1, 2. Ndiéjunʼ nindxu̱u̱ regalo dí gíʼdoo wéñuʼ numuu ga̱jma̱a̱ ndíjkha rá.

ANULÚ bi̱ xtáa mekhuíí nixnúlú mbá regalo dí mitsaan: Vida rí kuaʼdáá xóo xa̱bu̱ ni̱ndxu̱lú nandoo najmañulúʼ nundxa̱ʼwáá májánʼ edxu̱lúʼ, asndu ma̱ndoo mbuʼyaridáá rí xú xa̱bu̱ nindxu̱u̱ (Génesis 1:27). Ga̱jma̱a̱ numuu regalo rígi̱, nandoo nundxaʼwamíjná numuu ikha rí na̱ʼkha̱ náa Biblia ga̱jma̱a̱ nuʼgíʼ nuʼni. Á mu najmañulúʼ nuʼni xúʼko̱, maʼga̱ raʼni itháan gujkhuʼ fe. Manindxu̱lúʼ xa̱bu̱ bi̱ nandún kuyáá Jeobá ga̱jma̱a̱ bi̱ “najmañún mundxa̱ʼwa̱a̱ májánʼ edxu̱ún mu muraʼwíí rí májánʼ ga̱jma̱a̱ dí ra̱májánʼ” (Hebreos 5:14).

² Rí mbiʼi xúgi̱ gíʼdoo wéñuʼ numuu majmañulúʼ munimbánii ikha rí na̱ʼkha̱ náa Biblia. Numbaaʼ ra̱ʼkhá tháán mingíjyúuʼ rí nimbá xtángoo tséʼngo̱o̱ gáʼnimbánuu xúgíʼ xkujndu dí narígá. Mbá xkri̱da ga̱jma̱a̱ numuu thana náa naʼni majmaa eʼdi. Rígi̱ nindxu̱u̱ mbá rí nandulúʼ mbuʼyáá xúgiáanʼ bi̱ nandulúʼ muʼnimbulúʼ kuʼyáá Jeobá. Xóo gándoo guraʼwíí májánʼ dí muʼni mu xúʼnigawíínʼ conciencia ndrígúlú ga̱jma̱a̱ maʼni rí Dios maʼndoo kaʼyulúʼ má xúʼko̱ rá. Dí makru̱ʼu̱lú májánʼ ikha dí na̱ʼkha̱ náa Biblia (Proverbios 2:6-11). Guʼyáá tikhuu.

3, 4. Nguáná niʼthí timbá aʼphu̱ náa Escrituras dí mitsúʼkháan nindxu̱u̱ eʼdi, ga̱jma̱a̱ náa ikha nigájnuu rá.

³ Jeobá ndaʼyoo rí gíʼdoo numuu vida ga̱jma̱a̱ eʼdi, ga̱jma̱a̱ nájma̱ nindxu̱u̱ mitsúʼkháan. Timbá aʼphu̱ rí nisngájma rígi̱ ninindxu̱u̱ nda̱wa̱á rí Caín nixíyáa Abel. Dios niʼthúu̱n Caín: “¡Atadxawíín! Eʼdi ndrígóo ndxájuaʼ xtáa randa̱ʼa̱ cuenta asndu mbayííʼ” (Génesis 4:10). Jeobá ndiʼyoo rí eʼdi ndrígóo  Abel nindxu̱u̱ vida, bi̱ ra̱ʼkhá tháán xkawiʼ nikháñu. Nindxu̱u̱ rí asndu xóo eʼdiuu xtáa randa̱ʼa̱ náa Dios mu maguma rí jmbu (Hebreos 12:24).

⁴ Nda̱wa̱á rí nixnúu Ruʼwambiiʼ, Dios niʼthún xa̱bu̱ rí ma̱ndoo mu̱phu̱ xuñúnʼ xujkhúʼ, ikhaa niʼthún: “I̱ndó xuwiʼ ga̱jma̱a̱ vida ndrígóo, eʼdiu, ragíʼmaa muphula. Ga̱jma̱a̱ eʼdi ndrígála manda̱ʼa̱a̱ cuenta” (Génesis 9:4, 5). Asndu mbiʼi xúgi̱, xúgínʼ xa̱bu̱ bi̱ naguwáʼ náa Noé, gíʼmaa dí munimbaníí rí kiʼtáñajunʼ rígi̱, náa naʼthí mbu̱júu̱ rí nindoo gáʼthi Dios índo̱ niʼtámíjná ga̱jma̱a̱ Caín. Timbá ikha nindxu̱u̱ rí eʼdi nandoo gáʼthúu̱n vida ndrígu̱ún xúgínʼ bi̱ nduya náa xúgíʼ tsu̱du̱u̱ ku̱ba̱ʼ. Nda̱wa̱á nasngájma rí Jeobá, náa phú na̱ʼkha̱ vida, manda̱ʼa̱ cuenta náa bi̱ tséyamajkuíí vida ga̱jma̱a̱ eʼdi (Salmo 36:9).

