1, 2. Náa guaʼyaa dí gúraʼwíí muʼni índo̱ nandulúʼ makuwáanʼ gagi rá.

ATATSAʼWÁMINAʼ rí inu miʼtsu mbá xndú taun dí ra̱ʼkhá tháán miʼtsí, mu natayáá dí ni̱ʼga̱ mbá níʼkhóo. Ndiéjunʼ gátani rá. Rígá ajtsú dí ma̱ndoo matani: Miʼtsu mbá xúgíʼ maski ajndu ni̱ʼga̱ mbá níʼkhóo, matada̱ʼ xúgíʼ náa náska o matrujturígú náa ni̱ʼga̱ mu miʼtsu dí májánʼ. Ndiéjunʼ gátraʼwíí matani rá.

² Dí nuʼni gagimijná dí rígá náa numbaaʼ rígi̱ nambánii ga̱jma̱a̱ xndú taun dí guámbulúʼ niʼthá. Índo̱ nuniʼnúuʼ xú káʼnii nindxu̱u̱, na̱jkua̱nú nduʼyáá dí xúgíʼ dí nuni nánguá péñu xó má mbá manzana rí ni̱ʼga̱. Ndiéjunʼ gúʼni rá. Tikhun “naʼphu̱” má xúgíʼ, na̱nguá eyáá á mu rí májánʼ o ra̱májánʼ. Eʼwíínʼ nunigaʼduunʼ mbá kayuʼ numuu rí tsíñún mugíʼnii nimbá dí ra̱májánʼ. Mú, kuwa bi̱ nuñewamíjna̱ mu xúni̱ o xúyáá mbá rí xámbáñun, mú nguáná nuni gagimijná májánʼ. Ikha jngó, ndiéjunʼ gúraʼwíí muʼni ikháanʼ mu maʼndoo kaʼyulúʼ má xúʼko̱ Dios rá.

3. Ndiéjunʼ gúʼyáá xúgi̱ rá.

³ Mbaʼánʼ dí ikháanʼ nuʼni dí ragajtsú: Nduʼyáá dí ndayóoʼ muʼni gagimijná, mú i̱ndó dí xáʼga̱ kaguáanʼ mu̱ʼni̱ dí ra̱májánʼ. Ikha jngó, ndayóoʼ majmañulúʼ mbuʼyáá náa guaʼyaa dí májánʼ ga̱jma̱a̱ dí ra̱májánʼ. Mú nákha xóó tséʼyáá xú gándoo gúraʼwíí dí muʼni gagimijná, ginii gíʼmaa mbuʼyáá xú káʼnii gámbáyúu o gáʼnii gachúu rí muʼni ñajunʼ Jeobá.

4. Xú káʼnii gíʼmaa mambáyulúʼ dí nixnaximi̱jna̱ náa Dios índo̱ gúraʼwíí dí muʼni gagimijná rá.

⁴ Tséʼni má mba̱yu̱ʼ tsiguʼ rí mbáa Testigo bi̱ nijngún iyááʼ nákha 1946 niʼthí: “Naniguʼ maxtáá ga̱jma̱a̱ maʼgíʼ májánʼ edxu̱ʼ mámbá discurso rí nanújngoo dí najuixnún bi̱ najngún iyááʼ, na̱ni̱ asndu xóo rí ikhúúnʼ gájngunʼ iyááʼ”. Nda̱wa̱á niʼthí ndíjkha rí naʼni xúʼko̱: “Rí marmáʼáan a̱jkiu̱nʼ dí nixnaxíminaʼ náa Jeobá nambáyuʼ magújun jmbu”. Ikháanʼ mangáanʼ nundxaʼwamíjná xó má ikhaa: Mu muguajún má xúʼko̱ jmbu ndayóoʼ marmáʼáan a̱jkiu̱lú rí gíʼmaa muʼnimbánii rí nixuʼdamíjná náa Jeobá. Ndiéjunʼ niʼtháán muʼni xá. Rí muxnaximíjná káxi̱ mu muʼni ñajunʼ (atraxnuu Eclesiastés 5:4). Dí niʼthá muʼni nákha ikhú gambáyulú muʼni ñajunʼ rí kaʼyoo mbáa cristiano. Mú ma̱ngaa gíʼmaa mambáyulúʼ náa eʼwáʼ dí gúʼni, xó má dí muʼni gagimijná. Ikhaa rúʼko̱ nindoo gáʼthi apóstol Pablo índo̱ nikunguanʼ i̱yi̱i̱ʼ náa inún cristianos bi̱ nikuwa nákha ikhú: “Tséʼniuu á mu kuwáanʼ ruphiʼtsu, o nawa̱a̱nla, o rígá i̱mba̱ rí kuwáanʼ runi, guni xúgíʼ rígi̱ mu maʼga̱ gamajkhu náa Dios” (1 Corintios 10:31).

