1-3. a) Ndiéjunʼ nindxu̱u̱ regalo dí nixnúlú Jeobá, ga̱jma̱a̱ xú gándoo majmulúʼ ra̱májánʼ rá. b) Á mu nandulúʼ rí Dios ma̱ndoo kaʼyulúʼ, xú káʼnii gíʼmaa majmulúʼ dí muʼtá rá.

GUʼGÍʼ mbá xkri̱da á mu nuxnáá carro mbáa bi̱ kuʼyáá mu ikhaa tséjmuu májánʼ, na̱jkha̱ kaʼyoo xkawiʼ wéñuʼ ga̱jma̱a̱ naʼni kámbiñun eʼwíínʼ xa̱bu̱. Xóo gákumulú rá. Mbáa makuwaanʼ gíná.

² Náa Jeobá e̱ʼkha̱ “xúgíʼ regalo májánʼ ga̱jma̱a̱ xúgíʼ rí jmbu” (Santiago 1:17). Mbá xkri̱da, ikhaa nixnúlú mbá dí naʼni mixtiʼkuáanʼ náa xujkhúʼ ga̱jma̱a̱ nayambáá mu muʼthá ndiéjunʼ endxaʼwamíjna̱ ga̱jma̱a̱ ndiéjunʼ eku̱mu̱lú: Ikhaa nindxu̱u̱ dí nuʼthá. Mú regalo rígi̱ xó má xkri̱da dí niʼgíʼ ga̱jma̱a̱ numuu carro, ma̱ndoo majmulúʼ raʼkhí. Mbaʼin xa̱bu̱ tséjmún májánʼ ga̱jma̱a̱ nuniu̱u̱n dí raʼkhí eʼwíínʼ. Lá nakru̱ʼu̱lú dí Jeobá xtáa gíná ga̱jma̱a̱ numuu rúʼko̱ ráʼ.

³ Á mu nandulúʼ rí Dios maʼndoo kaʼyulúʼ, gíʼmaa majmulúʼ májánʼ regalo dí nixnúlú o muʼnimbánii ikha dí na̱ʼkha̱ náa Biblia: “Xagájnuu náa rawanla nimbá ajngáa rí tséjmaa, xúgíʼ rí gútha ganindxu̱u̱ májánʼ dí mayambáá [náa xa̱bu̱ numbaaʼ gajmiála] índo̱ ndayóoʼ, mu maʼniún dí májánʼ bi̱ gudxawíín” (Efesios 4:29). Ikha jngó, mbuʼyáá xúgi̱ náa guaʼyaa ajngáa dí ragíʼmaa muʼthá ga̱jma̱a̱ xú  gándoo gúʼthá mu eʼwíínʼ maʼni̱i̱ a̱jkiu̱ún. Mú ginii guʼyáá ndíjkha jngó gíʼdoo wéñuʼ numuu muñewa̱a̱n rajunlú.

4, 5. Ndiéjunʼ eʼthí náa proverbios ndrígóo Biblia ga̱jma̱a̱ numuu tsiakii dí gíʼdoo ajngáa rá.

⁴ Timbá numuu dí gíʼmaa muñewa̱a̱n dí muʼthá nindxu̱u̱ rí gíʼdoo wéñuʼ tsiakii ajngáa. Ikhaa numuu tsiakii rígi̱ eʼthí náa Proverbios 15:4: “Índo̱ rajunlú naʼthí ajngáa gua̱ba̱ʼ nindxu̱u̱ xóo ixi̱ dí naxná vida, mú á mu najmulú mu muʼthá dí ra̱májánʼ naʼni makágua̱ba̱ʼ mbáa xa̱bu̱”. Ajngá rí májánʼ naʼni marigá dí tsímáá rí nindxu̱u̱ asndu xóó xuájyaʼ ga̱jma̱a̱ naʼni dí maʼni̱i̱ a̱jkia̱nʼ asndu xóo mbá bálsamo. Mú, ajngáa dí ra̱májánʼ dí nagájnuu rawuunʼ mbáa, asndu tsáa maʼni gawúunʼ. Xó má ndiʼyáá, ajngáa ma̱ndoo maʼni gawúunʼ mbáa o maʼni̱i̱ a̱jkiu̱u̱n (Proverbios 18:21).