5, 6. Xú káʼnii nisngajma Xtángoo rí niwaxnáá Moisés dí mitsúʼkháan ga̱jma̱a̱ dí gíʼdoo wéñuʼ numuu eʼdi rá. (Ma̱ngaa atayáá rí kúgumaʼá “ Guʼyamajkuíí vida ndrígu̱ún xujkhúʼ.”)

⁵ Nájma̱ ikha rígi̱ gíʼdoo wéñuʼ numuu rí niguanúu náa Xtángoo dí niwaxnáá Moisés. Náa Levítico 17:10, 11, Jeobá niʼthí: “Á mu mbáa xa̱bu̱ [...] gíkhu̱ eʼdi, ikhúúnʼ makiʼnún ka̱yo̱o̱ bi̱ xtáa raʼkhu eʼdi ga̱jma̱a̱ ikhúúnʼ maxíyáa náa tapo̱o̱ xuajñu. Numuu rí eʼdi dí rígá náa xuwiʼ nindxu̱u̱ vida, ikhúúnʼ naxidíí eʼdi náa altar mu xúʼko̱ ikháanʼ xaguaʼdáá aʼkhá, numuu rí eʼdi naʼni rí mambáa aʼkhá rí kuaʼdáá numuu rí náa eʼdi rígá vida” (atayáá náa kúgumaʼá “ Eʼdi naʼnijngudi̱i̱ aʼkhá”.) *

⁶ I̱ndó á mu najmún náa altar, eʼdi gíʼmaa rí magadiriga mbayííʼ. Rígi̱ nindxu̱u̱ mbá xkri̱da rí xóo etanga̱a̱ vida náa bi̱ phú niʼni (Deuteronomio 12:16; Ezequiel 18:4). Gíʼmaa mbuʼyáá rí israelitas nánguá ndiyóoʼ muxidi̱i̱ asndu iwáá kayuʼ eʼdiún xujkhúʼ. I̱ndó murujturaʼa aphún ga̱jma̱a̱ magadíí májánʼ eʼdiún, xúʼko̱ ma̱ndoo mu̱phu̱ rí xáʼni gawúunʼ conciencia ndrígu̱ún, dí muʼni xúʼko̱ nusngajma rí nduyamajkuíí bi̱ Nixná vida.

7. Xóo nisngajma David rí ndiʼyamajkuu eʼdi rá.

 ⁷ Mbáa bi̱ nikro̱ʼo̱o̱ májánʼ ikha ndrígóo xtángoo ga̱jma̱a̱ numuu eʼdi ninindxu̱u̱ David mbáa xa̱biya̱ bi̱ Dios niʼni a̱jkiu̱u̱n kaʼyoo (Hechos 13:22). Mbá míʼtsú índo̱ nikhandau wéñuʼ. Índo̱ nidxawíín, ajtsíin xa̱bi̱i̱ nitu̱ʼu̱u̱n ga̱jma̱a̱ tsiakii náa campamento ndrígu̱ún xa̱bu̱ bi̱ sia̱nʼ gajmiún, niriyaʼ iyaʼ náa cisterna ga̱jma̱a̱ nigúun ku̱ñu̱u̱n mu maga̱a̱n David. Xú  nindxa̱ʼwáminaʼ xá. Ikhaa niʼthí: “Lá ma̱ga̱nʼ ikhúúnʼ eʼdiún xa̱bu̱ bi̱ nini gínámijná dí asndu nigíʼ makhañún xáʼ.” David ndiʼyoo rí iyaʼ rúʼko̱ ninindxu̱u̱ asndu xóo vida ndrígu̱ún xa̱bu̱. Ikha jngó, maski ajndu nikhandau wéñuʼ, “nixídiriga náa Jeobá” (2 Samuel 23:15-17).

