Ra̱ʼkhá tháán gawúnlú índo̱ nagumaa expulsar náa congregación mbáa bi̱ kuʼyáá o mbáa bi̱ nambáxulúʼ gajmiúlú numuu rí tsétanga̱a̱ a̱jkiu̱u̱n náa aʼkhá rí xtáa raʼni. Rí xú káʼnii eriʼña ikháanʼ dí naʼthí náa Biblia ga̱jma̱a̱ numuu rígi̱ masngájma nguáthá eyulú kuʼyáá Dios ga̱jma̱a̱ asndu nguáthá guʼnimbaníí xtángoo dí naxná. * Ikha jngó, guʼyáá tikhuu xkujndu dí maʼga̱nú marigá.

Xóo gátani ga̱jma̱ʼ mbáa expulsado rá. “Guniʼñáanʼ rundáwami̱jna̱, xúʼko̱ má xambáxala gajmiála asndu tsáa bi̱ najuiʼtháán ndxájulú, bi̱ nakudaminaʼ aʼkhá ga̱jma̱a̱ mbáa, o nindxu̱u̱ mbáa bi̱ nandoo magiʼdoo wéñuʼ, o ndaʼyamajkhún xándú, bi̱ naʼthí wéñuʼ eʼwíínʼ, o xa̱bu̱ najnga̱a̱ o mbáa xa̱bu̱ bi̱ naguwikáñúnʼ ga̱jma̱a̱ tsiakii dí guáʼdáá a̱ngiu̱ún, ga̱jma̱a̱ asndu xáphiʼtsu gajmiála xa̱bu̱ buʼko̱.” (1 Corintios 5:11.) Ma̱ngaa Biblia naʼtulúʼ: “[Á mu dí mbáa] naniñuʼ raʼnimbánuu dí niʼsngáa Cristo [...], xúdrígui náa guʼwálaʼ asndu má xúraxi̱i̱. Numuu rí bi̱ naraxi̱i̱ xtáa rambáyúu náa dí raʼkhí eʼni” (2 Juan 9-11). Náa revista La Atalaya rí 15 ñajunʼ gu̱nʼ noviembre tsiguʼ 1981, ináa 19, naʼthí: “Dí maratha̱a̱n ‹¡Xú káʼnii xtaa!› maʼga̱ kañán maratamíjná ga̱jma̱ʼ o mbáa asndu mambaxáʼ ga̱jma̱ʼ. Lá nandulúʼ muʼni rígi̱ gajmiúlú mbáa xa̱bu̱ bi̱ nigumaa expulsar ráʼ.” Índo̱ mbáa bi̱ xtáa náa congregación nagumaa expulsar, nuniʼñánʼ rambáxulú gajmiúlú ma̱ngaa nánguá eʼthámíjná gajmiúlú ga̱jma̱a̱ numuu Dios.

