Jesús niʼngo̱o̱ niʼni thanún xa̱bu̱ bi̱ nandoo káñun ga̱jma̱a̱ nikuxiín xa̱bu̱. Ma̱ngaa, niʼngo̱o̱ nitsiji giñánʼ ga̱jma̱a̱ ruʼwa. Nda̱wa̱á rí niʼtájkáan náa kúbá, Jesús ndiʼyoo rí náa lamáa ndrígóo Galilea naxnúu giñánʼ mbiiʼ. Apóstoles ndrígóo kuwa náa mbá barca runi remar ga̱jma̱a̱ xúgíʼ tsiakii ndrígu̱ún mu manújngún náa giñán mbiiʼ. Ikha jngó Jesús nigajtaa ga̱jma̱a̱ ni̱jkha̱ kruámuʼ náa inuu iyaʼ. Índo̱ apóstoles ndiyáá rí mbáa na̱jkha̱ kruámuʼ náa tsu̱du̱u̱ iyaʼ, nimiñun wéñuʼ. Mú Jesús niʼthúu̱n: “Ikhúúnʼ ni̱ndxu̱ʼ. Xámiñalaʼ”.

Pedro niʼthí: “Señor, á mu ikháánʼ ni̱ndxa̱ʼ, arathúnʼ rí maʼgá náa ikháánʼ”. Jesús niʼthúu̱n: “¡Ayi̱!”. Ikha jngó Pedro nigajtaa náa barca ga̱jma̱a̱ ni̱jkha̱ kruámuʼ náa inuu iyaʼ mu maʼga̱ náa Jesús índo̱ xtáa raxnúu giñán mbiiʼ. Mú índo̱ Pedro xtáa ra̱jkha̱ kanuu náa Jesús, ndiʼyoo giñán mbiiʼ, ikhú nimíñuu. Nikumu̱u̱ rí xtáa rarmáʼáan náa iyaʼ ga̱jma̱a̱ nindxaʼwaska: “¡Señor, atani kríñunʼ!”. Jesús niguajtuun ñawúunʼ ga̱jma̱a̱ niʼthúu̱n: “Náa numuu rí nitani̱ a̱jma̱ a̱jkia̱nʼ rá. Lá na̱nguá xtaʼdáá fe ráʼ.”

Jesús ga̱jma̱a̱ Pedro nitsimún náa barca, ga̱jma̱a̱ núkhu niwi̱ji̱i̱ giñán mbiiʼ. Lá natatsaʼwáminaʼ xú káʼnii nikumu̱ún apóstoles ráʼ. Nithi: “Gajkhun rí ikháánʼ ni̱ndxa̱ʼ A̱ʼdióo Dios”.

Raʼkháa indió mbiʼi rúʼko̱ rí Jesús nitsijii giñán mbiiʼ. Imbo̱o̱ mbiʼi índo̱ Jesús ga̱jma̱a̱ apóstoles nagún náa barca náa imbo̱o̱ ridoo lamáa, Jesús niguanúu niʼgu náa ki̱dxu̱ʼ barca. Índo̱ xtáa raʼgu, nigíʼdu̱u̱ nixnúu mbá ruʼwa mbiiʼ. Iyaʼ rí naʼbaxu̱u̱ naxnáminaʼ ga̱jma̱a̱ barca, ga̱jma̱a̱ nigíʼdu̱u̱ nijnííʼ iyaʼ náa barca. Apóstoles nixkajui̱i̱ Jesús: “¡Maestro, makhañúlú! ¡Atambáyuxuʼ!”. Jesús nituxi̱i̱ ga̱jma̱a̱ niʼthúu̱n lamáa: “¡Wíí gáʼni!”. Ikhú giñán mbiiʼ ga̱jma̱a̱ lamáa niwi̱ji̱i̱. Ikhú Jesús niraxu̱u̱n apóstoles: “Lá raguáʼdáá fe ráʼ.” Ga̱jma̱a̱ ikhiin nitimijná: “¡Asndu giñánʼ ga̱jma̱a̱ lamáa nunimbu̱ún kuyáá!”. Apóstoles nijmañún rí gíʼmaa makumún kuyáá káxi̱ Jesús ga̱jma̱a̱ ragíʼmaa mamiñún nditháan.