⁵ Tsiakii dí gíʼdoo ajngáa ma̱ngaa najuiʼthá náa Proverbios 12:18. Ikhí naʼthí rí “bi̱ tsindxaʼwóo edxu̱u̱ rí maʼthí” nindxu̱u̱ xóo índo̱ “narujtáanʼ [ga̱jma̱a̱] chídí rí a̱jma̱ inuu”. Índo̱ tsíndxaʼwáá edxu̱lúʼ dí muʼthá, naʼni gawúunʼ mbáa ga̱jma̱a̱ naʼni gachúu dí nambáxulúʼ gajmiúlú. Ajngáa naʼni gawúnlú itháan ki xóo mbá chídí rí a̱jma̱  inuu dí nanújngoo ngayuu náa a̱jkiu̱lú. Mú náa proverbio xóó naʼthí, dí ma̱ndoo marigá dí májánʼ: “Mú, rí nuthi xa̱bu̱ bi̱ nundxa̱ʼwa̱a̱ májánʼ edxu̱ún nindxu̱u̱ xóo rí naʼni thana”. Bi̱ naʼni tsiakimínáʼ masngájma ku̱ma̱ ndrígóo Dios nañewu̱u̱n dí naʼthí. Ajngáa májánʼ dí naʼthí naʼni maʼni̱i̱ a̱jkiu̱ún bi̱ kuwa gíná ga̱jma̱a̱ naʼni dí mambaxúún itháan májánʼ xa̱bu̱. Xúgiáanʼ má eʼyáá dí gíʼdoo tsiakii ajngáa rí naʼni maʼni̱i̱ a̱jkiu̱lú (atraxnuu Proverbios 16:24). Dí nagájnuu náa rawunlú gíʼdoo wéñuʼ tsiakii; ikha jngó, gajmulú mu muʼni̱i̱ a̱jkiu̱u̱n mbáa, raʼkháa rí muʼnigawíínʼ.

6. Ndíjkha rí mingíjyúuʼ wéñuʼ muñewa̱a̱n rajunlú rá.

⁶ Mú maski ajndu nuʼni tsiakimijna mu muña̱wa̱a̱n rí muʼthá, nguáná naʼniulú mingíjyúuʼ. Rígi̱ nasngájmulúʼ raga̱jma̱ numuu rí gíʼmaa muñewa̱a̱n rí muʼthá: Rí ni̱ndxu̱lú xa̱bu̱ aʼkhá naʼni dí xájmulú májánʼ rajunlú. Naʼniulú mingíjyúuʼ muñewa̱a̱n numuu rí ajngáa dí nuʼthá nagájnuu asndu náa a̱jkiu̱lú ga̱jma̱a̱ xó má eʼthí náa Biblia, ‹xa̱bu̱ nundxa̱ʼwa̱míjna̱ muni̱ dí raʼkhí› (Génesis 8:21; Lucas 6:45; atraxnuu Santiago 3:2-4). Maski ajndu aʼkhá rí kuaʼdáá naʼni rí xájmulú májánʼ rajunlú, ma̱ndoo muña̱wa̱a̱n xóo majmulúʼ. Xó má mbáa xa̱bu̱ bi̱ ndayóoʼ makidaa mbá mañu mba̱a̱, ikhaa gíʼmaa maʼni tsiakimínáʼ mu xáʼga̱ kayáa xkujyuʼ iyaʼ. Xó má xkujyuʼ iyaʼ, aʼkhá na̱jkha̱ kaguáanʼ mu muʼthá ajngáa dí ra̱májánʼ. Ikha jngó, gíʼmaa muñewa̱a̱n rajunlú.

7, 8. Á mu tsíñewa̱a̱n dí nuʼthá, lá ma̱ndoo mambáxulúʼ gajmiúlú Jeobá ráʼ.