5. Náa Levítico 22:18-20 naʼthí mbá dí ragíʼmaa marigá, ikha jngó, ndiéjunʼ dí ragíʼmaa muʼni xó má eʼthí náa Romanos 12:1 rá.

⁵ Xó má eʼyáá, xúgíʼ dí nuʼni tsejtsí  mbiʼi nambánii ga̱jma̱a̱ ñajunʼ rí nuʼni náa Jeobá. Pablo nisngájmun cristianos bi̱ kuwa náa Roma rí gíʼdoo wéñuʼ numuu rígi̱, índo̱ niʼthí: “Muxnaxí xuyala xóo tsigijñaʼ rí ndaʼya, kaʼwu, rí maniguuʼ Dios, mbóó ñajunʼ rí mitsúʼkháan ga̱jma̱a̱ rí mundxa̱ʼwa̱a̱ májánʼ edxa̱la” (Romanos 12:1). Índo̱ Pablo niʼthí xuyala nindoo gáʼthi ga̱jma̱a̱ numuu xúgíʼ rí endxaʼwamíjna̱, a̱jkiu̱lú ga̱jma̱a̱ tsiakii dí kuaʼdáá (Marcos 12:30). Xú káʼnii exnaxí xóo tsigijñaʼ xuyulúʼ rá. Índo̱ nuʼni ñajuunʼ Dios ga̱jma̱a̱ xúgíʼ a̱jkiu̱lú ga̱jma̱a̱ mbá kañiʼ xóo xa̱bu̱ ni̱ndxu̱lú. Ajngáa “tsigijñaʼ” rígá rí eyoo gáʼthulúʼ asndu mangáanʼ. Ndíjkha rá. Numuu rí náa xtángoo dí nijuixnáá Moisés niʼthí dí ragíʼmaa mixnáxi̱i̱ xóo tsigijñaʼ mbáa xujkhúʼ bi̱ na̱nguá májáánʼ; Dios tsegruigú tsigijñaʼ rúʼko̱ (Levítico 22:18-20). Xúʼko̱ má ma̱ngaa, á mu mbáa cristiano tséʼni májánʼ ñajuunʼ Jeobá, ikhaa xagruigú. Mú, ndiéjunʼ gáʼni dí ikhaa xagruigú tsigijñaʼ dí nuxnáá xá.

6, 7. Xú káʼnii gándoo gáʼni gachúu xúgíʼ xuyuʼ mbáa cristiano, ga̱jma̱a̱ ndiéjunʼ dí gágíʼnuu xá.

