Matha̱nʼ rí niʼni mbáa dxámá, bi̱ niʼni kríyaa apóstol Pablo. Tséʼyáá xú káʼnii nigumbiʼyuu, mú nduʼyáá rí a̱ʼdá gi̱ʼtio̱o̱ Pablo ninindxu̱u̱. Ninindxu̱u̱ bi̱ ra̱ʼkhá tháán gakhi̱i̱ a̱jkiu̱u̱n. Lá nandaʼ matha̱nʼ ndiéjunʼ niʼni xáʼ...

Pablo kraʼaa guʼwá e̱jua̱nʼ náa xuajen Jerusalén. Nirajtuwiin numuu dí naʼthúún xa̱bu̱ ga̱jma̱a̱ numuu Jesús. Mú nikúwi̱i̱n tikuin xa̱bu̱ bi̱ nditháan taʼndun gúyaa Pablo ma̱ngaa nitamijná dí muni̱i̱ mbá dí raʼkhí wéñuʼ. Nindúún gágun gútháán bi̱ naʼtáñajúnʼ soldado: “Aratá ñajúnʼ soldado ndrígia̱ʼ mú magún ku̱ya̱a̱ Pablo náa guʼwá ñajunʼ”. Ikhiin murkaʼumijná náa kamba̱a̱ mu índo̱ ganújngoo Pablo ¡muxiyáa!

A̱ʼdá giʼtio̱o̱ Pablo niʼdxuun dí nitamijná muni. Ndiéjunʼ lá gáʼni xá. Ni̱jkha̱ gáʼthúu̱n a̱muu. Ikhú Pablo niʼthúunʼ: “Ayuʼ nacha̱ gáratha̱a̱n xúgíʼ dí nitadxuun bi̱ naʼtáñajúnʼ soldado”. Mingíjyúuʼ maʼni rúʼko̱, numuu dí bi̱ naʼtáñajunʼ soldado gíʼdoo wéñuʼ numuu. Lá mikhi̱i̱ a̱jkiu̱u̱n a̱ʼdá giʼtio̱o̱ Pablo mú maʼtamíjná ga̱jma̱a̱ xáʼ... Xúʼko̱, ikhaa niʼni gakhi̱i̱ a̱jkiu̱u̱n ga̱jma̱a̱ niʼthúu̱n xúgíʼ.

Bi̱ naʼtáñajúnʼ soldado nixnátiʼñaminaʼ maʼdxaun. Mu maña̱wu̱u̱n Pablo nikuʼmaa maʼga̱ imba̱ níʼkhá, náa mbóo xuajen dí mbiʼyuu Cesarea. Ma̱ngaa niʼtañajúnʼ mbá 500 soldado ndrígio̱o̱ mú magún ku̱ya̱a̱. Niʼthún: “Aʼgua̱ ku̱ya̱a̱lá má mbruʼun rígi̱”. Lá nikríyaʼ Pablo o nixiyáa xa̱bu̱ bi̱ ra̱míjínʼ che̱ʼ. Ndiéjunʼ ku̱ma̱ʼ ikháánʼ rá... ¡Xuʼko̱, nikríyaʼ! Xa̱bu̱ buʼko̱ tándoo guxiyáa.

Lá ninigua̱ʼ dí nitadxuun gi̱jyooʼ ráʼ... Lá nitayáá dí aʼdá giʼtio̱o̱ Pablo ra̱ʼkhá tháán gakhi̱i̱ a̱jkiu̱u̱n niʼni ráʼ. ¡Ikháánʼ mangáán ma̱ndoo matani gakhi̱i̱ a̱jkia̱nʼ xóo ikhaa! Ndayóoʼ maʼni gakhi̱i̱ a̱jkiu̱lú mú muʼthúún xa̱bu̱ ga̱jma̱a̱ numuu Jeobá. Lá matani gakhi̱i̱ a̱jkia̱nʼ má xúʼko̱ mú marata̱ ga̱jma̱a̱ numuu Jeobá ráʼ... Gíʼdoo wéñuʼ numuu dí muʼtá má xúʼko̱ ga̱jma̱a̱ numuu Dios. Xúʼko̱ ma̱ndoo makáwíin mbaʼin xa̱bu̱.