8, 9. Lá niriʼkhuu xóo endxa̱ʼwáminaʼ Dios ga̱jma̱a̱ numuu vida ga̱jma̱a̱ eʼdi índo̱ nigíʼ congregación cristiana ráʼ. Arathá.

⁸ Mba̱yu̱ʼ tsiguʼ nda̱wa̱á, nigimbíin bi̱ kuya̱ edxu̱u̱ náa congregación cristiana: Cuerpo Gobernante. Ninújngoo má 2,400 tsiguʼ asndu nákha Noé nigruigú xtángoo ndrígóo eʼdi, ga̱jma̱a̱ 1,500 tsiguʼ asndu dí nirígá rí nimbánuu Xtángoo. Náa reunión rúʼko̱, Jeobá nixnúún xi̱ʼ kaʼwu Cuerpo Gobernante mu muniraʼmáʼ: “Xi̱ʼ kaʼwu ga̱jma̱a̱ ikháanʼ ndu̱ya̱a̱xu dí xándoo maxtanda̱ʼa̱la mbá rí xáʼngala gúni, i̱ndó rígi̱ rí ndayóoʼ magumambánii: Guñeumíjna̱ rí xaphula tsigijñaʼ rí nixnaxi̱i̱n náa xándú, ga̱jma̱a̱ eʼdi, ga̱jma̱a̱ xujkhúʼ bi̱ kaxngáun, ma̱ngaa xátaxuʼdáminaʼ aʼkhá ga̱jma̱ʼ mbáa” (Hechos 15:28, 29).

⁹ Cuerpo Gobernante bi̱ nikuwa nákha siglo timbá nikru̱ʼu̱u̱n dí mitsúʼkháan nindxu̱u̱ eʼdi ga̱jma̱a̱ á mu tséjmaa májánʼ nindxu̱u̱ mbá aʼkhá dí mitsáʼkháan xó má dí mataxuʼdáminaʼ aʼkhá ga̱jma̱ʼ mbáa o dí matayamajkún xándú o i̱ʼwáʼ. Dí mbiʼi xúgi̱ nuʼnimbániilu káxi̱ ikha rígi̱ índo̱ nuraʼníí xkujndu ga̱jma̱a̱ numuu eʼdi, nduʼyáaʼlú ikha rí na̱ʼkha̱ náa Biblia mu muraʼwíí dí májánʼ muʼni rí maniguuʼ Dios.

10, 11. a) Lá nundrígulú eʼdi bi̱ ni̱ndxu̱lú xa̱bi̱i̱ Jeobá o i̱ʼwáʼ thana náa najmaa eʼdi ráʼ. b) Xú káʼnii gándoo garaʼwíí maʼni mámbáa ga̱jma̱a̱ numuu eʼdi rá.

¹⁰ Bi̱ ni̱ndxu̱lú xa̱bi̱i̱ Jeobá nuʼnimbulúʼ rí kiʼtáñajunʼ “guñeumíjna̱ rí xaphula [...] eʼdi”, ikha jngó tséxnalú eʼdi asndu má tséndrígulú, o magixi̱i̱ eʼdiulú mu mata̱ʼa̱ʼlú nda̱wa̱á. Ga̱jma̱a̱ tséndrígulú nájkhu̱ dí gíʼdoo eʼdi: Glóbulos rojos, glóbulos blancos, plaquetas ga̱jma̱a̱ plasma.

¹¹ Dí mbiʼi xúgi̱ nurkuajiʼ mámbá dí gíʼdoo eʼdi mu mbaʼa enii xóo gájmúún. Lá gíʼmaa mbuʼyáá ikháá má xó eʼdi ráʼ.  Lá ma̱ndoo mundrígú ráʼ. Mámbáa kaʼyoo maraʼwíí ndiéjunʼ gáʼni. Xúʼko̱ má xóo hemodiálisis, hemodilución ga̱jma̱a̱ rí mata̱ʼa̱ʼ ikháá má eʼdiaʼ mú ragíʼmaa magixi̱i̱ mú mata̱ʼa̱ʼ nda̱wa̱á (atayáá apéndice “Dí nagájnuu náa a̱jkhu̱ enii dí gíʼdoo eʼdi ga̱jma̱a̱ i̱ʼwáʼ dí najmún médicos”).

12. Á mu rígá mbá xkujndu náa ndayóoʼ mundxaʼwamíjna̱lú, xú káʼnii gíʼmaa muʼnilú ga̱jma̱a̱ ndiéjunʼ gambáyulú muraʼwíí dí muʼni rá.