⁶ Pablo niʼthún cristianos bi̱ nikuwa náa Roma: “Xúxnaxí xuyala náa aʼkhá”. Xúʼko̱ má ma̱ngaa niʼthún dí xúni̱ xó má eguaʼa xuñúnʼ (Romanos 6:12-14; 8:13). Nákha wapháá, niʼthí ga̱jma̱a̱ numuu xuyulúʼ ga̱jma̱a̱ xú káʼnii ejmaa mu maʼni dí ra̱májánʼ. Niʼthí ga̱jma̱a̱ numún xa̱bu̱ aʼkhá índo̱ niʼthí: “Ga̱jma̱a̱ rawúnʼ gajthíí dí ra̱májánʼ”. “Kuwa xawii má xúʼko̱ mu muradíin eʼwíínʼ.” “Tsímiñun kuyáá Dios.” (Romanos 3:13-18.) Ndiéjunʼ gárígá á mu mbáa cristiano najmuu xuyuʼ mu maʼni aʼkhá xóo rúʼko̱ rá. Maxtáa raʼni gachúu xúgíʼ xuyuʼ. Mbá xkri̱da, á mu xtáa má raʼyoo xtiʼkhuu dí mitsaga, xóo náa nubúunʼ xa̱bu̱ o nagájnún tsaʼtsin ga̱jma̱a̱ ma̱ngaa náa tsígawiinʼ a̱jkiu̱ún kuyamijná índo̱ nuxmijná, ikhú maxtáa raxnáxi iduu náa aʼkhá ga̱jma̱a̱ xúʼko̱ eʼni gachúu xúgíʼ xuyuʼ. Ní xándoo gaxnáxi xóo tsigijñaʼ májánʼ náa Dios, numuu rí nánguá exnúu mbá gamajkhu kaʼwu  (Deuteronomio 15:21; 1 Pedro 1:14-16; 2 Pedro 3:11). Numuu dí niraʼwíí maʼni gagiminaʼ ga̱jma̱a̱ dí ra̱májánʼ, ikhaa má gámínuʼ wéñuʼ nda̱wa̱á.

⁷ Nandoo nduʼyáá rí á mu tséjmañulú gúraʼwíí májánʼ dí muʼni gagimijná asndu gamíi maʼga̱ kaguáanʼ mugíʼnii dí ra̱májánʼ. Xúgíʼ rí gúraʼwíí muʼni tsíyulú dí maʼni gachúu tsigijñaʼ dí nuxná Dios, nandulúʼ dí magiʼdoo itháan numuu. Dí xúgi̱ gúʼyáá á mu májánʼ o ra̱májánʼ dí gúraʼwíí muʼni.

8, 9. a) Xú káʼnii a̱jma̱ enii rí muʼni gagimijná rígá rá. b) Xú káʼnii rí nuni gagimijná eʼni gaʼduunʼ, ga̱jma̱a̱ ndíjkha rá.

⁸ Mbáa cristiano ndaʼyoo dí rígá a̱jma̱ enii rí maʼni gagiminaʼ: Tikhuu dí mbájkhu ragíʼmaa maʼni, ga̱jma̱a̱ tikhuu rí ma̱ndoo maʼni á mu naniñuʼ conciencia ndrígóo. Gugíʼdi̱i̱ ga̱jma̱a̱ timbá: Dí ragíʼmaa maʼni mbáa xa̱bi̱i̱ Dios.

⁹ Xó má ndiʼyáá náa timbá capítulo ndrígóo libro rígi̱, tikhuu dí matani gagiminaʼ ra̱májánʼ nindxu̱u̱ xó má e̱ʼkha̱ raʼthí náa Biblia. Náa mbaʼa programa ndrígóo televisión, ináa ndrígóo Internet, películas ga̱jma̱a̱ ajmúú na̱ʼkha̱ raʼthí ga̱jma̱a̱ numuu espiritismo, pornografía, náa nuxmijná xkawiʼ wéñuʼ o nuxkaxi̱i̱n muni dí ra̱májánʼ. Mbaʼin xa̱bu̱ nuni gagimijná xúʼko̱. Náa Biblia naʼthí dí mbájkhu má raʼkhí rígi̱ ga̱jma̱a̱ bi̱ cristianos ragíʼmaa muni nditháan kayuʼ (Hechos 15:28, 29; 1 Corintios 6:9, 10; Revelación 21:8). Xúʼko̱ gúsngajmáá Jeobá dí gíʼdoo wéñuʼ numuu nájma̱ rí kiʼtáñajunʼ rígi̱: “Gaguiyala ku̱ya̱a̱ dí ra̱májánʼ” ga̱jma̱a̱ “Atanitsinguminaʼ náa dí ra̱májánʼ”. Á mu nuʼni xúʼko̱ musngajma mbá “fe rí na̱nguá gíʼdoo a̱jma̱ inuu” (Romanos 12:9; Salmo 34:14; 1 Timoteo 1:5).

