1, 2. a) Ndiéjunʼ gándoo guraximíjna̱ índo̱ na̱jkua̱ náa ndxa̱a̱ gatsigúnʼ ga̱jma̱a̱ náa numuu rá. b) Ndiéjunʼ graxe̱ gúʼyáá náa capítulo rígi̱ rá.

LÁ NANIGUA̱ʼ ndxa̱a̱ gatsigúnʼ ráʼ. Mbaʼin xa̱bu̱ nanigu̱nʼ, numuu rí mbiʼi rúʼko̱ mitsaan wéñuʼ. Novios nugíʼ mbóo xtíin rí itháan májánʼ, ga̱jma̱a̱ nakujmaa náa inún rí kuwa gagi wéñuʼ. Xúgínʼ nadxún, nduyáá rí makuwá májánʼ wéñuʼ nda̱wa̱á.

² Mú gíʼmaa mbuʼyáá, dí mingíjyúuʼ wéñuʼ makuwá rí mbiʼi xúgi̱ bi̱ nidamijná. Ikha jngó maski ajndu na̱jkua̱ náa narígá gatsigúnʼ, nandulúʼ rí ikhiin makuwá tsímáá, mú nguáná nuraximíjna̱: “Lá makuwá gagi bi̱ nidamijná ga̱jma̱a̱ maʼni kámuu ráʼ.” Makuwá á mu nunimbu̱ún xtángoo rí naxná Dios ga̱jma̱a̱ á mu nuni tsiakimijna munimbánii (atraxnuu Proverbios 3:5, 6). Dí muni tsiakimijna maʼni rí makuwá májánʼ ga̱jma̱a̱ rí Dios maʼndoo kaʼñúún má xúʼko̱. Tséʼniuu á mu ndiʼyáa xa̱bu̱ o xóó, májánʼ gáʼni á mu nduʼyáá xú eriʼña̱a̱ Biblia nájkhu̱ graxe̱ rígi̱: Ndíjkha rí mbuʼyáa xa̱bu̱ rá. Ndiéjunʼ gambáyulú mu mbuʼyáaʼ mbáa xa̱bu̱ mbuʼyáa rá. Xú káʼnii gátani rataminaʼ mu mbi̱ya̱a̱ xa̱bu̱ rá. Ndiéjunʼ gambáñun xa̱bu̱ bi̱ nidamijná mu makuwá májánʼ má xúʼko̱ rá.

3. Tikhun nuthi dí xáraxtaa gagi á mu tséyáa xa̱bu̱, mú ndiéjunʼ niʼthí Jesús ga̱jma̱a̱ Pablo rá.

³ Tikhun xa̱bu̱ nuthi rí mu makuwáanʼ gagi ndayóoʼ mbuʼyáa xa̱bu̱ ga̱jma̱a̱ dí nimbáa xáxtáa gagi á mu tséxkamaa mbáa bi̱ mbayáa. ¡Ragájkhun rúʼko̱! Guʼyáá xkridoo Jesús. Ikhaa tánigúnʼ ga̱jma̱a̱ niʼthí dí nindxu̱u̱ mbá regalo dí maraxtaa mbáwíín ma̱ngaa niʼthí rí á mu naʼngo̱o̱ maxtáa mbáwíi mbáa xa̱bu̱  ma̱ndoo má xánigúnʼ o xánujunʼ (Mateo 19:11, 12). Apóstol Pablo ma̱ngaa niʼthí xú káʼnii embáyulú rí xúʼyáa xa̱bu̱ (1 Corintios 7:32-38). Ni má Pablo ni má Jesús na̱nguá nithi rí gíʼmaa maʼni tsiakii rígi̱; náa Biblia naʼthí rí á mu mbáa tsíniñanʼ mataniʼgúnʼ o matanujúnʼ nindxu̱u̱ mbá “kiʼsngáa ndrígu̱ún xa̱bu̱ wéñiʼ” (1 Timoteo 4:1-3). Bi̱ xóó tsinigúnʼ, bi̱ xóó tsinújunʼ nandoo nuni itháan káxi̱ ñajuunʼ Jeobá. Mú xándoo mataniʼgúnʼ o matanujúnʼ numuu dí eʼwíínʼ nutha̱nʼ matani.