¹² Lá nda̱a̱ numuu eʼyoo Jeobá dí muraʼwíí muʼni ráʼ. Na̱nguá, numuu dí ikhaa naxmiéjunʼ wéñuʼ xóo e̱ndxa̱ʼwá edxu̱lúʼ ga̱jma̱a̱ ndíjkha dí nuʼni xúʼko̱ (atraxnuu Proverbios 17:3; 24:12). Ndiéjunʼ gíʼmaa muʼni nákha xóo tsendrígú o muʼnigaʼduunʼ mbá thana dí naxná médico rá. Timbá, muʼtákáñii Dios ga̱jma̱a̱ mbuʼyááʼ makru̱ʼu̱lú xóó itháán, ga̱jma̱a̱ nda̱wa̱á muʼni xó má gáʼthi conciencia ndrígúlú (Romanos 14:2, 22, 23). Ragíʼmaa muniʼñáaʼ dí nimbáa maʼthúlú ndiéjunʼ gíʼmaa muʼni, asndu má ragíʼmaa muraxi: “Ndiéjunʼ gátani ikháánʼ rá.”  Numuu rí “mámbáa kaʼyoo maʼnimbánuu ñajunʼ rí kaʼyoo” (Gálatas 6:5; Romanos 14:12; atayáá náa kúgumaʼá “ Lá nda̱yo̱o̱ tsuʼkháan eʼdi ráʼ.”). *

13. Ndiéjunʼ esngájma numuu Jeobá xtángoo ga̱jma̱a̱ ikha dí na̱ʼkha̱ náa Biblia rá. Atagíʼ mbá xkri̱da.

¹³ Xtángoo ga̱jma̱a̱ ikha dí na̱ʼkha̱ náa Biblia nasngájma dí Jeobá najmañuu nagrui̱ga̱ xtángoo ga̱jma̱a̱ nindxu̱u̱ bi̱ májánʼ a̱jkiu̱u̱n bi̱ nañewu̱u̱n májánʼ e̱ji̱i̱n (Salmo 19:7-11). Maski ajndu cristianos kiʼtáñajúnʼ rí ‹muñeumíjná rí xúphu̱ eʼdi› na̱nguá nindxu̱u̱ xtángoo ndrígóo mbáa médico, mú nañewu̱nlú náa xkujndu dí maguaʼdáá ga̱jma̱a̱ numuu eʼdi (Hechos 15:20). Mbaʼin médicos nuthi rí mbá operación dí xáta̱ʼa̱ʼ eʼdi nindxu̱u̱ mbá dí xú káʼnii mbiʼyaridáá dí mbiʼi xúgi̱. Bi̱ ni̱ndxu̱lú cristianos gajkhun nduʼyáá itháan kaʼwu rí Jeobá nindxu̱u̱ mbáa Anu̱lú bi̱ nandoo kaʼyulúʼ wéñuʼ ga̱jma̱a̱ ra̱ʼkhá tháán ejmañuu (atraxnuu Isaías 55:9; Juan 14:21, 23).

14, 15. a) Xú káʼnii xtángoo nisngájma dí Dios nandoo kaʼyoo xuajñu rá. b) Xú káʼnii gúʼgíʼ muʼni ikha rí nagájnuu náa xtángoo rí muñeumíjnalu rá.

¹⁴ Dios naxmiéjunʼ má xúʼko̱ kaʼyoo xuajñu. Xúʼko̱ esngájma mbaʼa xtángoo dí nixnúún bi̱ israelitas. Mbá xkri̱da, niʼtáñajúúnʼ dí muni barda o barandal náa azotea ndrígu̱ún. Numuu dí najmún wéñuʼ, rígi̱ nayambáá dí xákambiñu̱u̱nʼ (Deuteronomio 22:8; 1 Samuel 9:25, 26; Nehemías 8:16; Hechos 10:9). Ma̱ngaa niʼtáñajúúnʼ dí muruguaraʼin xede̱ bi̱ najmangunʼ (Éxodo 21:28, 29). Bi̱ nanújngorámuʼ xtángoo rígi̱ mba̱a̱ náa ekieʼkúun ga̱jma̱a̱ asndu maʼni rí xóo ikhaa nixíyáa xa̱bu̱.

