Timoteo nindxu̱u̱ mbáa dxámá bi̱ nadxuu wéñuʼ índo̱ nambáñun iʼwíínʼ. Ni̱jkha̱ mbaʼa xuajen mú mambáñun xa̱bu̱. Májánʼ wéñuʼ nixtáa. Lá nandaʼ matha̱nʼ itháan ga̱jma̱a̱ numuu xáʼ...

Timoteo niga̱ja̱a̱ náa mbá xuajen dí mbiʼyuu Listra. Ru̱dúu̱ nigumbiʼyuu, Eunice, xíñuʼ nigumbiʼyuu Loida. Asndu nákha chíʼgíʼ Timoteo, ikhiin nitháán ga̱jma̱a̱ numuu Jeobá. Ikha jngó, nákhi má chíʼgíʼ, Timoteo nindoo mambáñun xa̱bu̱ muniʼniiʼ Jeobá.

Mbóo mbiʼi, índo̱ Timoteo ninindxu̱u̱ má mbáa dxámá, Pablo niʼthúu̱n: “Maʼgá gátaraʼa i̱ʼwáʼ xuajen. Lá nandaʼ mi̱dxa̱ʼ muʼgua̱ʼ ráʼ.” Timoteo ra̱ʼkhá tháán nidxuu ikhú niʼthúu̱n: “¡Nandoʼ maʼgá!”. Ikhaa nindoo mambáñun xa̱bu̱.

 Ni̱jkha̱ ga̱jma̱a̱ Pablo náa Tesalónica, náa mbóo xuajen ndrígóo Grecia. Mu maguanu ikhí, ndiyóoʼ magún rajkhún mitsínguánʼ wéñuʼ nda̱wa̱á magún ga̱jma̱a̱ barco. Índo̱ niguáʼnu ikhí, nimbañúún mbaʼin xa̱bu̱ mu muniʼniiʼ Jeobá. Mú tikhun xa̱bu̱ nikiʼníin wéñuʼ ga̱jma̱a̱ nindúún munigawúnʼ. Ikha jngó, Pablo ga̱jma̱a̱ Timoteo ndiyóoʼ magún gutaraʼa i̱ʼwáʼ xuajen.

Nguáthá gu̱nʼ nda̱wa̱á, Pablo niʼthúu̱n Timoteo dí mata̱nga̱a̱ náa xuajen Tesalónica. Nindoo mbaʼyoo xóo kúwi̱i̱n a̱ngiu̱lú. Mú náa xuajen Tesalónica tikuin xa̱bu̱ nini gíníin wéñuʼ bi̱ ñajúnʼ cristiano. ¡Timoteo ndiyóoʼ maʼni gakhi̱i̱ a̱jkiu̱u̱n mú mata̱nga̱a̱ ikhí! Ndiéjunʼ niʼni Timoteo rá. Niʼthí má dí mata̱nga̱a̱ numuu dí nixmiéjunʼ kaʼñúún a̱ngiu̱lú. Índo̱ ni̱ʼkha̱a̱ gáʼyoo Pablo nita̱nga̱a̱ kayóo ajngáa májánʼ. ¡A̱ngiu̱lú bi̱ kúwi̱i̱n náa xuajen Tesalónica kaʼníí kuwa runi ñajunʼ Jeobá!

Mba̱yu̱ʼ tsiguʼ, Timoteo niʼni ñajunʼ Jeobá ga̱jma̱a̱ Pablo. Ikha jngó, mbóo miʼtsú, Pablo niʼnirámáʼ ga̱jma̱a̱ numuu Timoteo: “Makuʼnguáanʼ Timoteo mú mambáñun a̱ngiu̱lú. Nda̱wa̱a̱ imba̱a̱ xóo ikhaa. Ikhaa nandoo kaʼyoo Jeobá ma̱ngaa nandoo kaʼñúún xa̱bu̱”.

Lá ragájkhun dí mangáán nandaʼ xtañún iʼwíínʼ xa̱bu̱ ráʼ. Lá manigua̱ʼ matambáñuun mú muniʼniiʼ Jeobá xáʼ... Ikhú ma̱ndoo maraxtaa májánʼ wéñuʼ, xóo Timoteo.