Índo̱ Jesús xtáa raʼtáraʼa itháan maʼni mbá tsiguʼ tikhu, ndiyóoʼ maraʼwíí mbóo rí gíʼdoo wéñuʼ numuu. Tsíin garaʼwíin mu mañajunʼ gajmíi̱n ga̱jma̱a̱ mu muxna ikha náa congregación cristiana xá. Nákha xóó tsíraʼwíí maʼni rúʼko̱, Jesús ndiyááʼ ikha ndrígóo Jeobá. Ikha jngó ni̱jkha̱ náa kúbá mu maxtáa mbáwíi ga̱jma̱a̱ niʼtájkáan kañiʼ mbruʼun. I̱mba̱ néjtsuu, Jesús nigímbíin tikhun xa̱bi̱i̱ ga̱jma̱a̱ niraʼwíin mbá 12 apóstoles. Lá natayáá xú káʼnii mbiʼñún xáʼ. Nigumbiʼñún Pedro, Andrés, Santiago, Juan, Felipe, Bartolomé, Tomás, Mateo, Santiago a̱ʼdióo Alfeo, Tadeo, Simón ga̱jma̱a̱ Judas Iscariote.

Mbá 12 nagún gajmiún Jesús. Ikha ni̱jkha̱ raʼsngúún xú káʼnii gutaraʼa ga̱jma̱a̱ nda̱wa̱á niniñúnʼ rí mutaraʼa ndajkuíin. Ma̱ngaa Jeobá nixnúún tsiakii mu muxkawíin xa̱bu̱ wéñiʼ ga̱jma̱a̱ muni thanún bi̱ naʼniún nandii.

Jesús nambáxu̱u̱ gajmíi̱n 12 apóstoles, ga̱jma̱a̱ ikhaa naku̱mu̱u̱ kaʼñún ikhiin. Fariseos nindxa̱ʼwa̱míjna̱ rí apóstoles na̱nguá guáʼdáá  numún, rí tséyáá nditháan. Mú Jesús taʼñún xúʼko̱. Ikhaa niʼniratiin mu muni májánʼ ñajunʼ ndrígu̱ún. Ikhiin makuwá gajmiún Jesús náa mbiʼi rí magiʼdoo itháan numuu náa vida ndrígóo. Mbá xkri̱da, makuwá gajmiún ikhaa índo̱ gakháñuu ga̱jma̱a̱ índo̱ gátuxi̱i̱. Mbaʼin rí ikhiin naguwáʼ náa Galilea, xó má Jesús. Ga̱jma̱a̱ tikhun má ninigu̱nʼ.

Apóstoles ni̱ndxu̱ún xa̱bu̱ aʼkhá, ikha jngó najngawi̱i̱n. Nguáná tséndxa̱ʼwa̱a̱ edxu̱ún rí nuthi ga̱jma̱a̱ nguáná tsíraʼwíí májánʼ rí muni. Nguáná nakiʼníin nacha̱. Asndu nagiʼdu̱u̱n mu mbuyáá tsáa gíʼdoo itháan numuu. Mú ninindxu̱ún míjínʼ xa̱bu̱ bi̱ nandún kuyáá Jeobá. Ikhiin makuwa ginii náa congregación cristiana mu muni mbá ñajunʼ kiejunʼ índo̱ Jesús ní xáxtáa náa ku̱ba̱ʼ.