Lá natayáá ikháánʼ ndiéjunʼ nindxu̱u̱ dí rígá ngo̱ʼo̱o̱ ráʼ... * Nindxu̱u̱ mbóo dí tséyáá mbaʼin xa̱bu̱. Náa Biblia naʼthí ga̱jma̱a̱ numuu mbá dí rígá ngo̱ʼo̱o̱ dí gíʼdoo wéñuʼ numuu ga̱jma̱a̱ naxná mbiʼyuu ‹ngu̱ʼwa̱ rí mitsáʼkháan›. Mitsáʼkháan nindxu̱u̱ numuu rí na̱ʼkha̱ náa Dios. Nákhi ginii nimbáa na̱nguá eʼyoo. Ansdu ángeles nindúún mbuyáá ndiéjunʼ nindxu̱u̱. Lá manigua̱ʼ ma̱ta̱ya̱a̱ ndiéjunʼ nindxu̱u̱ dí nirígá ngo̱ʼo̱o̱ ráʼ...

Nákhi wajy úúʼ, Dios niʼnii timbáa xa̱biya̱ ga̱jma̱a̱ timbáa a̱ʼgu̱. Xú káʼnii nigumbiʼñún xá... Adán ga̱jma̱a̱ Eva. Ikhiin nikuwa náa ixi̱ʼ ri̱ʼi̱ Edén. Ra̱ʼkhá tháán nagui̱i̱ ikhí, Dios niʼni mújúnʼ mu ikhí gákuwá. Dios nindoo rí ikhiin gajmiún e̱jñún muni̱i̱ mitsaan xúgíʼ Ku̱ba̱ʼ, xó má náa ixi̱ ri̱ʼi̱ Edén. Mú na̱nguá nirígá rúʼko̱. Náa numuu rá.

Numuu rí Adán ga̱jma̱a̱ Eva na̱nguá ninimbu̱u̱n dí niʼthí Dios, ikha jngó na̱nguá kuwáanʼ náa Ku̱ba̱ʼ mitsaan xúgi̱. Mú Dios niʼthí rí maʼga̱nú mbiʼi dí xúgíʼ Ku̱ba̱ʼ maʼni̱i̱ mitsaan. Xúgínʼ xa̱bu̱ bi̱ kuwa náa xúgíʼ numbaaʼ makuwíin gagi ga̱jma̱a̱ makuwá kámuu mbiʼi. Xú káʼnii gaʼnimbánuu Dios dí niʼthí rá. Mba̱yu̱ʼ tsiguʼ ninújngoo, ga̱jma̱a̱ nimbáa xa̱bu̱ na̱nguá ndiʼyoo. ¡Ninindxu̱u̱ mbóo dí nirígá ngo̱ʼo̱o̱!

Mú mañúú ni̱jkha̱ rakujmaa. Índo̱ ni̱ʼkha̱ Jesús náa tsu̱du̱u̱ Ku̱ba̱ʼ, niʼsngúún xa̱bu̱ ndiéjunʼ nindxu̱u̱ dí rígá ngo̱ʼo̱o̱. Niʼthún dí nindxu̱u̱ Xa̱bu̱ Ñajunʼ ndrígóo Dios. Índo̱ nuʼthá kháñii Dios, nunda̱ʼa̱a̱: “Gaʼka ri naratañajun”. Náa numuu rá. Numuu dí Xa̱bu̱ Ñajunʼ buʼko̱ maʼni dí Ku̱ba̱ʼ maʼni̱i̱ mitsaan wéñuʼ.

Lá manigua̱ʼ maraxtaa náa ku̱ba̱ʼ mitsaan rúʼko̱ ráʼ... Xágumaaʼ dí i̱ndó xa̱bu̱ bi̱ nunimbu̱ún kuyáá Dios makuwíin náa Ku̱ba̱ʼ mitsaan. Náa Biblia na̱ʼkha̱ raʼthí ga̱jma̱a̱ numún mbaʼin xa̱bekha ga̱jma̱a̱ gu̱ʼu̱ bi̱ ninimbu̱ún rí niʼthí Jeobá Dios. Náa folleto rígi̱ gajmañulú tsíin nindxu̱ún ga̱jma̱a̱ xú káʼnii gándoo manindxu̱lú xóo ikhiin. Lá nandaʼ matatsiʼnúunʼ xáʼ...