¹⁵ Xú káʼnii eʼgíʼ muʼni ikha rí nagájnuu náa xtángoo  rígi̱ rá. Índo̱ kuwáanʼ xawii mú mbuʼyáá á mu májánʼ carro ndrígúlú, rí xóo ejkua kuʼyúlú, rí xú káʼnii guʼulúʼ, rí xú káʼnii nindxu̱u̱ náa nuñajunʼlú, xú káʼnii nuñewu̱u̱nlú xujkhúʼ kharaʼdiin ga̱jma̱a̱ xóo eraʼwíí muʼni gagimijná. Náa tikhuu xuajen, rí phú naʼni makhañún jiáma ga̱jma̱a̱ wa̱ʼxa̱ʼ nindxu̱u̱ dí nakámbiñu̱u̱nʼ, rígi̱ narígá numuu dí tséñawamíjna̱. Ikha jngó dxámá o dxáʼgú bi̱ nandoo rí Dios ma̱ndoo kaʼyoo má xúʼko̱ ga̱jma̱a̱ ndaʼyoo dí gíʼdoo numuu vida na̱nguá eʼni gagiminaʼ náa maʼga̱ kayáa makámbiyuuʼ. Na̱nguá endxa̱ʼwáminaʼ dí nda̱a̱ dí gágíʼnuu. Numuu rí nañewamínáʼ, naxtáa itháan mba̱yu̱ʼ mbiʼi (Eclesiastés 11:9, 10).

16. Xú káʼnii ikha dí na̱ʼkha̱ náa Biblia nayambáá mú xundriguíin e̱jñún xá. (Ma̱ngaa atayáá nota.)

¹⁶ Dios ndaʼyoo dí ra̱ʼkhá tháán gíʼdoo numuu vida ndrígóo mbáa xa̱bu̱, asndu nákha kuaʼa̱a̱n náa awúu̱n ru̱dúu̱. Náa Xtángoo ndrígóo Moisés, niʼthí ndiéjunʼ gíʼmaa magumaa mbáa xa̱bu̱ bi̱ gáʼni kámbiyuuʼ mbá a̱ʼgu̱ bi̱ kagu̱ ewáan mbáa ada̱. Á mu a̱ʼgu̱ o ada̱ gakháñuu, xa̱bu̱ bi̱ niʼni gawúunʼ magiʼdoo aʼkhúun ga̱jma̱a̱ asndu maʼni numa̱a̱ ga̱jma̱a̱ vida ndrígóo, “ikhú bi̱ nixíyáa gíʼmaa makhañúu” (atraxnuu Éxodo 21:22, 23). * Dí xóo xtáa rarígá, nandoo nduʼyáá xóo eku̱mu̱u̱ Jeobá índo̱ ndaʼyoo dí mámbá tsiguʼ nundriguíin e̱jñún, mbaʼa nuthu narígá rígi̱ numuu rí nandún muni rí ethi eʼwíínʼ o dí endxaʼwamíjna̱ ma̱ngaa mu musngajma dí ikhiin má eraʼwíí rí muni ga̱jma̱a̱ xuñúnʼ.

17. Xú káʼnii gándoo gumbáyii mbáa a̱ʼgu̱ bi̱ niríguíi a̱ʼdióo nákha xóó tsíjma̱ñuu ikha rí na̱ʼkha̱ náa Dios rá.

¹⁷ Mú, xú káʼnii gáʼni á mu mbáa a̱ʼgu̱ niríguíi a̱ʼdióo nákha xóó tsíjma̱ñuu dí gajkhun ga̱jma̱a̱ numuu Biblia rá. Lá gíʼmaa mandxaʼwáminaʼ rí Dios xágáwíínʼ a̱jkiu̱u̱n kaʼyoo xáʼ. Na̱nguá. Asndu tsáa bi̱ gátanga̱a̱ a̱jkiu̱u̱n ma̱ndoo mbaʼyoo rí Jeobá  maʼni mba̱a̱ a̱jkiu̱u̱n kaʼyoo ga̱jma̱a̱ numuu eʼdiuu dí nixídíí Jesús (Salmo 103:8-14; Efesios 1:7). Mínaʼ má Cristo niʼthí rí “taʼka gandxaʼun xabo tsi jmbun, indo numu xabo tsi nuni aʼkan” mu mata̱nga̱a̱ a̱jkiu̱ún (Lucas 5:32).