4. Ndíjkha rí bi̱ nidamijná ma̱ndoo munimbani̱i̱ e̱jñún rá.

⁴ Mú, lá rígá mbá numuu mu mbi̱ya̱a̱ xa̱bu̱ ráʼ. Xúʼko̱. Dí mbi̱ya̱a̱ xa̱bu̱ nindxu̱u̱ regalo dí nixná Dios náa naʼni marigá dí májánʼ ma̱ngaa naʼni rí xa̱bu̱ makuwá gagi wéñuʼ (atraxnuu Génesis 2:18). Á mu narígá xígi̱, ma̱ndoo munimbani̱i̱ e̱jñún, numuu dí ikhiin ndayóoʼ makuwá náa mbá guʼwá rí anu̱ún ga̱jma̱a̱ rudún maʼndún kuñún, muxnún ikha ga̱jma̱a̱ muxprigún (Salmo 127:3; Efesios 6:1-4). Mú rígá i̱ʼwáʼ numuu mu matraʼwi̱i̱ mbi̱ya̱a̱ xa̱bu̱.

5, 6. a) Xó má eʼthí Eclesiastés 4:9-12, ndiéjunʼ dí májánʼ gakhánun bi̱ nambáxu̱u̱n májánʼ rá. b) Xú káʼnii gándoo gánindxu̱ún bi̱ ninigu̱nʼ xóo ñuu rí ajtsú xkudiuu rá.

⁵ Guʼyáá contexto ndrígóo versículo rí kayá edxu̱u̱ náa capítulo rígi̱: “Itháan májánʼ dí a̱jmi̱i̱n ki xó mbáwíi, numuu rí mba̱a̱ gakhánun bi̱ nuñajunʼ gakhii. Á mu mbáa dí ikhaa naxpátri̱ga̱a̱, imba̱a̱ ma̱ndoo makuxi̱i̱ ndxájuu. Mú ndiéjunʼ gágíʼnuu bi̱ xtáa mbáwíi índo̱ gáxpátri̱ga̱a̱ ga̱jma̱a̱ nda̱wa̱a̱ imba̱a̱ bi̱ makuxi̱i̱ xá. Ma̱ngaa, á mu nunuʼ a̱jmi̱i̱n, ikhú naʼni rí xákrámunʼ; mú xú káʼnii gándoo gágiga̱a̱ á mu dí mbáwíí xá. Rí mbáwíi xa̱bu̱ ma̱ndoo mandáti̱go̱o̱, dí a̱jmi̱i̱n xa̱bu̱ ma̱ndoo maguajún gujkhuʼ. Ga̱jma̱a̱ rí ajtsú ñuu xutu nacha̱” (Eclesiastés 4:9-12).

⁶ Versículo rígi̱ naʼthí ga̱jma̱a̱ numún xa̱bu̱ bi̱ nambáxu̱u̱n. Mú, lá ma̱ndoo majmulúʼ texto rígi̱ mu muʼthá ga̱jma̱a̱ numún bi̱ nidamijná ráʼ. Xúʼko̱, numuu rí nambáxu̱u̱n itháan mijngii ga̱jma̱a̱ nandoo numbayumíjná, nuxnamijná tsiakii ga̱jma̱a̱ nuñeumi̱jna̱ xó má eʼthí texto rígi̱. Mu  makuwá májánʼ xa̱bu̱ bi̱ nidamijná, gíʼmaa marigá imbo̱o̱ rí mambáñun. Xúʼko̱ maʼni xóo mbá ñuu dí gíʼdoo ajtsú xkudiuu rí kambróʼoo, xó má eʼthí náa Eclesiastés, dí itháan naʼngo̱o̱ ki xóo dí a̱jma̱ xkudiuu. Ndiéjunʼ nindxu̱u̱ dí maʼni ajtsú xkudiuu dí naʼni maʼngo̱o̱ rá. Ikhaa nindxu̱u̱ Jeobá. Índo̱ ikhaa naxtáa náa bi̱ nidamijná ga̱jma̱a̱ nájmi̱i̱n nuni tsiakimijna muni rí naniguuʼ, nakuwa itháan kambáxu̱u̱n.