⁷ Rí maʼni ajtsú numuu dí gíʼmaa muñewa̱a̱n dí muʼthá nindxu̱u̱ rí kaʼyulúʼ muxnaxíi cuenta náa Jeobá. Dí nuʼthá raʼkháa i̱ndó naʼniún rí májánʼ o dí ra̱májánʼ bi̱ nambáxulúʼ gajmiúlú, asndu ma̱ngaa dí nambáxulúʼ gajmiúlú Dios. Xúʼko̱ eʼthí náa Santiago 1:26: “Á mu mbáa nandxa̱ʼwáminaʼ dí nindxu̱u̱ xa̱bi̱i̱ Dios mú á mu tséñewu̱u̱n raju̱u̱n,  xtáa raʼninduwaaʼ a̱jkiu̱u̱n, ga̱jma̱a̱ rí ndaʼyamajkuu Dios nindxu̱u̱ ndíí”. * Xó má nijuiʼthá náa capítulo dí ninújngoo, nambríguíi dí xú káʼnii ejmulú rajunlú ga̱jma̱a̱ dí xú káʼnii eʼyamajkuíí Dios. Á mu tsíñewa̱a̱n rajunlú ga̱jma̱a̱ nuʼthá ajngáa dí naʼni gawúunʼ imba̱a̱, ñajunʼ dí nuʼni náa Dios xágiʼdoo nditháan numuu. Rígi̱ gíʼmaa maʼni mundxaʼwáá edxu̱lúʼ (Santiago 3:8-10).

⁸ Ndiʼyáá ajtsú numuu náa naʼthí ndíjkha jngó gíʼmaa muñewa̱a̱n ajngáa dí nuʼthá. Rí xúgi̱ mbuʼyáá náa biʼyaa ajngáa dí ragíʼmaa muʼthá mbá kayuʼ ga̱jma̱a̱ náa biʼyaa dí ma̱ndoo majmulúʼ mu maxnúu tsiakii imba̱a̱ xa̱bu̱.

9, 10. a) Ndiéjunʼ nindxu̱u̱ ajngáa rí najmún náa numbaaʼ xá. b) Ndíjkha rí gíʼmaa muʼni gaʼduunʼ ajngáa tsaga rá. (Ma̱ngaa atayáá nota.)

⁹ Ajngáa rí tséjmaa. Rí mbiʼi xúgi̱, dí muni tsu̱di̱i̱ mbáa, muthi ajngáa xkawiʼ ga̱jma̱a̱ eʼwáʼ ajngáa dí nda̱a̱ numuu nindxu̱u̱ mbá dí rígá wéñuʼ náa numbaaʼ. Mbaʼin xa̱bu̱ najmún mu magiʼdoo itháan tsiakii dí nuthi o na̱nguá exkamaa mbá ajngáa májánʼ rí majmúún. Xa̱bu̱ bi̱ nuni xnduʼwá, najmún ajngáa dí tséjmaa kayuʼ mu muni rí xa̱bu̱ munduʼwa. Mú rígi̱ na̱nguá nindxu̱u̱ nimbá xnduʼwá. Nákha 2,000 tsiguʼ, Pablo nikuʼma mbá carta náa inún cristianos bi̱ kuwa náa Colosas náa niʼthún dí xúthi mbá kayuʼ “ajngáa tsaga” (Colosenses 3:8). Ga̱jma̱a̱ Pablo niʼthún a̱ngui̱i̱n bi̱ kuwa náa Éfeso náa niʼnirámáʼ: “Asndu nditháan xútha [xó má] ajngáa xnduʼwá rí mitsaga” (Efesios 5:3, 4).

¹⁰ Dios bi̱ nandoo kaʼyulúʼ nagawúunʼ eʼni ajngáa tsaga. Ikha jngó, ikháanʼ mangáanʼ nawiyulúʼ kuʼyáá ga̱jma̱a̱ tséjmulú mbá kayuʼ. Nduʼyáá kaʼwu rí nindxu̱u̱ mbá  “rí mitsaga”, rí nindxu̱u̱ mbá “xúgíʼ rí naʼni xuwiʼ” dí Pablo niʼthí dí ra̱májánʼ (Gálatas 5:19-21). Nindxu̱u̱ mbá rí mitsáʼkháan wéñuʼ. Mbáa xa̱bu̱ ma̱ndoo magumaa expulsar náa congregación á mu tséniñuuʼ raʼthí ajngáa dí ra̱májánʼ wéñuʼ rí xú káʼnii ebúnʼ xa̱bu̱, dí asndu nánguá etiyuuʼ maʼthí ajngáa xkawiʼ, maski ajndu nuxnáá mbaʼa nuthu xtágabu. *

11, 12. a) Nguáná dí ra̱májánʼ muʼthá xú kúwi̱i̱n eʼwíínʼ rá. b) Náa numuu dí ragíʼmaa muʼnigámii eʼwíínʼ rá.