18. Ndiéjunʼ eʼni magadíí eʼdi eʼthí náa Biblia rá.

¹⁸ Mú, raʼkháa i̱ndó dí xúʼni̱ gawúunʼ eʼwíínʼ, Jeobá nandoo rí muríyaʼ náa a̱jkiu̱lú dí maguiyulúʼ kuʼyáá mbáa, numuu dí rígi̱ naʼni dí muradímíjná. Apóstol Juan niʼnirámáʼ: “Asndu tsáa bi̱ nawiyuʼ kaʼyoo ndxájuu nindxu̱u̱ asndu xóo naxíyáa” (1 Juan 3:15). Raʼkháa i̱ndó nandoo gáʼthúu̱n rí xáʼndaʼ gáta̱ya̱a̱ xa̱bu̱ rí asndu maʼnda̱ʼ makhañúu. Á mu xúʼko̱, maʼni rí asndu muʼni tsu̱di̱i̱ o muʼthá dí nduwaʼ ga̱jma̱a̱ numuu mbá dí ra̱májánʼ rí asndu kaʼyoo castigo ndrígóo Dios (Levítico 19:16; Deuteronomio 19:18-21; Mateo 5:22). Ikha jngó ndayóoʼ muʼni mbá tsiakii dí muríyaʼ náa a̱jkiu̱lú xúgíʼ dí ra̱májánʼ (Santiago 1:14, 15; 4:1-3).

19. Xú káʼnii ikha ejmañuu náa Salmo 11:5 ga̱jma̱a̱ Filipenses 4:8, 9 mbáa xa̱bu̱ bi̱ naxtáa xó má e̱ʼkha̱ raʼthí ikha ndrígóo Biblia rá.

¹⁹ Á mu nduʼyamajkuíí vida xó má eʼyamajkuu Dios, ga̱jma̱a̱ á mu nandulúʼ rí maʼndoo kaʼyulúʼ má xúʼko̱, xúʼni̱ nimbá rí asndu maʼni mugiʼdulú. Náa Salmo 11:5 naʼthí rí Jeobá “nawiyuʼ kaʼyoo asndu tsáa bi̱ naniguuʼ maxmínaʼ”. Mú ajngáa rígi̱ raʼkháa i̱ndó nasngájma xóo eku̱mu̱u̱ Dios; ma̱ngaa naniñulú mbuʼyááʼ mbá ikha dí maxná ikhulú: Xí nandulúʼ kuʼyáá Dios xúʼni̱ nimbá rí muʼni gagimijná náa maʼni manigulúʼ dí nuxmijná xa̱bu̱. Xúʼko̱ má índo̱ nuraxnuu dí Jeobá nindxu̱u̱ mbáa “Dios bi̱ naxná rí tsímáá”, najmañulúʼ dí gíʼmaa mundxaʼwamíjna̱lú ga̱jma̱a̱ muʼthán a̱jkiu̱lú mbawíí dí májánʼ, dí naʼni marigá gamajkhu ga̱jma̱a̱ dí tsímáá (atraxnuu Filipenses 4:8, 9).

20-22. Xú káʼnii eguájun jmbu cristianos náa numbaaʼ, ga̱jma̱a̱ náa numuu rá.

²⁰ Dios ndaʼyoo dí numbaaʼ ndrígóo Satanás nagudíin mbaʼin xa̱bu̱ bi̱ nda̱a̱ aʼkhún. Náa Escrituras naʼthí rí Xa̱bu̱ Ñajunʼ ndrígu̱ún ni̱ndxu̱ún xóo xujkhúʼ bi̱ najmanguunʼ wéñuʼ, bi̱ nuradíin mbaʼin wéñuʼ xa̱bu̱, tikhun dí ikhiin ni̱ndxu̱ún xa̱bi̱i̱ Jeobá (Daniel 8:3, 4, 20-22; Revelación 13:1, 2, 7, 8).  Mbaʼin xa̱bu̱ bi̱ nagujua̱ ga̱jma̱a̱ científicos numbañún políticos mu muni ajua̱nʼ rí itháan gamíi, xúʼko̱ nakhánun itháan mbújkha̱a̱. Xó má eʼyáá: “Náa xúgíʼ numbaaʼ rígá tsiakii ndrígóo Gixa̱a̱” (1 Juan 5:19).