7, 8. a) Xú káʼnii xtágabu nixnúún Pablo cristianos bi̱ ndajkuíin bi̱ naʼniún mingíjyúuʼ murikháá rí maʼndún mubúúnʼ gajmiún mbáa rá. b) Ndiéjunʼ gúraʼníí bi̱ nidamijná eʼthí náa Biblia rá.

⁷ I̱ndó bi̱ nidamijná ma̱ndoo mubúúnʼ. I̱ndó ikhiin kaʼñúún makuwá gagi ga̱jma̱a̱ numuu rígi̱ (Proverbios 5:18). Rígá tsiguʼ dí ra̱ʼkhá tháán eyaʼ mataba̱ʼ ga̱jma̱ʼ mbáa. Ikha jngó, ndiéjunʼ gándoo gúni bi̱ xóó tsédiin xa̱bu̱ ga̱jma̱a̱ nánguá kuwa náa tsiguʼ rúʼko̱ rá. Á mu tséʼgu̱u̱n gúrikháá rí mubúúnʼ gajmiún mbáa asndu migamíi maʼga̱ kagui̱i̱n muxudami̱jna̱ aʼkhá, Pablo nijuiʼtháán maʼnirámáʼ xtágabu rígi̱: “Mú á mu tséʼngala gurikháá rí mubalaʼ, guniʼgúnʼ o gunujúnʼ, numuu rí itháan májánʼ rí mudamijná ki xóo rí majngruigala mijkháanʼ” (1 Corintios 7:9, 36; Santiago 1:15).

⁸ Bi̱ nandún mudamijná ndayóoʼ mbuyáá dí gúraʼníí. Pablo niʼthí rí “bi̱ gúdamijná maguaʼdáá xkujndu” (1 Corintios 7:28). Numuu dí maguáʼdáá xkujndu dí tséraʼníí bi̱ kuwa ndajkuíin. Á mu mbáa nandoo mbayáa xa̱bu̱, xú káʼnii gándoo gúni mu xaguaʼdáá wéñuʼ xkujndu ga̱jma̱a̱ muguaʼdáá itháan dí májánʼ xá. Mbá dí mayambáá nindxu̱u̱ rí mbuyáaʼ májánʼ bi̱ mbu̱ya̱a̱.

9, 10. a) Xú káʼnii xkri̱da nijmuu Pablo rá. b) Ndiéjunʼ egíʼnii bi̱ nanújngorámúnʼ xtágabu rí na̱ʼkha̱ náa Biblia ga̱jma̱a̱ ndu̱ya̱a̱ mbáa bi̱ tséniʼniiʼ Dios rá.

⁹ Dios niʼthúu̱n Pablo rí maʼnirámáʼ mbá ikha rí phú ndayóoʼ muni bi̱ nduyáaʼ mbáa bi̱ munigu̱nʼ o munujunʼ gajmiún. Nijmuu mbá xkri̱da ndrígu̱ún xa̱bu̱ bi̱ nudu, ikhú niʼthí: “Xúnigúnʼ o xúnujúnʼ gajmiála xa̱bu̱ bi̱ tseniʼniiʼ Dios” (2 Corintios 6:14). Ndiéjunʼ erígá índo̱ nutamaʼ yoko náa  edxu̱ún xujkhúʼ mu magún ku̱ñu̱u̱n arado rá. Á mu dí mbáa itháan mba̱a̱ o migújkhuiiʼ, nájmi̱i̱n tséñajunʼ májánʼ ga̱jma̱a̱ numíniiʼ. Ga̱jma̱a̱ ikháá má erígá índo̱ mbáa cristiano bi̱ ndayáa mbáa xa̱bu̱ bi̱ tseniʼniiʼ Dios. Narígá xkujndu, numuu rí tsimbánii dí eraʼwíí muni: Mbáa naxmiéjunʼ maʼndoo kaʼyoo wéñuʼ Dios, ga̱jma̱a̱ imba̱a̱ na̱nguá eʼyoo dí gíʼdoo numuu. Mbáa maʼni rí nájmi̱i̱n xákuwa gagi. Ikha jngó Pablo niʼthún rí mudamijná “i̱ndó náa Señor” (1 Corintios 7:39).