Lá ndayóoʼ muñewamíjna̱ wéñuʼ náa xa̱bu̱ bi̱ nigumiin expulsar ráʼ. Xúʼko̱, rígá mbaʼa numuu. Rí timbá nindxu̱u̱ dí nandulúʼ maguajún jmbu náa Dios ga̱jma̱a̱ náa Ajngá rawunʼ. Nuʼnimbulúʼ má xúʼko̱ náa Jeobá numuu dí nandulúʼ kuʼyáá, maski ajndu índo̱ naʼniulú mingíjyúuʼ. Ma̱ngaa nduʼyáá dí ikhaa nindxu̱u̱ jmbii ga̱jma̱a̱ nandoo kaʼyulú, ga̱jma̱a̱ xúgíʼ xtángoo ndrígóo nindxu̱u̱ dí mambáyulúʼ (Isaías 48:17; 1 Juan 5:3). Raga̱jma̱  numuu nindxu̱u̱ dí xa̱bu̱ bi̱ nikudaminaʼ aʼkhá, bi̱ tsítanga̱a̱ a̱jkiu̱u̱n maʼni gacháanlú. Ikha jngó, índo̱ nuniʼñánʼ rambáxulú gajmiúlú nambáyulúʼ dí xúʼni̱ mbá dí raʼkhí o mbá dí tsénigu̱u̱ʼ Dios, ga̱jma̱a̱ nuyambáá marigá dí mikaʼwu ma̱ngaa rí xútanumáá congregación (1 Corintios 5:6, 7). Ragajtsú numuu nindxu̱u̱ rí mambáyúu má xa̱bu̱ bi̱ nikudaminaʼ aʼkhá. Xú káʼnii rá. Á mu tséniʼñáaʼ ruʼnimbánii ikha rí na̱ʼkha̱ náa Biblia ga̱jma̱a̱ muyambáá dí eraʼwíí maʼni comité judicial mbáa ma̱ndoo mumbayíí bi̱ nikudaminaʼ aʼkhá, bi̱ na̱nguá eniñaminaʼ dí mumbayíí bi̱ kuya̱ edxu̱u̱. Dí maguajún jmbu maʼni dí maʼndoo mata̱nga̱a̱ ga̱jma̱a̱ mariʼkhuu xóo eʼni. Índo̱ gáʼyoo dí nánguá embáxu̱u̱ gajmíi̱n bi̱ kaʼñún, mbáa mandxaʼwáminaʼ xóo xtáa ga̱jma̱a̱ maʼga̱nú mbaʼyoo dí raʼkhí rí niʼni, ikhú maʼni tsiakimínáʼ mata̱nga̱a̱ náa Jeobá (Lucas 15:17).

Á mu bi̱ nigumaa expulsar nindxu̱u̱ mbáa bi̱ kuʼyáá rá. Maʼniulú mingíjyúuʼ maguajún jmbu náa Jeobá á mu dí kuʼyáá. Á mu rí xúʼko̱, xóo gíʼmaa muʼni gajmiúlú xá. Maski ajndu xáʼngo̱o̱ mbuʼyáá xúgíʼ, mbuʼyáá a̱jma̱ dí phú itháan gíʼdoo numuu.

Nguáná bi̱ nigumaa expulsar xtáa gajmíi̱n bi̱ kuwa náa goʼwóo. Numuu rí índo̱ mbáa nagumaa expulsar na̱nguá eyoo gáʼthi dí naniñuʼ ranindxu̱u̱ ndxájuu, anu̱u̱, ru̱dúu̱ o mbáa bi̱ kaʼyoo, ma̱ndoo má mutamijná gajmiún ga̱jma̱a̱ numuu ñajunʼ dí rígá guʼwáá. Mu maguajún jmbu náa Jeobá xándoo muthán ga̱jma̱a̱ numuu ikhaa náa xa̱bu̱ bi̱ nikudaminaʼ aʼkhá, numuu rí xa̱bu̱ bugi̱ niríyaminaʼ nánguá xóo mambaxúu gajmíi̱n a̱ngiu̱lú. Mú ma̱ndoo muniñaaʼ maxtáa índo̱ nunigajmaa mbáa guʼwíin, mú xándoo maʼthí. Á mu dí xóó chíʼgíʼ, anu̱u̱ ga̱jma̱a̱ ru̱dúu̱ ma̱ndoo musngáá ga̱jma̱a̱ numuu Biblia, numuu rí ikhiin kaʼñún musngáá ga̱jma̱a̱ muxpriguíí aʼdiún (Proverbios 6:20-22; 29:17). *

Á mu bi̱ expulsado nánguá xtáa gajmíi̱n bi̱ kuwa náa goʼwóo rá. Cristianos bi̱ naguáju̱n jmbu nunimi̱jna̱ rí ní xámbáxu̱u̱n gajmiún, i̱ndó á mu ndayóoʼ mutamijná ga̱jma̱a̱ numuu xkujndu  dí narígá náa guʼwá. Tséyááʼ mbá rí munindu̱wa̱ʼ mu mambaxúún. Numuu rí nandún maguajún jmbu náa Jeobá ma̱ngaa náa xuajñu, nduyamajkuíí índo̱ Biblia naxprígún. Nandún dí makuwá májánʼ a̱ngiu̱ún, mbáa asndu ma̱ndoo mumbañún bi̱ nindrigú xtágabu á mu naguáju̱n jmbu (Hebreos 12:11). *