²¹ Mú bi̱ nagún tsu̱du̱u̱ Jesús nda̱a̱ aʼkhún numuu dí tséradíin xa̱bu̱, gaʼne má mbáwíi o mbaʼin. Náa numuu rá. Numuu dí ‹rañájúnʼ› náa numbaaʼ, ikha jngó naguáju̱n jmbu tsémbañún político ga̱jma̱a̱ tséyambáá náa guerra (Juan 15:19; 17:16). * Ma̱ngaa índo̱ nuxkúún, nduyaridáá Cristo ga̱jma̱a̱ tsétangi̱i̱n muniu̱u̱ dí ra̱májánʼ, dí nuni, nandún kuñún xa̱bu̱ bi̱ sia̱nʼ gajmiún, asndu nutajkháan ga̱jma̱a̱ numún (Mateo 5:44; Romanos 12:17-21).

²² Bi̱ phú ñajúnʼ cristianos tsendawamíjná náa “Babilonia ri ñajun xuajin apa”, religión dí ragájkhun dí rígá náa xúgíʼ numbaaʼ, mbá organización bi̱ itháan gíʼdoo aʼkhúun dí nakháñun mbaʼin xa̱bu̱. Náa Escrituras naʼthí rí “ikhí nigadíí eʼdi  ndrígu̱ún gaʼyee ga̱jma̱a̱ ndrígu̱ún santos ga̱jma̱a̱ xúgínʼ bi̱ nikháñun náa tsu̱du̱u̱ ku̱ba̱ʼ”. Ikha jngó Dios naʼthúlúʼ: “Agajnáʼla ikhí xuajñunʼ” (Revelación 17:6; 18:2, 4, 24).

23. Ndiéjunʼ eyoo gáʼthi dí magajnáʼ náa Babilonia rí ñajunʼ xuajen apha rá.

²³ Bi̱ naʼnimbo̱o̱ xtángoo rí magajnáa náa Babilonia rí ñajunʼ xuajen apha nindxu̱u̱ rí xakudaminaʼ nditháan náa religión dí ragájkhun. Ma̱ngaa nandoo gáʼthúu̱n rí nawiyuʼ kaʼyoo xúgíʼ dí xkawiʼ dí xtáa raʼni o náa naxkaxi̱i̱n xa̱bu̱ dí muxudami̱jna̱ aʼkhá gajmiún mbáa, dí mundawamíjna̱ náa política ga̱jma̱a̱ dí maʼndún maguaʼdáá wéñuʼ (atraxnuu Salmo 97:10; Revelación 18:7, 9, 11-17). ¡Ra̱ʼkhá tháán eradimíjna xa̱bu̱ ga̱jma̱a̱ numuu rí naʼni Babilonia!

24, 25. Ndiéjunʼ ejmuu Jeobá mu magáwíinʼ a̱jkiu̱u̱n kaʼñún xa̱bu̱ bi̱ natanga̱a̱ a̱jkiu̱ún bi̱ nixiyáa mbáa xa̱bu̱, ga̱jma̱a̱ ndiéjunʼ nirígá náa xuajen Israel ga̱jma̱a̱ numuu rígi̱ rá.

²⁴ Nákha xóó tsiniʼnúʼ religión dí gajkhun, xúgiáanʼ niruguambáá náa numbaaʼ rí naʼtáñajunʼ Satanás. Ikha jngó asndu mangáanʼ niʼni maguaʼdáá aʼkhúlúʼ. Mú niriʼkhuu rí xóo eʼnilú, nusngajmá fe náa tsigijñaʼ ndrígóo Cristo ga̱jma̱a̱ nixnaxímíjná náa Dios. Xúgi̱ kaʼnii egáwíínʼ a̱jkiu̱u̱n kaʼyulúʼ ga̱jma̱a̱ nañewu̱nlú mu mambaxúlúʼ gajmiúlú (Hechos 3:19). Xó má gúʼyáá xúgi̱, nambánii ga̱jma̱a̱ xuajen náa nixtambáñun nákha wajyúúʼ (Números 35:11-15; Deuteronomio 21:1-9).