¹⁰ Mú tikhun kuwa gíná numuu rí ndajkhuíín rí asndu nakumu̱ún rí makuwá májánʼ á mu nunigu̱nʼ o nunuju̱nʼ gajmiún “xa̱bu̱ bi̱ tseniʼniiʼ Dios”. Nguáná nanújngorámunʼ xtágabu rí na̱ʼkha̱ náa Biblia ga̱jma̱a̱ naguánu nudiin bi̱ tséni ñajunʼ Jeobá. Mú na̱jkha̱nú narígá dí gíná. Nda̱wa̱á naguánu nduyáá dí ndi̱ya̱a̱ mbáa bi̱ rakáʼyoo mbu̱ya̱a̱ bi̱ xándoo muni gajmiún rí itháan gíʼdoo numuu, ikha jngó nda̱wa̱á naʼni rí makuwá itháan gíná ki xóo nákha ginii. Mú mbaʼin wéñuʼ cristianos tsejngutíguíin mu muni xígi̱ kaʼnii, numuu rí nakumu̱ún kuyáá Jeobá ga̱jma̱a̱ nunimbu̱ún káxi̱ náa ikhaa (atraxnuu Salmo 32:8). Nakuwa má xúʼko̱ ndajkuíín, nuguaʼti̱i̱n rí nda̱wa̱á muxkamaa mbáa bi̱ mbu̱ya̱a̱ náa awúu̱n xuajñu Dios.

11. Ndiéjunʼ rígá mambáyulúʼ mu mbuʼyáaʼ bi̱ muniʼgúnʼ o munujúnʼ gajmiúlú rá. (Atayáá ma̱ngaa náa kúgumaʼá rí “ Dí phú mambáyaʼ mu matraʼwíí májánʼ.”)

¹¹ Mu mataʼyáaʼ mbáa bi̱ mbi̱ya̱a̱ raʼkháa i̱ndó ndayóoʼ maʼni ñajuunʼ Jeobá. Gíʼmaa rí maʼni mbeʼtíín, rí maʼndún muni mbríguu ñajunʼ Dios ga̱jma̱a̱ rí maʼndún kuyáá Dios. Ñumbáá tsí jmbii nuxna mbaʼa xtágabu rí na̱ʼkha̱ náa Biblia ga̱jma̱a̱ numuu rígi̱, ikha jngó májánʼ gáʼni maratajkháan mu ma̱ta̱ya̱a̱ rígi̱ ga̱jma̱a̱ nda̱wa̱á matatsiʼñáminaʼ maxnáʼ ikha (atraxnuu Salmo 119:105). *

12. Xú káʼnii eñíinʼ bi̱ mudiin e̱jñún náa mbaʼa xuajen, ga̱jma̱a̱ náa guaʼyaa xkri̱da rí na̱ʼkha̱ náa Biblia nayambáá índo̱ narígá xúʼko̱ rá.

¹² Náa mbaʼa xuajen, costumbre ndrígu̱ún xa̱bu̱ guanii nindxu̱u̱ dí ikhiin eñíinʼ bi̱ mudiin e̱jñún. Numuu rí xa̱bu̱ guanii  nduyáá itháan ga̱jma̱a̱ najmañún. Xúʼko̱ má nirígá nákha wajyúúʼ eʼthí Biblia, nakuwa itháan májánʼ bi̱ nidamijná índo̱ narígá xúʼko̱. Xa̱bu̱ guanii bi̱ gajkuáa ñawúunʼ muni rúʼko̱ dí ra̱ʼkhá tháán gíʼdoo numuu ma̱ndoo mbuyaridáá Abrahán. Índo̱ niʼthí rí mbayáaʼ a̱ʼgiu̱u̱ Isaac, na̱nguá ndiʼyoo á mu dxáʼgú gíʼdoo mbújkha̱a̱ o mbá ñajunʼ májánʼ. Nijmiuu xa̱bu̱ bi̱ nañajunʼ náa ikhaa mu mbayáaʼ mbáa a̱ʼgu̱ bi̱ ndaʼyamajkuu Jeobá (Génesis 24:3, 67). *

13-15. a) Xú káʼnii embáyúu Proverbios 24:27 dxámá bi̱ nandoo manigúnʼ rá. b) Xú káʼnii gándoo mbá a̱ʼgu̱ gáʼnirataminaʼ mu manújunʼ rá.

