José ga̱jma̱a̱ María nikuwa náa Nazaret gajmiún Jesús mangiin eʼwíínʼ e̱jñún. Ñajunʼ ndrígóo José ninindxu̱u̱ rí maʼtóo ixi̱ mu maxniʼtsun bi̱ kuwa náa goʼwóo. Ma̱ngaa niʼsngúún ga̱jma̱a̱ numuu Jeobá ga̱jma̱a̱ Xtángoo ndrígóo. Bi̱ kúwi̱i̱n náa goʼwóo naguʼwún nagún náa sinagoga mu mbuyamajkuíí Dios ga̱jma̱a̱ rí magún Jerusalén mu muniriyaaʼ Pascua xúgíʼ tsiguʼ.

Índo̱ Jesús nigiʼdoo 12 tsiguuʼ, bi̱ kuwa náa goʼwóo nigún asndu náa Jerusalén, xó má naguʼún nuni. Náa xuajen rúʼko̱ kuwa mbaʼin xa̱bu̱ bi̱ nagún mu muniriyaaʼ ndxa̱a̱ Pascua. Índo̱ guámbá ndxa̱a̱, José ga̱jma̱a̱ María nitangi̱ín náa guʼwún, nikumu̱ún rí Jesús najkha̱a̱ gajmíi̱n bi̱ kaʼñún. Mú índo̱ ndiyáaʼ náa xúgínʼ xa̱bu̱, túxkama̱a̱.

Ikha jngó nitangi̱i̱n náa Jerusalén ga̱jma̱a̱ ndiyáaʼ mbá ajtsú mbiʼi aʼdiún. Asndu nda̱wa̱á kayuʼ nixkamaa náa templo. Ikhí xtáa Jesús, gíʼ náa tapu̱ún bi̱ nusngáa, ga̱jma̱a̱ naʼdxawún tsumáá wéñuʼ ga̱jma̱a̱ naʼniún graxe̱ rí miʼskhoo. Bi̱ nusngáa niguanún tsiánguá ga̱jma̱a̱  numuu rí niʼthí Jesús rí asndu ikhiin nigi̱ʼdi̱i̱ nini̱i̱ graxe̱. Niguanún tsiánguá wéñuʼ ga̱jma̱a̱ numuu rí niriʼña̱a̱. Niguánu ndiyáá rí nakro̱ʼo̱o̱ májánʼ Xtángoo ndrígóo Jeobá.

José ga̱jma̱a̱ María nixmiéjunʼ wéñuʼ. María niʼthúu̱n a̱ʼdióo: “A̱ʼdióoʼ, nijngruiguxu ruʼñáanʼ náa xúgíʼ xuajen. Náa niraxtaa rá. Jesús niriʼña̱a̱: Lá tséya̱a̱ rí gíʼmaa maxtáá náa goʼwóo Anu̱ʼ ráʼ.”

Jesús nitanga̱a̱ ga̱jma̱a̱ Anu̱u̱ ma̱ngaa ru̱dúu̱ náa Nazaret. Ikhú, José niʼsngóo Jesús maʼtóo ixi̱. Ndiéjunʼ tatsaʼwáminaʼ. Xú káʼnii ninindxu̱u̱ Jesús nákha nindxu̱u̱ dxámá rá. Jesús ni̱jkha̱ ra̱ja̱a̱ ga̱jma̱a̱ ni̱jkha̱ rajmañuu itháan. Ikha jngó Dios ga̱jma̱a̱ xa̱bu̱ nindúún kuyáá itháan.