GRAXE̱ 10

Lá ma̱ndoo mambáyuʼ ikhúúnʼ Biblia ráʼ.

ATADXUN NÁA AJNGÁA

NDÍJKHA GÍʼDOO NUMUU

Náa Biblia naʼthí rí “xúgíʼ Escritura na̱ʼkha̱ náa Dios” (2 Timoteo 3:16). Á mu gajkhun rígi̱, Biblia ma̱ndoo maxnáʼ ikha rí ndayáʼ.

NDIÉJUNʼ GÁTANI IKHÁÁNʼ RÁ.

Atatsaʼwáminaʼ rígi̱: David na̱jkha̱ ga̱jma̱a̱ carro ndrígóo náa rí ikhaa tsíninuʼ. Índo̱ ndaʼyoo mbiʼyuu calle ga̱jma̱a̱ guʼwá, ndaʼyoo dí raʼkháa ikhí phú gíʼmaa maʼga̱. Nindáti̱ga̱a̱. Mbáa asndu táʼyoo xú káʼnii nijngawa̱a̱n kamba̱a̱.

Á mu ikháánʼ ni̱ndxa̱ʼ David, ndiéjunʼ gátani rá.

ATATSAʼWÁMINAʼ MBÉGU̱ʼ

Xtaʼdáá mbaʼa rí matani:

Matanda̱ʼa̱a̱ mbáa maʼtháanʼ xú káʼnii mi̱dxu̱ʼnú náa eyaʼ.
Ma̱ta̱ya̱a̱ mapa o majmaʼ GPS.
Rí mi̱dxu̱ʼ jchááʼ má xúʼko̱ carro asndu náa mataxkamaa kamba̱a̱ rí edxu̱ʼ.

Nakujmaa kaʼwu rí opción C xáyambáá nditháan.

Rí opción B itháan májánʼ ki xóo rí timbá: Rí maraʼdáá mbá mapa o GPS ma̱ndoo maxnáʼ ikha náa xúgíʼ kamba̱a̱.

Xúʼko̱ má gándoo gambayaaʼ Biblia.

Libro rí itháan naxtangujua ma̱ndoo:

Maxnáʼ ikha índo̱ gátraʼníí xkujndu.
Mambáyaʼ matatsiʼnuminaʼ májánʼ ga̱jma̱a̱ manindxa̱ʼ májáánʼ xa̱bu̱.
Maʼsngááʼ xú káʼnii itháan májánʼ maraxtaa.

NAXTIʼÑA̱A̱ GRAXE̱ RÍ ITHÁÁN GÍʼDOO NUMUU

Asndu índo̱ nugíʼdi̱i̱ nuʼthá nuʼni graxe̱:

Náa numuu rí azul mekhu rá.
Nguáthi̱i̱n a̱ʼgua̱a̱n kuwa rá.

Nda̱wa̱á nigíʼdi̱i̱ niʼni graxe̱ ga̱jma̱a̱ numuu rí xóo kuwáanʼ:

Náa numuu narígá dí ra̱májánʼ ráʼ.
Náa numuu rí nakháñulú rá.

Lá natayáá rí náa Biblia nariʼña̱a̱ graxe̱ rígi̱ ráʼ.

Mbaʼin xa̱bu̱ nuthi rí Biblia na̱ʼkha̱ raʼthí i̱ndó cuentos o rí nindxu̱u̱ mbá libro wayuu ga̱jma̱a̱ rí mingíjyúuʼ makruaʼaʼ. Mú lá gajkhun rúʼko̱ ráʼ. Lá gajkhun rí nuthi ga̱jma̱a̱ numuu Biblia xáʼ. Lá na̱nguá májánʼ niguaʼthún xáʼ.

Mbá xkri̱da, xa̱bu̱ nakumu̱ún rí Biblia naʼthí rí Dios naʼtáñajunʼ náa numbaaʼ. Mú, lá nambánii rígi̱ ráʼ. Numbaaʼ rígi̱ nichúu. Asndu náa nduʼyáá gaʼkhu, rí numíniiʼ, nandii, rí nakháñun xa̱bu̱, tsingíná ga̱jma̱a̱ gamiéjunʼ. Lá gíʼdoo aʼkhúun Dios bi̱ nandoo kaʼyulú ga̱jma̱a̱ numuu xúgíʼ rígi̱ ráʼ.

Lá manigua̱ʼ ma̱ta̱ya̱a̱ tsáa etañajunʼ numbaaʼ rígi̱ ráʼ. Rí nariʼña̱a̱ Biblia maʼni maguanáʼ tsiánguá.

Nitayáá rí náa folleto rígi̱ na̱ʼkha̱ xtágabu rí nigájnuu náa Biblia. Xa̱bi̱i̱ Jeobá nduyáá májánʼ rí náa Biblia naxná ikha májánʼ numuu rí “Escritura na̱ʼkha̱ náa Dios ga̱jma̱a̱ nayambáá mu miʼsngáa, mu maxprígulú, mu maʼni̱i̱ jmbi̱i̱ rí e̱ʼni̱” (2 Timoteo 3:16, 17). Xátanimbáti̱ga̱ rí matatsiʼnuʼ libro wayuu rígi̱ ma̱ngaa rí najmaa wéñuʼ mbiʼi xúgi̱.