Jesús ni̱ʼkha̱ náa tsu̱du̱u̱ ku̱ba̱ʼ mu maʼtáraʼa ajngáa rí májánʼ numuu Reino ndrígóo Dios. Ma̱ngaa, Jeobá nixnúu xi̱ʼ kaʼwu mu maʼni milagros ga̱jma̱a̱ masngájma ndiéjunʼ gáʼni ikhaa índo̱ ganindxu̱u̱ rey. Mbá xkri̱da, Jesús ma̱ndoo maʼni thanún xa̱bu̱ tséʼniuu má asndu xú káʼnii má nandii rí guáʼdáá. Asndu náa má ejkha̱, bi̱ guáʼdáá nandii nutháán rí mambáñun, ga̱jma̱a̱ ikhaa naʼni thanún xúgínʼ. Bi̱ tsíkruigu̱u̱n nandoo nuyexi, bi̱ tsédxuun, nudxuun ga̱jma̱a̱ bi̱ tsegun, nagún. Naʼni̱i̱n á mu i̱ndó nurajtuun xtíñuu Jesús. Ma̱ngaa naxkawíin xa̱bu̱ wéñiʼ. Xa̱bu̱ nagún kidxuuʼ asndu náa má ejkha̱, ga̱jma̱a̱ ikhaa nagruiguíin xúgínʼ, maski ajndu nguáná ikhaa nandoo maxtáa mbáwíi.

Mbáa miʼtsú niguwáʼ ku̱ya̱a̱ mbáa xa̱bu̱ bi̱ tséjkha̱ náa guʼwá rí xtáa Jesús. Mú kuwa wéñuʼ xa̱bu̱ rí asndu na̱nguá xóo manújngún, ikha jngó nini mbá iñáʼ náa tsu̱du̱u̱ guʼwá mu ikhí gaguajtaa ku̱ya̱a̱ ga̱jma̱a̱ mu mbaʼyoo Jesús. Ikhú Jesús niʼthúu̱n xa̱bu̱ bi̱ tséjkha̱: “Araxu̱nʼ ga̱jma̱a̱ ayuʼ”. Índo̱ nigíʼdu̱u̱ ni̱jkha̱, xa̱bu̱ niguanún tsiánguá.

Imbo̱o̱ mbiʼi, Jesús inuu maʼga̱nú náa mbá xuajen, índo̱ mbá 10 xa̱bu̱ bi̱ guáʼdáá lepra nindxa̱ʼwa̱ asndu nákha guwáʼ mitsínguánʼ: “¡Jesús, atambáyuxu!”. Ikhú na̱nguá eniñu̱nʼ rí bi̱ guáʼdáá lepra muxuʼmamijná náa xa̱bu̱. Ma̱ngaa náa Xtángoo ndrígóo Jeobá naʼthí rí bi̱ guáʼdáá lepra gíʼmaa magún náa templo nda̱wa̱á rí gaguma thanún. Ikha jngó Jesús niʼthún rí magún ikhí. Índo̱ kuwa ragún náa templo, bi̱ guáʼdáá lepra niguma thanún. I̱ndó mbáa rí ikhiin ndiʼyoo rí niʼni̱i̱, nitanga̱a̱  náa Jesús mu maxnáa núma̱aʼ ga̱jma̱a̱ maʼni mba̱a̱ Dios. Rí mbá 10 bi̱ niguáʼdáá lepra, káaʼ mbáwíi nixnáa núma̱aʼ Jesús.

Nixtáa mbáa a̱ʼgu̱ bi̱ niʼni mbá 12 tsiguʼ rí naʼniuu mbá nandii ga̱jma̱a̱ nindoo maguma thanáá numuu rí nánguá eʼngo̱o̱ itháan. Ikha jngó ni̱jkha̱ náa tapu̱ún xa̱bu̱ mu ma̱ndoo makuʼmaminaʼ náa kidxuuʼ Jesús ga̱jma̱a̱ nigujtun rawunʼ xtíñuu. Núkhu ikhú, niʼni̱i̱. Ikhú Jesús niraxi: “Tsa nixkajmu roʼ.” A̱ʼgu̱ nimíñuu wéñuʼ, mú nikuʼmaminaʼ náa ikhaa ga̱jma̱a̱ niʼthúu̱n. Jesús niʼthúu̱n rí xaxmiéjunʼ ga̱jma̱a̱ niʼthúu̱n: “A̱ʼdióoʼ, ayuʼ tsímáá”.

Mbáa Xa̱bu̱ Ñajunʼ bi̱ nigumbiʼyuu Jairo niʼthá kháñuu Jesús: “Ayi̱ náa goʼwóoʼ, wáxioʼ naʼniuu wéñuʼ nandii”. Mú nákha xóó tséjkha̱nú náa goʼwóo Jairo, dxáʼgú nikháñu. Índo̱ Jesús ni̱jkha̱nú ndiʼyoo rí kúwi̱i̱n rumbiyaʼ mbaʼin xa̱bu̱ gajmiún bi̱ kuwa náa goʼwóo dxáʼgú. Jesús niʼthún: “ Xúmbiyaʼ, i̱ndó naʼgu”. Ikhú nigujtuun ñawúunʼ ada̱ ga̱jma̱a̱ niʼthí: “Dxáʼgú, ¡araxu̱nʼ!”. Núkhu nigixi̱i̱ dxáʼgú, ga̱jma̱a̱ Jesús niʼthúu̱n anu̱u̱ ga̱jma̱a̱ ru̱dúu̱ rí guxnáá rí mikhu. ¡Atatsaʼwáminaʼ xú káʼnii nikumu̱u̱ anu̱u̱ ga̱jma̱a̱ ru̱dúu̱!