¹³ Á mu kuwáanʼ rundxa̱ʼwa̱míjna̱ dí muniʼgúnʼ o munujúnʼ, gíʼmaa muraxi̱mi̱jna̱: “Lá gajkhun xtáá xawii ráʼ.” Dí maxtiʼña̱a̱ raʼkháa i̱ndó nandoo gáʼthúu̱n rí maʼnda̱ʼ xtayáá mbáa, rí mataba̱ʼ ga̱jma̱ʼ, rí xáku̱ma̱ʼ rí xtaa mbáwíín o maraʼdiin e̱ji̱n. Itháan májánʼ gáʼni dí ma̱ta̱ya̱a̱ ginii ndiéjunʼ gátani.

¹⁴ Gundxaʼwamíjna̱ náa mbáa ndxáma bi̱ nda̱yáaʼ mbáa a̱ʼgu̱ mbayáa. Gíʼmaa mandxaʼwáminaʼ náa versículo rígi̱: “Atani májáánʼ ñajunʼ rí xtaʼdáá ga̱jma̱a̱ atiejunʼ xanáá. Nda̱wa̱á gíʼmaa matani guʼwáaʼ” (Proverbios 24:27). Ndiéjunʼ eʼsngúlúʼ texto rígi̱ rá. Xó má eʼthí Biblia, bi̱ naríyaʼ awan ‹maʼni goʼwóo›, nandoo gáʼthúu̱n dí mbayáa xa̱bu̱, gíʼmaa maraximínáʼ: “Lá xtáá xawii mu mañewu̱u̱n, maxnu̱u̱ rí ndayóoʼ mbáa a̱ʼgu̱ ga̱jma̱a̱ e̱ji̱n bi̱ gakuwa ráʼ.” Nákha xóó tsínigúnʼ, ndiyóoʼ má dí mañajunʼ. Ikháá má ikha eyóoʼ munimbaníí jiáma rí mbiʼi xúgi̱. Á mu nandún munigu̱nʼ, gíʼmaa muniratamijná mu munimbaníí ñajunʼ rí kaʼñún muni. Á mu tséʼniún nandii, gíʼmaa dí muñajunʼ. Náa Ajngá rawunʼ Dios naʼthí rí xa̱biya̱ bi̱ tséxnún rí nda̱ñúnʼ bi̱ kuwa náa goʼwóo, bi̱ tséʼyoo xú káʼnii endxaʼwamíjna̱ ga̱jma̱a̱ tsémbáñún makuwá májánʼ náa inuu Dios nindxu̱u̱ mbáa xa̱bu̱ itháan ra̱májánʼ ki xóo bi̱ ragíʼdoo fe (atraxnuu 1 Timoteo 5:8).

 ¹⁵ A̱ʼgu̱ ma̱ngaa gíʼmaa maʼni rataminaʼ mu maʼnimbánuu dí kaʼyoo maʼni. Náa Biblia nasngájma rí xú káʼnii xa̱bu̱ gíʼmaa mani̱ndxu̱u̱ ga̱jma̱a̱ rí eyóoʼ maʼni mu mambáyúu ajmbio̱o̱ ga̱jma̱a̱ mu mañewu̱u̱n (Proverbios 31:10-31). Bi̱ nanigúnʼ o nanújunʼ nacha̱, i̱ndó nandxa̱ʼwáminaʼ ga̱jma̱a̱ numuu ikhaa. Náa numuu rá. Numuu rí tséndxaʼwáminaʼ ndiéjunʼ gáxnúu bi̱ mbayáa nda̱wa̱á. Rí phú itháan gíʼdoo numuu náa xa̱bu̱ bi̱ mudamijná nindxu̱u̱ rí muniratamijná mu mugíʼ mambaxúún gajmiún Dios. Guʼyáá ndiéjunʼ eyoo gáʼthúu̱n.

16, 17. Náa guaʼyaa ikha dí na̱ʼkha̱ náa Biblia gíʼmaa mundxaʼwamíjna̱ bi̱ kúwi̱i̱n runiratamijná rí munigu̱nʼ o munuju̱nʼ rá.

