María nindxu̱u̱ mbáa dxáʼgú bi̱ xtáa náa xuajen Nazaret, rí naʼtáñajunʼ Galilea, ma̱ngaa kaʼyoo Elisabet. María manújunʼ ga̱jma̱a̱ mbáa xa̱bu̱ bi̱ naʼtóo ixi̱ bi̱ nagumbiʼyuu José. Índo̱ Elisabet naʼni má majun igu̱nʼ rí kagu̱ ewáan ada̱, ángel Gabriel nikujmaa náa María ga̱jma̱a̱ niʼthúu̱n: “Wajtsaʼ, María, Jeobá niʼni tsajkurámáánʼ wéñuʼ”. Ikhaa tákro̱ʼo̱o̱ rí Gabriel niʼthúu̱n, ikha jngó ikhaa niʼthúu̱n: “Mida ewáan mbáa ada̱ ga̱jma̱a̱ maraʼdaa ada̱. Gíʼmaa maraxna mbiʼí Jesús. Mani̱ndxu̱u̱ rey, ga̱jma̱a̱ reino ndrígóo marigá kámuu mbiʼi”.

María niʼthí: “Mú ikhúúnʼ xóó tsébóʼ ga̱jmu̱ʼ mbáa xa̱bu̱. Xú káʼnii gándoo gaguʼdaa mbáa ada̱ rá.” Gabriel niriʼñuu: “Jeobá xúgíʼ ma̱ndoo maʼni. Xi̱ʼ kaʼwu ma̱ʼkha̱ náa ikháánʼ, ga̱jma̱a̱ maraʼdaa mbáa ada̱. Elisabet, bi̱ xtayáá, ma̱ngaa kagu̱ ewáan ada̱”. Ikhú María niriʼña̱a̱: “Ikhúúnʼ ni̱ndxu̱ʼ ñumbáá ndrígóo Jeobá. Gagiʼnuʼ xó má ikháánʼ niratá”.

 María ni̱jkha̱ gáʼyoo Elisabet náa xuajen dí rígu náa inuu kúbá. Índo̱ ni̱jkha̱nú, niraxi̱i̱, ga̱jma̱a̱ Elisabet nikumu̱u̱ rí a̱ʼdióo nikixi̱i̱ náa awúu̱n. Ikhaa nigruigú xi̱ʼ kaʼwu ga̱jma̱a̱ niʼthí: “María, Jeobá niʼni tsajkurámáánʼ. Ra̱ʼkhá tháán májánʼ nindxu̱u̱ dí ru̱dúu̱ Señor ndrígóʼ ni̱ʼkha̱ gáʼyóóʼ náa goʼwóoʼ”. María niriʼña̱a̱: “Nani mba̱a̱ Jeobá ga̱jma̱a̱ xúgíʼ a̱jkiu̱nʼ”. Ikhú niguanúu ajtsú igu̱nʼ ga̱jma̱a̱ Elisabet, ga̱jma̱a̱ nda̱wa̱á nitanga̱a̱ náa goʼwóo, náa Nazaret.

Índo̱ José niʼdxuun rí María kagu̱ ewáan mbáa ada̱, nánguá nindoo mbayáa. Mú mbáa ángel ni̱ʼkha̱ náa xnuʼndaa ndrígóo ga̱jma̱a̱ niʼthúu̱n: “Xámiñaʼ rí matatsiʼgúnʼ ga̱jma̱ʼ María. Táʼni nimbá dí ra̱májánʼ”. Ikhú José ndiyáa María ga̱jma̱a̱ ni̱jkha̱ kayáa náa goʼwóo.