10. Ndiéjunʼ ethi tikhun, ga̱jma̱a̱ ndíjkha dí migamíi rí xúʼko̱ endxa̱ʼwa̱a̱ edxu̱ún xá.

 ¹⁰ Kúwi̱i̱n bi̱ nuthi dí xáʼniuu má ma̱ta̱ya̱a̱ dí náa Biblia naʼthí dí ra̱májánʼ. Mbáa nuthi: “I̱mba̱ núthu nindxu̱u̱ dí ma̱ta̱ya̱a̱ náa pantalla, raʼkháa ikhaa xóo dí matani”. Mú bi̱ nundxaʼwamíjná xúʼko̱ nuninduwamijná ga̱jma̱a̱ gamíi muni dí ra̱májánʼ (atraxnuu Jeremías 17:9). Á mu nduʼyáá mbá rí tsénigu̱u̱ʼ Jeobá, lá gajkhun ma̱ndoo muʼthá rí ‹naguiyulú kuʼyáá dí ra̱májánʼ ráʼ.› Ma̱ngaa índo̱ nduʼyáá má xúʼko̱ dí ra̱májánʼ nachúu conciencia ndrígúlú, ikhú gamíi muxuʼdámíjná aʼkhá o mbuʼyáá dí na̱nguá má xkawiʼ wéñuʼ dí kuwa runi eʼwíínʼ (Salmo 119:70; 1 Timoteo 4:1, 2).

11. Xú káʼnii gándoo gájmulúʼ ajngáa dí na̱ʼkha̱ náa Gálatas 6:7 índo̱ gúraʼwíí muʼni gagimijná rá.

¹¹ Rúʼko̱ nugíʼnii tikhun cristianos. Numuu rí naguʼún mbuyáá dí ra̱májánʼ, asndu naguánu nuni. Xúʼko̱ nijmañún “rí xtáa raʼdu mbáa xa̱bu̱; rúʼko̱ má gáguxi̱i̱” (Gálatas 6:7). Mú ikháanʼ ragíʼmaa majngutíguáanʼ náa tsáʼkhá xó má ikhiin. Á mu nuʼni tsiakimijna mundxaʼwáá edxu̱lúʼ dí májánʼ, maʼni dí makhánulúʼ dí májánʼ (atayáá náa kúgumaʼá náa naʼthí “ Xú káʼnii garaʼwíí mani gagiminaʼ rá.”).

12. Xú gándoo gambáyulú Gálatas 6:5 índo̱ gúraʼwíí dí muʼni gagimijná, ma̱ngaa náa gúxkamaa dí mambáyulúʼ muraʼwíí dí muʼni rá.

¹² Dí xúgi̱ guʼtá raga̱jma̱ enii dí muʼni gagimijná: Rí tséʼthi náa Ajngá rawunʼ Dios á mu májánʼ o ra̱májánʼ nindxu̱u̱. Mámbáa kaʼyoo mbaʼyoo á mu rí mambáyúu o na̱nguá (atraxnuu Gálatas 6:5). Mú raʼkháa i̱ndó xóo endxaʼwamíjna̱ ikháanʼ. Kuaʼdáá mbá dí mambáyulúʼ mbuʼyáá rígi̱. Kuaʼdáá ikha o kiʼsngáa dí itháan gíʼdoo numuu dí na̱ʼkha̱ náa Biblia. Ikha rígi̱ nasngájmulúʼ dí  endxa̱ʼwáminaʼ Jeobá. Ikha jngó, á mu nduʼyáá májánʼ, muʼgua̱nú mbuʼyáá “ndiéjunʼ eyoo Jeobá” náa xúgíʼ rí gúʼnilú, asndu dí muʼni gagimijná (Efesios 5:17).

13. Ndiéjunʼ gáxkaxáanʼ mu xúʼni̱ gagimijná ga̱jma̱a̱ dí tsénigu̱u̱ʼ Jeobá rá.

¹³ Mañúú ejkha̱ rajmañún cristianos rí xú káʼnii guraʼwíí rí muni (Filipenses 1:9). Ga̱jma̱a̱ mámbáa eʼyoo xú káʼnii garaʼwíí dí maʼni gagiminaʼ. Ikha jngó, xáguaʼthi̱i̱n dí ikháá má gúraʼwíí muni xúgínʼ. Mú tséʼniuu má ndiéjunʼ  eniguuʼ mámbáa, xúgiáanʼ gíʼmaa mundxaʼwamíjna̱ náa ikha rí na̱ʼkha̱ náa Dios ga̱jma̱a̱ guniʼñáanʼ dí mariʼkhuu rí endxaʼwamíjna̱lú ga̱jma̱a̱ dí gíwanʼ náa a̱jkiu̱lú. Xúʼko̱ gáʼni dí xúraʼwíí muʼni gagimijná ga̱jma̱a̱ xúgíʼ dí tsénigu̱u̱ʼ Jeobá (Salmo 119:11, 129; 1 Pedro 2:16).