²⁵ Náa ejmaa xuajen rúʼko̱ rá. Náa ma̱ndoo mixtambáyii israelita bi̱ tsexíyáa kiejunʼ mbáa ga̱jma̱a̱ nagáyúu mu ma̱ndoo makríyaaʼ. Índo̱ na̱jkha̱nú náa mbá xuajen rígi̱, Xa̱bu̱ Ñajunʼ nunimbaníí xkujndu ndrígóo ga̱jma̱a̱ gíʼmaa maxtáa ikhí asndu índo̱ gakháñuu ndxajkun, nda̱wa̱á maʼga̱ asndu náa má eyoo. Dí nirígá rígi̱ Dios nisngájma kaʼwu rí nagáwíínʼ a̱jkiu̱u̱n ga̱jma̱a̱ ndaʼyoo rí gíʼdoo wéñuʼ numuu vida ndrígóo xa̱bu̱. Ndiéjunʼ nindoo gáʼthúu̱n xuajen náa nixtambáñun xa̱bu̱ bi̱ na̱nguá niradíin kiejunʼ eʼwíínʼ rá. Nindxu̱u̱ awan rí xóo eñawunlú Jeobá rí mbiʼi xúgi̱. Xú káʼnii rá. Jeobá najmuu tsigijñaʼ ndrígóo Cristo mu mañawunlú dí nakháñulú  dí kaʼyulúʼ numuu rí asndu tséʼyáá xú enujngoramulú xtángoo ndrígóo Jeobá ga̱jma̱a̱ numuu vida ma̱ngaa eʼdi. Xú káʼnii esngajmá dí nduʼyamajkuíí awan rígi̱ rá. Mbóo dí ma̱ndoo muʼni nindxu̱u̱ dí muʼthúún xa̱bu̱ maguwáʼ náa xuajen náa mumbáyumíjná. Rígi̱ rí ndayóoʼ maguma itháan nacha̱, numuu rí na̱ʼkha̱nú itháan mijngii gaʼkhu rí majphú mba̱a̱ marigá (Mateo 24:21; 2 Corintios 6:1, 2).

26-28. Xú káʼnii embánii mbiʼi dí nixtáa Ezequiel ga̱jma̱a̱ mbiʼi dí kuwáanʼ ikháanʼ, ga̱jma̱a̱ xú káʼnii gándoo guʼni mu ma̱ndoo kaʼyulúʼ má xúʼko̱ Dios rá.

²⁶ Rí mbiʼi xúgi̱, xuajñu Dios gíʼdoo mbá ñajunʼ rí nambánii ga̱jma̱a̱ ñajunʼ rí nigiʼdoo Ezequiel, gaʼyee bi̱ nigíiʼ Jeobá mu mañewu̱u̱n xuajen ndrígóo Israel dí makuwá májánʼ náa inuu Dios. Ikhaa nijuiʼtháán rígi̱: “Gíʼmaa matadxawíín ajngáa ga̱jma̱a̱ maratamúʼún ga̱jma̱a̱ numuʼ”. Á mu Ezequiel tséʼnimbánuu ñajunʼ ndrígóo, ikha kaʼyoo maʼni numa̱a̱ eʼdiún índo̱ Dios gánda̱ʼa̱a̱ cuenta náa xuajen Jerusalén (Ezequiel 33:7-9). Mú, xó má eʼyáá, gaʼyee niʼnimbánuu ñajunʼ ndrígóo ga̱jma̱a̱ tágiʼdoo aʼkhúun numuu rí nikháñun xa̱bu̱.

²⁷ Xájyúuʼ má numbaaʼ ndrígóo Satanás maʼga̱nú mambáa. Ikha jngó, bi̱ nutaraʼa numuu Jeobá nduʼyáá xóo mbá gamajkhu ga̱jma̱a̱ nduʼyáá rí gíʼmaa miʼtáraʼa “mbiʼi dí manda̱ʼa̱ cuenta Dios” ga̱jma̱a̱ muʼtáraʼa numuu Reino (Isaías 61:2; Mateo 24:14). Lá nuʼni ga̱jma̱a̱ gagi ñajunʼ rígi̱ ráʼ. Xúʼko̱ niʼni Pablo, ikha jngó niʼthí: “Naraguʼdoʼ aʼkunʼ naʼ inaʼla mba xuguianʼla xi majañaʼla asjndo jamu. Numu ri mba xugui consejo drigo Dios nitanʼla, nitan tarkaʼu” (Hechos 20:26, 27). Nindxu̱u̱ mbá xkri̱da dí ma̱ndoo mbuʼyaridáá.

²⁸ Mu Anu̱lú ma̱ndoo kaʼyulúʼ má xúʼko̱ raʼkháa i̱ndó ndayóoʼ mbuʼyamajkuíí vida ga̱jma̱a̱ eʼdi xó má eʼyoo ikhaa. Xó má gúʼyáá náa imbo̱o̱ capítulo, ndayóoʼ dí manindxu̱lúʼ santos o mikaʼwáanʼ náa iduu.