¹¹ Xtujtaa ga̱jma̱a̱ dí nunigámiin eʼwíínʼ. Rí miʼtá xú káʼnii xtáa mbáa xa̱bu̱ xáʼni gawúunʼ á mu najuiʼthá rí májánʼ o rí mayambáá, xóo bi̱ ndiʼkhún nijngúun iyááʼ o bi̱ ndayóoʼ mixnáá tsiakii. Cristianos bi̱ nikuwa nákha siglo timbá mangiin nixmiéjunʼ wéñuʼ kuñún a̱ngiu̱ún ma̱ngaa nithi dí májánʼ ga̱jma̱a̱ numún (Efesios 6:21, 22; Colosenses 4:8, 9). Ragíʼmaa muʼthá mbá dí na̱nguá nirígá o dí xú káʼnii xtáa mbáa xa̱bu̱. Costumbre rúʼko̱ asndu ma̱ndoo maʼga̱ kaguáanʼ muʼni mbá dí ra̱májánʼ: Dí muʼnigámii eʼwíínʼ, nandoo gáʼthi “dí muʼthá rí nduwaʼ ga̱jma̱a̱ numuu imba̱a̱ mu muʼni̱i̱ dí ra̱májánʼ o muʼni rí ní xúyamajkuíí” (Diccionario del español usual en México). Mbá xkri̱da ni̱ndxu̱ún fariseos bi̱ nithi rí minduwaʼ mu munigámaa Jesús mu muni dí xa̱bu̱ ní xúyamajkuíí (Mateo 9:32-34; 12:22-24). Mbá dí nakujmaa kaʼwu nindxu̱u̱ rí índo̱ nunigámii eʼwíínʼ naʼni rí mugi̱ʼdu̱u̱n (Proverbios 26:20).

¹² Xú káʼnii eʼñún Jeobá bi̱ i̱ndó najngrui̱gu̱u̱n runigámii eʼwíínʼ o nuni marigá xkujndu rá. Tséʼñún májánʼ. Nawiyuuʼ kaʼñún bi̱ nuni rí maguaʼdáá “xkujndu mbáa xa̱bu̱ ga̱jma̱a̱ ndxájuu” (Proverbios 6:16-19). Garmáʼáan a̱jkiu̱lú  rí ajngáa griego “dí nunigámii eʼwíínʼ” nandoo gáʼthi diábolos, ikháá má dí najmaa mu muxnambiʼí Satanás xóo “Gixa̱a̱”, ikhaa bi̱ naʼnigámaa Dios (Revelación 12:9, 10). Nimbáa dí ikháanʼ tsíyoo mani̱ndxu̱u̱ “gixa̱a̱” (o mbáa bi̱ naʼnigáma). Náa congregación na̱nguá xú makuwá bi̱ nunigámii eʼwíínʼ ni má xúgíʼ rí naʼni xuwiʼ, xó má “bi̱ nagiʼdu̱u̱n má xúʼko̱” ga̱jma̱a̱ “bi̱ nuniwajimijna” (Gálatas 5:19-21). Ikha jngó, nákha xóó tséʼtha ga̱jma̱a̱ numuu imba̱a̱, gíʼmaa muraximíjna̱: “Lá nda̱yo̱o̱ dí gajkhun nindxu̱u̱ ráʼ. Lá masngajmá rí nandoʼ ka̱yo̱o̱ ndxájuʼ á mu natha ráʼ. Lá májánʼ gáʼni o ndayóoʼ dí eʼwíínʼ mbuyáá ráʼ.” (Atraxnuu 1 Tesalonicenses 4:11.)

