáñun mbuyáá ndiéjunʼ dí “mitsaan” ndayóoʼ muguaʼdáá mu muniratáá guʼwún. Nda̱wa̱á ma̱ndoo muniratáá “guʼwá”. Rí nandoo gáʼthúu̱n: Rí nandún kuyáá Jeobá gáxkaxi̱i̱n dí mugíʼ muni xtágabu rí ninigajmaa. Xúʼko̱ muni dí marigá mbu̱júu̱ náa guʼwún dí tsímáá ga̱jma̱a̱ gagi xó má nákha ginii.

22. Ndiéjunʼ dí májánʼ gaguaʼdáálú á mu nuʼni tsiakimijna muʼnimbánii rí kaʼyulúʼ muʼni mu mambaxúlúʼ májánʼ gajmiúlú bi̱ ndiʼyáa rá.

²² Gajkhun má dí mbajyúuʼ matani̱i̱ mitsaan mbu̱júu̱. Mú cristianos bi̱ nuni tsiakimijna munimbánii rí kaʼñúún muni, makhánun mbá rí májánʼ: Kuwa tsímáá numuu rí nduyáá rí kuwa runimbu̱ún kiʼtáñajunʼ ndrígóo Biblia náa naʼthí dí nájmi̱i̱n gíʼmaa mugi̱ʼdi̱i̱ mbuyamajkumijná (Romanos 12:10; Salmo 147:11). Ga̱jma̱a̱ dí nuni tsiakimijna mbuyamajkuíí bi̱ ndi̱ya̱a̱ maʼni rí Dios maʼndoo kaʼñúún.