14. a) Ndiéjunʼ imbo̱o̱ gíʼmaa mbuʼyáá índo̱ guraʼwíí muʼni gagimijná rá. b) Ndiéjunʼ gambáyulú mu muʼgíʼ muʼni ginii ñajuunʼ Dios rá.

¹⁴ Májánʼ gáʼni á mu nundxa̱ʼwa̱míjna̱ xú káʼnii eraʼwíí dí muʼni gagimijná, xúʼko̱ gándoo gúʼyáá á mu májánʼ o ra̱májánʼ dí muʼni. Mú rígá imbo̱o̱ rí gíʼmaa mbuʼyáá: Mbiʼi rí najmulú mu muʼni gagimijná. Náa numuu rá. Numuu rí xúʼko̱ gúʼyáá á mu itháan gíʼdoo numuu náa ikháanʼlu. Náa mbáa cristiano itháan gíʼdoo numuu rí maʼni ñajuunʼ Dios (atraxnuu Mateo 6:33). Ndiéjunʼ gambáyulú mu muʼgíʼ muʼni ginii ikhaa rá. Gúʼgíʼ guʼni xó má xtágabu rí nixná apóstol Pablo: “Tsumáá gúya̱a̱ xú káʼnii majngruigala xaʼni xóo xa̱bu̱ bi̱ tséyáá, gíʼmaa muni xóo xa̱bu̱ bi̱ nduyáá wéñuʼ, gutsila xúgíʼ mbiʼi dí naguánúu” (Efesios 5:15, 16). Ikha jngó, á mu nuríyaʼ awan rí xú káʼnii majmulúʼ mbiʼi rí muʼni gagimijná, maguaʼdáá mba̱yu̱ʼ mbiʼi mu muʼni “rí itháan gíʼdoo numuu”, ñajunʼ rí naʼni makuwáanʼ májánʼ náa inuu Dios (Filipenses 1:10).

15. Náa numuu rí májánʼ nindxu̱u̱ rí mbuʼyáá asndu náa jmbriga̱a̱ gátumulúʼ dí muʼni gagimijná rá.

¹⁵ Índo̱ guraʼwíí muʼni gagimijná, májánʼ gáʼni dí mbuʼyáá asndu náa jmbriga̱a̱ gátumulúʼ. Ndiéjunʼ eyoo gáʼthi rígi̱ rá. Gatangaánʼ náa xkri̱da ndrígóo manzana dí niʼthá náa timbá kutriga̱. Mu xúʼphu̱ nditháan rí ni̱ʼga̱, raʼkháa i̱ndó nurígúu dí ni̱ʼga̱, ma̱ngaa nurígu mbá chímba̱a̱ náa dí májánʼ. Xó má dí nuʼni gagimijná, cristianos tseni nditháan dí nanújngorámuʼ ikha rí na̱ʼkha̱ náa Biblia; mú ma̱ngaa májánʼ gaʼni rí muʼni gaʼduunʼ asndu ndiéjunʼ má dí na̱nguá eʼyáá xóo phú nindxu̱u̱ o  nduʼyáá rí xámbáyulúʼ mambaxúlúʼ májánʼ gajmiúlú Dios (Proverbios 4:25-27). Mbá rí mambáyulúʼ mbuʼyáá asndu náa gátumulúʼ nindxu̱u̱ rí muʼni xó má eʼthí xtágabu ndrígóo Biblia.

16. a) Xú káʼnii esngajmá dí nuʼni xó má eyoo Jeobá rá. b) Ndiéjunʼ dí gíʼmaa muʼni mámbá mbiʼi rá.

