GRAXE̱ 3
Xú káʼnii gándoo gatamíjna gajmíi̱nʼ anu̱ʼ rá.
NDIÉJUNʼ GÁTANI IKHÁÁNʼ RÁ.
Atatsaʼwáminaʼ rígi̱: Nindxu̱u̱ mbá mbiʼi miércoles wakhííʼ, Willy, gíʼdoo 17 tsiguʼ, niguámbóo má niʼni tarea ga̱jma̱a̱ ma̱ndoo má mbayáa xu̱ʼ, ikhú naskámuu tele ga̱jma̱a̱ nabóoʼ náa sillón rí naniguʼ.
Ikhú nato̱ʼo̱o̱ anu̱u̱ ga̱jma̱a̱ nakujmaa rí nakiʼnáa.
“¡Wiliam! Ndíjkha rí natanimbáti̱ga̱ mbiʼi natayáá tele rá. Lá na̱nguá eyóoʼ matambáyii giʼtiaʼ ráʼ. ¡Ninguáná tsítani rí niguaʼtáanʼ!”.
“Mbu̱júu̱ʼ”, naʼthí Willy mañúú.
Anu̱u̱ na̱ʼkha̱ mijngii ga̱jma̱a̱ naraxu̱u̱: “Ndiéjunʼ niratá”.
“Nda̱a̱ má”, eʼthí Willy asndu misia̱nʼ inu.
Anu̱u̱ nakiʼnáa wéñuʼ. “¡Má xáratunʼ xkuaʼnii!”, eʼthúu̱n.
Á mu ikháánʼ ni̱ndxa̱ʼ Willy, ndiéjunʼ gátani mu xáraʼdáá xkujndu rúʼko̱ rá.
ATATSAʼWÁMINAʼ MBÉGU̱ʼ
Á mu na̱dxu̱ʼ jchááʼ mbá carro ga̱jma̱a̱ natayáá rí carretera nigugoo, natayááʼ imbo̱o̱ kamba̱a̱. Xúʼko̱ má kaʼnii, ma̱ndoo mataʼyááʼ i̱mba̱ xóo maratamíjná gajmiáanʼ ana̱ʼ.
MBÁ XKRI̱DA:
Leah naʼthí: “Naʼniuʼ mingíjyúuʼ matamíjná ga̱jmu̱ʼ anu̱ʼ. Nguáná, xtáá má mba̱yu̱ʼ ratamíjná ga̱jmu̱ʼ índo̱ ikhaa naraxuʼ: ‹Atani mba̱a̱ a̱jkia̱nʼ, ndiéjunʼ rathúnʼ›”.
RÍGÁ AJTSÚ RÍ MA̱NDOO MAʼNI LEAH
-
Mandxaʼwájmaa anu̱u̱.
Leah nandxaʼwájmaa: “¡Atadxawíín! ¡Gíʼdoo numuu!”.
-
Xáʼthi itháan.
Leah naniñuʼ raʼthúu̱n ga̱jma̱a̱ numuu xkujndu.
-
Mbayáaʼ i̱mba̱ mbiʼi mu maʼthúu̱n.
Leah naʼtámíjná nda̱wa̱á ga̱jma̱a̱ anu̱u̱, o naʼnirámáʼ mbá carta ga̱jma̱a̱ numuu xkujndu.
Ndiéjunʼ gáratha̱a̱n ikháánʼ maʼni Leah rá.
ATATSAʼWÁMINAʼ RÍGI̱: Anu̱u̱ Leah i̱ʼwáʼ rí xtáa randxa̱ʼóo edxu̱u̱ ga̱jma̱a̱ tseʼyoo rí xtáa raʼthúu̱n. Á mu Leah naraʼwíí opción A ga̱jma̱a̱ nandxaʼwájmaa, mbáa anu̱u̱ xákro̱ʼo̱o̱ náa numuu rí xúʼko̱ eʼni. Leah xáʼngo̱o̱ gáʼnii rí anu̱u̱ maʼdxun, ma̱ngaa masngájma rí ndaa gamajkuu náa anu̱u̱ (Efesios 6:2). Rígi̱ xambáñuun nájmi̱i̱n.
Maski ajndu marigá rí marikha̱ʼ náa kamba̱a̱, ma̱ndoo mataxkamaa xú káʼnii garatamíjna gajmiáanʼ ana̱ʼ.
Maski ajndu opción B nindxu̱u̱ itháan ra̱mingíjyúuʼ, mu na̱nguá má májánʼ wéñuʼ. Náa numuu rá. Numuu rí á mu Leah nandoo maʼnimbánuu xkujndu, ndayóoʼ maʼtámíjná ga̱jma̱a̱ anu̱u̱. Ga̱jma̱a̱ anu̱u̱ ndayóoʼ mbaʼyoo káʼnii gíʼdoo mu mambáyúu. Nda̱a̱ rí gámbáyúu á mu naguanúu wíí.
Mú náa opción C, Leah tániñuʼ dí rúʼko̱ maʼni rí xáʼtamíjná ga̱jma̱a̱ anu̱u̱. Ikha nagíʼ matamíjná ga̱jma̱a̱ numuu xkujndu ndrígóo i̱mba̱ mbiʼi. Ga̱jma̱a̱ á mu nagíʼ maʼnirámáʼ mbá carta náa anu̱u̱, mbáa itháan tsímáá gaxtáa.
Rí maʼnirámáʼ mbá carta Leah ma̱ndoo mambáyúu mu maʼthúu̱n anu̱u̱ rí nandoo. Índo̱ anu̱u̱ gaguxnuu carta makro̱ʼo̱o̱ rí xtáa ragíʼnuu. Opción C mambáyúu Leah ga̱jma̱a̱ anu̱u̱. Tséʼniuu má xóo gutamijná á mu ga̱jma̱a̱ carta o na̱nguá, opción rígi̱ nambánuu ga̱jma̱a̱ xtágabu rí na̱ʼkha̱ náa Biblia rí “naʼni marigá tsímáá” (Romanos 14:19).
Xú káʼnii i̱ʼwáʼ ma̱ndoo maʼni Leah rá.
Atatsawámina ganumuu imbomaxóo gambánuu.
ARATHÁ KAʼWU
Garmáʼáan a̱jkia̱nʼ: Rí gárata ikháánʼ raʼkháa rúʼko̱ rí makru̱ʼu̱u̱n ana̱ʼ.
MBÁ XKRI̱DA:
Ana̱ʼ nuraxa̱ʼ náa numuu rí nakiʼnán. Ikháánʼ natriʼñúún: “Tsíyóóʼ gáthá ga̱jma̱a̱ numuu rúʼko̱”.
Mu mbáa ikhiin makru̱ʼu̱u̱n: “Nánguá embáxuʼ gajmíi̱nʼ anu̱ʼ. I̱ndó mathu̱u̱n bi̱ nambáxuʼ gajmíi̱nʼ xkujndu rí gúʼdoo”.
Atatsaʼwáminaʼ rí xtaa ratraʼníí mbá xkujndu mingíjyúuʼ wéñuʼ ga̱jma̱a̱ mbáa ana̱ʼ nandoo mambáyaʼ. Mú ikháánʼ naratháán: “Xaxmiéjuanʼ, ma̱ndoo manimbánuu má ikhúúnʼ”.
-
Ndiéjun gakro̱ʼo̱o̱ ana̱ʼ ga̱jma̱a̱ ru̱dáʼ rá.
-
Xú kánii rí itháan máján marata rá.