13, 14. a) Xú káʼnii eʼni makuwá xa̱bu̱ índo̱ nuta wéñúúnʼ xá. b) Ndiéjunʼ gúgíʼníí bi̱ nuta wéñúúnʼ eʼwíínʼ rá.

¹³ Ajngáa dí naʼni gawúunʼ eʼwíínʼ. Xó má ndiʼyáá, ajngáa ma̱ndoo maʼni gawúnlú wéñuʼ. Aʼkhá dí kuaʼdáá na̱jkha̱ kaguáanʼ xúgiáanʼ muʼthá dí nda̱wa̱á naʼni magáwíinʼ a̱jkiu̱lú. Mú náa Biblia naʼthúlúʼ dí rígá ajngáa dí ragíʼmaa muʼthá náa congregación ni má náa guʼwúlú. Pablo niʼthún cristianos: “Ní xuyéʼgua sia̱nʼ ga̱jma̱a̱ ní xágigáanʼ, ní xákiʼnáanʼ, ní xúndxaʼwajmíin eʼwíínʼ ga̱jma̱a̱ ní xúta wéñúúnʼ eʼwíínʼ” (Efesios 4:31). Dí muʼthá xúgi̱ kaʼnii, ma̱ngaa ajngáa dí naʼni májthinʼ eʼwíínʼ, ajngáa gujkhuʼ ga̱jma̱a̱ tsegáwiinʼ a̱jkiu̱ún índo̱ nutanuma, naʼni rí ní xúyamajkún eʼwíínʼ ga̱jma̱a̱ dí xa̱bu̱ makuwá gíná. Bi̱ e̱ji̱n, naʼni gawún itháan numuu rí xóó nda̱a̱ rí eyáá (Colosenses 3:21).

¹⁴ Biblia tséniñuʼ rí xa̱bu̱ muta wéñúúnʼ eʼwíínʼ ga̱jma̱a̱ naʼthí dí kuwa náa mbá tsáʼkhá. Ndiéjunʼ gugíʼniin nda̱wa̱á bi̱ naguʼún nuta wéñúúnʼ, tséyamajkhún o nuni májthinʼ eʼwíínʼ rá. Ginii muniñaaʼ rí mariʼkuminaʼ. Á mu tsíyoo gáʼni, magumaa expulsar náa congregación. Dí phú itháan gíná rí asndu maʼnimbáti̱ga̱ rí maxtáa kámuu mbiʼi náa maʼtáñajunʼ Reino ndrígóo Dios (1 Corintios 5:11-13;  6:9, 10). Naguanúu kaʼwu rí á mu nandulúʼ rí Dios ma̱ndoo kaʼyulúʼ ragíʼmaa muʼtá ajngáa xkawiʼ, xtujtaa, rí muʼtá wéñúúnʼ ga̱jma̱a̱ xúgíʼ ajngáa rí makáguabinʼ eʼwíínʼ.

15. Náa biʼyaa ajngáa eʼni rí maʼni̱i̱ a̱jkiu̱u̱n xa̱bu̱ numbaaʼ rá.

¹⁵ Xú káʼnii eyoo Jeobá majmulúʼ rí nuʼthá rá. Garmáʼáan a̱jkiu̱lú rí náa Biblia naʼthí rí majmulúʼ mu “mayambáá [náa xa̱bu̱ numbaaʼ gajmiúlú]” (Efesios 4:29). Jeobá naniguuʼ índo̱ nuʼni tsiakimijna mu muʼthá ajngáa rí maxná tsiakii ga̱jma̱a̱ rí maʼni maguajún gujkhuʼ. Mú náa Escrituras na̱nguá e̱ʼkha̱ mbá awan ni mbá lista náa na̱ʼkha̱ ajngáa rí ‹májánʼ› (Tito 2:8). Mu mbuʼyáá á mu mbá dí najuiʼthá nañambáá mu maʼni̱i̱ a̱jkiu̱u̱n mbáa ndayóoʼ mbiʼyáá rígi̱: Nindxu̱u̱ jmbu, gajkhun ga̱jma̱a̱ naʼni marigá dí májánʼ. Gagiwanʼ má xúʼko̱ a̱jkiu̱lú ajtsú rígi̱ dí gíʼdoo numuu índo̱ gákuwáanʼ ruʼyáá mbaʼa xkri̱da (atayáá náa kúgumaʼá “ Lá naʼni̱i̱ a̱jkiu̱ún xa̱bu̱ ajngáa dí na̱tha̱ ráʼ.”).

