Rí matrugua ndrígáʼ mu maku̱ma̱ʼ rí xtaa ratabáaʼ ga̱jma̱ʼ mbáa nindxu̱u̱ mbá vicio rí naʼni dí ní xáraxtaa májánʼ náa iduu Dios, naʼni rí matandxaʼwamínáʼ i̱ndó ga̱jma̱a̱ numaʼ ikháánʼ ga̱jma̱a̱ naʼni rí ní xatatsaʼwamínáʼ májánʼ. Bi̱ nuni rígi̱ asndu maguánu mbuñún eʼwíínʼ xóo juguete. Nánguá ebúnʼ numuu rí nandún kuyamijná ga̱jma̱a̱ índo̱ nuruguami̱jna̱ naʼni rí makuwá gagi mbégu̱ʼ ma̱ngaa naʼni rí nixáguaʼa mubúúnʼ. Mú mbégu̱ʼ exiín. Rí matrugua ndrígáʼ mu maku̱ma̱ʼ rí xtaa ratabáaʼ ga̱jma̱ʼ mbáa tséʼni maxa̱a̱ rí nagua̱ʼa̱ maʼni xuyaʼ rí maʼga̱ kañán mataxuʼdáminaʼ aʼkhá ga̱jma̱ʼ mbáa ga̱jma̱a̱ dí mitsaga wéñuʼ; rí naʼni naxkaxi̱i̱n matani itháan (Colosenses 3:5).

Apóstol Pablo niʼnirámáʼ: “Ikha jngó, numuu rí ikháanʼlu kuaʼti̱i̱n rígi̱, ikháanʼ rí nandoʼ ka̱ya̱la, guʼni kaʼwumijnáanʼlu xúgíʼ rí mitsaga rí nagua̱ʼa̱ náa xuwiʼ ga̱jma̱a̱ espíritu, guʼni jmbu̱u̱ má xúʼko̱ rí kaʼwu numuu rí nduʼyamajkuíí Dios” (2 Corintios 7:1). Tikhun xa̱bu̱, índo̱ najuiʼthún rígi̱ naʼniún mingíjyúuʼ wéñuʼ makuwíin mikaʼwu; mú ragíʼmaa muniñaʼ runi tsiakimijna, numuu rí Jeobá xtáa ‹xawii mu maʼni mba̱a̱ a̱jkiu̱u̱n› ga̱jma̱a̱ mu mambáñun (Salmo 86:5; Lucas 11:9-13). Mbáa nguáná magandríguíin mbu̱júu̱, mú nusngajma dí nuni rí májánʼ, índo̱ nundxa̱ʼwa̱a̱ edxu̱ún dí raʼkhí nini ga̱jma̱a̱ nuni tsiakimijna rí muniñaʼ vicio. Nditháan xámbumulú rí “Dios itháan mba̱a̱ ki xóo a̱jkiu̱lú ga̱jma̱a̱ naninuʼ xúgíʼ” (1 Juan 3:20). Índo̱ ikhaa ndaʼyulúʼ, na̱nguá eʼyoo i̱ndó aʼkhá rí nuʼni, ikhaa ndaʼyoo xúgíʼ rí xóo xa̱bu̱ ni̱ndxu̱lú. Numuu rí naninuuʼ májánʼ rí xú káʼnii kuwáanʼlu naʼdxun  índo̱ nuʼtháán rí magáwíinʼ a̱jkiu̱u̱n kaʼyulúʼ. Ikha jngó, ganindxu̱lú xa̱bu̱ guabáanʼ índo̱ guʼtákáñii má xúʼko̱, xó má mbáa ada̱ bi̱ nakuʼmaminaʼ náa anu̱u̱ índo̱ nandoo rí mambáyúu. Jeobá maʼngo̱o̱ maʼni kaʼwu conciencia ndrígúlú (Salmo 51:1-12, 17; Isaías 1:18). Mú raʼkháa i̱ndó ndayóoʼ muʼtájkáan; gíʼmaa muʼni tsiakimijna mu muʼni xó má e̱nda̱ʼa̱ ga̱jma̱a̱ gíʼmaa muniʼñáaʼ rí tsembáyulúʼ, xó má xúgíʼ enii pornografía ga̱jma̱a̱ bi̱ nambáxulúʼ gajmiúlú bi̱ tséni rí májánʼ. *

Á mu mbáa tséʼngo̱o̱ gániñuʼ, ragíʼmaa matiyuʼ maʼtámíjná ga̱jma̱a̱ anu̱u̱, ru̱dúu̱ o imba̱a̱ ndxájulú xa̱biya̱ o ndxájulú a̱ʼgu̱ bi̱ nandxa̱ʼóo májánʼ edxu̱u̱ ga̱jma̱a̱ bi̱ gajkhun naxmiéjunʼ kaʼyoo (Proverbios 1:8, 9; 1 Tesalonicenses 5:14; Tito 2:3-5). *