Xa̱bu̱ Ñajunʼ bi̱ naʼtáñajunʼ náa Roma, César Augusto, niʼthí rí xúgínʼ judíos magún náa xuajen rí nigumiin mu muxuda̱ʼ mbiʼñún. Ikha jngó José ga̱jma̱a̱ María nigún náa Belén, numuu rí ikhí kuwa bi̱ kaʼñún José. Inuu má magiʼdaa ada̱ María.

Índo̱ niguánu náa Belén, nánguá nixkamaa imbo̱ʼ náa maguanún i̱ndó náa kuwa xujkhúʼ, ga̱jma̱a̱ ikhí nigumaa Jesús. María nimbráʼaa xtíin gua̱ba̱ʼ ga̱jma̱a̱ nitámáʼ tsumáá náa nuphiʼtsu xujkhúʼ.

Mijngii Belén, tikhun báxtúu kuwa xaná ruñewu̱u̱n mugiuún. Nda̱a̱ tsu̱ma̱, nikujmaa mbáa ángel, ga̱jma̱a̱ ndiyáá gloria ndrígóo Jeobá nimbiʼi náa mbájndi kuwa ikhiin. Báxtúu nimiñun, mú ikhaa niʼthún: “Xámiñalaʼ, na̱ʼkhá ka̱yo̱ʼ ajngáa rí májánʼ. Rí xúgi̱ Mesías nigumaa náa Belén”. Ikhú nikujmiin mbaʼin ángeles mekhuíí ga̱jma̱a̱ nithi: “Gloria  ndrígóo Dios náa mekhuíí, ga̱jma̱a̱ rí tsímáá náa tsu̱du̱u̱ ku̱ba̱ʼ”. Ikhú ángeles nánguá nikujmiin. Ndiéjunʼ nini báxtúu rá.

Báxtúu nitimijná kaníkhiin: “Guʼgua̱ Belén xúgi̱ má”. Ikha jngó núkhu nigún ga̱jma̱a̱ nixkamaa José ga̱jma̱a̱ María náa kuwa xujkhúʼ ga̱jma̱a̱ ada̱ bi̱ ndiʼkhún nigumaa.

Xúgínʼ bi̱ nidxawíín rí ángel niʼthún báxtúu niguanún tsiánguá. María nindxa̱ʼwáminaʼ má xúʼko̱ rí niʼthí mbáa ángel ga̱jma̱a̱ támbumuu nditháan. Báxtúu nitangi̱i̱n náa xaná gajmiún mugiuún, ma̱ngaa ni̱xna̱a̱ wéñuʼ núma̱a̱ Jeobá ga̱jma̱a̱ numuu xúgíʼ rí niguánu ndiyáá ma̱ngaa rí nidxawíín.