16, 17. a) Ndíjkha rí gíʼmaa muʼthúún rí májánʼ kuwa runi eʼwíínʼ rá. b) Ndiéjunʼ dí májánʼ gándoo muʼthá náa congregación ga̱jma̱a̱ náa guʼulúʼ rá.

¹⁶ Ajngáa májánʼ dí nagájnuu asndu náa a̱jkiu̱lú. Jeobá ga̱jma̱a̱ Jesús nduyáá dí ra̱ʼkhá tháán eyóoʼ miʼthún ajngáa májánʼ eʼwíínʼ ga̱jma̱a̱ miʼthún dí ra̱ʼkhá tháán májánʼ dí kuwa runi (Mateo 3:17; 25:19-23; Juan 1:47). Ga̱jma̱a̱ xúgiáanʼ bi̱ ni̱ndxu̱lú cristianos gíʼmaa muʼni rúʼko̱. Xúʼko̱, “mbá ajngáa índo̱ ndayóoʼ, ¡ra̱ʼkhá tháán májánʼ nindxu̱u̱!” (Proverbios 15:23). Índo̱ nduʼyáá rí mbáa naʼthúlúʼ ga̱jma̱a̱ xúgíʼ a̱jkiu̱u̱n dí kuwaanʼ ruʼni dí májánʼ, naʼni dí maʼdxulú ga̱jma̱a̱ naxnúlú tsiakii. Xúʼko̱ má gíʼmaa makumulúʼ, numuu dí rígi̱ naʼni mbuʼyáá rí xtáa mbáa bi̱ naxmiéjunʼ kaʼyulúʼ ga̱jma̱a̱ dí májánʼ kuwaanʼ ruʼni. Rígi̱ nasngájmulúʼ rí tsiakii dí ni̱ʼni̱ na̱nguá nindxu̱u̱ ndíí, naʼni rí xámiñulu ga̱jma̱a̱ naxkaxáanʼ muñajunʼ mámbá mbiʼi  ga̱jma̱a̱ gagi. Numuu dí xúgiáanʼ nanigulúʼ mutulú mbá rí májánʼ dí nuʼni, lá na̱nguá gíʼmaa maxmiéjunʼlú muʼthúún eʼwíínʼ rí májánʼ eni ráʼ. (Atraxnuu Mateo 7:12.)

¹⁷ Á mu naguʼwunlú nduʼyáá rí májánʼ eni eʼwíínʼ, maʼni muʼthúún rí májánʼ kuwa runi. Mbá xkri̱da, ndiéjunʼ gándoo mbuʼyáá náa congregación rá. Mbáa bi̱ najmañuu maxná májánʼ discurso, mbáa ndxáʼgú o dxámá naʼni tsiakimínáʼ mu maʼnimbánuu meta dí maʼni ñajunʼ Jeobá o mbáa ndxájulú nikhi̱i̱ tséndáti̱go̱o̱ náa reunión maski ajndu naʼniu nandii. Mbá ajngáa dí gíʼdoo wéñuʼ numuu maʼga̱nú asndu náa a̱jkiu̱u̱n mbáa xa̱bu̱ ga̱jma̱a̱ maxnúu tsiakii. Ndiéjunʼ gándoo gúʼthá ga̱jma̱a̱ mbá guʼwíin xa̱bu̱ rá. Nájmi̱i̱n bi̱ nidamijná ndayóoʼ mudxawíín ajngáa dí maxnún tsiakii ga̱jma̱a̱ musngajma dí gíʼdoo numuu ñajunʼ dí nuni (Proverbios 31:10, 28). E̱ji̱n mangiin nda̱ñúnʼ rí makumún kuñún ga̱jma̱a̱ mutún dí guáʼdáá numún. Xó má mbá ixi̱ ndayóoʼ iyaʼ ga̱jma̱a̱ a̱jkha̱ʼ mu mikhi̱i̱, xúʼko̱ má mbáa ada̱ ndayóoʼ maratha̱a̱n ajngáa dí maxnúu tsiakii ga̱jma̱a̱ maratha̱a̱n dí xtáa má raʼni rí májánʼ. Ikha jngó, bi̱ guáʼdiin e̱ji̱n gíʼmaa mutún e̱jñún dí májáánʼ xa̱bu̱ ni̱ndxu̱ún ga̱jma̱a̱ dí májánʼ eni. Xúʼko̱ muniu̱u̱ makuwá gagi ga̱jma̱a̱ dí xámiñuun muraʼníí asndu guaʼyaa má dí gugíʼniin, ga̱jma̱a̱ maxkajxi̱i̱n muni tsiakimijna itháan rí kaʼñún.