¹⁶ Índo̱ guraʼwíí mbá rí muʼni gagimijná, bi̱ ni̱ndxu̱lú cristianos ginii nduʼyáá xóo endxa̱ʼwáminaʼ Jeobá. Nduʼyáaʼ náa Biblia mu mbuʼyáá ikha ndrígóo Jeobá ga̱jma̱a̱ xóo eʼyoo. Mbá xkri̱da, ma̱ndoo mbuʼyáá mbá lista ndrígóo rey Salomón rí Jeobá nawiyuʼ kaʼyoo, xó má “bi̱ naʼni nduwaʼ”, “bi̱ nuradíin bi̱ nda̱a̱ rí eni”, “bi̱ nagájnuu náa a̱jkiu̱ún muni dí ra̱májánʼ” ga̱jma̱a̱ “bi̱ nagáñun muni dí tséjmaa” (Proverbios 6:16-19). Índo̱ nduʼyáá rí endxa̱ʼwáminaʼ Dios, xú káʼnii gíʼmaa muʼni rá. Salmista nariʼña̱a̱: “Bi̱ nandala ku̱ya̱a̱ Jeobá, gaguiyala ku̱ya̱a̱ dí raʼkhí” (Salmo 97:10). Ikha jngó, dí guraʼwíí muʼni gagimijná gíʼmaa masngájma kaʼwu rí naguiyulúʼ kuʼyáá xúgíʼ rí Jeobá eguiyuʼ kaʼyoo (Gálatas 5:19-21). Rígi̱ gíʼmaa maʼni pa̱jnu̱ ga̱jma̱a̱ índo̱ kuwáanʼ ndajkuáanʼ, ikhú dí phú nasngájma kaʼwu xú káʼnii xa̱bu̱ ni̱ndxu̱lú (Salmo 11:4; 16:8). Lá nandulúʼ makuwáanʼ ga̱jma̱a̱ xúgíʼ a̱jkiu̱lú xó má endxa̱ʼwáminaʼ Jeobá ráʼ. Á mu xúʼko̱, mbuʼyááʼ má xúʼko̱ ikha ndrígóo Biblia asndu ndiéjunʼ má dí guraʼwíí muʼni. Ikhaa rúʼko̱ dí gúʼni mámbá mbiʼi (2 Corintios 3:18).

17. Ndiéjunʼ gíʼmaa muraximíjna̱ nákha xóó tsíraʼwíí mbá rí muʼni gagimijná rá.

 ¹⁷ Ndiéjunʼ imbo̱o̱ gíʼmaa muʼni mu mbuʼyáá á mu naniguuʼ Jeobá dí guraʼwíí muʼni gagimijná rá. Guʼni graxe̱ rígi̱: “Lá maʼniuʼ mani dí májánʼ o dí ra̱májánʼ ga̱jma̱a̱ dí mambaxúʼ ga̱jmu̱ʼ Dios ráʼ.” Mbá xkri̱da, nákha xóó tséʼyáá mbá película gíʼmaa mundxaʼwamíjna̱: “Lá maʼniuu dí raʼkhí conciencia ndrígóʼ ráʼ.” Guʼyáá mbaʼa ikha dí na̱ʼkha̱ náa Biblia dí naʼthí ga̱jma̱a̱ numuu rígi̱.

18, 19. a) Xú káʼnii embáyulú ikha rí na̱ʼkha̱ náa Filipenses 4:8 índo̱ guraʼwíí muʼni gagimijná májánʼ ráʼ. b) Náa guaʼyaa i̱ʼwáʼ ikha gándoo gambáyulú rá. (Atayáá nota.)

