Rígá mbá xuajen rí gíʼ xígií náa este ndrígóo Israel náa xa̱bu̱ nakumu̱ún rí a̱ʼgua̱a̱n ma̱ndoo muxna ikha. Mbá mbruʼun, tikhun xa̱bu̱ bi̱ naguwáʼ xígií náa nagájnuu A̱jkha̱ʼ ndiyáá mekhuíí rí ñajunʼ xóo a̱ʼgua̱a̱n bi̱ nambiʼi ga̱jma̱a̱ rí na̱jkha̱, ikhú nigún kidxuuʼ. “A̱ʼgua̱a̱n” nixná ikhúún asndu náa Jerusalén. Xa̱bekha nagún ruraxu̱u̱n xa̱bu̱: “Náa minaʼ xtáa ada̱ bi̱ mani̱ndxu̱u̱ rey ndrígu̱ún judíos rá. Nanduxu musmbati̱gu̱xu náa inuu ikhaa”.

Herodes, rey ndrígóo Jerusalén, niʼdxuun ga̱jma̱a̱ numuu rey nuxi̱ʼ bugi̱. Nixmiéjunʼ wéñuʼ ga̱jma̱a̱ niraxu̱u̱ ndxajkun bi̱ kuya̱ edxu̱u̱: “Náa minaʼ gáxtáa rey bugi̱ rá.” Ikhiin niriʼña̱a̱: “Gaʼyee nithi rí magumaa náa Belén”. Ikha jngó Herodes nindxaʼwún xa̱bu̱ bi̱ naguwáʼ xígií náa nagájnuu A̱jkha̱ʼ ga̱jma̱a̱ niʼthún: “Guʼgua̱ Belén ga̱jma̱a̱ guʼyáaʼ ada̱ buʼko̱. Nda̱wa̱á gagutangáanʼ mu mutu̱nʼ náa minaʼ xtáa, numuu rí mangúún nandoʼ masmbatígo̱ʼ náa inuu ikhaa”. Mú minduwaʼ nindxu̱u̱.

“A̱ʼgua̱a̱n” nigíʼdu̱u̱ ni̱jkha̱ mbu̱júu̱, ga̱jma̱a̱ xa̱bekha nigún kidxuuʼ asndu náa Belén. Ikhú “a̱ʼgua̱a̱n” niwi̱ji̱ náa tsu̱du̱u̱ mbá guʼwá, xa̱bekha nitu̱ʼu̱u̱n awúu̱n ga̱jma̱a̱ nixkamaa Jesús ga̱jma̱a̱ ru̱dúu̱. Ikhiin nismbatigu̱u̱n náa inuu ada̱ ga̱jma̱a̱ nixnáá regalos: Oro, incienso ga̱jma̱a̱ mirra. Mú, lá Jeobá nikunguinʼ xa̱bekha buʼko̱ náa xtáa Jesús ráʼ. Na̱nguá.

Mbruʼun má rúʼko̱, Jeobá niʼthúu̱n José náa mbá xnuʼndaa: “Herodes nandoo maxíyáa Jesús. Ayuʼ ga̱jma̱ʼ a̱ʼgia̱ʼ ma̱ngaa a̱ʼdiáaʼ ga̱jma̱a̱ ayuʼ náa Egipto. Aguanála ikhí ga̱jma̱a̱ xágutangáanʼla asndu índo̱ gatala rí nijngoo má gamíi”. Ikha jngó José ga̱jma̱a̱ bi̱ kuwa náa goʼwóo núkhu nigún náa Egipto.

Ma̱ngaa, Jeobá niʼthún xa̱bekha bi̱ naguwáʼ xígií náa nagájnuu A̱jkha̱ʼ rí xátangi̱i̱n náa Herodes. Índo̱ Herodes ndiʼyoo rí xátangi̱i̱n nikiʼnáa  wéñuʼ. Ga̱jma̱a̱ numuu rí táxkamaa Jesús, nikuʼma magudíin xúgínʼ e̱ji̱n náa Belén bi̱ guáʼdáá ikháá má tsiguuʼ xóo Jesús. Mú Jesús nda̱a̱ rí nigíʼnuu numuu rí nixtáa asndu náa Egipto náa rí mitsínguánʼ wéñuʼ.

Índo̱ ninújngoo mbiʼi, Herodes nikháñuu. Ikhú Jeobá niʼthúu̱n José: “Nándáa gamíi. Ma̱ndoo matangaán”. José, María ga̱jma̱a̱ Jesús nitangi̱i̱n náa Israel ga̱jma̱a̱ nikuwa náa xuajen Nazaret.