18, 19. Ndíjkha dí gíʼma muʼni xó má eʼngo̱o̱ mu muʼni̱i̱ a̱jkiu̱ún ga̱jma̱a̱ muxnún tsiakii a̱ngiu̱lú, ga̱jma̱a̱ xú gándoo gúʼni rá.

¹⁸ Guʼni̱i̱ a̱jkiu̱ún ga̱jma̱a̱ guxnún tsiakii. Jeobá gajkhun naxmiéjunʼ kaʼñún “xa̱bu̱ gíníi” ga̱jma̱a̱ “bi̱ kuwa gíná” (Isaías 57:15). Ikhaa naʼthúlúʼ náa Biblia: “Guni̱i̱ a̱jkia̱la mámbáanʼ dí ikháanʼ ga̱jma̱a̱ [...] guthu̱u̱n ajngáa rí maxnún tsiakii bi̱ kuwa gíná” (1 Tesalonicenses 5:11, 14). Ikhaa naxtáa gagi índo̱ ndaʼyoo tsiakii dí nuʼni mu muʼthá ajngáa dí naxnún tsiakii ga̱jma̱a̱ naʼni̱i̱ a̱jkiu̱ún bi̱ kuwa gíná.

 ¹⁹ Ndiéjunʼ gándoo muʼni ga̱jma̱a̱ numuu cristiano bi̱ xtáa gíná rá. Timbá, guʼtháán ajngáa dí mambáyúu. Maski ajndu tséʼnimbaníí xkujndu dí gíʼdoo ga̱jma̱a̱ ajngáa dí nuʼtháán, ragíʼmaa maxmiéjunʼlú. Mú itháan gíʼdoo numuu musngajmáá dí numbayíí ga̱jma̱a̱ dí naxmiéjunlú kuʼyáá. Ma̱ngaa ma̱ndoo muʼtájkáan ga̱jma̱a̱ numuu, gunda̱ʼa̱a̱ Jeobá mambáyúu mbaʼyoo dí eʼwíínʼ nandún kuyáá ga̱jma̱a̱ dí Dios má nandoo kaʼyoo (Santiago 5:14, 15). Gíʼmaa muʼthán rí nandún kuyáá bi̱ kuwa náa congregación ga̱jma̱a̱ rí nduyáá dí gíʼdoo wéñuʼ numuu (1 Corintios 12:12-26). Imbo̱o̱ rí ma̱ndoo muʼni nindxu̱u̱ dí muraxnuu mbá texto ndrígóo Biblia dí maʼni marmáʼáan a̱jkiu̱u̱n dí Jeobá naxmiéjunʼ kaʼyoo (Salmo 34:18; Mateo 10:29-31). Á mu nuríyaʼ mbiʼi mu muxná tsiakii ga̱jma̱a̱ mbá ‹ajngáa májánʼ› dí nagájnuu asndu náa a̱jkiu̱lú, mbaʼyoo rí nandulúʼ kuʼyáá ga̱jma̱a̱ mbaʼyoo rí gíʼdoo numuu (atraxnuu Proverbios 12:25).

20, 21. Náa biʼyaa ajtsú enii dí naʼni rí xtágabu mayambáá rá.