¹⁸ Mbá ikha dí ra̱ʼkhá tháán gíʼdoo numuu na̱ʼkha̱ náa Filipenses 4:8: “Xúgíʼ dí nindxu̱u̱ gajkhun, xúgíʼ dí gíʼdoo wéñuʼ numuu, asndu nguáthá má dí jmbu, asndu nguáthá má dí kaʼwu, asndu nguáthá má dí májánʼ wéñuʼ, asndu xú káʼnii má dí guʼni, ga̱jma̱a̱ asndu xúgíʼ rí naʼniaʼ matani rí májánʼ ga̱jma̱a̱ asndu káʼnii má dí kaʼyoo maʼga̱ gamajkhu, guni má xúʼko̱ xúgíʼ rígi̱”. Gajkhun má dí índo̱ Pablo niʼthí ajngáa rígi̱ na̱nguá xtáa raʼthí ga̱jma̱a̱ numuu rí muʼni gagimijná, ikhaa niʼthí rí ndayóoʼ mundxaʼwamíjna̱ ndiéjunʼ rí eniguuʼ Dios (Salmo 19:14). Mú, ajngáa rígi̱ ma̱ndoo má maʼni ma̱ngaa náa dí muʼni gagimijná. Xú káʼnii rá.

¹⁹ Gundxaʼwamíjna̱ índo̱ guraʼwíí rí muʼni gagimijná, xó má películas, videojuegos, ajmúú o i̱ʼwáʼ, ga̱jma̱a̱ guraximíjna̱: “Lá naguanúu náa edxu̱ʼ mbawíí dí májánʼ ráʼ.” Mbá xkri̱da, nda̱wa̱á rí ndi̱yo̱o̱ mbá película, guʼyáá ndiéjunʼ niguanúu náa edxu̱lúʼ. Á mu dí májánʼ nindxu̱u̱, mikaʼwu ga̱jma̱a̱ naxnúlú tsiakii, rúʼko̱ eyoo gáʼthi dí niraʼwíí mbá rí májánʼ mbuʼyáá o muʼdxawíín. Mú á mu película rí ndiʼyáá naʼni mundxaʼwamíjna̱ dí raʼkhí, rúʼko̱ eyoo gáʼthi rí túraʼwíí dí májánʼ mbuʼyáá (Mateo 12:33; Marcos 7:20-23). Xú káʼnii eʼni gacháanʼ rí  mundxaʼwamíjna̱ dí ra̱májánʼ rá. Naʼni rí ní xákuwáanʼ tsímáá, naʼni rí ní xákumu̱u̱ conciencia ndrígúlú ga̱jma̱a̱ asndu ma̱ndoo maʼni gachúu rí mambaxúlúʼ májánʼ gajmiúlú Dios (Efesios 5:5; 1 Timoteo 1:5, 19). Numuu dí naʼni gacháanʼ á mu nuraʼwíí mbá dí tséjmaa rí muʼni gagimijná, gíʼmaa rí muʼni gaʼduunʼ mbá kayuʼ (Romanos 12:2). * Nandulúʼ manindxu̱lúʼ xóo salmista bi̱ nindo̱ʼo̱o̱ Jeobá: “Atani rí iduʼ maxáʼyoo nimbáa dí ra̱májánʼ; atani maxtáá má xúʼko̱ náa kamba̱a̱ʼ” (Salmo 119:37).

20, 21. Xú káʼnii gambáyulú 1 Corintios 10:23, 24 índo̱ guraʼwíí dí muʼni gagimijná rá.

²⁰ Pablo niʼthí ga̱jma̱a̱ imbo̱o̱ numuu ikha rí na̱ʼkha̱ náa Biblia rí gíʼmaa mbuʼyáá índo̱ guraʼwíí muʼni: “Xúgíʼ ma̱ndoo matani; mú raxúgíʼ nindxu̱u̱ májánʼ. Xúgíʼ ma̱ndoo matani; mu raxúgíʼ gambáyaʼ. Gíʼmaa rí mundxaʼwamíjna̱ ga̱jma̱a̱ numún eʼwíínʼ, raʼkháa i̱ndó ga̱jma̱a̱ numulúʼ ikháanʼ” (1 Corintios 10:23, 24). Ndiéjunʼ gambáyulú mu muʼgíʼ muʼni ikha rígi̱ índo̱ nduʼyááʼ muʼni gagimijná májánʼ rá. Guʼni graxe̱ rígi̱: “Xú káʼnii gúyáá eʼwíínʼ dí gáraʼwíí mani rá.”