¹⁶ Timbá, xa̱biya̱ ga̱jma̱a̱ a̱ʼgu̱ gíʼmaa mundxaʼwamíjna̱ ndiéjunʼ gíʼthu̱u̱n Dios muni índo̱ gúdamijná. Xa̱biya̱ gíʼmaa mbaʼyoo májánʼ ndiéjunʼ ñajunʼ gágiʼdoo xóo bi̱ kayá edxu̱u̱ náa mbá guʼwá. Xándoo maʼni gíníi bi̱ kuwa náa goʼwóo numuu rí ikhaa kayá edxu̱u̱, gíʼmaa mbaʼyaridoo Jesús índo̱ nayéjkha̱ edxu̱u̱ (Efesios 5:23). Xúʼko̱ má mbáa cristiana gíʼmaa makro̱ʼo̱o̱ xúgíʼ ñajunʼ dí magiʼdoo. Ikha jngó, májánʼ gáʼni rí maraximínáʼ: “Lá xtáá xawii mu manimbooʼ dí gáʼthi ajmbioʼ ráʼ.” (Romanos 7:2). Bi̱ xóo tsínújúnʼ xtáa má ranimbánuu xtángoo ndrígóo Jeobá ga̱jma̱a̱ ndrígóo Cristo (Gálatas 6:2). Á mu nanújúnʼ gíʼmaa dí maʼnimbánuu i̱mba̱ xtángoo: Dí naʼtáñajunʼ ajmbio̱o̱. Mbu̱júu̱ gíʼmaa maraximínáʼ: “Lá maʼngoʼ manimbánuu dí gáʼthi mbáa xa̱bu̱ aʼkhá ga̱jma̱a̱ mambáyúu asndu xó má eʼngoʼ ráʼ.” Á mu xániguuʼ manimbánuu rúʼko̱, xóó na̱nguá xtáa xawii mu manújúnʼ.

¹⁷ Ma̱ngaa bi̱ gánigúnʼ o bi̱ gánújúnʼ, gíʼmaa maxtáa xawii mu mbaʼyoo ndiéjunʼ eyóoʼ bi̱ ndiyáa, maski ajndu mixtiʼkhu dí eniguuʼ ikhaa (atraxnuu Filipenses 2:4). Pablo niʼnirámáʼ: “Mámbáa dí ikháanʼ, gaʼndoo kaʼyoo a̱ʼgiu̱u̱ xó má eyoo kaʼyaminaʼ ikhaa; xúʼko̱ má a̱ʼgu̱ gíʼmaa mbaʼyamajkuu wéñuʼ ajmbio̱o̱”. Xó má eʼyáá apóstol niʼni makro̱ʼo̱o̱ ga̱jma̱a̱ xi̱ʼ ndrígóo Dios rí bi̱ xa̱biya̱ gíʼmaa maku̱mu̱u̱ rí nduyamajkuíí, xó má a̱ʼgu̱ maku̱mu̱u̱ rí nandún kuyáá (Efesios 5:21-33).

18. Náa numuu rí gíʼmaa matiewumínaʼ índo̱ gajngruigaʼ ga̱jma̱ʼ mbáa rá.

¹⁸ Dí mani̱ndxu̱ún novios ragíʼmaa mbuyáá xóo mbá  gatsíjma. Índo̱ rí najngrui̱gu̱u̱n gíʼmaa rí muniʼnumijná ga̱jma̱a̱ mbuyáá á mu májánʼ gáʼni rí mudamijná. Ma̱ngaa, índo̱ jngruigu̱u̱n gíʼmaa muñewamíjna̱ mu xúni̱ dí raʼkhí. Náa numuu rá. Numuu dí ra̱ʼkhá tháán enigu̱nʼ kuyamijná rí asndu maʼga̱ kagui̱i̱n muruguami̱jna̱. Á mu gajkhun nandún kuyamijná, xúni̱ nimbá dí maʼni dí xákuwa májánʼ náa inuu Dios (1 Tesalonicenses 4:6). Xúʼko̱, bi̱ nugi̱ʼdi̱i̱ najngrui̱gu̱u̱n gíʼmaa rí muñewamíjna̱, mu mambáñún má xúʼko̱, maski ajndu mudamijná o na̱nguá.

