Jeobá niraʼwíi Jeremías mu mani̱ndxu̱u̱ gaʼyee ndrígóo Judá. Nikuʼmaa mu maʼtáruʼun xa̱bu̱ bi̱ kuwa ikhí ga̱jma̱a̱ maʼthúún rí gíʼmaa muniñaʼ runi xúgíʼ dí raʼkhí. Mú Jeremías niriʼñuu Jeobá: “I̱ndó ni̱ndxu̱ʼ mbáa dxámá, tsejmañuʼ gáthá náa inún xa̱bu̱”. Jeobá niʼthúu̱n: “Xámiñaʼ, ikhúúnʼ má gambáyaʼ ga̱jma̱a̱ matha̱nʼ rí gíʼmaa maratha”.

Jeobá niʼthúu̱n Jeremías rí magímbíin bi̱ kuya̱ edxu̱u̱ náa xuajen, rí makuíʼthá mbá rayaʼ náa inún ga̱jma̱a̱ maʼthúún: “Xúgi̱ kaʼnii gagiʼnuu Jerusalén”. Índo̱ Jeremías niʼni rúʼko̱, bi̱ kuya̱ edxu̱u̱ nikiʼníin wéñuʼ. Mbáa bi̱ kayá edxu̱u̱ náa ndxajkun bi̱ nigumbiʼyuu Pasjur nixnúu Jeremías ga̱jma̱a̱ nigídáa̱ʼ náa cepo, xóo muʼthá, nikudaʼ rajkúu ga̱jma̱a̱ ñawúunʼ náa xajpa rí gíʼdoo iñúnʼ. Jeremías tabañimínaʼ kañiʼ mbruʼun. Pasjur niríyaʼ imba̱ néjtsuu. Ikhú Jeremías niʼthí: “Nánguá eʼngoʼ itháan. Maniʼñúʼ rataráʼa”. Mú, lá gajkhun niʼni rúʼko̱ xáʼ. Na̱nguá. Jeremías nindxa̱ʼwáminaʼ májánʼ ga̱jma̱a̱ niʼthí: “Ajngóo Jeobá nindxu̱u̱ xóo mbá aguʼ rí gíwanʼ náa awúu̱n a̱jkiu̱nʼ. Xándoo maniʼñúʼ rataráʼa”. Ikha jngó Jeremías niʼtáruʼun má xúʼko̱ xa̱bu̱.

Ninújngoo mba̱yu̱ʼ tsiguʼ ga̱jma̱a̱ mbáa nuxi̱ʼ rey nigíʼdu̱u̱ niʼtáñajunʼ náa Judá. Ndxajkun ga̱jma̱a̱ gaʼyee bi̱ minduwiinʼ tánigunʼ ajngáa ndrígóo Jeremías. Ikha jngó nithúún príncipes: “Xa̱bu̱ bugi̱ kaʼyoo makhañúu”. Jeremías niʼthí: “Á mu nuxíñu̱u̱n, muxíyáa mbáa xa̱bu̱ bi̱ nda̱a̱ rí niʼni. Ikhúúnʼ natha rí Jeobá nakuʼmún mata, raʼkháa rí nandoʼ ikhúúnʼ”. Índo̱ príncipes nidxawíín rígi̱, nithi: “Xa̱bu̱ bugi̱ rakáʼyoo makhañúu”.

 Jeremías tániñuʼ raʼtáraʼa, mú ikhú príncipes nikiʼníin wéñuʼ rí asndu ninda̱ʼa̱a̱ rey rí muxiyáa. Rey niʼthún rí ma̱ndoo muni̱i̱ asndu ndiéjunʼ má rí gáʼndun. Ikha jngó nirajtuwiin ga̱jma̱a̱ nixu̱ma̱ʼ náa mbá pozo mi̱jnu̱ʼ wéñuʼ náa rígá i̱ndó ngaʼcha̱ʼ mu makhañúu ikhí. Mañu mañúú, Jeremías ni̱jkha̱ rajngúun náa ngaʼcha̱ʼ.

Ikhú Ébed-Mélec mbáa bi̱ nambáyúu rey niʼthúu̱n: “Príncipes nixu̱ma̱ʼ Jeremías náa mbá pozo. Á mu nuniʼñánʼ ikhí, makhañúu”. Rey nikuʼmaa Ébed-Mélec rí maʼga̱ gajmíi̱n mbá 30 xa̱bekha ga̱jma̱a̱ muriyaʼ Jeremías náa pozo. Jeremías nimbá tarikhoo mu maniñuʼ raʼtáraʼa. Lá ragájkhun rí nandaʼ manindxa̱ʼ xóo ikhaa xáʼ.