Nda̱wa̱á rí Jesús nijngúun iyááʼ nigíʼdu̱u̱ niʼtáraʼa: “Reino ndrígóo Dios xtáa mijngii”. Ikhaa na̱jkha̱ gajmíi̱n xa̱bi̱i̱ náa xúgíʼ Galilea ga̱jma̱a̱ Judea. Índo̱ Jesús nitanga̱a̱ náa xuajñu, Nazaret, ni̱jkha̱ náa sinagoga, nimbáʼtoo rollo ndrígóo Isaías ga̱jma̱a̱ niguxnuu gakhi̱i̱: “Jeobá nixnúʼ xi̱ʼ kaʼwu ndrígóo mu mataráʼa ajngáa rí májánʼ”. Ndiéjunʼ nindoo gáʼthi xá. Xa̱bu̱ nindúún mbuyáá milagros ndrígóo Jesús. Mú ikhaa tagruigú xi̱ʼ kaʼwu mu maʼni i̱ndó rúʼko̱. Rí phú itháan gíʼdoo numuu rí maʼtáraʼa ajngáa rí májánʼ ndrígóo Reino. Nda̱wa̱á kayuʼ niʼthún bi̱ kuwa rudxawíín: “Xúgi̱ embánuu rí nijuiʼtáriyaʼ rígi̱”.

Nda̱wa̱á Jesús ni̱jkha̱ náa lamáa ndrígóo Galilea, náa nininúnʼ a̱jkhu̱u̱n xa̱bu̱ bi̱ nurawíin e̱gi̱ʼ bi̱ nda̱wa̱á niguánu ninindxu̱ún xa̱bi̱i̱ ga̱jma̱a̱ niʼthún: “Aguwaʼ ga̱jma̱á ni̱ndxu̱ʼ ga̱jma̱a̱ mani rí mani̱ndxa̱la xa̱bu̱ bi̱ nurajtuun xa̱bu̱”. Xa̱bu̱ bugi̱ nigumbiʼñún Pedro, Andrés, Santiago ga̱jma̱a̱ Juan. Núkhu niniñaaʼ rurawíin e̱gi̱ʼ ga̱jma̱a̱ nigún gajmiún. Nigún náa xúgíʼ Galilea rutaraʼa ga̱jma̱a̱ numuu Reino ndrígóo Jeobá. Nitaraʼa náa sinagogas, xuáá ga̱jma̱a̱ náa calle. Mbaʼin xa̱bu̱ nagún kidxu̱únʼ asndu náa má egún. Niwáán ga̱jma̱a̱ numuu Jesús náa mbaʼa xuajen, asndu náa Siria, xuajen rí mitsínguánʼ wéñuʼ.

Nda̱wa̱á Jesús nixnúún tsiakii tikhun xa̱bi̱i̱ mu muni thanún bi̱ naʼniún nandii ga̱jma̱a̱ muxkawíin xa̱bu̱ wéñiʼ. Eʼwíínʼ nagún gajmiún mu mutaraʼa náa mámbá xuajen mba̱ʼu̱ ga̱jma̱a̱ náa mámbá xuajen ma̱jkha̱ʼ. Mangiin nagún tikhun gu̱ʼu̱ bi̱ kuwa jmbu bi̱ numbayíí ikhaa mangiin numbañún xa̱bi̱i̱. Náa ikhiin xtáa María Magdalena, Juana, Susana ga̱jma̱a̱ eʼwíínʼ.

Nda̱wa̱á rí Jesús niʼniratiin xa̱bi̱i̱, nikungui̱nʼ mu magún gutaraʼa. Índo̱ kuwa ragún náa Galilea, eʼwíínʼ ninindxu̱ún xa̱bi̱i̱ Jesús ga̱jma̱a̱ nijngún iyááʼ. Nikuwa mbaʼin xa̱bu̱ bi̱ nindúún magún kidxuuʼ Jesús, ikha jngó ikhaa niʼthí rí ni̱ndxu̱ún xóo mbaaʼ dí rígá xawii mu mugimbóó rí nijuiʼdu. Ikhaa niʼthí: “Gutakáñii Jeobá mu makunguinʼ itháan xa̱bu̱ bi̱ mugimbóó rí nijuiʼdu”. Nda̱wa̱á niraʼwíin mbá 70 xa̱bi̱i̱  ga̱jma̱a̱ nikuʼmiin mbá majmi̱i̱n mu magún gutaraʼa náa xúgíʼ Judea. Nuthúún mbá xúgínʼ xa̱bu̱ ga̱jma̱a̱ numuu Reino. Índo̱ naguwáanʼ, ra̱ʼkhá tháán eñún muthán Jesús xú káʼnii nigún. Gixa̱a̱ nda̱a̱ rí niʼngo̱o̱ niʼni mu muniñaʼ rutaraʼa.

Jesús niniñuʼ xawii xúgíʼ mu xa̱bi̱i̱ muni má xúʼko̱ ñajunʼ rígi̱ rí gíʼdoo wéñuʼ numuu índo̱ ikhaa gátanga̱a̱ mekhuíí. Niʼthún: “Gutaraʼa ajngáa rí májánʼ ndrígóo Reino náa xúgíʼ tsu̱du̱u̱ ku̱ba̱ʼ. Gusngún xa̱bu̱ ajngóo Dios ga̱jma̱a̱ guxuʼmíínʼ iyááʼ”.