²⁰ Xtágabu májánʼ. Numuu rí xúgiáanʼ ni̱ndxu̱lú xa̱bu̱ aʼkhá, nguáná ndayóoʼ muxnulu ikha. Ikha jngó náa Biblia naʼthúlúʼ: “Atadxawíín xtágabu ga̱jma̱a̱ atriʼña májánʼ índo̱ nuxpriguáʼ, mu xúʼko̱ manindxa̱ʼ mbáa xa̱bu̱ bi̱ ndaʼyoo nda̱wa̱á” (Proverbios 19:20). Náa congregación nuxnulu ikha bi̱ kuya̱ edxu̱u̱. Mú raʼkháa i̱ndó ikhiin gándoo  gúxnulú. Mbá xkri̱da, xa̱bu̱ bi̱ guáʼdiin e̱ji̱n gíʼmaa muxnún xtágabu e̱jñún (Efesios 6:4). Ga̱jma̱a̱ a̱ngiu̱lú gu̱ʼu̱ bi̱ nambáxu̱u̱n májánʼ gajmiún Dios ma̱ndoo mumbañún cristianas bi̱ xóó wa̱ʼxa̱ʼ (Tito 2:3-5). Numuu dí nandoo kaʼyoo xa̱bu̱ numbaaʼ ga̱jma̱a̱ bi̱ naxná xtágabu gíʼmaa mañewu̱u̱n xóo maʼthí mu xákiʼnáa nimbáa. Guʼyáá ajtsú enii dí naʼni rí xtágabu mayambáá: Bi̱ maxná xtágabu gíʼmaa maʼni ga̱jma̱a̱ mbá numuu májánʼ ga̱jma̱a̱ rí nandoo mayambáá, magiʼdoo mbáa numuu rí maxná, ga̱jma̱a̱ maxná xó má gíʼmaa.

²¹ Timbá nindxu̱u̱ rí bi̱ maxná xtágabu gíʼmaa maʼni ga̱jma̱a̱ mbá numuu májánʼ ga̱jma̱a̱ rí nandoo mayambáá. Ndiéjunʼ embáyulú mundrígú májánʼ xtágabu rá. Índo̱ nduʼyáá rí nuxnulu numuu rí gajkhun naxmiéjunʼ kuyulúʼ, raʼkháa numuu rí nandoo maʼniulú mbá dí ra̱májánʼ. Ikha jngó, xúʼko̱ gúʼni índo̱ gúxnún xtágabu eʼwíínʼ. Raga̱jma̱ numuu nindxu̱u̱ rí majmulúʼ Ajngá rawunʼ Dios (2 Timoteo 3:16). Xúgíʼ dí gúʼthá gíʼmaa ma̱ʼkha̱ náa Biblia, tséʼniuu á mu nuraxnuu ikhí o na̱nguá. Bi̱ kuya̱ edxu̱u̱ gíʼmaa muña̱wa̱a̱n rí xúthi xó má ekumún ikhiin. Ni má tsériʼkhuíí textos mu mambáñun índo̱ muthi. Rí maʼni ragajtsú nindxu̱u̱ rí mixná xó má gíʼmaa. Májánʼ a̱jkiu̱ún índo̱ nuxna xtágabu, nduyamajkuíí xóo xa̱bu̱ nindxu̱u̱ mámbáa, xúʼko̱ xáʼni mingíjyúuʼ mundrígú xtágabu (Colosenses 4:6).

22. Xú káʼnii eyulú majmulúʼ rí nuʼthá rá.

²² Dí nuʼthá nindxu̱u̱ mbáa regalo ndrígóo Jeobá rí gíʼdoo wéñuʼ numuu. Numuu rí nandulúʼ kuʼyáá wéñuʼ Anu̱lú nandulúʼ majmulúʼ májánʼ. Nditháan xámbumulú rí ajngáa maʼni rí maʼni̱i̱ a̱jkiu̱lú o maʼni rí makuwáanʼ gíná. Ikha jngó, gajmulú má xúʼko̱ xó má Jeobá eyoo: ‹Mu maʼni̱i̱ a̱jkiu̱ún xa̱bu̱ numbaaʼ gajmiúlú›. Xúʼko̱ muʼniu̱u̱n dí májánʼ bi̱ nambáxulúʼ gajmiúlú ga̱jma̱a̱ rí ma̱ndoo kaʼyulúʼ má xúʼko̱ Dios.