19, 20. Gajmaʼ xkri̱da mu maratha xóo eyáá mbaʼin xa̱bu̱ dí mudamijná ga̱jma̱a̱ xóo gíʼmaa mbuyáá cristianos.

¹⁹ Mu ma̱ndoo makuwá kámuu mbiʼi bi̱ nidamijná gíʼmaa mbuʼyáá dí gíʼdoo numuu rí nuxuda̱mi̱jna̱ muni. Náa novelas ga̱jma̱a̱ náa películas, nakujmaa rí nakuwa tsímáá nda̱wa̱á rí nidamijná. Mú ragájkhun rúʼko̱; nindxu̱u̱ mbá dí ndiʼkhún gi̱ʼdu̱u̱ dí Jeobá niʼni mu mbajyúuʼ (Génesis 2:24). Phú gíná rígá náa numbaaʼ rígi̱ numuu rí mixtiʼkhu endxa̱ʼwa̱a̱ edxu̱ún xa̱bu̱. Náa tikhuu xuajen xa̱bu̱ nuthi rí nindxu̱u̱ xóo matruʼwa̱a̱ mbá ñuu rí ma̱ndoo matrajkuíí índo̱ gáʼndaʼ. Ikhaa rúʼko̱ rí nuni xa̱bu̱.

²⁰ Xúʼko̱, mbaʼin xa̱bu̱ nundxa̱ʼwa̱míjna̱ rí ma̱ndoo muniñami̱jna̱ índo̱ gáʼduun ikhiin. Ikha jngó gagi kuwa índo̱ nudamijná, numuu dí nduyáá rí ma̱ndoo muniñami̱jna̱ índo̱ tsérígá xó má guáʼthi̱i̱n o índo̱ nagi̱ʼdu̱u̱ narígá xkujndu. Mú, ndayóoʼ marmáʼáan a̱jkiu̱lú rí náa Biblia naʼthí rí índo̱ nambáxu̱u̱n a̱jmi̱i̱n xa̱bu̱ bi̱ ninigu̱nʼ nindxu̱u̱ xóo mbá ñuu. Mbaʼa ñuu najmaʼnuʼ numuu rí tsétu nacha̱. Mbá xkri̱da, ñuu dí najmaa náa barco naʼngo̱o̱ tsétu índo̱ naxnúu ruʼwambiiʼ asndu má tsexkuixi̱i̱. Ga̱jma̱a̱ xúʼko̱ má erígá náa xa̱bu̱ bi̱ nidamijná: Jeobá niʼni mu mbajyúuʼ. Garmáʼáan a̱jkiu̱lú rí Jesús niʼthí: “Ri niruhua Dios maxarakuhuaji xabo” (Mateo 19:6). Xúʼko̱ gíʼmaa mundxaʼwamíjna̱ xúgiáanʼ bi̱ ni̱ndxu̱lú cristianos. Lá mingíjyúuʼ rí munimbaníí rígi̱ bi̱ nidamijná ráʼ. Na̱nguá.

21. Ndiéjunʼ gíʼmaa majmañún xa̱bu̱ bi̱ nidamijná, ga̱jma̱a̱ ndiéjunʼ xkri̱da guáʼdáá xá.

 ²¹ Bi̱ nidamijná gíʼmaa dí mbuyamijná xó má gíʼmaa. Á mu mámbáa naʼniminaʼ mbaʼyoo dí xú káʼnii májánʼ xa̱bu̱ nindxu̱u̱ ga̱jma̱a̱ tsiakii dí naʼni, ikhú bi̱ nidamijná makuwá gagi wéñuʼ. Mú, lá ma̱ndoo maguma rúʼko̱ ráʼ. Ma̱ndoo. Jeobá naʼni xúʼko̱ ga̱jma̱a̱ kuaʼti̱i̱n rí ikhaa mbaʼyoo dí májánʼ náa ikháanʼlu. Nundxaʼwamíjná xó má salmista índo̱ niʼthí: “Á mu ikháánʼ natayáá dí nakiéʼkúun mámbáa xa̱bu̱, oh Jeobá,  tsáa gándoo gáxtáa rá.” (Salmo 130:3.) Bi̱ nidamijná gíʼmaa mbuyáá dí nájmi̱i̱n ni̱ndxu̱ún xa̱bu̱ aʼkhá ga̱jma̱a̱ gíʼmaa muni mba̱a̱ a̱jkiu̱ún kuyamijná (atraxnuu Colosenses 3:13).

