Mba̱yu̱ʼ rí nijngoo Pascua, Jesús gajmíi̱n xa̱bi̱i̱ nitangi̱i̱n náa Galilea. Índo̱ kuwa raguwáanʼ ninújngún náa Samaria ga̱jma̱a̱ niguájun náa xuajen Sicar, náa pozo ndrígóo Jacob. Jesús niguanúu ikhí mu mbayáa xuuʼ mú xa̱bi̱i̱ nigún gutsi ganitsu náa xuajen.

Mbáa a̱ʼgu̱ ni̱ʼkha̱ náa pozo garíyaaʼ iyaʼ, ga̱jma̱a̱ Jesús niʼthúu̱n: “Araxnúʼ iyaʼ ma̱ga̱nʼ”. Ikhaa niraxi: “Náa numuu naratamíjná ga̱jma̱á ni̱ndxu̱ʼ rá. Judíos tsetamijná gajmiún samaritanos”. Jesús niʼthí: “Á mu natayáá tsáa ni̱ndxu̱ʼ, matando̱ʼo̱ʼ iyaʼ, ga̱jma̱a̱ ikhúúnʼ gáxna̱ʼ iyaʼ rí ndaʼya”. A̱ʼgu̱ niraxi̱: “Ndiéjunʼ eyaʼ gárata, rí asndu na̱nguá xtaʼdáá rí matríyaʼ ga̱jma̱a̱ iyaʼ”. Jesús niriʼñuu: “Bi̱ gágáan iyaʼ rí ikhúúnʼ gáxnu̱u̱ xakandawuʼ nditháan”. A̱ʼgu̱ niʼthí: “Tátá, araxnúʼ iyaʼ rúʼko̱”.

Nda̱wa̱á Jesús niʼthí: “Aratháán ajmbiaʼ ma̱ʼkha̱”. Ikhaa niriʼña̱a̱: “Na̱nguá gúʼdaa ajmbioʼ”. Jesús niʼthí: “Gajkhun má, numuu rí nitanújunʼ mbá witsu nuthu, ga̱jma̱a̱ rí xúgi̱ xtaa ga̱jma̱ʼ mbáa xa̱bu̱, mú na̱nguá nitanújunʼ ga̱jma̱ʼ ikhaa”. A̱ʼgu̱ niriʼñuu: “Nda̱yo̱o̱ rí ni̱ndxa̱ʼ mbáa gaʼyee. Xa̱bu̱ xuajñuʼ nakumu̱ún rí ma̱ndoo mbuʼyamajkuíí Dios náa kúbá rígi̱, mú judíos nuthi rí i̱ndó náa Jerusalén gíʼmaa mbuʼyamajkuíí Dios. Ikhúúnʼ naku̱mu̱ʼ rí índo̱ gáʼkha̱nú Mesías, ikhaa maʼsngúxu xú káʼnii guyamajkuííxu Dios” Ikhú Jesús niʼthí mbá rí xóó tséʼthúu̱n nimbáa: “Ikhúúnʼ ni̱ndxu̱ʼ Mesías”.

 A̱ʼgu̱ ni̱jkha̱a̱ ragáyúu náa xuajñu ga̱jma̱a̱ niʼthún xa̱bu̱ samaritanos: “Mbáa nixkamaa Mesías. Ndaʼyoo xúgíʼ ga̱jma̱a̱ numuuʼ. Aguwaʼ ga̱jma̱a̱ gu̱ya̱a̱”. Ikha jngó nigún gajmiún náa pozo mu mudxawíín rí gáʼsngáa Jesús.

Ikhú, samaritanos ninda̱ʼa̱a̱ Jesús rí maguanúu gajmíi̱n. Náa xuajen rúʼko̱ niguanúu a̱jma̱ mbiʼi ma̱ngaa mbaʼa rí niʼsngúún, ga̱jma̱a̱ mbaʼin niguáʼdáá fe náa ikhaa. Nda̱wa̱á kayuʼ nitháán samaritana: “Nda̱wa̱á rí nidxáwiinxu rí niʼthí xa̱bu̱ bugi̱, ndu̱ya̱a̱xu májánʼ rí ikhaa phú maʼni káwíin xúgínʼ xa̱bu̱ numbaaʼ”.