KÍXNUU 2
Rebeca nindoo rí Jeobá maʼdxuu kaʼyoo
Rebeca ninindxu̱u̱ mbáa a̱ʼgu̱ bi̱ nindoo kaʼyoo Jeobá. Ajmbio̱o̱, Isaac, ma̱ngaa nindoo kaʼyoo Jeobá. Gi̱jyooʼ gúʼyáá xú káʼnii niniʼnumi̱jná, ma̱ngaa mbuʼyáá náa numuu rí Jeobá nidxuu kaʼyoo wéñuʼ Rebeca.
Anu̱u̱ Isaac ga̱jma̱a̱ ru̱dúu̱ nigumbiʼñún Abrahán ga̱jma̱a̱ Sara. Abrahán nindoo rí a̱ʼdióo mbayáa mbáa a̱ʼgu̱ bi̱ nandoo kaʼyoo Jeobá. Mú mingíjyúuʼ rúʼko̱ numuu rí ikhiin kuwa náa Canaán, náa kuwa xa̱bu̱ bi̱ tséyamajkuíí Jeobá. Ikha jngó nikunguanʼ mbáa xa̱bu̱ bi̱ nambáyúu (mbáa Eliezer) mu maʼga̱ náa xuajin Harán. Náa numuu nikunguanʼ maʼga̱ ikhí xá. Numuu rí náa xuajin Harán kuwa a̱ngui̱i̱n Abrahán, ga̱jma̱a̱ ikhí Eliezer gándoo gaxkamaa mbáa a̱ʼgu̱ bi̱ májánʼ mu mbayáa Isaac.
Rebeca ndiyóoʼ rí mañajunʼ wéñuʼ mu maxnún iyaʼ muwa̱a̱n camello
Eliezer ni̱jkha̱ tsínguánʼ gajmíi̱n eʼwíínʼ xa̱bi̱i̱ Abrahán. Nigún gajmiún mbá gu̱wi̱nʼ camello bi̱ kuda ganitsu ga̱jma̱a̱ regalo. Mú, xú káʼnii gaxkamaa Eliezer a̱ʼgu̱ bi̱ mbayáa Isaac rá. Ikhaa ndaʼyoo rí gu̱ʼu̱ nagún ruda iyaʼ náa puzu. Ikha jngó, índo̱ niguánu náa xuajin Harán, nigún mbájmbu náa gíiʼ puzu rúʼko̱. Ikhú niʼtákáñuu Jeobá: “Mando̱ʼo̱o̱ mbáa dxáʼgú maxnúʼ iyaʼ. Á mu ikhaa naxnúʼ iyaʼ ga̱jma̱a̱ naxnún camello, nandoo gáʼthi rí ikhaa nindxu̱u̱ a̱ʼgu̱ bi̱ nitayáaʼ ikháánʼ”.
Ikhú ni̱ʼkha̱nú Rebeca náa puzu. Náa Biblia naʼthí rí ikhaa mitsiʼyáa wéñuʼ. Eliezer nindo̱ʼo̱o̱ iyaʼ, ga̱jma̱a̱ ikhaa niriʼña: “Maxna̱ʼ iyaʼ migi̱i̱n ikháánʼ ma̱ngoo maxnu̱u̱n iyaʼ muwa̱a̱n camello ndrígia̱ʼ”. Rebeca ndiyóoʼ magungoo wéñuʼ iyaʼ numuu rí camello naʼwa̱a̱n mba̱ji̱nʼ iyaʼ. ¡Na̱jkha̱ na̱ʼkha̱a̱ eʼni! Atayáá xtiʼkhu rí kama níjniúu. Ndiéjunʼ xtáa raʼni Rebeca rá... Asndu tsiánguá niguanúu Eliezer índo̱ ndiʼyoo dí Rebeca nañajunʼ wéñuʼ: ¡Jeobá niriʼña̱a̱ rí niʼthá kháñuu!
Eliezer nixnúu Rebeca regalo rí nagui̱i̱ wéñuʼ, ga̱jma̱a̱ Rebeca niʼthúu̱n Eliezer mangiin xa̱bu̱ bi̱ ni̱jkha̱ gajmíi̱n rí magún náa goʼwóo anu̱u̱. Eliezer niʼthún ndiéjunʼ jngó Abrahán nikunguanʼ náa xuajin Harán. Ma̱ngoo niʼthún xú káʼnii Jeobá niʼriña̱a̱ rí niʼtákáñuu. Índo̱ nidxawíín ruʼko̱, a̱ngui̱i̱n Rebeca nidxún wéñuʼ. Rígi̱ nitháán Eliezer: “Májánʼ eya̱a̱xu dí Rebeca mbayáa Isaac”.
Rebeca ni̱jkha̱ ga̱jma̱a̱ Eliezer náa xuajin Canaán mu mbayáa Isaac
Lá naku̱ma̱ ikháánʼ dí Rebeca nandoo mbayáa Isaac ráʼ... Índo̱ niraxi̱i̱ a̱ngui̱i̱n, ikhaa niʼthí rí ma̱ndoo. Ndiéjunʼ jngó rá. Numuu dí Rebeca ndaʼyoo má rí Jeobá nikunguanʼ Eliezer. Ikha jngó ni̱jkha̱ ga̱jma̱a̱ náa xuajin Canaán, índo̱ niguánu ikhí, ikhaa ndiyáa Isaac.
Rebeca niʼnimbo̱o̱ rí niʼthí Jeobá, ikha jngó ikhaa niñe̱wu̱u̱n májánʼ. Mú raʼkháa i̱ndó rúʼko̱: Náa e̱ji̱i̱n ikhaa ni̱ʼkha̱ Jesús. Jeobá mañe̱wa̱nʼ mangáán á mu natanimbaʼ rí eʼthí ikhaa xó má niʼni Rebeca. Ma̱ngoo, ikhaa maʼdxuu kaʼyaʼ.