²¹ Mbáa conciencia ndrígúlú maʼthí rí ma̱ndoo muʼni tikhuu dí muʼni gagimijná. Mú, á mu nduʼyáá dí eʼwíínʼ cristianos tséniñúnʼ conciencia ndrígu̱ún muni dí ikháanʼ nandoo nuʼni, mbáa mbuʼyáá i̱ʼwáʼ dí xáʼni gawúunʼ conciencia ndrígu̱ún. Náa numuu rá. Numuu rí tsíyulú majngrádiinʼ náa ñajunʼ dí nuni ga̱jma̱a̱ numuu Dios. Rúʼko̱ maʼni dí maguaʼdáá aʼkhúlúʼ ‹náa a̱ngiu̱lú›, xó má niʼthí Pablo, makiéʼkulú náa “Cristo”. Gíʼmaa  muʼnimbulúʼ ajngáa rígi̱: “Xúni̱ dí eʼwíínʼ majngrádiinʼ” (1 Corintios 8:12; 10:32). Bi̱ phú ni̱ndxu̱ún cristianos na̱nguá eni gagimijná ga̱jma̱a̱ mbóo dí tséyáá májánʼ eʼwíínʼ a̱ngiu̱lú. Xúʼko̱ kuwáanʼ ruʼnimbánii xtágabu dí ra̱ʼkhá tháán májánʼ dí nixná Pablo (Romanos 14:1; 15:1).

22. Náa numuu rí gíʼmaa mbuʼyamajkuíí dí gúraʼwíí muni eʼwíínʼ rá.

²² Mú ma̱ngaa gíʼmaa mbuʼyamajkuíí dí naniñuuʼ maʼni conciencia ndrígóo imba̱a̱ xa̱bu̱, á mu dí ikháanʼ tséniñulú muʼni conciencia ndrígúlú. Á mu xúʼko̱ erígá, ragíʼmaa muʼni dí eʼwíínʼ mundxaʼwamíjna̱ muni gagimijná xó má ikháanʼ. Nindxu̱u̱ asndu xóo dí maʼndulú dí xúgíʼ carro maʼga̱ mbrígúu xó má dí na̱jkua̱ kuʼyúlú ikháanʼ. Ikha jngó, xí mu dí eʼwíínʼ a̱ngiu̱lú mixtiʼkhu xóo eraʼwíí mu muni gagimijná, raʼkháa xóo enigulúʼ ikháanʼ, á mu náa Biblia tséʼthi dí ra̱májánʼ nindxu̱u̱, ndiéjunʼ gúʼni rá. Numuu rí nandulúʼ kuʼñúún, mbuʼyamajkuíí dí gúraʼwíí muni. Xúʼko̱, ‹mbuyáá xúgínʼ xa̱bu̱ rí ikháanʼ nundxa̱ʼwáá májánʼ edxu̱lúʼ› (Filipenses 4:5; Eclesiastés 7:16).

23. Ndiéjunʼ gíʼmaa muʼni mu muraʼwíí májánʼ dí muʼni gagimijná rá.

²³ Mu marmáʼáan a̱jkiu̱lú, ndiéjunʼ gíʼmaa muʼni mu muraʼwíí májánʼ dí muʼni gagimijná rá. Ginii guʼyáá á mu gíʼdoo dí ra̱májánʼ rí naʼthí náa Biblia dí ragíʼmaa muʼni; á mu rígá, gíʼmaa rí muʼni gaʼduunʼ. Índo̱ gúraʼní xkujndu dí tséʼkha̱ náa Ajngá rawunʼ Dios, mbuʼyááʼ tikhuu ikha dí na̱ʼkha̱ náa Biblia dí ma̱ndoo majmulúʼ náa mámbá xkujndu. Ma̱ngaa, muʼni gaʼduunʼ xúgíʼ dí maʼni gachúu conciencia ndrígúlú ga̱jma̱a̱ xúʼni̱ dí maʼni gawúunʼ conciencia ndrígu̱ún eʼwíínʼ mú itháan náa a̱ngiu̱lú. Á mu nuʼni tsiakimijna muraʼwíí májánʼ dí muʼni gagimijná, maʼni dí muxnáá gamajkhu Dios ga̱jma̱a̱ ikhaa ma̱ndoo kaʼyulúʼ má xúʼko̱ mámbáa dí ikháanʼ ga̱jma̱a̱ bi̱ kuwa náa guʼwúlú.