22, 23. Xú káʼnii xkri̱da niniñuʼ Abrahán ga̱jma̱a̱ Sara náa bi̱ nidamijná rá.

²² Gagi dí guáʼdáá bi̱ nidamijná maʼga̱ rajoo índo̱ gáʼga ranújngoo tsiguʼ. Guʼyáá xkri̱da ndrígóo Abrahán ga̱jma̱a̱ Sara, nájmi̱i̱n niraʼníí mbaʼa xkujndu índo̱ niʼni má guanii. Mbáa Sara nigiʼdoo 60 tsiguuʼ, niʼniuu mingíjyúuʼ maniñuʼ xúgíʼ dí nigiʼdoo náa goʼwóo, náa xuajen Ur náa rígá xúgíʼ, ga̱jma̱a̱ maxtáa náa guʼwá xtíin xúgíʼ mbiʼi asndu gakháñu. Mú niʼni numuu rí niʼnimbo̱o̱ kaʼyoo ajmbio̱o̱ bi̱ kayá edxu̱u̱. Nimbáyúu má xúʼko̱ mu magajnúu májánʼ xúgíʼ dí gúraʼwíí muni. Ikhaa niʼnimbo̱o̱ kaʼyoo ga̱jma̱a̱ xúgíʼ a̱jkiu̱u̱n, numuu rí asndu “náa a̱jkiu̱u̱n” niʼthúu̱n tátá (Génesis 18:12; 1 Pedro 3:6). Ndiʼyamajkuu ajmbio̱o̱ ga̱jma̱a̱ xúgíʼ a̱jkiu̱u̱n.

²³ Gajkhun má dí nájmi̱i̱n na̱nguá nindxa̱ʼwa̱a̱ mbríguu edxu̱ún. Mbóo míʼtsú, Sara nindo̱ʼo̱o̱ Abrahán mbá rí ikhaa “nditháan tániguuʼ”. Mú, niʼnimbo̱o̱ rí niʼthí Jeobá, niʼni guabaminaʼ ga̱jma̱a̱ niʼnimbo̱o̱ rí niʼthí a̱ʼgiu̱u̱, rígi̱ nimbáñun xúgínʼ bi̱ kuwa náa goʼwóo (Génesis 21:9-13). Rí mbiʼi xúgi̱, tséʼniuu má nguáthá mba̱yu̱ʼ kuwa bi̱ nidamijná ma̱ndoo majmañún wéñuʼ náa Abrahán ga̱jma̱a̱ Sara xa̱bi̱i̱ Dios bi̱ nikuwa jmbu.

24. Xóo gíʼmaa makuwíin bi̱ nidamijná mu muxnáá gamajkhu Dios, ga̱jma̱a̱ náa numuu rá.

²⁴ Náa congregación cristiana kúwi̱i̱n mbaʼin wéñuʼ bi̱ nidamijná, náa a̱ʼgu̱ ndaʼyamajkuu ajmbio̱o̱, xa̱biya̱ nandoo kaʼyoo a̱ʼgiu̱u̱, ga̱jma̱a̱ nájmi̱i̱n nuñajunʼ mbríguu mu muni ñajuunʼ Jeobá ki xóo i̱ʼwáʼ ñajunʼ. Ma̱ndoo makuwá gagi bi̱ nidamijná. Á mu ikháánʼ nandaʼ mbi̱ya̱a̱ xa̱bu̱, ma̱ndoo mataʼyáaʼ májánʼ mbáa bi̱ mbi̱ya̱a̱, atani̱rataminaʼ májánʼ ga̱jma̱a̱ atani tsiakimínáʼ mu marigá rí tsímáá ga̱jma̱a̱ gaʼndala kuyamíjna̱ náa guʼwálaʼ. Á mu nakuwa májánʼ bi̱ nidamijná raʼkháa i̱ndó muxnáá gamajkhu Jeobá rí asndu ma̱ngaa nambáñun rí Dios maʼndoo kaʼñúún.