Jeobá niʼni marigá ixi̱ ri̱ʼi̱ Edén. Ikhí nirígá ri̱ʼi̱, ixi̱ ga̱jma̱a̱ xujkhúʼ. Ikhú Dios niʼnii timbáa xa̱biya̱, Adán. Niʼnii ga̱jma̱a̱ ku̱ba̱ʼ nda̱wa̱á nindiyuu rakhóo. Natayáá dí nirígá ikhú ráʼ. ¡Xa̱biya̱ nigíʼdu̱u̱ nixtáa! Jeobá niʼthúu̱n Adán dí mañewu̱u̱n ixi̱ ri̱ʼi̱ ga̱jma̱a̱ dí maxná mbiʼñún xúgínʼ xujkhúʼ.

Jeobá niʼthúu̱n Adán dí maʼnimbánuu mbá dí gíʼdoo wéñuʼ numuu. Niʼthúu̱n: “Ma̱ndoo miʼtsu asndu náa mbá biʼyaa xndú taun, i̱ndó ragíʼmaa miʼtsu mbá rí nindxu̱u̱ kiejunʼ wéñuʼ. Á mu natsu xndúu ixi̱ rúʼko̱ makhañáaʼ”.

Nda̱wa̱á Jeobá niʼthí: “Mani̱i̱ mbáa bi̱ mambáyúu Adán”. Ikha jngó niʼni dí Adán magumuu migu ga̱jma̱a̱ nijmuu mbá itsu̱ tso̱xto̱o̱ mu maʼnii a̱ʼgiu̱u̱. Nigumbiʼyuu Eva. Adán ga̱jma̱a̱ Eva ninindxu̱u̱n  timbíi̱n bi̱ nikuwa mbá guʼwíin. Xú káʼnii nikumu̱u̱ Adán índo̱ ndiʼyoo a̱ʼgiu̱u̱ rá. Ra̱ʼkhá tháán gagi nixtáa rí asndu niʼthí: “¡Atayáá rí niʼni Jeobá ga̱jma̱a̱ itsu̱ tso̱xto̱ʼ! ¡Mbáa xóo ikhúúnʼ kayuʼ!”.

Jeobá niʼthúu̱n Adán ga̱jma̱a̱ Eva dí muguaʼdiin mbaʼin e̱ji̱n ga̱jma̱a̱ muni dí makuwá náa xúgíʼ tsu̱du̱u̱ ku̱ba̱ʼ. Nindoo dí muñajunʼ gagi nájmi̱i̱n mu muni dí ku̱ba̱ʼ maʼni mitsaan, xó má ixi̱ ri̱ʼi̱ Edén. Mú na̱nguá nirígá xúʼko̱. Ndíjkha jngó rá. Mbuʼyáá náa imbo̱o̱ capítulo.